O U TI a kontan mon dir ou en keksoz?— Get ou lanmen. Bouz ou ledwa. Aprezan anmas en keksoz. Ou lanmen i kapab fer bokou keksoz, e i kapab fer zot byen menm. Ou konnen lekel ki ti fer nou lanmen?—

Wi, sa Enn ki’n fer nou labous, nou nennen, ek nou lizye. Sa i Bondye, Papa sa Gran Ansennyan. Pa nou kontan Bondye in fer nou lizye?— Nou kapab vwar bokou keksoz avek nou lizye. Nou kapab vwar bann fler. Nou kapab vwar zerb ver ek lesyel ble. Nou menm kapab vwar bann pti zwazo ki lafen, parey la lo sa portre. I gou pour vwar bann keksoz koumsa, pa i vre?—

Me lekel ki’n fer sa bann keksoz? Eski en dimoun ki’n fer zot? Non. Dimoun i kapab fer lakaz. Me zot pa kapab fer zerb pouse. Dimoun pa kapab fer en pti zwazo, ni en fler, oubyen okenn lezot keksoz vivan. Ou ti konn sa ou?—

Bondye ki’n fer tou sa bann keksoz. Bondye in fer lesyel ek later. I’n fer dimoun tou. I ti kree premye zonm ek premye  fanm. Sa Gran Ansennyan, Zezi, ti koz lo sa li osi.—Matye 19:4-6.

Ki mannyer Zezi ti konnen Bondye ti fer zonm ek fanm? Eski i ti vwar Bondye pe fer zot?— Wi, i ti vwar. Zezi ti avek Bondye ler Bondye ti fer zonm ek fanm. Bondye ti fer Zezi premye. Zezi ti en lanz, e i ti reste dan lesyel avek son Papa.

Labib i dir nou ki Bondye ti dir: “Annou fer zonm.” (Zenez 1:26) Ou konnen avek ki Bondye ti pe koze la?— I ti pe koz avek son Garson. I ti pe koz avek sa enn ki plitar ti vin lo later e ganny apele Zezi.

Zis mazin sa! Ler nou ekout Zezi, nou pe ekout sa enn ki ti avek Bondye ler Bondye ti fer later ek tou lezot keksoz. Pa i enteresan  sa? Zezi ti aprann bokou keksoz ler i ti travay avek son Papa dan lesyel. Sanmenm Zezi i en Gran Ansennyan!

Ou krwar Bondye ti santi li tousel avan i ti fer son Garson?— Non. Be si i pa ti santi li tousel, akoz i ti fer lezot keksoz vivan?— I ti fer sa akoz i en Bondye lanmour. I ti anvi lezot konnen konman i gou pour viv. Nou devret remersye Bondye pour donn nou lavi.

Tou keksoz ki Bondye in fer i montre son lanmour. Bondye ti fer soley. Soley i donn lalimyer e i kit nou so. Si ti napa soley, tou keksoz ti pou fre e ti pou napa keksoz vivan lo later. Granmersi Bondye in fer soley, pa i vre?—

Bondye i osi fer lapli tonbe. I vre parfwa ou pa kontan lapli akoz ou pa kapab al zwe deor ler lapli i tonbe. Me lapli i ede fer bann fler pouse. Alors, ler nou vwar bann zoli fler, lekel ki nou devret remersye?— Bondye. Be lekel ki nou devret remersye ler nou manz bann bon fri ek legim?— Nou devret remersye Bondye akoz li ki fer soley tape e fer lapli tonbe pour sa bann keksoz pouse.

Si en dimoun i demann ou, ‘Eski Bondye ki’n fer bann imen ek zannimo?’ Ki ou pou dir?— I byen pour dir: “Wi, Bondye ki’n fer bann imen ek zannimo.” Be si sa dimoun pa krwar sa? I dir ou bann imen i sorti dan zannimo. Labib pa dir sa. I dir Bondye ki’n kree tou keksoz vivan.—Zenez 1:26-31.

Be si sa dimoun pa krwar dan Bondye? Ki ou pou dir li?— Petet ou kapab montre li en lakaz. Demann sa dimoun: “Lekel ki’n fer sa lakaz?” Nou tou nou konnen en  dimoun in bezwen fer sa lakaz. Sa lakaz pa’n kapab fer li li menm!—Ebre 3:4.

Apre anmenn sa dimoun deor e montre li en fler. Demann li: “Lekel ki’n fer sa fler?” Pa en dimoun ki’n fer li. Zis parey sa lakaz pa’n fer li li menm, sa fler osi pa’n fer li li menm. I annan enn ki’n bezwen fer li, e sa i Bondye.

Dir sa dimoun ekout en zwazo pe sante. Apre demann li: “Lekel ki’n fer zwazo e fer zot konn sante?” Bondye. Bondye ki’n fer lesyel, later, ek tou keksoz vivan! Li ki donn lavi.

Me serten dimoun i kapab dir: ‘Mon krwar zis sa ki mon vwar.’ Savedir si zot pa vwar en keksoz, zot pa pou krwar ladan. Alor zot pa krwar dan Bondye akoz zot pa kapab vwar li.

I vre nou pa kapab vwar Bondye. Labib i dir: ‘Napa okenn dimoun ki kapab vwar Bondye.’ Okenn zonm, madanm, oubyen zanfan lo later pa kapab vwar Bondye. Alors personn pa devret sey desin oubyen fer en zimaz Bondye. Bondye li menm i dir nou pa fer sa. Alors Bondye pa kontan ler i annan sa bann kalite zimaz dan nou lakaz.—Egzod 20:4, 5; 33:20; Zan 1:18.

Me si nou pa kapab vwar Bondye, ki mannyer nou konnen i vreman annan Bondye? Reflesir en kou. Ou kapab vwar divan ou?— Non, napa personn ki kapab vwar divan. Me ou kapab vwar bann keksoz ki divan i fer. Par egzanp, ou vwar fey bouze ler divan i soufle dan pye dibwa. Sa i fer ou krwar i annan divan.

I parey avek Bondye. Ou kapab vwar bann keksoz ki Bondye in fer. Kan ou get en fler oubyen en zwazo, ou pe get en keksoz ki Bondye in fer. Sanmenm sa nou krwar i annan Bondye.

Si en dimoun i dir ou, ‘Lekel ki’n fer soley ek later?’ Labib i dir:  “Bondye ti kree lesyel ek later.” (Zenez 1:1) Wi, Bondye ki’n fer tou sa bann zoli keksoz! Ki mannyer sa i devret fer ou santi lo Bondye?—

Pa i gou nou vivan? Nou kapab tann bann zoli sanson ki zwazo i sante. Nou kapab vwar bann fler ek lezot keksoz ki Bondye in fer. Nou kapab osi manz bann bon manze ki Bondye in donn nou.

Nou devret remersye Bondye pour tou sa bann keksoz. Me nou devret sirtou remersye li pour donn nou lavi. Si nou vreman kontan sa ki Bondye in fer pour nou, nou pou fer en keksoz. Ki nou pou fer?—Nou pou ekout Bondye, e nou pou fer sa ki i dir nou dan Labib. Koumsa nou montre nou kontan sa Enn ki’n fer tou keksoz.