¿IMA libron astawan gustasunki?... Wakin wawakunamanqa animalkunamanta willaq librokunan gustan, wakinmantaq askha dibujokunayoq librokuna. Chay librokunata leespaqa anchatan kusikunchis ¿riki?

Diosmanta cheqaqllata willaq librokunan aswan allinqa. Ichaqa kanmi chay librokunamanta aswan valorniyoq libro. ¿Ima libron chay kanman? ¿Yachankichu?... Arí, Biblian.

¿Imaraykun Biblia juj librokunamanta aswan importante?... Diospa libron kasqanrayku. Diosmi Bibliata apachimuwaranchis juj cartata jina. Chaypin willawanchis paymanta, jamuq tiempopi allinkuna ruwananmanta, payta kusichinapaq imakuna ruwananchismantawan.

¿Kikin Dioschu Bibliata qelqaruspa runakunaman apachimuran? Manan. Diosqa payta serviq runakunatan kamachiran Bibliata qelqanankupaq. Ichaqa paymi niran ima qelqanankutapas.

¿Imaynatan Dios chayta ruwaran?... Chayta entiendenaykipaq kaypi piensay: Radiopi rimamuq runakunaqa karupin kashanku. Televisionpi rikusqanchis runakunapas wakinqa juj nacionpiraqmi kashanku ¿riki?

Wakin runakunaqa killaman viajaspan chaymantapacha runakunaman mensajekunata apachimunku. ¿Yacharankichu chayta?... ¡Admiranapaqmi chay ruwasqankuqa! Diosri, ¿atinmanchu runakunaman ima mensajetapas apachimuyta?... ¡Riki! Payqa chaytan ruwaran manaraq runakuna radiota, televisionta ruwashaqtinku.

 Diosmi ñaupa tiempopi Moisés runata rimaykamuran. Moisesqa uyariranmi Diospa rimamusqanta ichaqa manan uyanta rikuranchu. Chay kutipin Dios rimarimuqtin jina rayokuna t’ojaran orqokunataq sinchita kuyuriran. Askha runakunan chaypi kasharanku. Chaymi Diospa rimarimusqanta uyarispa sinchita mancharikuranku. Jinan Moisesta niranku: ‘Ama Dios noqaykuwan rimachunchu paqtan wañuykuman’, nispa. Chaymi Moisesqa Diospa tukuy nisqanta Bibliapi qelqaran (Éxodo 20:18-21).

Moisesqa pisqa librokunatan qelqaran, wakin librokunatataq juj runakuna. Llapanpiqa 40 runakuna jinan qelqaranku. Bibliataqa 1.600 watapi jinan qelqayta tukuranku. Chay runakunaqa  ñaupa tiempopiraqmi kausaranku, manataqmi wakinqa reqsinakurankuchu. Chaywanpas juj runallapas qelqanman jinan llapallan allinta tupan. ¡Chayqa ancha admirakunapaqmi!

Bibliata wakin qelqaq runakunaqa allin reqsisqan karanku. Jujninmi karan Moisés. Payqa oveja michiqmi karan, ichaqa qhepamanmi Israel nacionpi kamachikuran. Jujtaqmi karan Salomón. Payqa reymi karan, ancha qhapaq allin yachayniyoq runa. Wakin qelqaqkunan ichaqa común runakunalla karanku. Jujninmi karan Amós, payqa higosta plantaspan llank’aran.

Qelqaqkunamanta jujninmi karan doctor. ¿Yachankichu sutinta?... Sutinqa Lucasmi. Juj qelqaqpa sutinmi karan Mateo, payqa impuestokuna cobraqmi karan. Kallarantaqmi religionpi leykunata allinta yachaq runapas. Payqa askha librokunatan qelqaran. ¿Yachankichu sutinta?... Sutinqa Pablon. Wakin librokunatan Pedrowan Juanwan qelqaranku. Paykunaqa challwaqkunan karanku manaraq Jesuspa apostolnin kashaspa.

Yaqa llapankun qelqaranku imakunatan Dios jamuq tiempopi ruwanqa chayta. ¿Imaynapin chaykunata yacharanku?... Diosmi paykunaman willaran imakuna pasananta.

Jesús kay allpapi tiyashaqtinqa askha librokunañan qelqasqa kasharan. Ichaqa manaraq kay allpaman jamushaspan janaq pachapi tiyaran. Chaymi payqa rikuran papanpa tukuy ruwasqanta. ¿Diospa cartanta jinachu Jesús Bibliata rikuran?... Arí.

Chaymi Bibliamantapuni runakunaman yachachiq, mayninpitaq Bibliaq nisqanta umallanmanta willaq. Jinaspapas Diosmanta mana yachasqankutan yachachiq. Juj kutinmi niran: ‘Imakunatachus Diosmanta uyarisqaytan kay pachapiqa rimani’, nispa (Juan 8:26). Payqa imaymanatan papanmanta yacharan.  ¿Ima libropin yachasunman Jesuspa tukuy yachachisqanmanta?... Arí, Bibliapin. Chaymi Bibliata leenanchis.

Bibliata qelqaq runakunaqa rimasqanku simipin qelqaranku. Wakinmi qelqaran hebreo simipi, wakinqa griego simipi, wakintaq arameo simipi. Ichaqa manan llapa llaqtakunapichu chay simikunata rimanku, chaymi juj simikunaman t’ijrakuran. Kunanqa 2.800 más simikunapin kashan. ¿Imaraykun askha simikunaman t’ijrakun? Llapa runakuna Diospa mensajenta yachananpaqmi. Askha simikunapiña kashan chaypas, llapallanmi Diospa mensajenta willashan.

Bibliaqa antiguo libron, ichaqa importante yachachikuykunatan willawanchis. Willashanmi kay tiempopi imaymana  sucedesqanta, jamuq tiempopi Dios imakuna ruwanantawan. Chay willakuykunaqa ancha kusikunapaqmi, sumaq kausayta suyakunapaq ima.

Diosmi Bibliapi willawanchis imayna kausananchista. Willanmi ima ruwaykunan allin, ima ruwaykunataqmi mana allinchu chayta. Chaymantapas willashanmi mana allinkunata ruwaq runakunamanta, imaynapi tarikusqankumantapas. Chaytapas yachananchismi mana paykuna jina kanapaq. Jinaspapas willanmi allin kaqta ruwaq runakunamanta, bendicionkuna chaskisqankumantapas. Chaykunatan Dios qelqachiran allinninchispaq.

¿Pin Bibliata qowaranchis? ¿Yuyashankichu?... Arí, Diosmi qowaranchis. Chaymi Bibliapi tukuy yachachikuypas yanapawasun allinta kausananchispaq. Ichaqa, ¿imatan ruwananchis allin yachaywan imatapas ruwananchispaq?... Diostan uyarinanchis, kamachiwasqanchisman jinataqmi imatapas ruwananchis.

Sichus munakusqanchis runa cartata apachimuwasunman chayri, ¿imatan chay cartawan ruwasunman? Kaq raton iskay-kinsa kutitaraq leerusunman ¿riki? Bibliapas Diospa cartan jinan. Payqa anchata munakuwasqanchisraykun Bibliata ruwachiran, chaymi tiempota t’aqananchis leenanchispaq.