SUMATI ako, ano nga libro an paborito mo gud?— Karuyag han iba nga kabataan an libro nga nagsusumat mahitungod han mga hayop. Karuyag han iba an libro nga damu an mga retrato. Makalilipay an pagbasa hito nga mga libro.

Kondi an gimaopayi nga mga libro nga aada yana amo adton nagsusumat ha aton han kamatuoran mahitungod ha Dios. Usa hiton nga mga libro mas presyoso kay ha ngatanan nga iba nga mga libro. Maaram ka ba kon ano ito nga libro?— An Biblia.

Kay ano nga importante gud an Biblia?— Tungod kay an Dios an naghatag hito ha aton. Nagsusumat ito ha aton mahitungod ha iya ngan mahitungod han mag-opay nga mga butang nga iya pagbubuhaton para ha aton. Ngan ipinapakita hito ha aton kon ano an sadang pagbuhaton naton basi lipayon hiya. Pariho ito han usa nga surat tikang ha Dios.

Maisusurat unta han Dios an bug-os nga Biblia ha langit ngan katapos, ihatag ito ha tawo. Kondi waray niya buhata ito. Bisan kon an mga ideya nagtikang ha Dios, ginamit niya an iya mga surugoon dinhi ha tuna ha pagsurat han kadak-an han Biblia.

Paonan-o ginbuhat ito han Dios?— Basi masabtan kon paonan-o, tagda ini. Kon nakakabati kita hin tingog dida ha radyo, bangin tingog ito han usa ka tawo nga aadto ha hirayo. Kon nagkikita kita ha telebisyon, nakikita pa ngani naton an mga retrato han mga tawo ha iba nga mga nasud ha kalibotan, ngan nababatian naton an ira ginsisiring.

An mga tawo nakakagbiyahe pa ngani ngadto ha bulan ha ira mga spaceship, ngan naipapadara nira an mga mensahe tikang didto nganhi ha tuna. Maaram ka ba hito?— Kon nahihimo ito han mga tawo, maipapadara ba han Dios an mga mensahe tikang ha langit?— Siyempre! Ngan maiha na  nga ginbuhat niya ito antes pa magkaada hin radyo o telebisyon an mga tawo.

Hi Moises usa ka tawo nga nakabati ha Dios nga nagyayakan. Waray makita ni Moises an Dios, kondi nababatian niya an tingog han Dios. Minilyon nga mga tawo an nakadto didto han nahitabo ini. Oo, hiton nga adlaw ginpahinabo han Dios nga mabay-og an bug-os nga bukid, ngan nagdalugdog ngan nagkidlat. Maaram an mga tawo nga an Dios nagyakan, kondi nahadlok gud hira. Salit nagsiring hira kan Moises: ‘Ayaw payakna an Dios ha amon kay bangin kami magkamatay.’ Ha urhi, iginsurat ni Moises an mga butang nga ginsiring han Dios. Ngan an iginsurat ni Moises aada ha Biblia.​—Eksodo 20:18-21.

 Iginsurat ni Moises an siyahan nga lima nga libro han Biblia. Kondi diri la hiya an nagsurat han mga bahin han Biblia. Ginamit han Dios an mga 40 nga kalalakin-an ha pagsurat han mga bahin han Biblia. Ini nga kalalakin-an nabuhi maiha na gud nga panahon an naglabay, ngan damu ka tuig an ginasto ha pagtapos han Biblia. Oo, mga 1,600 ka tuig! An urusahon amo nga bisan kon diri gud magkakilala an pipira hini nga kalalakin-an, bug-os nga nagkakauruyon an ngatanan nga ira iginsurat.

Mga bantogan an iba nga kalalakin-an nga ginamit han Dios ha pagsurat han Biblia. Bisan kon hi Moises usa hadto nga magbarantay han mga karnero, nagin lider hiya han nasud han Israel. Hi Salomon usa nga hadi nga pinakamaaramon ngan pinakabahandianon nga tawo ha kalibotan. Kondi an iba nga mga parasurat diri gud kilala. Hi Amos usa nga nag-ataman hin mga kahoy nga nagbunga hin mga igos.

Dugang pa, an usa nga parasurat han Biblia usa nga doktor. Maaram ka ba han iya ngaran?— Hi Lukas. An usa pa nga parasurat amo an parasukot hin buhis hadto. Mateo an iya ngaran. An usa pa usa nga abogado hadto, nga may awtoridad ha balaud han relihiyon han mga Judio. Mas damu an iya iginsurat nga mga libro han Biblia kay ha iba. Maaram ka ba han iya ngaran?— Hi Pablo. Ngan an mga disipulo ni Jesus nga hi Pedro ngan Juan, nga mga parasurat liwat han Biblia, mga parapangisda hadto.

Damu hini nga mga parasurat han Biblia an nagsurat mahitungod han mga butang nga pagbubuhaton han Dios ha tidaraon. Paonan-o nira hinbaroan iton nga mga butang antes pa ngani mahitabo ito?— An Dios naghatag hiton nga kalalakin-an hin impormasyon. Iya ginsumatan hira kon ano an mahitatabo.

Ha panahon nga hi Jesus, an Bantogan nga Magturutdo, nakanhi ha tuna, nahisurat na an kadak-an nga bahin han Biblia. Hinumdumi, an Bantogan nga Magturutdo nakadto ha langit hadto. Maaram hiya han ginbuhat han Dios. Natoo ba hiya nga an Biblia tikang ha Dios?— Oo, natoo hiya.

Han hi Jesus nakiistorya ha mga tawo mahitungod han mga buhat han Dios, ginbasa niya an Biblia. Usahay memoryado nga iginsasaysay niya ha ira kon ano an ginsiring hito. Hi Jesus nagdara liwat ha aton hin dugang nga impormasyon  tikang ha Dios. Hi Jesus nagsiring: “An akon hinbatian tikang ha iya, ini akon iginyayakan ha kalibotan.” (Juan 8:26) Hinbatian ni Jesus an damu nga mga butang tikang ha Dios tungod kay nagkinabuhi hiya kaupod han Dios. Ngan diin naton mababasa iton nga mga butang nga ginsiring ni Jesus?— Ha Biblia. Iginsurat ito ngatanan para ha aton basi basahon.

Siyempre, han ginamit han Dios an kalalakin-an ha pagsurat, nagsurat hira ha yinaknan nga ginamit nira adlaw-adlaw. Salit an kadak-an han Biblia iginsurat ha Hebreo, an iba ha Aramaiko, ngan an damu hito ha Griego. Tungod kay an kadam-an nga mga tawo yana nga panahon diri maaram magbasa hito nga mga yinaknan, an Biblia iginhuhubad ha iba nga mga yinaknan. Yana nga panahon an mga bahin han Biblia mababasa na ha sobra 2,260 nga yinaknan. Hunahunaa la ito! An Biblia amo an surat han Dios ha mga tawo ha bisan diin. Kondi bisan kon damu ka beses nga iginhuhubad ito, an mensahe hito tikang pa gihapon ha Dios.

 Importante para ha aton an ginsisiring han Biblia. Iginsurat ito maiha na nga panahon an naglabay. Kondi nagsusumat ito mahitungod han mga butang nga nahitatabo yana nga panahon. Ngan nagsusumat ito ha aton kon ano an hirani na pagbuhaton han Dios. Makalilipay an ginsisiring hito! Naghahatag ito ha aton hin urusahon nga paglaom.

An Biblia nagsusumat liwat ha aton han paagi han pagkinabuhi nga karuyag han Dios para ha aton. Nagsusumat ito ha aton kon ano an husto ngan kon ano an sayop. Kinahanglan mahibaroan mo ini, ngan ako liwat. Nagsusumat ito ha aton mahitungod han mga tawo nga nagbuhat hin maraot ngan kon ano an nahitabo ha ira, basi malikyan naton an ira nagin problema. Nagsusumat liwat ito ha aton mahitungod han mga tawo nga nagbuhat hin husto ngan han mag-opay nga mga resulta nga inabot ha ira. Ini ngatanan iginsurat para ha aton kaopayan.

Kondi basi makarawat an gidadakui nga kapulsanan tikang ha Biblia, kinahanglan hibaroan naton an baton ha usa nga pakiana. An pakiana amo ini: Hin-o an naghatag ha aton han Biblia? Ano an imo baton?— Oo, an bug-os nga Biblia tikang ha Dios. Salit, paonan-o naton maipapakita nga kita tinuod nga maaramon?— Pinaagi han pagpamati ha Dios ngan pinaagi han pagbuhat han iya ginsisiring.

Salit kinahanglan magkaada kita panahon ha tarampo nga pagbasa han Biblia. Kon nakarawat kita hin surat tikang ha usa nga aton hinigugma gud, aton ginbabasa ito hin pauroutro. Presyoso ito ha aton. An Biblia sadang magin sugad kapresyoso ha aton tungod kay usa nga surat ito tikang ha Usa nga nahigugma gud ha aton. Usa nga surat ito tikang ha mahigugmaon nga Dios.