CHE aikuaa peteĩ mbaʼe iporãitereíva. ¿Rehendusépa?... Emañamína nde póre. Koʼág̃a emboty ha eavri jey. Ejagarramína koʼág̃a peteĩ mbaʼe. Nde ikatu rejapo heta mbaʼe nde pópe. Péro, ¿reikuaa piko mávapa ojapo ñande po?...

Upeichaite, Ñandejára hína, pe Mboʼehára Guasu túva. Haʼe ojapo vaʼekue avei nde juru, ne tĩ ha nde resa. ¿Ndépa revyʼa Ñandejára ojapo haguére ñande resa?... Upéicha rupi ikatu jahecha heta mbaʼe, por ehémplo umi yvoty, pe pásto vérde ha yvága hovy asy. Avei ikatu jahecha mbaʼéichapa okaru umi guyraʼi mimi, jahechaháicha ko divúhope. ¿Revyʼápa ikatu haguére rehecha hetaite mbaʼe porã?...

Péro, ¿mávapa ojapo koʼã mbaʼe? ¿Peteĩ kuimbaʼe piko? Nahániri. Umi kuimbaʼe ikatu ojapo óga ha umícha, péro ndaikatúi ojapo umi plánta okakuaáva, peteĩ guyraʼi ni umi yvoty. ¿Ndépa reikuaáva voi upéva?...

Ñandejára ojapo vaʼekue opa mbaʼe: yvága, yvy ha yvyporakuérape. Pe Mboʼehára Guasu omboʼe vaʼekue Ñandejára  ojapo hague pe kuimbaʼe ha kuña ypykuépe (Mateo 19:4-6).

¿Mbaʼéichapa Jesús oikuaa upéva? ¿Ohecha mbaʼe piko ojapórõ guare chupekuéra?... Si. Jesús oĩ vaʼekue Ñandejára ndive upérõ guare. Ñandejára ojapo vaʼekue chupe raẽvete. Jesús ningo peteĩ ánhel vaʼekue oikóva Itúva ndive yvágape.

La Bíbliape jatopa Ñandejára heʼi hague: ‘Jajapóna yvypórape’ (Génesis 1:26). ¿Reikuaápa mávapepa oñeʼẽ raʼe Ñandejára?... Oñemongeta Itaʼýra Jesús ndive. Upe rire haʼe ou vaʼekue onase ko yvy ape ári.

Epensamíntena: ñahendu jave Jesúspe ndahaʼeiete oimeraẽva pe ñanemboʼéva. Síno pe oĩ vaʼekue Ñandejára ndive ojapórõ guare ko yvy ha opa mbaʼe. Jesús oaprende heta mbaʼe ombaʼapórõ guare Itúvandi. ¡Ajeve voi ningo haʼe pe Mboʼehára Guasu!

 ¿Ndépa ere Ñandejára ndovyʼái hague haʼeño ha upévare ojapo Jesúspe?... Nahániri. ¿Mbaʼérepa upéicharõ ojapo umi ánhel, mymbakuéra ha yvyporakuérape?... Ñandejára ningo oporohayhu, ha upévare oipota oĩ ótro oikovéva ha ovyʼáva ko yvy ape ári ha yvágape. Ñande jaagradese vaʼerã chupe ñandeapo haguére.

Opa mbaʼe Ñandejára ojapo vaʼekue ohechauka ñanderayhuha. Por ehémplo, pe kuarahy ohesape ha ombyaku ko yvy. Ndaipóririre pe kuarahy, roʼyeterei vaʼerãmoʼã ha ndaikatumoʼãi ojeiko ko yvy ape ári. ¿Revyʼápa Ñandejára ojapo haguére pe kuarahy?...

Ñandejára ojapo avei pe ama. Ikatu oime nandegustapái oky jave, ndaikatúi rupi resẽ rehuga. Péro okýrõmante okakuaáta umi yvoty. Upévare jahechárõ umi yvoty iporãva, ¿mávapepa jaagradese vaʼerã?... Ñandejárape. ¿Ha mbaʼépa jajapo vaʼerã jaʼu jave umi yva ha verdúra hetereíva?... Jaagradese vaʼerã Ñandejárape. Haʼe ningo pe ojapo vaʼekue pe kuarahy ha avei ombou pe ama omongakuaáva umi plánta.

Ñamoĩ chupe oĩha oporandúva ndéve: “¿Ojapópa rakaʼe Ñandejára mymbakuéra ha yvypórape?”. ¿Mbaʼépa eréne chupe?... Oĩ porãta eréramo: “Si, Ñandejára ojapo mymbakuéra ha yvypórape”. Péro ¿ndogueroviáiramo ha heʼi ndéve ñande jajuha mymbágui? La Biblia ningo nomboʼéi upéva, heʼi guei Ñandejára ojapo hague mymbakuéra ha yvypórape (Génesis 1:26-31).

Ha oĩramo peteĩ ndojeroviáiva Ñandejárare, ¿mbaʼépa eréne chupe?... Ikatu rehechauka chupe peteĩ óga ha reporandu: “¿Mávapa ojapo amo óga?”. Entéronte jaikuaa oĩha peteĩ ojapo vaʼekue upe óga, ndaikatúingo osẽ reínte upépe (Hebreos 3:4).

 Upéi ikatu reho hendive peteĩ hardínpe, rejagarra peteĩ yvoty ha reporandu chupe: “¿Mávapa ojapo ko yvoty?”. Ndojapói peteĩ kuimbaʼe. Péro oĩháicha peteĩ ojapóva upe óga, oĩmante vaʼerã avei peteĩ ojapo vaʼekue pe yvoty. Ha upéva hína Ñandejára.

Upéi erekuaa chupe tohendumi umi guyraʼi opurahéivo, ha eporandu chupe: “¿Mávapa ojapo umi guyraʼi, ha mávapa omboʼe chupekuéra opuraheikuaa hag̃ua?”. Ñandejára ojapo vaʼekue yvága, yvy ha opa mbaʼe oikovéva.

Ikatu oĩ heʼíva ndéve ogueroviaha upe ohechávante. Ha heʼi: “Che ndagueroviamoʼãi ndahecháirõ”. Koʼág̃arupi oĩ heta opensáva upéicha, ha upévare ndojeroviái Ñandejárare.

Ndaikatúi añete jahecha Ñandejárape. La Biblia heʼi voi: ‘Avave ndaikatúi ohecha Ñandejárape’. Ni peteĩ kuimbaʼe, kuña ni mitã ndaikatúi ohecha chupe. Upévare ndovaléi ojejapo Ñandejára raʼanga. Haʼe voi omanda ani hag̃ua ojejapo upéva. Upéicharõ ikatu jaʼe Ñandejárape ndogustaiha jareko taʼanga ha santokuéra ñande rógape (Éxodo 20:4, 5; 33:20; Juan 1:18).

Péro, ¿mbaʼéichapa ikatu jaikuaa Ñandejára oexistiha? Epensamína ko mbaʼére: ¿ikatúpa rehecha pe yvytu?... Nahániri, avave ndaikatúi ohecha upéva. Péro ikatu rehecha umi mbaʼe ojapóva; por ehémplo, omonguʼe jave umi yvyra rogue térã reñandu oipeju kangy asy jave. Upéicha rupi reikuaa oexistiha.

Upéicha avei ikatu reguerovia Ñandejára oexistiha rehechávo umi mbaʼe haʼe ojapo vaʼekue. Remañáramo peteĩ yvoty térã guyraʼíre rehecha hína Ñandejára rembiapokue.

Ikatu oĩ oporandúva ndéve: “¿Mávapa ojapo ko yvy ha pe kuarahy?”. La Biblia omombeʼu ‘Ñandejára ojapo hague yvága ha  yvy’ (Génesis 1:1). Upeichaite, Ñandejára ojapo koʼã mbaʼe porãite. ¿Mbaʼépa nde repensa koʼã mbaʼére?...

¡Ajépa javyʼaite jaikove haguére! Ikatu ñahendu umi guyraʼi opurahéivo, jahecha umi yvoty ha opa mbaʼe Ñandejára ojapo vaʼekue. Avei jaʼu umi tembiʼu Ñandejára omeʼẽva ñandéve.

Jaagradese vaʼerã Ñandejárape koʼã mbaʼére, ha avei ñandeapo haguére. Jaagradeséramo chupe jajapóta peteĩ mbaʼe. ¿Mbaʼépa hína upéva?... Ñahendúta Ñandejárape ha jajapóta umi mbaʼe omandáva ñandéve la Biblia rupive. Upéicha jajapóramo, jahechaukáta jahayhuha upe ojapo vaʼekuépe opa mbaʼe.