GUDXI naa xi libru jma riuláʼdxiluʼ gúʼndaluʼ.... Nuu baʼduhuiiniʼ riulaʼdxiʼ ni caníʼ de manihuiiniʼ; stuudxi riulaʼdxiʼ ni napa stale dibuju. Zándaca galán guʼndaʼ binni ca libru riʼ, cadi dxandíʼ la?

Peru ca libru ni jma galán nga cani cusiidiʼ laanu de Dios. Lade cani nuu tobi ni jma risaca. Ñee nannuʼ xi libru caniéʼ la?... Nga nga Biblia.

Xiñee ndiʼ nabé risaca Biblia yaʼ.... Purtiʼ Dios nga bidii ni laanu. Caniʼni de laabe ne de cani galán chigúnibe pur laanu. Ne laaca rusiidini laanu xi riquiiñeʼ gúninu ti chulaʼdxiʼ Dios ni rúninu. Zeeda gácani casi ti carta ni cuseendaʼ Dios para laanu.

Dxandíʼ nga ñándaca nucaa Dios guidubi naca Biblia riʼ guibáʼ ne despué nudiibe ni binni, peru qué ñúnidibe zacá. Neca xquendabiaaniʼ Dios nga cá luni, peru laabe biquiiñebe ca xpínnibe ni guyuu dxiqué para gucaacaʼ stale de ni cá luni.

Ximodo bíʼnibe ni yaʼ.... Ziéneluʼ ni pa guiníʼ íqueluʼ ndiʼ: ca ridxi ni runadiáganu lu radiu ca la? stiʼ binni ni nuu zitu de laanu ni, ne lu tele laaca zanda gúʼyanu ne gunadiáganu binni ni nuu sti guidxi.

Ca hombre ca huaquiiñecabe avión para chindácabe ra nuu Beeu, ne dede racá riníʼnecabe binni nuu lu Guidxilayú. Ñee nannuʼ nga la?... Pa binni de guidxilayú randa rúnini, ñee qué zanda guiniʼné Dios binni lu guidxilayú riʼ neca nuube guibáʼ la?... Zanda pue, ne bíʼnibe ni ante chuʼ radiu ne tele.

 Guyuu ti hombre láʼ Moisés ni binadiágapeʼ ridxi stiʼ Dios, nécapeʼ qué ñuuyabe laa. Ya, dxiqueca Dios biniibi ti dani dede guxidxi rayu ne biree biaaniʼ, ne nuu stálepeʼ binni ora gúcani. Neca nánnacabe Dios ngue guníʼ, peru guizáʼ bidxíbicabe. Ngue runi gúdxicabe Moisés sicaríʼ: Cadi guiniʼné diʼ Dios laadu, purtiʼ zándaca gátidu. Despué bicaa Moisés ni gudxi Dios laa ndaaniʼ Biblia (Éxodo 20:18-21).

Moisés bicaa gaayuʼ libru ni zeeda ra ruzulú Biblia, peru cadi laasibe nga bicaabe ni. Dios biquiiñebe biaʼ cuarenta hombre para gucaa ni. Maʼ raca stálepeʼ iza bibánicabe, ne gudiʼdiʼ biaʼ  ti mil xhoopaʼ gayuaa iza para bilúxecabe ni. Tuudxi de laacabe qué ñunibiáʼ saadicabe. Peru ridxagayaapenu nga gánnanu tobi si ni riníʼ guiráʼ cani bicaacabe.

Tuudxi de ca hombre ni biquiiñeʼ Dios para gucaa Biblia binibiáʼ stale binni laacaʼ. Casi Moisés, nécapeʼ dendxuʼ nga gúpabe, peru beeda gácabe xaíque stiʼ guidxi Israel. Salomón gúcabe ti rey, ne laaca gúcabe ti hombre ni jma gupa bidxichi ne ni jma nuu xpiaaniʼ ni guyuu lu Guidxilayú riʼ. Peru guyuu stuudxi hombre ni qué ñunibiaʼpeʼ binni laacaʼ. Tobi de laacabe nga Amós, ne dxiiñaʼ stibe nga gudxiibabe duʼgaʼ.

Laaca guyuu ti doctor. Ñee nannuʼ tu labe la?... Labe Lucas. Stobi de laacabe nga Mateu, tobi ni biʼniʼ cobrar impuestu. Ládecabe guyuu tobi ni nabé gunna de ley stiʼ ca judíu que. Laabe nga ni bicaabe jma libru stiʼ Biblia. Nannuʼ tu labe la?... Labe Pablu. Ne laaca bicaa Pedru ne Juan caadxi libru zeeda luni. Laacabe gunaazecabe benda ante gácacabe discípulo stiʼ Jesús.

Stale de ca hombre ni bicaa Biblia nabé bizeetecabe ni chiguni Dios. Ximodo gúnnacabe zaca cani yaʼ.... Purtiʼ Dios gudxi laacabe xi chigaca.

Ca dxi bibani Jesús, Maestru Ni Jma Nanna Gusiidiʼ que lu Guidxilayú riʼ la? maca gucuá stale de ni zeeda lu Biblia. Bietenalaʼdxiʼ, Maestru Ni Jma Nanna Gusiidiʼ que maca guyuu guibáʼ ne nánnabe xi biʼniʼ Dios. Ñee raʼbuʼ biʼniʼ crebe pa zeeda Biblia ca de Dios la?... Biʼniʼ crebe pue.

Ora guniʼné Jesús ca binni que de guiráʼ cani bizáʼ Dios la? biindabe de lu Biblia, ne nuu tiru guniʼbe de ca historia ni maca nánnabe sin gúʼyabe luni. Laaca bisiidibe laanu stale de Dios. Jesús guníʼ: «Rue nia binni ni gudxi si ni biseenda naa iniéʼ» (Juan 8:26). Ne cumu maca bibaninebe Dios guibáʼ la? binadiágabe  stale de ni guníʼ. Paraa zanda guidxélanu ca diidxaʼ stiʼ Jesús ca yaʼ.... Lu Biblia. Nuu cani racá para gúʼndanu cani.

Ca hombre ni biquiiñeʼ Dios para gucaacaʼ Biblia la? bicaacabe ni ne diidxaʼ riníʼcabe. Ngue runi, stale de ca libru ca gucuá cani diidxaʼ hebreu, stuudxi de laani gucuá arameu ne sti ndaa de laani gucuá griegu. Cumu yanna stale binni qué runibiáʼ ca diidxaʼ ca la? nga runi Biblia ca maʼ huacá ni lu stuudxi diidxaʼ. Nuu caadxi libru stini maʼ nuu lu jma de chupa mil chupa gayuaa sesenta diidxaʼ. Stale diidxaʼ ni purtiʼ Biblia ca nga ti carta ni zeeda de Dios para guiráʼ binni. Nga runi, biaʼ tiica diidxaʼ guicá ni la? guiráʼ ni caniʼni zeeda de Dios.

 Ni caníʼ Biblia ca risaca ni para laanu. Neca maʼ raca stale iza nga gucuá ni, caniʼni de cani cayaca yanna ne ni chiguni Dios. Cani cá ndaaniʼ ni nabé sicarú ne cani cabézanu gaca ca guizáʼ rusiecheʼ laanu.

Biblia laaca cusiene laanu ximodo na Dios guibáninu. Cusiidiʼ ni laanu xii nga jneza ne ni cadi jneza, ne nga nga caquiiñeʼ gánnanu. Caniʼni de binni ni biʼniʼ cosa malu ne xi gúcacaʼ ti cadi gucheʼnu casi laacaʼ. Laaca caniʼni de binni ni biʼniʼ ni jneza ne pabiáʼ galán guyé ni laacaʼ. Guirani gucuá para gacané laanu.

Peru para ganda guizíʼdinu jma de ni na Biblia la? riquiiñeʼ gánnanu guicábinu ni zeeda raríʼ: Tu bidii laanu Biblia. Lii xi raʼbuʼ yaʼ.... Ya, guidubi naca Biblia zeeda de Dios. Yanna, ximodo gusihuínninu dxandipeʼ nga nuu xpiaaninu yaʼ.... Ra gucaadiáganu Dios ne gúninu ni nabe.

Nga runi, naquiiñeʼ cueenu tiempu para gúʼndanu Biblia juntu. Ora ricaanu ti carta stiʼ ti binni ni nadxiinu stale la? rúʼndanu ni chupa chonna biaje. Para laanu nabé risaca ni. Zacaca nga naquiiñeʼ gúninu ne Biblia, purtiʼ laani nga ti carta ni zeeda de ti Dios ni guizáʼ nadxii laanu.