¿BAʼAX libroil maas uts ta wich?... Yaan mejen paalaloʼobeʼ maas jatsʼuts u yilkoʼob le ku tʼaanoʼob tiʼ baʼalcheʼoboʼ; yanoʼob xaneʼ maas uts tu yichoʼob le ku taasik yaʼab fotoʼoboʼ. ¿Máasaʼ jatsʼuts u xoʼokol le libroʼob beyaʼ?

² Baʼaleʼ le libroʼob maas maʼalobtakoʼ letiʼe ku kaʼanskoʼob u jaajil yoʼolal Diosoʼ. Ichiloʼobeʼ yaan junpʼéel maas jach maʼalobiʼ. ¿A wojel wa máakalmáak?... Letiʼe Bibliaoʼ.

³ ¿Baʼaxten jach maʼalob le Bibliaoʼ?... Tumen tiʼ Dios u taal. Ku tʼaan tiʼ letiʼ yéetel tiʼ le baʼaloʼob maʼalobtak ken u beet t-oʼolaloʼ. Tsʼoʼoleʼ ku kaʼansiktoʼon baʼax unaj k-beetik utiaʼal k-lúubul utsil tiʼ. Bey junpʼéel carta ku túuxtiktoʼon Dioseʼ.

⁴ Kex jeʼel u béeytal u tsʼíibtik Dios tuláakal le Biblia teʼ kaʼan utiaʼal u tsʼáa tiʼ wíinikoʼ, maʼ bey úuchik u beetkiʼ. Le baʼaxoʼob yaan ichiloʼ tiʼ Dios u taal, baʼaleʼ tu nuʼuktaj le máaxoʼob meyajtik way Luʼum utiaʼal ka u tsʼíibtoʼob u maas yaʼabil le baʼaxoʼob ku yaʼalik le Bibliaoʼ.

⁵ ¿Bix úuchik u beetik?... Jeʼel a maas naʼatik wa ka tuukul tiʼ lelaʼ: le máaxoʼob k-uʼuyik u tʼaanoʼob teʼ radiooʼ náach yanoʼob. Teʼ televisión xanoʼ k-ilik yéetel k-uʼuyik u tʼaan le máakoʼob kex táanxel luʼumil yanoʼoboʼ.

⁶ Le máakoʼoboʼ tsʼoʼok tak u kʼuchloʼob teʼ Lunaoʼ yéetel ku túuxtikoʼob mensajeʼob way Luʼumeʼ. ¿A wojel wa kaʼach lelaʼ?... Wa le wíinik ku páajtal u beetkoʼ, ¿maʼ wa tu páajtal u túuxtik Dios  mensajeʼob desde teʼ kaʼanoʼ?... Jeʼeleʼ, letiʼeʼ káaj u beetik táanil tiʼ u yantal le radio yéetel le televisionoʼ.

⁷ Úuchjeakileʼ Moiseseʼ jach tu yuʼubaj u tʼaan Dios. Kex maʼ béeychaj u yilkeʼ, tu yuʼubaj u tʼaan. Teʼ kʼiin jeʼeloʼ Dioseʼ tu beetaj u tíitkuba junpʼéel wits, bey xan u kíilbal yéetel u léembal cháak. U millonesil máakoʼob ile. Letiʼobeʼ u yojloʼob Dios le ku tʼaanoʼ, baʼaleʼ letiʼobeʼ saajkoʼob. Le oʼolal tu yaʼaloʼob tiʼ Moisés: ‹Maʼ u tʼankoʼon Dios, tumen maʼ xaan ka kíimkoʼoniʼ›. Ka tsʼoʼokeʼ, Moiseseʼ tu tsʼíibtaj teʼ Biblia le baʼax aʼalaʼabtiʼ tumen Diosoʼ (Éxodo 20:18-21).

⁸ Moiseseʼ tu tsʼíibtaj le yáax cinco libroʼob tiʼ le Bibliaoʼ, baʼaleʼ anchaj uláakʼ máaxoʼob tsʼíibt le Bibliaoʼ. Dioseʼ meyajnajtiʼ kex  cuarenta máakoʼob utiaʼal u tsʼíibtik. Le máakoʼoboʼ úuch kuxlakoʼob yéetel xáanchaj kex mil seiscientos jaʼaboʼob táan u tsʼíibtikoʼob. Yaan tiʼ le máaxoʼob tsʼíibtoʼ maʼ tu kʼaj óoltubaʼobiʼ. Baʼaleʼ le baʼaxoʼob tu tsʼíibtoʼoboʼ maʼatech u contradecirtkuba. ¿Máasaʼ leloʼ jach jatsʼuts?

⁹ Yaan tiʼ le máaxoʼob tu yéeyaj Dios utiaʼal tsʼíibtik le Bibliaoʼ jach kʼaj óolaʼanoʼob. Jeʼex Moiseseʼ kex chéen kanan taman ku beetik kaʼacheʼ, tsʼaʼab u nuʼukt u kaajil Israel. Salomoneʼ juntúul rey yéetel letiʼe máax maas ayikʼal yéetel yaan u naʼat anchaj way luʼumoʼ. Baʼaleʼ yanoʼobeʼ maʼ jach kʼaj óolaʼanoʼobiʼ. Juntúul tiʼ letiʼobeʼ, Amós, letiʼ kaʼacheʼ ku pakʼik higoʼob.

¹⁰ Uláakʼ juntúuleʼ doctor. ¿A wojel wa bix u kʼaabaʼ?... Lucas. Uláakʼ juntúuleʼ Mateo, cobrar impuestoʼob ku beetik kaʼachi. Juntúul xaneʼ jach tu xokaj u ley le judíoʼoboʼ. Letiʼeʼ maas yaʼab u mejen libroiloʼob le Biblia tu tsʼíibtoʼ. ¿A wojel wa bix u kʼaabaʼ?... Pablo. Pedro yéetel Juaneʼ chuk kay ku beetkoʼob kaʼach táanil tiʼ u beetkubaʼob disipuloil tiʼ Jesús, cada juntúul tiʼ letiʼobeʼ tu tsʼíibtoʼob xan junjaats tiʼ le Bibliaoʼ.

¹¹ Yaʼab tiʼ le máaxoʼob tsʼíibt le Bibliaoʼ tu yaʼaloʼob baʼaxoʼob ken u beet Dios táanil tiʼ u kʼuchul u kʼiinil. ¿Bix úuchik u yojéeltikoʼob táanil tiʼ u yúuchul?... Dios tsʼáa u yojéeltoʼob, tu yaʼalajtiʼob baʼax kun úuchul.

¹² Le ka taal Jesús, le Maʼalob j-Kaʼansaj, way Luʼumoʼ, tsʼoʼok u tsʼíibtaʼal u maas yaʼabil le Bibliaoʼ. Kʼaʼajaktecheʼ Jesuseʼ tiʼ kajaʼan kaʼach teʼ kaʼanoʼ yéetel u yojel baʼaxoʼob u beetmaj Dios. Letiʼeʼ, ¿ku creertik wa tiʼ Dios u taal le Bibliaoʼ?... Ku creertik.

¹³ Le ken u tsikbalt Jesús le baʼaxoʼob u beetmaj Diosoʼ, ku xokik kaʼach teʼ Bibliaoʼ yéetel yaan kʼiineʼ chéen ku kʼaʼajsik le baʼaxoʼob ku yaʼalik utiaʼal u kaʼansik wa baʼaxoʼ. Tsʼoʼoleʼ tu maas tsolaj bix Dios. Letiʼeʼ tu yaʼalaj: «Le baʼaxoʼob xan tin wuʼuyaj u yaʼalikoʼ letiʼe  baʼaxoʼob kin waʼalik way yóokʼol kaabaʼ» (Juan 8:26). Jesuseʼ yaʼab baʼax tu yuʼubaj u yaʼalik Dios le tiaʼan tu yéetel teʼ kaʼanoʼ. ¿Tuʼux jeʼel u páajtal k-ilik le baʼaxoʼob tu kaʼansaj Jesusoʼ?... Teʼ Bibliaoʼ. Tiʼ tsʼaʼan utiaʼal k-xokiʼ .

¹⁴ Le máaxoʼob yéeyaʼaboʼob tumen Diosoʼ tu tsʼíibtoʼob le Biblia ichil le idioma ku tʼankoʼoboʼ. Le oʼolal u maas yaʼabileʼ tsʼíibtaʼab ich hebreo, junjaatseʼ ich arameo yéetel u tsʼook junjaatseʼ ich griego. Teʼ kʼiinoʼobaʼ yaʼab máakoʼob maʼatech u naʼatkoʼob le idiomaʼobaʼ, le oʼolaleʼ tsʼoʼok u suʼutul le Biblia ich yaʼab idiomaʼoboʼ. Yaan jaats tiʼ le Bibliaoʼ jeʼel u páajtal u xoʼokol ich maas tiʼ dos mil doscientos sesenta idiomaʼobeʼ. Tsʼoʼok u yaʼabtal tumen le Bibliaoʼ bey junpʼéel carta túuxtaʼan tumen Dios tiʼ tuláakal wíinikeʼ. Le oʼolal kex jeʼel jaypʼéel idiomaʼob tsʼoʼok u suʼutuleʼ, le baʼax ku yaʼalikoʼ tiʼ Dios u taal.

 ¹⁵ Le baʼax ku yaʼalik le Bibliaoʼ jach jeʼel u yáantkoʼoneʼ. Kex úuch tsʼíibtaʼakeʼ ku tʼaan tiʼ le baʼaxoʼob ku yúuchul teʼ kʼiinoʼobaʼ bey xan tiʼ le baʼax ken u beet Dios maʼ kun xáantaloʼ. Le baʼax ku yaʼalikoʼ ku líiʼsik k-óol yéetel ku tsʼáaiktoʼon esperanza.

¹⁶ Le Bibliaoʼ ku tsolik xan bix u kʼáat Dios ka kuxlakoʼon. Ku kaʼansiktoʼon baʼax maʼalob yéetel baʼax maʼ maʼalobiʼ, lelaʼ junpʼéel baʼal tuláakloʼon unaj k-kanik. Ku tʼaan tiʼ máaxoʼob tu beetoʼob baʼax maʼ maʼalobiʼ yéetel bix biniktiʼob, utiaʼal maʼ k-beetik xan beyoʼ. Ku tʼaan xan tiʼ máaxoʼob beet baʼaloʼob maʼalobtak yéetel le utsiloʼob tu kʼamoʼoboʼ. Tuláakal tsʼíibtaʼab utiaʼal u yáantkoʼon.

¹⁷ Baʼaleʼ utiaʼal k-jóoʼsik utsil tiʼ le Bibliaoʼ, kʼaʼabéet k-ojéeltik u núukil le kʼáatchiʼobaʼ: ¿máax tsʼáatoʼon le Bibliaoʼ? ¿Techeʼ máax a tuklik?... Beyoʼ, le Bibliaoʼ tiʼ Dios u taal. Baʼaleʼ ¿bix jeʼel k-eʼesik jach yaan k-naʼateʼ?... Letiʼe k-uʼuyik u tʼaan Dios yéetel k-beetik le baʼax ku yaʼalikoʼ.

¹⁸ Le oʼolaleʼ kʼaʼabéet k-jóoʼsik tiempo utiaʼal k-múul xokik le Bibliaoʼ. Ken tsʼaʼabaktoʼon u carta juntúul máax k-yaabiltmeʼ k-xokik yaʼab u téenel. K-tiaʼaleʼ jach nojoch baʼal. Bey xan unaj k-ilik le Bibliaoʼ, tumen bey junpʼéel carta ku tsʼáaiktoʼon le máax maas yaan u yaabilajoʼ, Dios.