باب نمبر ۲
خدا کی طرف سے ایک خط
آپ کو کون سی کتاب سب سے زیادہ پسند ہے؟ ...... کئی بچوں کو ایسی کتابیں اچھی لگتی ہیں جو جانوروں کے بارے میں ہیں۔ اور کئی بچوں کو ایسی کتابیں اچھی لگتی ہیں جن میں بہت سی تصویریں ہیں۔ ایسی کتابیں پڑھنے میں بڑا مزہ آتا ہے۔
لیکن سب سے اچھی کتابیں وہ ہیں جو خدا کے بارے میں سچائی سکھاتی ہیں۔ اِن کتابوں میں سے ایک سب سے اہم ہے۔ کیا آپ مجھے بتا سکتے ہیں کہ اُس کتاب کا نام کیا ہے؟ ...... اُس کتاب کا نام بائبل ہے۔
آپ کے خیال میں بائبل اِتنی اہم کیوں ہے؟ ...... بائبل خدا کی طرف سے ہے۔ اِس لئے یہ سب سے اہم کتاب ہے۔ بائبل ہمیں خدا کے بارے میں بتاتی ہے۔ اِس میں بتایا گیا ہے کہ خدا ہمارے لئے کیا کچھ کرے گا۔ بائبل میں یہ بھی بتایا گیا ہے کہ ہم خدا کو کیسے خوش کر سکتے ہیں۔ بائبل خدا کی طرف سے ایک خط ہے۔
خدا بائبل کو آسمان پر لکھ سکتا تھا۔ لیکن اُس نے ایسا نہیں کِیا۔ اُس نے بائبل کو کچھ آدمیوں سے لکھوایا۔ اِن آدمیوں نے خدا کے خیال لکھے۔
لیکن خدا تو آسمان پر ہے۔ تو پھر اُس نے انسانوں سے بائبل کیسے لکھوائی؟ آپ کا کیا خیال ہے؟ ...... مَیں آپ کو کچھ مثالیں دیتا ہوں تاکہ آپ اِس بات کو سمجھ سکیں۔ ہم ریڈیو پر ایسے لوگوں کی آواز سُن سکتے ہیں جو کسی اَور جگہ پر ہوتے ہیں۔ اور ٹیوی پر ہم ایسے لوگوں کو دیکھ سکتے ہیں جو کسی اَور ملک میں رہتے ہیں۔
انسان راکٹ میں بیٹھ کر چاند پر جاتے ہیں۔ وہ وہاں سے زمین پر رہنے والے لوگوں کو پیغام بھیج سکتے ہیں۔ کیا آپ کو یہ پتہ تھا؟ ...... اگر انسان چاند سے پیغام بھیج سکتے ہیں تو کیا خدا آسمان سے انسانوں کے لئے پیغام نہیں بھیج سکتا؟ آپ کا کیا خیال ہے؟ ...... وہ ضرور ایسا کر سکتا ہے۔ اُس نے آج سے ہزاروں سال پہلے کئی آدمیوں کو پیغام دئے۔
ہم کیسے جانتے ہیں کہ خدا آسمان سے ہمیں پیغام بھیج سکتا ہے؟
اِن آدمیوں میں سے ایک خدا کے نبی موسیٰ تھے۔ وہ خدا کو دیکھ تو نہیں سکتے تھے لیکن وہ خدا کی آواز سُن سکتے تھے۔ ایک بار موسیٰ کے ساتھ لاکھوں لوگ ایک پہاڑ کے سامنے کھڑے تھے۔ جب خدا بولنے لگا تو پہاڑ ہلنے لگا، بادل گرجنے لگے اور بجلی چمکنے لگی۔ اِس سے لوگوں کو پتہ چلا کہ خدا بول رہا ہے۔ لوگ بہت ڈر گئے۔ اُنہوں نے موسیٰ سے کہا: ”خدا ہم سے باتیں نہ کرے، ایسا نہ ہو کہ ہم مر جائیں۔“ بعد میں موسیٰ نے وہ سب باتیں لکھیں جو خدا نے اُن سے کہی تھیں۔ اور یہ باتیں بائبل میں لکھی ہیں۔—خروج ۲۰:۱۸-۲۱۔
بائبل میں بہت سی چھوٹیچھوٹی کتابیں ہیں۔ موسیٰ نے بائبل کی پہلی پانچ کتابیں لکھی تھیں۔ خدا نے بائبل کو ۴۰ آدمیوں سے لکھوایا۔ یہ آدمی آج سے بہت سال پہلے زمین پر رہتے تھے۔ بائبل کو لکھنے میں تقریباً ۱۶۰۰ سال لگے۔ بائبل کو لکھنے والے کچھ آدمی ایک دوسرے کو جانتے بھی نہیں تھے۔ لیکن پھر بھی اُن میں سے کسی نے کوئی ایسی بات نہیں لکھی جو بائبل کے دوسرے لکھنے والوں کی بات کے خلاف تھی۔
اِن آدمیوں نے بائبل کی کچھ کتابیں لکھیں۔ اِن کے نام کیا ہیں؟
بائبل کو لکھنے والے کئی آدمی بڑے مشہور تھے۔ مثال کے طور پر موسیٰ پہلے تو بھیڑیں پالتے تھے لیکن بعد میں وہ اسرائیلی قوم کے رہنما بنے۔ سلیمان ایک بہت بڑے بادشاہ تھے۔ وہ اپنے زمانے کے سب سے عقلمند اور امیر آدمی تھے۔ لیکن بائبل کو لکھنے والے کچھ آدمی اِتنے مشہور نہیں تھے۔ مثال کے طور پر خدا کے نبی عاموس ایک مالی تھے۔
بائبل کو لکھنے والوں میں سے ایک آدمی ڈاکٹر تھے۔ کیا آپ اُن کا نام جانتے ہیں؟ ...... اُن کا نام لوقا تھا۔ ایک اَور آدمی محصول لینے والے تھے۔ اِس کا مطلب ہے کہ وہ لوگوں سے ٹیکس لیتے تھے۔ اُن کا نام متی تھا۔ بائبل کو لکھنے والے ایک آدمی وکیل تھے۔ وہ یہودی قوم کے مذہبی قانون کو اچھی طرح سے جانتے تھے۔ اُنہوں نے بائبل میں سب سے زیادہ کتابیں لکھیں۔ کیا آپ کو اُن کا نام پتہ ہے؟ ...... اُن کا نام پولس تھا۔ یسوع مسیح کے شاگردوں پطرس اور یوحنا نے بھی بائبل کی کچھ کتابیں لکھیں۔ وہ دونوں مچھلیاں پکڑتے تھے اور اِن کو بیچتے تھے۔
بائبل کو لکھنے والے بہت سے آدمیوں نے ایسی باتیں لکھیں جو آنے والے زمانے میں ہونی تھیں۔ آپ کے خیال میں اِن آدمیوں کو کیسے پتہ تھا کہ آئندہ کیا ہونے والا ہے؟ ...... اُن کو خدا نے بتایا تھا۔
جب عظیم اُستاد یسوع مسیح زمین پر آئے تو بائبل کی بہت سی کتابیں لکھی جا چکی تھیں۔ آپ کے خیال میں کیا یسوع مسیح مانتے تھے کہ بائبل خدا کی طرف سے ہے؟ ...... یسوع مسیح کو اِس بات پر پورا یقین تھا۔ آپ کو یاد ہوگا کہ یسوع مسیح زمین پر آنے سے پہلے آسمان پر رہتے تھے۔ اِس لئے وہ خدا کے کاموں کے بارے میں جانتے تھے۔
جب یسوع مسیح لوگوں کو خدا کے کاموں کے بارے میں بتاتے تھے تو وہ بائبل سے پڑھ کر سناتے تھے۔ اُنہیں بائبل کی بہت سی آیتیں زبانی یاد تھیں اور وہ لوگوں سے بات کرتے وقت اِن آیتوں کا ذکر کرتے تھے۔ یسوع مسیح نے لوگوں کو بہت سی نئی باتیں بھی سکھائیں۔ اُنہوں نے کہا: ”جو باتیں مَیں نے خدا سے سنیں، وہی مَیں دُنیا سے کہتا ہوں۔“ (یوحنا ۸:۲۶) یسوع مسیح نے خدا سے بہت سی باتیں سنی تھیں کیونکہ وہ خدا کے ساتھ آسمان پر رہ چکے تھے۔ کیا آپ جانتے ہیں کہ ہم یسوع مسیح کی باتیں کہاں پڑھ سکتے ہیں؟ ...... ہم یہ باتیں بائبل میں پڑھ سکتے ہیں۔ خدا نے اِن باتوں کو آدمیوں سے لکھوایا تاکہ ہم اِن باتوں کو پڑھ سکیں۔
جن آدمیوں نے بائبل کو لکھا، اُنہوں نے بائبل کو اپنیاپنی زبان میں لکھا۔ بائبل کی زیادہتر کتابیں عبرانی زبان میں لکھی گئی تھیں، کچھ کتابیں ارامی زبان میں لکھی گئی تھیں اور کئی کتابیں یونانی زبان میں لکھی گئی تھیں۔ لیکن آج بہت کم لوگ اِن زبانوں کو پڑھ سکتے ہیں۔ اِس لئے بائبل کا ترجمہ دوسری زبانوں میں کِیا گیا ہے۔ بائبل کا ترجمہ ۲۴۰۰ سے زیادہ زبانوں میں ہو چُکا ہے۔ یہ تو بہت سی زبانیں ہیں، ہے نا؟ خدا چاہتا ہے کہ دُنیا کے سب لوگ بائبل کو اپنیاپنی زبان میں پڑھ سکیں۔ چاہے آپ کسی بھی زبان میں بائبل کو پڑھیں، اِس کا پیغام وہی ہوگا جو خدا نے دیا تھا۔
بائبل میں جو کچھ لکھا ہے، وہ ہمارے لئے بہت اہم ہے۔ بائبل بہت سال پہلے لکھی گئی تھی لیکن اِس میں ایسی باتیں بھی لکھی ہیں جو آج پوری ہو رہی ہیں۔ بائبل میں یہ بھی بتایا گیا ہے کہ خدا آئندہ کیا کرے گا۔ اِن باتوں کو پڑھ کر ہمیں پتہ چلتا ہے کہ آنے والا وقت ہمارے لئے بہت اچھا ہوگا۔
آپ بائبل سے کون سی باتیں سیکھ سکتے ہیں؟
بائبل میں لکھا ہے کہ خدا اچھے کاموں سے خوش ہوتا ہے اور بُرے کاموں سے ناراض ہوتا ہے۔ اِس میں یہ بھی لکھا ہے کہ کون سے کام اچھے ہیں اور کون سے کام بُرے ہیں۔ ہم سب کو اِن باتوں کے بارے میں جاننے کی ضرورت ہے۔ بائبل میں ایسے لوگوں کے بارے میں بتایا گیا ہے جنہوں نے بُرے کام کئے۔ اور اِس وجہ سے اِن لوگوں کو مشکلات کا سامنا کرنا پڑا۔ اِن لوگوں کے بارے میں پڑھ کر ہم سیکھتے ہیں کہ ہمیں بُرے کاموں سے بچنا چاہئے۔ بائبل میں ایسے لوگوں کے بارے میں بھی بتایا گیا ہے جنہوں نے اچھے کام کئے۔ اور اِس وجہ سے اُن کو برکتیں ملیں۔ یہ سب باتیں ہمارے فائدے کے لئے لکھی گئی ہیں۔
بائبل سے فائدہ حاصل کرنے کے لئے ہمیں اِس سوال کا جواب جاننا چاہئے کہ کس نے ہمیں بائبل دی ہے؟ کیا آپ اِس سوال کا جواب جانتے ہیں؟ ...... خدا نے ہمیں بائبل دی ہے۔ تو پھر آپ کے خیال میں ہم بائبل سے کیسے فائدہ حاصل کر سکتے ہیں؟ ...... ہمیں خدا کی باتوں پر عمل کرنا چاہئے۔ اِس طرح ہم سمجھدار بنیں گے۔
اِس لئے ہمیں مل کر بائبل پڑھنے کے لئے وقت نکالنا چاہئے۔ جب ہمیں اپنے کسی اچھے دوست کا خط ملتا ہے تو ہم اِسے باربار پڑھتے ہیں، ہے نا؟ یہ خط ہمیں بہت ہی پیارا ہوتا ہے۔ بائبل خدا کی طرف سے ایک خط ہے۔ خدا ہمیں سب سے زیادہ پیار کرتا ہے۔ اِس لئے بائبل ہمیں بہت ہی پیاری ہونی چاہئے اور ہمیں اِسے باربار پڑھنا چاہئے۔
جیسا کہ ہم نے دیکھا ہے، بائبل خدا کی طرف سے ہے اور خدا نے ہمارے فائدے کے لئے بائبل لکھوائی تھی۔ اِس کے بارے میں اَور جاننے کے لئے اِن آیتوں کو پڑھیں: رومیوں ۱۵:۴؛ ۲-تیمتھیس ۳:۱۶، ۱۷؛ اور ۲-پطرس ۱:۲۰، ۲۱۔
شاید آپ یہ بھی دیکھنا چاہیں
بچوں کو پاک کلام سے سکھائیں
یسوع مسیح کے بارے میں کتابیں لکھنے والے آدمی
اُن آٹھ آدمیوں کے بارے میں پڑھیں جو یسوع مسیح کے زمانے میں رہتے تھے اور جنہوں نے یسوع مسیح کے بارے میں کتابیں لکھیں۔
