ADDA ammok a nakaskasdaaw. Kayatmo kadi a maammuan?— Kitaem ta imam. Ikukotmo dagita ramaymo. Ita, mangpidutka iti uray ania. Adu ti nasayaat a maaramidan ta imam. Ammom kadi no siasino ti nangaramid kadagiti imatayo?—

Wen, isu met laeng Daydiay nangaramid iti ngiwat, agong, ken matatayo. Awan sabali no saan a ti Dios, ti Ama ti Naindaklan a Mannursuro. Ditayo aya maragsakan ta inikkannatayo ti Dios iti mata?— Adu ti makitatayo ta adda matatayo. Makitatayo dagiti sabsabong. Makitatayo dagiti berde a ruot ken asul a tangatang. Makitatayo pay dagiti babassit a tumatayab a mangmangan, a kas kadagiti nailadawan ditoy. Talaga a nakaskasdaaw gapu ta makitatayo dagita, di ngamin?—

Ngem siasino ti nangaramid kadagita? Tao kadi? Saan. Makaaramid ti tao iti balay. Ngem saan a makaaramid ti tao kadagiti agtubo a ruot. Saan a makaaramid ti tao iti bassit a tumatayab, sabong, wenno uray ania a sibibiag a banag. Ammom kadi dayta?—

Ti Dios ti nangaramid amin kadagita. Ti Dios ti nangaramid iti langit ken ti daga. Isu met ti nangaramid kadagiti tattao. Isu ti  nangparsua iti immuna a lalaki ken babai. Kasta ti insuro ni Jesus, ti Naindaklan a Mannursuro.​—Mateo 19:4-6.

Kasano a naammuan ni Jesus a ti Dios ti nangaramid iti lalaki ken babai? Nakita kadi ni Jesus ti panangaramid ti Dios kadakuada?— Wen, nakitana. Kadua ni Jesus ti Dios idi aramiden ti Dios ti lalaki ken babai. Ni Jesus ti immuna a persona nga inaramid ti Dios. Dati nga anghel ni Jesus, ken agnanaed idi idiay langit a kaduana ni Amana.

Kas mabasatayo iti Biblia, kinuna ti Dios: “Aramidenta ti tao.” (Genesis 1:26) Ammom kadi no siasino ti kasarsarita idi ti Dios?— Kasarsaritana ti Anakna. Kasarsaritana idi daydiay ibaonnanto ditoy daga ken agbalinto a Jesus.

Saan aya a makapainteres dayta? Agasem! No agimdengtayo ken Jesus, isursuronatayo daydiay kadua ti Dios idi aramidenna ti daga ken amin a dadduma pay a bambanag. Adu ti naadal ni Jesus idi agtartrabaho  a kadua ni Amana idiay langit. Di pakasdaawan a ni Jesus ti Naindaklan a Mannursuro!

Panagkunam naliday ngata ti Dios sakbay nga inaramidna ti Anakna gapu ta awan pay idi ti kaduana?— Saan. No saan a naliday, apay ngarud a nagaramid iti sabsabali pay a nabiag a bambanag?— Inaramidna daytoy gapu ta isu ket Dios ti ayat. Kayatna nga agbiag ken agragsak dagiti sabsabali. Rumbeng nga agyamantayo iti Dios gapu ta inikkannatayo iti biag.

Amin nga inaramid ti Dios ket pammaneknek iti ayatna. Inaramid ti Dios ti init. Ti init ti manglawag ken mangpapudot kadatayo. Nakalamlamiis ken awan koma ti biag ditoy daga no awan ti init. Dika aya maragsakan ta inaramid ti Dios ti init?—

Kasta met, ti Dios ti mangmangted iti tudo. No dadduma mabalin a dimo kayat ti tudo gapu ta dika makapagay-ayam idiay ruar no agtudtudo. Ngem makatulong ti tudo tapno agtubo dagiti sabsabong. Isu a no makakitatayo iti napipintas a sabsabong, siasino ti pagyamanantayo?— Ti Dios. Ket siasino ti rumbeng a pagyamanantayo no mangantayo kadagiti naimas a prutas ken natnateng?— Agyamantayo koma iti Dios agsipud ta timmaud dagita gapu iti inaramidna nga init ken tudo.

No kas pagarigan ta adda agsaludsod kenka, ‘Ti Dios kadi ti nangaramid met iti tao ken an-animal?’ Ania ti sungbatmo?— Umiso a kunaem: “Wen, ti Dios ti nangaramid iti tao ken an-animal.” Ngem ania ngay no dina patien a ti Dios a talaga ti nangaramid kadagiti tattao? Ania ngay no kunana nga iti animal ti naggapuan ti tao? Siempre, saan a kasta ti isursuro ti Biblia. Kunana a ti Dios ti nangparsua iti amin a sibibiag a banag.​—Genesis 1:26-31.

Ngem mabalin nga adda mangibaga kenka a dina patien ti Dios. No kasta, ania ti ibagam?— Padasem ti mangitudo  iti maysa a balay. Isaludsodmo kenkuana: “Siasino ti nangaramid iti dayta a balay?” Ammotayo amin nga adda nangaramid iti dayta. Sigurado a saan a basta tumaud lattan ti balay!​—Hebreo 3:4.

Kalpasanna, mapankayo iti hardin ket mangipakitaka iti sabong. Isaludsodmo: “Siasino ti nangaramid iti daytoy?” Saan a tao. Ket no kasano nga adda nangaramid iti balay, adda met nangaramid iti daytoy a sabong. Inaramid dayta ti Dios.

Ibagam kenkuana a denggenna ti kanta ti tumatayab. Kalpasanna, isaludsodmo: “Siasino ti nangaramid kadagiti tumatayab ken nangisuro kadakuada nga agkanta?” Ti Dios. Ti Dios ti nangaramid iti langit ken daga ken amin a sibibiag a bambanag! Isu ti mangmangted iti biag.

Ngem adda agkuna a dagidiay laeng makitana ti patienna. Mabalin a kunana: ‘Diak patien no diak makita.’ Dayta ti gapuna nga adda tattao nga agkuna a dida patien ti Dios gapu ta dida makita.

Agpayso a ditay makita ti Dios. Kuna ti Biblia: ‘Awan ti tao a makakita iti Dios.’ Awan ti lalaki, babai, wenno ubing ditoy daga a makakita iti Dios. Isu a saantay koma a padasen ti agaramid iti retrato wenno ladawan ti Dios. Ti Dios pay ketdi ti mangibagbaga a ditay agaramid iti ladawanna. Gapuna, saan ngarud a makaay-ayo iti Dios no addaantayo iti kakasta iti balaytayo.​—Exodo 20:4, 5; 33:20; Juan 1:18.

Ngem no ditay makita ti Dios, kasanotayo nga ammo a talaga nga adda Dios? Panunotem daytoy. Makitam kadi ti angin?— Saan. Awan ti makakita iti angin. Ngem makitam dagiti maaramidan ti angin. Makitam nga agkuti dagiti bulong no agangin kadagiti sanga ti kayo. Dayta ti gapuna a patiem nga adda angin.

Makitam met dagiti naaramidan ti Dios. No makakitaka iti sibibiag a sabong wenno tumatayab, makitam ti inaramid ti Dios. Isu a patiem a talaga nga adda Dios.

Mabalin nga adda agsaludsod kenka, ‘Siasino ti nangaramid iti init ken ti daga?’ Kuna ti Biblia: “Ti Dios pinarsuana ti langlangit ken ti  daga.” (Genesis 1:1) Wen, ti Dios ti nangaramid amin kadagitoy a nakaskasdaaw a banag! Ania ti makunam iti dayta?—

Saan aya a nagsayaat ta sibibiagtayo? Mangngegtayo ti nagpipintas a kanta dagiti tumatayab. Makitatayo dagiti sabsabong ken dadduma pay a banag nga inaramid ti Dios. Ket makantayo dagiti taraon nga inted ti Dios kadatayo.

Agyamantayo koma iti Dios gapu kadagitoy. Kangrunaanna, agyamantayo koma kenkuana gapu ta inikkannatayo iti biag. No napudno ti panagyamantayo iti Dios, adda masapul nga aramidentayo. Ania dayta?— Agimdengtayo iti Dios, ken aramidentayo dagiti ibilbilinna a masarakan iti Biblia. Iti kasta maipakitatayo nga ay-ayatentayo Daydiay nangaramid iti amin a banag.