ASEWUNGICOCELE, nguyiphi incwadzi loyitsandza kutendlula tonkhe?— Labanye bantfwana batsandza incwadzi lekhuluma ngetilwane. Kantsi labanye batsandza lenetitfombe letinyenti. Kumnandzi kufundza tincwadzi letinjalo.

Kodvwa tincwadzi letikahle kakhulu emhlabeni wonkhe, nguleto letisitjela liciniso ngaNkulunkulu. Lenye yaletincwadzi iligugu kakhulu kutendlula tonkhe. Uyati kutsi nguyiphi?— LiBhayibheli.

Yini leyenta liBhayibheli libaluleke kangaka?— Kungobe livela kuNkulunkulu. Lisitjela ngaye, kanye nangetintfo letinhle latosentela tona. Lisikhombisa naloko lokufanele sikwente kute simjabulise. Lifanana nencwadzi levela kuNkulunkulu.

Nkulunkulu abengatibhalela liBhayibheli ezulwini, bese ulinika bantfu. Kodvwa akazange akwente loko. Nanobe loko lokubhalwe kulo kuvela kuye, wasebentisa bantfu bakhe labasemhlabeni kutsi kube ngibo lababhala lokunyenti lokuseBhayibhelini.

Wakwenta njani loko Nkulunkulu?— Kute ukuve kahle loku, cabanga nganaku. Nasiva livi lemuntfu emsakatweni, kungenteka kutsi lelivi livela kumuntfu lokhashane kakhulu. Nasibukela i-TV, sibona titfombe tebantfu labakulamanye emave, futsi sikuve loko labakushoko.

Bantfu bangaya ngisho nasenyangeni bahamba ngemishini lendizela emkhatsini, nabefika lapho bangatfumela imilayeto emhlabeni. Bewukwati yini loko?— Nangabe bantfu bangakwenta loko, Nkulunkulu angayitfumela yini imilayeto emhlabeni asezulwini?— Angayitfumela. Loko wakwenta kadzeni, bantfu basete imisakato nobe ema-TV.

 Mosi wamuva Nkulunkulu nakakhuluma. Akazange ambone, kodvwa waliva livi laKhe. Bantfu labanyenti bebakhona nakwenteka loko. Ecinisweni, ngalelolanga Nkulunkulu wenta intsaba yanyakata, kwadvuma litulu kwaphindze kwamanyata. Bantfu bebati kutsi Nkulunkulu bekakhulumile, kodvwa befikelwa kwesaba lokukhulu. Ngako batsi kuMosi: ‘Sicela kutsi Nkulunkulu angakhulumi natsi, ngobe sesaba kutsi sitakufa.’ Ngekuhamba kwesikhatsi, Mosi wabhala tintfo Nkulunkulu labetikhulumile. Letintfo Mosi latibhala tiseBhayibhelini.​—Eksodusi 20:18-21.

Mosi wabhala tincwadzi tekucala teliBhayibheli letisihlanu. Kodvwa akusuye kuphela lowabhala liBhayibheli. Nkulunkulu wasebentisa  emadvodza langaba ngu-40 kutsi abhale tincenye teliBhayibheli. Lamadvodza aphila eminyakeni leminyenti leyendlulile, futsi kwatsatsa sikhatsi lesidze kutsi liBhayibheli liphele. Ecinisweni, kwatsatsa iminyaka lengaba ngu-1 600. Lokumangalisako kutsi ngisho nobe lamadvodza bekangatani, konkhe lakubhala kuyavumelana.

Lamanye emadvodza lasetjentiswa nguNkulunkulu kuze abhale liBhayibheli, bekatiwa kakhulu. Nanobe Mosi bekake waba ngumelusi, waphindze wahola nesive saka-Israyeli. Solomoni bekayinkhosi lehlakaniphe kakhulu futsi bekanjinge kunabo bonkhe bantfu emhlabeni. Kodvwa labanye bantfu lababhala liBhayibheli bebangatiwa kakhulu. Amosi bekanakekela tihlahla temkhiwa.

Lomunye umuntfu lowabhala liBhayibheli bekangudokotela. Bekungubani ligama lakhe?— BekunguLukha. Lomunye umuntfu lowabhala liBhayibheli bekangumtselisi. Ligama lakhe bekunguMatewu. Kantsi lomunye bekangummeli, futsi ati nemtsetfo wenkholo yemaJuda. Wabhala tincwadzi letinyenti teliBhayibheli kubendlula bonkhe laba labanye. Ngubani ligama lakhe?— NguPawula. Nebafundzi baJesu boPhetro naJohane, nabo lababhala liBhayibheli, bebabadwebi betinhlanti.

Linyenti lalabantfu lababhala liBhayibheli babhala ngetintfo Nkulunkulu bekatatenta esikhatsini lesitako. Bebatati njani letintfo njengobe betisengakenteki?— NguNkulunkulu lowabatjela tona. Wabatjela nekutsi bekutakwentekani.

Ngesikhatsi Jesu, uMfundzisi Lomuhle Kakhulu sekalapha emhlabeni, besekubhalwe tincwadzi letinyenti teliBhayibheli. Khumbula kutsi uMfundzisi Lomuhle Kakhulu bekasezulwini. Bekatati tintfo Nkulunkulu latentile. Bekakholelwa yini kutsi liBhayibheli livela kuNkulunkulu?— Bekakholelwa.

Ngesikhatsi Jesu akhuluma nebantfu ngemisebenti yaNkulunkulu, bekafundza eBhayibhelini. Ngaletinye tikhatsi bekabatjela tintfo angafundzi kulo ngalokucondzile. Jesu waphindze wasitjela tintfo letinyenti letivela kuNkulunkulu. Watsi: “Loko lengakuva kuye ngiko  lengikukhuluma kulomhlaba.” (Johane 8:26) Jesu weva tintfo letinyenti kuNkulunkulu ngobe bekake waphila naye. Singatifundza kuphi letintfo Jesu latisho?— EBhayibhelini. Tonkhe tibhalwe kulo kute sitifundze.

Kuliciniso kutsi ngesikhatsi Nkulunkulu asebentisa lamadvodza labhala liBhayibheli, alibhala ngelulwimi labekalikhuluma malanga onkhe. Ngako letinyenti tincwadzi teliBhayibheli tabhalwa ngesiHebheru, letinye ngesi-Aramu, bese kutsi letinye tato tabhalwa ngesiGriki. Njengobe bantfu labanyenti lamuhla bangakhoni kufundza tintfo letibhalwe ngaletilwimi, liBhayibheli selihunyushelwe nakuletinye tilwimi. Lamuhla, tincenye teliBhayibheli tingafundvwa ngetilwimi letingetulu kwa-2 260. Asewucabange nje ngaloko! LiBhayibheli liyincwadzi levela kuNkulunkulu leya kubantfu labasemhlabeni wonkhe. Ngisho nobe selihunyushwe  ngetilwimi letinyenti kangakanani, umlayeto walo uvela kuNkulunkulu.

Loko liBhayibheli lelikushoko kubalulekile kitsi. Labhalwa kadzeni. Kodvwa lisitjela ngetintfo letentekako lamuhla. Lisitjela loko Nkulunkulu latakwenta madvutane esikhatsini lesitako. Loko lelikushoko kujabulisa kakhulu! Kusinika litsemba lelimangalisako.

LiBhayibheli liphindze lisitjele kutsi Nkulunkulu ufuna siphile njani. Lisitjela kutsi ngukuphi lokuhle nalokubi. Mine nawe, kufanele sikwati loko. Likhuluma ngebantfu labenta tintfo letimbi nekutsi kwentekani kubo, kuze natsi singangeni enkingeni labangena kuyo. Liphindze lisitjele ngebantfu labenta lokuhle, kanye nemiphumela lemihle labayitfola. Konkhe loku kwabhalwa kuze kusite tsine.

Kuze sitfole lokunyenti eBhayibhelini, kudzingeka sati imphendvulo yembuto lotsite. Lombuto utsi: Ngubani lowasinika liBhayibheli? Wena ucabanga kutsi ngubani?— NguNkulunkulu lowasinika liBhayibheli. Ngako-ke, singakhombisa njani kutsi sihlakaniphe sibili?— Ngekutsi silalele Nkulunkulu siphindze sente loko lasitjela kona.

Ngako kudzingeka sitinike sikhatsi sekufundza liBhayibheli ndzawonye. Nasitfola incwadzi levela kumuntfu lesimtsandza kakhulu, siyifundza tikhatsi letinyenti. Isuke iligugu kitsi. NeliBhayibheli kufanele libe njalo, ngobe liyincwadzi levela kuMuntfu lositsandza kakhulu. Liyincwadzi levela kuNkulunkulu lonelutsandvo.