Ibuot 3

Enye Emi Okobotde Kpukpru N̄kpọ

AMI mmọfiọk utịben̄kpọ kiet. Nte afo akpama ndikop enye?— Se ubọk fo. Nụk nnuenubọk fo. Idahaemi men n̄kpọ. Ubọk fo ekeme ndinam ediwak n̄kpọ, onyụn̄ ekeme ndinam mmọ ọfọn. Nte afo ọmọfiọk enye emi okobotde ubọk nnyịn?—

Ih, enye edi Owo emi okobotde inua, ibuo, ye enyịn nnyịn. Abasi, kpa Ete Akwa Andikpep, okobot. Nte nnyịn ikopke idatesịt nte ke Abasi ama ọnọ nnyịn enyịn?— Nnyịn imekeme ndida mmọ n̄kụt ediwak n̄kpọ. Nnyịn imekeme ndise mme flawa. Nnyịn imekeme ndise awawa mbiet ye blublu ikpaenyọn̄. Nnyịn imekeme ndikam n̄kụt n̄kpri inuen ẹdiade udia nte mmọ emi ẹdude ke ndise emi. Ke akpanikọ, nnyịn ndikeme ndikụt mme n̄kpọ ntem edi utịben̄kpọ, nte idịghe?—

Edi anie okobot mme n̄kpọ emi? Ndi owo ekededi okobot mmọ? Baba. Mme owo ẹkeme ndibọp ufọk. Edi owo ndomokiet ikemeke ndinam mbiet oro ọkọride. Mme owo ikemeke ndibot eyen inuen, flawa, m̀mê odu uwem n̄kpọ efen ekededi. Nte afo ama ọfiọk oro?—

Abasi edi enye emi okobotde kpukpru n̄kpọ emi. Abasi okobot enyọn̄ ye isọn̄. Enye okobot mme owo n̄ko. Enye okobot akpa eren ye  akpa n̄wan. Jesus, kpa Akwa Andikpep, ekekpep emi.—Matthew 19:4-6.

Jesus akasan̄a didie ọfiọk ete ke Abasi okobot eren ye n̄wan? Nte Jesus ama okụt Abasi anamde emi?— Ih, ama okụt. Jesus okodu ye Abasi ke ini Abasi okobotde eren ye n̄wan. Jesus ekedi akpa owo oro Abasi okobotde. Jesus ekedi angel, ndien enye okodụn̄ ke heaven ye Ete esie.

Bible asian nnyịn ete ke Abasi ọkọdọhọ ete: “Ẹyak nnyịn inam owo.” (Genesis 1:26) Nte afo ọmọfiọk enye emi Abasi eketịn̄de ikọ ọnọ?— Eketịn̄ ọnọ Eyen esie. Enye eketịn̄ ikọ ye Jesus emi ekedide isọn̄ ke ukperedem.

Nte oro idịghe n̄kpọ nduaidem? Kam kere! Ke ini nnyịn ikpan̄de utọn̄ inọ Jesus, nnyịn ibọ ukpep ito enye emi okodude ye Abasi ke ini Abasi okobotde isọn̄ ye kpukpru n̄kpọ eken. Jesus ama ekpep ekese n̄kpọ ke ndinam utom ye Ete esie ke heaven. Eyịghe idụhe Jesus edide Akwa Andikpep!

 Nte afo ekere ke Abasi ikokopke inemesịt ndidu ikpọn̄ mbemiso enye okobotde Eyen esie?— Baba-o, enye ama okop. Ọfọn, edieke edide enye ama okop inemesịt, ntak emi enye okobotde mme odu uwem n̄kpọ eken?— Enye akanam emi koro enye edi Abasi ima. Enye okoyom mbon efen ẹdu uwem ẹnyụn̄ ẹdara uwem. Nnyịn ikpenyene ndikọm Abasi nte ke enye ama ọnọ nnyịn uwem.

Kpukpru n̄kpọ oro Abasi akanamde ẹwụt ima esie. Abasi okobot utịn. Utịn ọnọ nnyịn un̄wana onyụn̄ anam nnyịn ikop ufiop. Kpukpru n̄kpọ ẹkpedi mbịt-mbịt ndien uwem ndomokiet ikpodụhe ke isọn̄ edieke nnyịn mîkpenyeneke utịn. Nte afo udatke esịt nte ke Abasi ama obot utịn?—

Abasi esinam edịm edep n̄ko. Ndusụk ini ekeme ndidi afo usumaha edịm koro afo mûsukemeke ndiwọrọ an̄wa n̄kebre mbre ke ini edịm edepde. Edi edịm an̄wam mme flawa ẹkọri. Ntre ke ini nnyịn ikụtde ndiye flawa, anie ke nnyịn idikọm?— Abasi. Ndien anie ke nnyịn ikpọkọm ke ini nnyịn idiade mme mfri ye mme ikọn̄udia oro ẹnemde?— Nnyịn ikpọkọm Abasi koro edi utịn ye edịm esie ẹnam mme n̄kpọ ẹkọri.

Yak idọhọ nte ke owo obụp fi ete, ‘Nte Abasi okobot owo ye mme unam n̄ko?’ Nso ke afo ọkpọbọrọ?— Enen ndibọrọ: “Ih, Abasi okobot owo ye mme unam.” Edi nso edieke owo mînịmke ke akpanikọ ite ke enen̄ede edi Abasi okobot owo? Nso edieke enye ọdọhọde ke owo okoforo oto unam? Nte ededi, Bible ikpepke ntre. Enye ọdọhọ ete ke Abasi okobot kpukpru odu uwem n̄kpọ.—Genesis 1:26-31.

Edi owo ekeme ndidọhọ fi ke imọ inịmke ke Abasi odu. Nso ke afo edidọhọ?— Ntak mûnyanke ubọk uwụt ufọk? Bụp owo oro: “Anie ọkọbọp ufọk oko?” Kpukpru owo ẹfiọk ẹte ke owo ọkọbọp enye. Ke akpanikọ ufọk oro ikọbọpke idemesie!—Mme Hebrew 3:4.

Ekem da owo oro ka in̄wan̄esa nyụn̄  wụt enye flawa. Bụp enye ete: “Anie okobot emi?” Kpa nte ufọk mîkọbọpke idemesie, ntre flawa emi ikobotke idemesie n̄ko. Abasi okobot enye.

Dọhọ owo oro atuak ada onyụn̄ akpan̄ utọn̄ ọnọ ikwọ inuen. Ekem bụp enye: “Anie okobot mme inuen onyụn̄ ekpep mmọ ndikwọ ikwọ?” Edi Abasi. Abasi okobot enyọn̄ ye isọn̄ ye kpukpru odu uwem n̄kpọ! Enye edi Andinọ uwem.

Edi, owo ekeme ndidọhọ nte ke imọ inịm sụk se imọ ikemede ndikụt. Enye ekeme ndidọhọ: ‘Edieke mmen̄kemeke ndikụt enye, nnịmke enye ke akpanikọ.’ Ntre ndusụk owo ẹdọhọ ke mmimọ inịmke ke Abasi odu koro mmimọ mîkemeke ndikụt enye.

Edi akpanikọ nte ke nnyịn ikemeke ndikụt Abasi. Bible ọdọhọ ete: ‘Owo ndomokiet ikemeke ndikụt Abasi.’ Baba eren, n̄wan, m̀mê eyenọwọn̄ ke isọn̄ ikemeke ndikụt Abasi. Ntre ikpanaha owo ndomokiet odomo ndiwet ndise m̀mê ndinam mbiet Abasi. Abasi akam asian nnyịn ete ikûnam mbiet imọ. Ntem nnyịn ndinyene mme n̄kpọ ntre ke ufọk nnyịn idinemke Abasi esịt.—Exodus 20:4, 5; 33:20; John 1:18.

Edi edieke afo mûkemeke ndikụt Abasi, afo asan̄a didie ọfiọk ke Enye enen̄ede odu? Kere ban̄a emi. Nte afo emekeme ndikụt ofụm?— Baba. Owo ndomokiet ikemeke ndikụt ofụm. Edi afo emekeme ndikụt mme n̄kpọ oro ofụm anamde. Afo emekeme ndikụt nte mme n̄kọk eto ẹnyen̄ede ke ini ofụm efịmede. Ntre afo emenịm ke akpanikọ ete ke ofụm odu.

Afo emekeme ndikụt mme n̄kpọ oro Abasi anamde n̄ko. Ke ini okụtde flawa m̀mê odu uwem inuen, afo okụt n̄kpọ oro Abasi anamde. Ntre afo emenịm ke akpanikọ ete ke Abasi enen̄ede odu.

Owo ekeme ndibụp fi ete, ‘Anie okobot utịn ye isọn̄?’ Bible ọdọhọ ete: “Abasi okobot enyọn̄ ye isọn̄.” (Genesis 1:1) Ih, Abasi okobot kpukpru utịbe utịbe n̄kpọ emi! Didie ke emi otụk fi?—

 Nte idịghe inem n̄kpọ ndidu uwem? Nnyịn imekeme ndikop mme inem inem ikwọ inuen. Nnyịn imekeme ndikụt mme flawa ye mme n̄kpọ eken oro Abasi obotde. Ndien nnyịn imekeme ndidia mme udia oro Abasi ọnọde nnyịn.

Nnyịn ikpenyene ndikọm Abasi kaban̄a kpukpru n̄kpọ emi. Ke akande kpukpru, nnyịn ikpenyene ndikọm enye ke ndinọ nnyịn uwem. Edieke nnyịn inen̄erede iwụt esịtekọm inọ Abasi, nnyịn iyanam n̄kpọ. Nso ke idinam?— Nnyịn iyakpan̄ utọn̄ inọ Abasi, ndien nnyịn iyanam se enye asiande nnyịn ke Bible. Ke usụn̄ oro nnyịn imekeme ndiwụt nte ke nnyịn imama Enye emi okobotde kpukpru n̄kpọ.

Nnyịn ikpenyene ndiwụt esịtekọm nnọ Abasi kaban̄a kpukpru se enye anamde. Didie? Kot se ẹwetde ke Psalm 139:14; John 4:23, 24; 1 John 5:21; ye Ediyarade 4:10b.

[Ndise ke page 21]

Anie okobot kpukpru mme odu uwem n̄kpọ?

[Mme ndise ke page 22, 23]

Sia edide owo ọkọbọp ufọk, anie okobot mme flawa, mme eto, ye mme unam?

[Ndise ke page 25]

Afo asan̄a didie ọfiọk ke ofụm odu?