MAY nahibaluan ako nga isa ka makatilingala nga butang. Luyag mo bala mabatian ini?— Tan-awa ang imo kamot. Kulua ang imo mga tudlo. Nian, pudyuta ang isa ka butang. Madamo ang mahimo sang imo kamot, kag may kalantip. Nahibaluan mo bala kon sin-o ang naghimo sang aton mga kamot?—

Huo, amo man ang Isa nga naghimo sang aton baba, ilong, kag mga mata. Amo ang Dios, ang Amay sang Daku nga Manunudlo. Wala bala kita nalipay nga ginhatagan kita sang Dios sing mga mata?— Paagi sa sini madamo kita sing makita. Makita naton ang mga bulak. Makita naton ang berde nga mga hilamon kag ang asul nga langit. Mahimo pa gani kita makakita sing boto nga mga pispis nga nagapatugon sing pagkaon kaangay sang yara sa laragway. Sa pagkamatuod, indi bala makalilipay nga makita naton ang mga butang kaangay sini?—

Apang sin-o ang naghimo sining mga butang? Tawo bala ang naghimo sa ila? Indi. Ang mga tawo makahimo sing balay. Apang wala sing tawo nga makahimo sing hilamon nga nagatubo. Ang mga tawo indi makahimo sing boto sang pispis, sing bulak, ukon sing bisan ano nga buhi nga butang. Nahibaluan mo bala ini?—

Ang Dios amo ang naghimo sining tanan nga butang. Ginhimo sang Dios ang langit kag duta. Ginhimo man niya ang mga tawo. Gintuga niya  ang una nga lalaki kag una nga babayi. Gintudlo ini ni Jesus, ang Daku nga Manunudlo.—Mateo 19:4-6.

Paano nahibal-an ni Jesus nga ginhimo sang Dios ang lalaki kag babayi? Nakita bala ni Jesus sang ginhimo ini sang Dios?— Huo. Si Jesus upod sa Dios sang ginhimo sang Dios ang lalaki kag babayi. Si Jesus amo ang una nga persona nga ginhimo sang Dios. Si Jesus isa anay ka anghel, kag nagpuyo sia sa langit upod sa iya Amay.

Ang Biblia nagasugid sa aton nga ang Dios nagsiling: “Himuon naton ang tawo.” (Genesis 1:26) Nahibaluan mo bala kon sin-o ang kahambal sadto sang Dios?— Kahambal niya ang iya Anak. Kahambal niya ang isa nga nagkari sang ulihi sa duta kag nangin si Jesus.

Indi bala makakulunyag ini? Hunahunaa lamang! Kon mamati kita kay Jesus, ginatudluan kita sang isa nga kaupod sang Dios sang ginhimo sang Dios ang duta kag ang tanan nga iban pa nga butang. Madamo ang natun-an  ni Jesus gikan sa pagpangabudlay upod sa iya Amay sa langit. Indi katingalahan nga si Jesus isa ka Daku nga Manunudlo!

Sa banta mo ayhan masubo ang Dios nga nagaisahanon sia antes niya gintuga ang iya Anak?— Indi. Ti, kon indi sia masubo, ngaa ginhimo niya ang iban pa buhi nga mga butang?— Ginhimo niya ini bangod isa sia ka Dios sang gugma. Luyag niya nga mabuhi man ang iban kag mangin malipayon. Dapat kita magpasalamat sa Dios nga ginhatagan niya kita sing kabuhi.

Ang tanan nga ginhimo sang Dios nagapakita sang iya gugma. Ginhimo sang Dios ang adlaw. Ang adlaw nagahatag sa aton sing kapawa kag nagapainit sa aton. Ang tanan mangin matugnaw kag wala sing kabuhi sa duta kon wala kita sing adlaw. Wala ka bala nalipay nga ginhimo sang Dios ang adlaw?—

Ginhimo man sang Dios ang ulan. Kon kaisa indi mo luyag mag-ulan bangod indi ka makahampang sa guwa. Apang ang ulan nagabulig sa mga bulak sa pagtubo. Gani kon makakita kita sing matahom nga mga bulak, sin-o ang pasalamatan naton?— Ang Dios. Kag sin-o ang dapat naton pasalamatan kon nagakaon kita sing manamit nga mga prutas kag mga utan?— Dapat naton pasalamatan ang Dios bangod ang iya adlaw kag ulan amo ang nagapatubo sa mga butang.

Pananglit may mamangkot sa imo, ‘Ginhimo bala sang Dios ang tawo kag ang mga sapat man?’ Ano ang isabat mo?— Husto nga isiling: “Huo, ginhimo sang Dios ang tawo kag ang mga sapat.” Apang ano kon ang isa ka tawo indi magpati nga ginhimo gid sang Dios ang mga tawo? Ano kon magsiling sia nga ang tawo naghalin sa mga sapat? Ti, wala ini ginatudlo sang Biblia. Ini nagasiling nga gintuga sang Dios ang tanan nga buhi nga butang.—Genesis 1:26-31.

Apang mahimo may magsiling sa imo nga wala sia nagapati sa Dios. Ano nian ang isiling mo?— Ngaa indi mo itudlo ang isa ka balay? Pamangkuta sia: “Sin-o ang naghimo sina nga balay?”  Nahibal-an sang tanan nga may naghimo sini. Wala gid paghimua sang balay ang iya kaugalingon!—Hebreo 3:4.

Nian dalha sia sa isa ka hardin kag ipakita sa iya ang bulak. Pamangkuta sia: “Sin-o ang naghimo sini?” Wala ini ginhimo sang tawo. Kag subong nga wala paghimua sang balay ang iya kaugalingon, wala man paghimua sini nga bulak ang iya kaugalingon. May naghimo sini. Amo ang Dios.

Pangabaya sia nga magdulog kag pamatian ang huni sang isa ka pispis. Dayon pamangkuta sia: “Sin-o ang naghimo sa mga pispis kag nagtudlo sa ila sa paghuni?” Amo ang Dios. Ang Dios amo ang naghimo sang langit kag duta kag sang tanan buhi nga butang! Sia ang Isa nga nagahatag sing kabuhi.

Apang, mahimo may magsiling nga ang ginapatihan niya amo lamang ang iya makita. Mahimo magsiling sia: ‘Indi ako magpati kon indi ko makita ang isa ka butang.’ Gani nagasiling ang iban nga mga tawo nga wala sila nagapati sa Dios bangod indi nila makita sia.

Matuod indi naton makita ang Dios. Ang Biblia nagasiling: ‘Wala sing tawo nga makakita sa Dios.’ Wala sing lalaki, babayi, ukon bata sa duta nga makakita sa Dios. Gani indi dapat paghimuan sing laragway ukon imahen ang Dios. Ginadumilian pa gani kita sang Dios nga himuan sia sing imahen. Gani, indi naton mapahamut-an ang Dios kon may subong kita sini nga mga butang sa aton balay.—Exodo 20:4, 5; 33:20; Juan 1:18.

Apang kon indi mo makita ang Dios, paano mo nahibaluan nga may Dios gid? Hunahunaa ini. Makita mo bala ang hangin?— Indi. Wala sing makakita sa hangin. Apang makita mo ang mga butang nga ginahimo sang hangin. Makita mo ang mga dahon nga nagahulag kon maghuyop ang hangin sa mga sanga sang isa ka kahoy. Gani nagapati ka nga may hangin.

Makita mo man ang mga butang nga ginhimo sang Dios. Kon makakita ka sing isa ka bulak ukon pispis, nakita mo ang isa ka butang nga ginhimo sang Dios. Gani nagapati ka nga may Dios gid.

Mahimo may mamangkot sa imo, ‘Sin-o ang naghimo sang adlaw kag duta?’ Ang Biblia nagasiling: “Gintuga sang Dios ang mga langit kag ang  duta.” (Genesis 1:1) Huo, ginhimo sang Dios ining tanan nga makatilingala nga mga butang! Ano ang ginabatyag mo sa sini?—

Indi bala makalilipay nga buhi kita? Mabatian naton ang matahom nga mga huni sang mga pispis. Makita naton ang mga bulak kag ang iban pa nga mga butang nga ginhimo sang Dios. Kag makaon naton ang mga kalan-on nga ginhatag sa aton sang Dios.

Dapat naton pasalamatan ang Dios sa sining tanan nga butang. Labaw sa tanan, dapat naton sia pasalamatan sa kabuhi nga ginhatag niya sa aton. Kon ginapasalamatan gid naton ang Dios, may butang kita nga himuon. Ano ini?— Mamati kita sa Dios, kag himuon naton ang ginasiling niya sa aton sa Biblia. Sa sining paagi mapakita naton nga ginahigugma naton ang Isa nga naghimo sang tanan nga butang.