TENE na mbi, mbeti wa mo ye tënë ni mingi?— Ambeni molenge ayeke fa mbeti so asala tënë na ndo ti anyama. Ambeni ayeke fa mbeni mbeti so gbâ ti afoto ayeke na yâ ni. A nzere mingi ti diko ambeti so.

Me ambeti so ayeke nzoni ahon ambeti kue ti sese so ayeke ala so afa na e tâ tënë na ndo Nzapa. Mbeni oko ti ambeti so ayeke tâ nzoni mingi ahon atanga ni kue. A yeke mbeti wa?— Bible.

Ngbanga ti nyen Bible ayeke tâ kota ye mingi tongaso?— Ngbanga ti so a londo na Nzapa. A fa na e ye na ndo lo nga na ndo anzoni ye so lo yeke sala ande ndali ti e. A fa nga na e ye so a lingbi e sala ti nzere na lê ti lo. A yeke tongana mbeni lettre so alondo na Nzapa.

Nzapa alingbi lani ti sala Bible kue na yayu kâ na ti mû ni na azo. Me lo sala tongaso pëpe. Atâa so atënë ti yâ ni alondo na Nzapa, lo sala kusala na azo ti lo na sese ge ti sala Bible.

Nzapa asala ye so tongana nyen?— Ti hinga ni, bâ ye so ge. Tongana e mä go ti mbeni zo na yâ ti radio, a yeke peut-être go ti mbeni zo so ayo mingi na e. Tongana e bâ télévizion, e lingbi même ti bâ azo ti ambeni kodoro nde, na e lingbi ti mä tënë so ala yeke tene.

Na lege ti a-avion, azo alingbi ti gue kâ na lê ti nze, na ala lingbi ti sala tënë na azo ge na sese. Mo hinga ni?— Tongana azo alingbi ti sala ye tongaso, Nzapa alingbi ti ngbâ na yayu kâ na ti  sala tënë na azo ge pëpe?— Lo lingbi biani! A yeke ye so Nzapa asala giriri kozoni si zo asigigi na radio wala télévizion.

Moïse ayeke ândö mbeni koli so amä biani Nzapa na salango tënë. Moïse abâ lani Nzapa pëpe, me lo mä go ti lo. Azo kutu mingi ayeke lani dä tongana ye so asi. Na lâ ni kâ, Nzapa asala si hoto ni kue ayengi, nga bekpa na wâ ti bekpa asungba. Azo ahinga so Nzapa si ayeke sala tënë, me mbito ahon ndo ti ala. Tongaso ala tene na Moïse: “Zia Nzapa asala tënë na e pëpe wala fade e kui.” Na pekoni, Moïse azia na mbeti aye so Nzapa atene. E yeke wara atënë so na yâ Bible.​—Exode 20:18-21.

 Moïse asala akozo mbeti oku ti Bible. Me a yeke lani gi lo oko si asala Bible pëpe. Nzapa asala kusala na akoli ndulu na 40 ti sala ambeni mbage ti Bible ni. Akoli so ayeke lani na fini a sala angu mingi mingi. Na a mû angu mingi ti hunzi ti sala Bible kue, angu ndulu na 1 600. Ye ti dongo bê ni ayeke so, atâa so ambeni koli ni so ahinga tele lâ oko pëpe, tënë kue so ala zia dä ague tâ oko.

Ambeni koli so Nzapa amû ala ti sala Bible, azo ahinga ala mingi. Na tapande, Moïse ayeke ândö mbeni zo ti batango nyama. Me na pekoni lo ga mokonzi ti mara ti Israël. Salomon ayeke lani mbeni gbia so ahinga ye mingi nga so ayeke na mosoro mingi ahon tanga ti azo kue na ndo ti sese. Me ti ambeni, azo ahinga ala mingi pëpe. Na tapande, Amos ayeke bâ ti lo lani lege ti akeke ti figue.

Mbeni koli so asala nga Bible lani ayeke mbeni docteur. Mo hinga iri ti lo?— A yeke Luc. Mbeni nga ayeke zo ti rongo nginza ti lampo. Iri ti lo ayeke Matthieu. Me mbeni nde ayeke ti lo zo ti ndia, lo hinga ndia ti vorongo ti aJuif nzoni mingi. Lo sala abuku mingi ti Bible ahon tanga ti azo kue. Iri ti lo ayeke nyen?— A yeke Paul. Adisciple ti Jésus, Pierre na Jean, asala nga Bible. Ala yeke ti ala lani azo ti gingo susu.

Mingi ti akoli so azia na mbeti aye so Nzapa aga lani ndulu ti sala. Tongana nyen ala hinga aye so kozoni si a si?— Nzapa la si afa ni na ala. Lo fa na ala ye so ayeke si.

Kozoni si Jésus, Kota Wafango ye, aga na ndo ti sese, a sala kota mbage ti Bible awe. Me, dabe mo so Kota Wafango ye ayeke ândö na yayu kâ. Lo hinga ye so Nzapa asala. Lo yeda so Bible alondo na Nzapa?— Biani, lo yeda na ni.

Tongana Jésus afa na azo aye so Nzapa asala, lo diko ni na yâ ti Bible. Na ambeni ngoi, lo fa na ala ye so atene mbilimbili na yâ Bible, sân ti tene lo diko ni dikongo. Jésus afa nga na e afini ye mingi  na ndo Nzapa. Lo tene: ‘Tënë so Mbi mä na yanga ti Lo, ni la Mbi yeke fa na azo ti sese so.’ (Jean 8:26). Teti so lo duti na tele ti Nzapa, Jésus amä aye mingi na mbage ti lo. Na ndo wa e lingbi ti diko aye so Jésus atene so?— Na yâ ti Bible. A zia atënë so kue na mbeti si e diko ni.

Biani, tongana Nzapa amû lani azo ti sala Bible, ala sala ni na yanga so ala yeke tene ka ni lakue. Ni la, a sala kota mbage ti Bible na yanga ti Hébreu, ambeni na yanga ti Araméen, nga ambeni na yanga ti Grec. Teti so mingi ti azo laso ahinga ayanga ti kodoro so pëpe, a sala si Bible ni ayeke na ambeni yanga nde. Laso, a wara Bible na ayanga ahon 2 260. So tâ kota wungo! Bible ayeke lettre so Nzapa atokua na azo na ndo kue. Me, atâa a sala ni na ayanga ti kodoro mingi tongana nyen, tënë ni ayeke gi ti Nzapa.

 Ye so Bible atene ayeke kota ye teti e. A sala ni ahon angu mingi awe. Me atâa so kue, a sala tënë ti aye so ayeke si laso. A fa nga na e ye so Nzapa aga ndulu ti sala. Atënë ni amû ngia na bê mingi! A mû nga na e mbeni pendere beku.

Bible afa nga na e tongana nyen Nzapa aye si e sala ye na yâ fini ti e. A fa na e ye so ayeke nzoni na ye so ayeke sioni. A lingbi mbi na mo e hinga aye so. A sala tënë ti azo so asala aye ti sioni nga na aye so asi na ala, si e lingbi ti kpe asioni so ala wara na pekoni. A sala nga tënë ti azo so asala aye ti nzoni, nga na anzoni ye so ala wara na pekoni. A zia aye so kue na mbeti ndali ti nzoni ti e.

Me ti wara ye ti nzoni mingi na lege ti Bible, a lingbi e hinga kiringo tënë na mbeni hundango ndo. Hundango ndo ni ayeke so: Zo wa amû Bible na e? Mo tene ti mo nyen?— Tâ tënë, Bible kue alondo na Nzapa. Tongaso, tongana nyen e lingbi ti fa so e yeke biani na ndara?— Na mango Nzapa nga na salango ye so lo fa.

Ni la, a lingbi e mû ngoi ti diko Bible legeoko. Tongana e wara lettre ti mbeni zo so e ye lo ahon ndo ni, e yeke diko ni lege mingi, teti a yeke kota ye na lê ti e. Bâ, a lingbi Bible aduti tongaso teti e, ngbanga ti so a yeke mbeni lettre ti Zo so aye tënë ti e mingi. A yeke lettre ti mbeni Nzapa ti ndoye.