MILE nɔ ko ni yɔɔ naakpɛɛ. Ani obaasumɔ ni obo toi?— Kwɛmɔ onine. Dɔrɔmɔ owaobii. Agbɛnɛ kɔ nɔ ko kɛjɛ shikpɔŋ. Onine baanyɛ afee nibii babaoo, ni ebaanyɛ efee amɛ jogbaŋŋ hu. Ani ole mɔ ni fee wɔ niji lɛ?—

Hɛɛ, lɛ nɔŋŋ ji Mɔ ni fee wɔnaabu, wɔgugɔ, kɛ wɔhiŋmɛii lɛ. Lɛ ji Nyɔŋmɔ, Tsɔɔlɔ Kpele lɛ Tsɛ lɛ. Ani eŋɔɔɔ wɔnaa akɛ Nyɔŋmɔ ha wɔ hiŋmɛii?— Wɔnyɛɔ wɔkɛnaa nibii babaoo. Wɔbaanyɛ wɔkwɛ fɔfɔii. Wɔbaanyɛ wɔkwɛ jwɛi fɔ kɛ atatuiaŋ ni efee bluu lɛ. Wɔbaanyɛ wɔna loofɔji bibii ni hɔmɔ miiye amɛ po, tamɔ nɔ ni wɔnaa yɛ mfoniri lɛ mli lɛ. Eyɛ naakpɛɛ diɛŋtsɛ akɛ wɔmiina nibii ni tamɔ nɛkɛ, aloo jeee nakai?—

Shi namɔ fee nɛkɛ nibii nɛɛ? Ani gbɔmɔ ko fee amɛ? Dabi. Gbɔmɛi baanyɛ ama tsũ. Shi gbɔmɔ ko nyɛŋ afee jwɛi fɔ ni kwɛ̃ɔ lɛ. Gbɔmɛi nyɛŋ abɔ loofɔlɔ bi, fɔfɔi, loo nɔ kroko ni yɔɔ wala mli. Ani ole nakai?—

Nyɔŋmɔ ji mɔ ni fee nɛkɛ nibii nɛɛ fɛɛ. Nyɔŋmɔ fee ŋwɛi kɛ shikpɔŋ. Efee gbɔmɛi hu. Ebɔ klɛŋklɛŋ nuu kɛ yoo lɛ. Yesu, ni ji Tsɔɔlɔ Kpele lɛ, tsɔɔ nakai.—Mateo 19:4-6.

 Te fee tɛŋŋ ni Yesu le akɛ Nyɔŋmɔ ji mɔ ni fee nuu kɛ yoo lɛ? Ani Yesu na ni Nyɔŋmɔ miifee nakai?— Hɛɛ, ena. Yesu kɛ Nyɔŋmɔ yɔɔ beni Nyɔŋmɔ bɔ nuu kɛ yoo lɛ. Yesu ji klɛŋklɛŋ mɔ ni Nyɔŋmɔ bɔ lɛ. Yesu ji ŋwɛibɔfo, ni ekɛ e-Tsɛ lɛ hi ŋwɛi.

Biblia lɛ kɛɔ wɔ akɛ, Nyɔŋmɔ kɛɛ akɛ: ‘Ha wɔbɔ gbɔmɔ.’ (1 Mose 1:26) Ani ole mɔ ni Nyɔŋmɔ kɛ lɛ wieɔ lɛ?— Eewie eetsɔɔ e-Bi lɛ. Eewie eetsɔɔ mɔ ni yɛ sɛɛ mli lɛ eba shikpɔŋ nɔ ebatsɔ Yesu lɛ.

Ani enɛ jeee miishɛɛ sane? Bo lɛ susumɔ he okwɛ! Kɛji akɛ wɔbo Yesu toi lɛ, belɛ mɔ ni kɛ Nyɔŋmɔ yɔɔ beni Nyɔŋmɔ fee shikpɔŋ lɛ kɛ nibii krokomɛi fɛɛ lɛ ji mɔ ni tsɔɔ wɔ nii lɛ. Yesu kase nii babaoo kɛjɛ e-Tsɛ ni yɔɔ ŋwɛi lɛ ŋɔɔ, akɛni ekɛ lɛ tsu nii hewɔ. Ebɛ naakpɛɛ mɔ akɛ Yesu ji Tsɔɔlɔ Kpele lɛ!

 Ani osusuɔ akɛ Nyɔŋmɔ bɛ miishɛɛ akɛni ekome too pɛ eyɔɔ dani ebɔ e-Bi lɛ?— Dabi, eyɛ miishɛɛ. Ojogbaŋŋ, kɛji akɛ ejeee mɔ ni bɛ miishɛɛ lɛ, mɛni hewɔ efee nibii krokomɛi ni yɔɔ wala mli lɛ?— Efee nibii krokomɛi hu ejaakɛ eji Nyɔŋmɔ ni yɔɔ suɔmɔ. Eesumɔ ni mɛi krokomɛi ahi shi ní amɛná wala mli ŋɔɔmɔ. Esa akɛ wɔda Nyɔŋmɔ shi akɛ eha wɔ wala.

Nɔ fɛɛ nɔ ni Nyɔŋmɔ efee lɛ tsɔɔ suɔmɔ ni eyɔɔ. Nyɔŋmɔ fee hulu. Hulu lɛ hãa wɔnáa la ni ehãa wɔhe dɔɔ. Eji wɔbɛ hulu lɛ kulɛ, nɔ fɛɛ nɔ baafee ŋanii ni wala ehiŋ shikpɔŋ nɔ. Ani efeee bo miishɛɛ akɛ Nyɔŋmɔ fee hulu lɛ?—

Nyɔŋmɔ haa nugbɔ nɛɔ hu. Bei komɛi lɛ ekolɛ osumɔŋ nugbɔnɛmɔ, ejaakɛ onyɛŋ oyashwɛ yɛ agbo lɛ naa. Shi nugbɔnɛmɔ yeɔ buaa ni fɔfɔii kwɛ̃ɔ. No hewɔ lɛ, kɛ́ wɔna fɔfɔii fɛfɛji lɛ, namɔ esa akɛ wɔda lɛ shi?— Nyɔŋmɔ. Ni namɔ shi wɔbaada kɛ́ wɔye aduawai kɛ yelibaai ni ŋɔɔ lɛ?— Esa akɛ wɔda Nyɔŋmɔ shi ejaakɛ ehulu kɛ enu haa nibii kwɛ̃ɔ.

Feemɔ he mfoniri yɛ ojwɛŋmɔ mli ni mɔ ko ebi bo akɛ: ‘Ani Nyɔŋmɔ ji mɔ ni bɔ gbɔmɛi kɛ kooloi hu lɛ?’ Mɛni obaakɛɛ?— Eja akɛ oookɛɛ akɛ: “Hɛɛ, Nyɔŋmɔ bɔ gbɔmɔ kɛ kooloi lɛ.” Shi kɛ́ mɔ ko heee eyeee akɛ Nyɔŋmɔ diɛŋtsɛ fee gbɔmɛi hu? Shi kɛ́ mɔ lɛ kɛɛ akɛ gbɔmɔ ba kɛjɛ kooloi amli hu? Ojogbaŋŋ, Biblia lɛ etsɔɔɔ nakai. Ekɛɔ akɛ Nyɔŋmɔ bɔ nibii fɛɛ ni wala yɔɔ amɛmli lɛ.—1 Mose 1:26-31.

Shi ekolɛ mɔ ko baakɛɛ bo akɛ eheee eyeee akɛ Nyɔŋmɔ yɛ. No lɛ mɛni obaakɛɛ?— Mɛni hewɔ okɛ onine etsɔɔɔ shia ko? Bi mɔ lɛ akɛ: “Namɔ ma nakai shia lɛ?” Mɔ fɛɛ mɔ le akɛ esa akɛ mɔ ko ama enɛ. Eyɛ faŋŋ akɛ shia lɛ emaaa lɛ diɛŋtsɛ ehe.—Hebribii 3:4.

 Agbɛnɛ okɛ gbɔmɔ lɛ aya abɔɔ ko mli ni otsɔɔ lɛ fɔfɔi. Bi lɛ akɛ: “Namɔ fee enɛ?” Gbɔmɔ ko nyɛŋ afee enɛ. Ni tamɔ bɔ ni shia lɛ emaaa lɛ diɛŋtsɛ ehe lɛ, nakai nɔŋŋ nɛkɛ fɔfɔi nɛɛ hu efeee lɛ diɛŋtsɛ ehe. Mɔ ko fee. Nyɔŋmɔ fee.

Kɛɛmɔ mɔ lɛ akɛ emɛ ni ebo loofɔlɔ ko lala toi. Agbɛnɛ bi lɛ akɛ: “Namɔ bɔ loofɔji lɛ ni etsɔɔ amɛ lala lɛ?” Nyɔŋmɔ ji mɔ ni bɔ. Nyɔŋmɔ ji mɔ ni bɔ ŋwɛi kɛ shikpɔŋ kɛ nibii fɛɛ ni yɔɔ wala mli lɛ! Lɛ ji Mɔ ni kɛ wala haa mɔ.

Kɛlɛ, ekolɛ mɔ ko baakɛɛ akɛ nɔ ni enaa pɛ eheɔ eyeɔ. Ekolɛ ebaakɛɛ akɛ: ‘Kɛ minyɛɛɛ mana lɛ, miheee miyeee.’ No hewɔ lɛ, mɛi komɛi kɛɔ akɛ amɛheee Nyɔŋmɔ nɔ amɛyeee ejaakɛ amɛnaaa lɛ.

Eji anɔkwale akɛ wɔnyɛɛɛ wɔna Nyɔŋmɔ. Biblia lɛ kɛɔ akɛ: ‘Gbɔmɔ ko nyɛŋ ana Nyɔŋmɔ.’ Nuu, loo yoo, loo gbekɛ ko bɛ shikpɔŋ nɔ ni baanyɛ ana Nyɔŋmɔ. No hewɔ lɛ, mɔ ko akabɔ mɔdɛŋ akɛ eeefee Nyɔŋmɔ he mfoniri ko loo amaga. Nyɔŋmɔ kɛɔ wɔ po akɛ wɔkafee ehe amaga ko. No hewɔ lɛ, Nyɔŋmɔ naŋ he miishɛɛ kɛji akɛ wɔyɛ nibii ni tamɔ nakai yɛ wɔshia lɛ mli.—2 Mose 20:4, 5; 33:20; Yohane 1:18.

Shi kɛ onyɛɛɛ ona Nyɔŋmɔ lɛ, te feɔ tɛŋŋ ni oleɔ akɛ Nyɔŋmɔ yɛ diɛŋtsɛ hu? Susumɔ nɔ ni nyiɛ sɛɛ nɛɛ he okwɛ. Ani obaanyɛ ona kɔɔyɔɔ?— Dabi. Mɔ ko mɔ ko nyɛŋ ana kɔɔyɔɔ. Shi obaanyɛ ona nibii ni kɔɔyɔɔ feɔ. Obaanyɛ ona ni baai miihoso kɛ́ kɔɔyɔɔ tswa kɛtsɔ tso niji lɛ amli. No hewɔ lɛ, oheɔ oyeɔ akɛ kɔɔyɔɔ yɛ.

Obaanyɛ ona nibii ni Nyɔŋmɔ efee lɛ hu. Kɛ́ ona fɔfɔi ni egba afoforo loo loofɔlɔ lɛ, belɛ oona nɔ ko ni Nyɔŋmɔ efee. No hewɔ lɛ, oheɔ oyeɔ akɛ Nyɔŋmɔ yɛ diɛŋtsɛ.

Ekolɛ mɔ ko baabi bo akɛ, ‘Namɔ bɔ hulu lɛ kɛ shikpɔŋ lɛ?’ Biblia lɛ kɛɔ akɛ: “Nyɔŋmɔ bɔ ŋwɛi kɛ shikpɔŋ.” (1 Mose 1:1) Hɛɛ,  Nyɔŋmɔ fee nɛkɛ naakpɛɛ nibii nɛɛ fɛɛ! Te onuɔ enɛ he ohaa tɛŋŋ?—

Ani eŋɔɔɔ onaa akɛ oyɛ wala mli? Wɔbaanyɛ wɔnu loofɔji alalai ni ŋɔɔ lɛ. Wɔbaanyɛ wɔna fɔfɔii kɛ nibii krokomɛi ni Nyɔŋmɔ efee lɛ. Ni wɔbaanyɛ wɔye niyenii srɔtoi ni Nyɔŋmɔ kɛha wɔ lɛ.

Esa akɛ wɔda Nyɔŋmɔ shi yɛ nɛkɛ nibii nɛɛ fɛɛ hewɔ. Nɔ ni fe fɛɛ lɛ, esa akɛ wɔda lɛ shi yɛ wala ni ekɛha wɔ lɛ hewɔ. Kɛji akɛ wɔkɛ shidaa haa Nyɔŋmɔ diɛŋtsɛ lɛ, wɔbaafee nɔ ko. Mɛni ji no?— Wɔbaabo Nyɔŋmɔ toi, ni wɔbaafee nɔ ni ekɛɔ wɔ yɛ Biblia lɛ mli lɛ. Yɛ nɛkɛ gbɛ nɔ lɛ, wɔbaanyɛ wɔtsɔɔ akɛ wɔsumɔɔ Mɔ ni fee nibii fɛɛ lɛ.