FAI mai aka, se a te tusi e fiafia malosi koe ki ei?— E filifili aka ne nisi tama‵liki se tusi e uiga ki manu. A ko nisi tama‵liki e filifili ne latou se tusi telā e uke a ata i ei. E mafai eiloa o gali a te faitau ki tusi konā.

Kae ko toe tusi ‵gali i tusi katoa i te lalolagi ko tusi kolā e fakaasi mai i ei a te munatonu e uiga ki te Atua. E tasi te tusi mai i tusi konā e sili fakafia atu tena tāua. E iloa ne koe me se a te tusi tenā?— Ko te Tusi Tapu.

Kaia e tāua katoa ei a te Tusi Tapu?— Me se tusi mai te Atua. E fakaasi mai i ei ki a tatou a mea uiga ki a ia mo mea ‵lei kolā ka fai ne ia mō tatou. Kae e fakaasi mai foki ne ia a mea e ‵tau o fai ne tatou ke fakafiafia atu ki a ia. E fai eiloa e pelā me se tusi mai te Atua.

Ia, ne mafai eiloa o tusi ne te Atua a te Tusi Tapu kātoa i te lagi, ko tuku mai ei ne ia ki tino. Kae ne seki fai ne ia penā. E tiga eiloa ne māfua mai a manatu i ei mai i te Atua, ne fakaaoga ne ia ana tavini i te lalolagi ke fai ne latou a te lasiga o tusitusiga i te Tusi Tapu.

Ne fai pefea ne te Atua a te mea tenā?— Ke malamalama tatou i te auala ne fakaaoga ne ia, mafaufau ki te mea tenei. Kafai e lagona ne tatou se leo o se tino i te letiō, e mafai o vau a te leo tenā mai i se tino telā e nofo ‵mao atu. Kafai e onoono tatou ki te televise, e mafai foki o lavea ne tatou a ata o tino i nisi fenua i te lalolagi, kae e mafai foki o lagona ne tatou olotou pati.

Ke oko foki ki tāgata, ko mafai o olo atu ki te masina i olotou lōketi, kae e mafai o lafo mai olotou fekau ki te lalolagi mai i konā. E mata, ne iloa ne koe te mea tenā?— Kafai e mafai ne tāgata o fai a te mea tenā, e mata, e mafai o lafo mai ne te Atua a fekau mai te lagi?— E mautinoa  eiloa me e mafai ne ia! Kae ne fai ne ia te mea tenā a koi tuai eiloa o maua ne tāgata a letiō io me ko televise.

A Mose se tagata telā ne lagona tonu eiloa ne ia a te Atua e faipati. Ne seki mafai o lavea ne Mose te Atua, kae ne mafai o lagona ne ia a te leo o te Atua. Ne ‵nofo atu eiloa a te fia miliona o tino i konā i te taimi ne tupu ei te mea tenei. A te ‵tonuga loa, ne fai ne te Atua i te aso tenā ke galulu te mauga kātoa, kae ne ‵pa mai a fa‵tili kae ‵lapa a uila. Ne iloa ne tino me ne faipati mai te Atua, kae ne ma‵taku valevale latou. Tela la, ne fai atu latou ki a Mose: “Matou nei ko ma‵taku i te mea ma faipati mai te Atua ki a matou, ko ‵mate ei matou.” Fakamuli ifo, ne tusi ki lalo ne Mose a mea kolā ne fai atu ne te Atua. Kae ko mea ne tusi ne Mose e maua i te Tusi Tapu.—Esoto 20:18-21.

 Ne tusi ne Mose a tusi muamua e lima i te Tusi Tapu. Kae e se ko ia fua tokotasi ne tusi ne ia te Tusi Tapu. Ne fakaaoga ne te Atua a tāgata e toko 40 ke tusi ne latou a nisi vaega o te Tusi Tapu. Ne ola a tāgata konei i te fia o tausaga ko ‵teka atu, kae ne palele foki te tusiga o te Tusi Tapu i se taimi leva ‵ki. E tonu, e ‵tusa mo te 1,600 tausaga! A te mea fakaofoofogia, me e tiga eiloa e seki fetaui a nisi tāgata konei, e fetaui ‵lei a mea katoa ne tusi ne latou.

Ne lauiloa a nisi tāgata kolā ne fakaaoga ne te Atua ke tusi te Tusi Tapu. E tiga eiloa ne fai a Mose mo fai se tausi mamoe, ne fai a ia mo takitaki o te fenua o Isalaelu. A Solomona se tupu telā ne fai mo fai te ‵toe tagata poto kae maumea i te lalolagi. Kae ko nisi tino tusitala ne seki lauiloa malosi. Ne fai a Amosa mo fai se tino tausi mati.

E se gata i ei, a te tino tusitala e tokotasi o te Tusi Tapu se tokitā. E iloa ne koe tena igoa?— Ko Luka. A te suā tino tusitala se tino ao lafoga. Tena igoa ko Mataio. Kae ko te suā tino se lōia, se tino poto i tulafono fakalotu a te kau Iutaia. Ne tusi ne ia a tusi e uke atu i te Tusi Tapu i lō so se isi tino. E iloa ne koe tena igoa?— Ko Paulo. Kae ko soko o Iesu, ko Petelu mo Ioane, tino tusitala foki o te Tusi Tapu, ne tino faiika.

E tokouke a tino tusitala o te Tusi Tapu ne tusi mai ne latou a mea ka fai ne te Atua i aso mai mua. Ne iloa pefea ne latou a mea konā a koi tuai o ‵tupu?— Ne tuku atu ne te Atua a fakamatalaga ki tāgata konā. Ne fakailoa atu ne ia ki a latou a mea ka ‵tupu.

I te taimi ne nofo mai ei a Iesu, te Faiakoga Sili, i te lalolagi, ko oti eiloa ne tusi a te ukega o tusi i te Tusi Tapu. Masaua la, me ne nofo atu a te Faiakoga Sili i te lagi. Ne iloa ne ia a mea ko oti ne fai ne te Atua. E mata, ne talitonu a ia me i te Tusi Tapu se tusi mai te Atua?— Ao, ne talitonu eiloa a ia ki ei.

I te taimi ne faipati atu ei a Iesu ki tino e uiga ki galuega a te Atua, ne faitau atu a ia mai te Tusi Tapu. I nisi taimi, ne siki atu ne ia a pati e masaua ne ia mai i ei. Ne tuku mai foki ne Iesu a fakamatalaga e uke atu mai te Atua. Ne fai mai a Iesu: “Ko mea eiloa kolā ne lagona ne au mai  i a ia e faipati ne au i te lalolagi.” (Ioane 8:26) Ne lagona ne Iesu a mea e uke mai te Atua ona ko te mea ne ‵nofo fakatasi a ia mo te Atua. Kae tefea te koga e mafai o fai‵tau tatou ki mea kolā ne fai mai ne Iesu?— I te Tusi Tapu. Ne tusi a mea katoa ki lalo ko te mea ke fai‵tau tatou ki ei.

E tonu, i te taimi ne fakaaoga ne te Atua a tāgata ke tusi ne latou, ne tusi ne latou i te ‵gana telā ne fakaaoga eiloa ne latou i aso katoa. Tela la, a te lasiga o te Tusi Tapu ne tusi i te ‵gana Epelu, nisi vaega i te ‵gana Alamaika, kae uke atu foki ne tusi i te ‵gana Eleni. Ona ko te mea e se iloa ne te tokoukega o tino i aso nei o fai‵tau i ‵gana konā, ko oti eiloa ne ‵fuli a te Tusi Tapu ki nisi ‵gana. I aso nei, e mafai eiloa o fai‵tau ki nisi vaega o te Tusi Tapu i ‵gana e silia atu i te 2,260. Mafaufau la ki te mea tenā! A te Tusi Tapu se tusi a te Atua ki tino i koga katoa. Kae faitalia te uke o taimi ne fai ei a ‵kopi, a te fekau i ei ne aumai eiloa mai te Atua.

 E tāua eiloa a muna i te Tusi Tapu ki a tatou. Ko leva ‵ki eiloa te taimi ne tusi i ei. Kae e taku mai eiloa i ei a mea kolā e ‵tupu i aso nei. Kae e fai mai foki i ei a mea kolā ka fai ne te Atua i aso ‵pili mai mua nei. Ko oko eiloa i te ‵gali o mea kolā e fai mai i ei! E tuku mai i ei se fakamoemoega gali mō tatou.

E fakaasi mai i te Tusi Tapu a te auala e manako te Atua ke ola ei tatou. E fai mai i ei a te mea ‵lei mo te mea masei. E ‵tau o iloa ne koe a te mea tenei, kae e penā foki au. E fai mai i ei e uiga ki tino kolā ne fai ne latou a mea ma‵sei mo mea ne ‵tupu ki a latou, ko te mea ke mafai o ‵kalo keatea tatou mai i fakalavelave ne fe‵paki mo latou. E fai mai foki i ei e uiga ki tino kolā ne fai ne latou a mea ‵lei mo ikuga ‵lei ne oko atu ki a latou. Ne tusi a mea katoa ki lalo mō te ‵lei o tatou.

Kae ke maua a toe mea aoga mai i te Tusi Tapu, e ‵tau o iloa ne tatou a te tali ki se fesili. A te fesili tenei: Ko oi ne tuku mai ne ia te Tusi Tapu? Se a tau faka‵tau?— Ao, a te Tusi Tapu kātoa ne aumai mai te Atua. E mafai la pefea o fakaasi atu ne tatou me e ‵poto eiloa tatou?— Mai i te fakalogologo ki te Atua mo te faiga o mea kolā e fakatonu mai ne ia.

Tela la, e ‵tau o fakaavanoa a taimi ke fai‵tau fakatasi tatou ki te Tusi Tapu. Kafai e maua ne tatou se tusi mai i se tino telā e a‵lofa malosi tatou ki ei, e fai‵tau faeloa tatou ki ei. E tāua eiloa ki a tatou. Tenā eiloa te kilokiloga e ‵tau o maua ne tatou ki te Tusi Tapu me se tusi mai i te Tino telā e alofa malosi mai ki a tatou. Se tusi mai i se Atua alofa.