KAPU 3

Muntu Yina Kusalaka Bima Yonso

MU MEZABA kima mosi ya kitoko. Keti nge kezola kuzaba yo?— Tala diboko na nge. Kangisa misapi na nge. Ntangu yai, baka kima mosi. Diboko na nge le sala mambu mingi, mpi yo le sala yo mbote. Keti nge mezaba kana nani kusalaka maboko na beto?—

Ee, Muntu yina kusalaka maboko yandi yina mosi kusalaka munoko na beto, mbombo na beto, mpi meso na beto. Muntu yango kele Nzambi, Tata ya Longi ya Nene. Keti beto ke na kyese ve na mpila Nzambi mepesaka beto meso?— Beto le mona bima mingi ti meso na beto. Beto le mona bintuntu. Beto le mona matiti mpi zulu ya kitoko. Beto le mona nkutu bandeke ke na kudya, bonso bayai ya ke na kifwanisu yai. Yo ke kyese mpenza na mpila beto kekuka kumona bima ya mutindu yai. Luvunu?—

Kansi, nani kusalaka bima yai? Bantu? Ve. Bantu le tunga nzo. Kansi ata muntu mosi ve le sala matiti yina keyelaka. Bantu le sala ve mwana ya ndeke, kintuntu, to kima yankaka ya ke na luzingu. Keti nge zabaka dyambu yai?—

Nzambi muntu kusalaka bima yai yonso. Nzambi kusalaka zulu ti ntoto. Yandi salaka mpi bantu. Yandi salaka bakala ti nkento ya ntete. Yezu, Longi ya Nene, kulongaka mambu yai.—Matayo 19:4-6.

 Inki mutindu Yezu kuzabaka nde Nzambi kusalaka bakala ti nkento? Keti Yezu kumonaka mutindu Nzambi kusalaka bo?— Ee, yandi monaka. Yezu kuvandaka ti Nzambi ntangu Nzambi kusalaka bakala ti nkento. Yezu kuvandaka muntu ya ntete ya Nzambi kusalaka. Yezu kuvandaka wanzyo, mpi yandi vandaka kuzinga na zulu ti Tata na yandi.

Biblia ketubila beto nde Nzambi kutubaka nde: “Ntangu yai beto ke sala bantu.” (Kuyantika 1:26) Keti nge le songa munu muntu yina Nzambi vandaka kutubila?— Yandi vandaka kutubila Mwana na yandi. Yandi vandaka kutubila muntu yina kwisaka na ntoto na nima ya bamvula mingi mpi yina kukumaka Yezu.

Keti mambu yai kepesa ve kyese? Yindula ntete! Kana beto kewila Yezu, pana yo kesonga nde muntu yina kuvandaka ti Nzambi ntangu Nzambi kusalaka ntoto mpi bima yankaka yonso ke na kulonga beto. Yezu kulongukaka mambu mingi na ntangu yandi vandaka kusala ti Tata na yandi na zulu. Mpila ya kuyituka kele ve na kumona nde Yezu mekumaka Longi ya Nene!

 Keti nge keyindula nde Nzambi kuvandaka ve na kyese ntangu yandi vandaka yandi mosi na ntwala ya kusala Mwana na yandi?— Ve, yandi vandaka na kyese. Kansi, kana yandi vandaka na kyese, sambu na nki yandi salaka bima yankaka yina kezingaka?— Yandi salaka bima yina sambu yandi ke Nzambi ya zola. Yandi kuzolaka nde bima ti bantu yankaka kuzinga mpi kusepela na luzingu. Beto fwe pesaka Nzambi mersi na mpila yandi mepesaka beto luzingu.

Bima yonso ya Nzambi mesalaka kesongaka zola na yandi. Nzambi kusalaka ntangu. Ntangu kepesaka beto nsemo mpi yo kesalaka nde beto wa ve madidi. Kana beto vandaka ve ti ntangu, nga bima yonso zolaka kuvanda madidi mpi mpila ya kuzinga na ntoto zolaka kuvanda ve. Keti nge kevandaka ve na kyese na kumona nde Nzambi mesalaka ntangu?—

Nzambi kenokisaka mpi mvula. Bantangu yankaka, nge le sepela ve ti mvula sambu kana yo kenoka nge le kwe sakana ve na nganda. Kansi, mvula kesadisaka bintuntu na kuyela. Yo yina, kana beto memona bintuntu ya kitoko, na nani beto tapesaka mersi sambu na yo?— Na Nzambi. Ebuna nani beto fwe pesaka mersi kana beto kedya bambuma mpi bandunda ya kitoko?— Beto fwe pesaka Nzambi mersi sambu ntangu mpi mvula na yandi keyedisaka bima.

Kana muntu kuyula nge nde: ‘Keti Nzambi muntu kusalaka bantu ti bambisi?’ Inki nge tatuba?— Yo tavanda mbote nge tuba nde: “Ee, Nzambi kusalaka muntu ti bambisi.” Kansi nki nge tasala kana muntu kendima ve nde Nzambi kusalaka mpenza bantu? Inki nge tatuba kana muntu yango kutuba nde muntu kukatukaka na bambisi? Biblia kelonga ve mpidina. Yo ketuba nde Nzambi kusalaka bima yonso ya kezingaka.—Kuyantika 1:26-31.

Kansi muntu yankaka le songa nge nde yandi kekwikilaka ve na Nzambi. Ebuna, inki nge tatuba?— Kana muntu mesonga nge mpidina, nge le songa yandi nzo mosi. Ebuna nge yula yandi nde: “Nani kutungaka nzo yai?” Bantu  yonso mezaba nde ke ti muntu kutungaka yo. Ya kyeleka, nzo yai kuditungaka ve yo mosi!—Baebreo 3:4.

Na nima, nata muntu yango na masamba ebuna songa yandi kintuntu mosi. Yula yandi nde: “Nani kusalaka kintuntu yai?” Muntu mosi ve kusalaka yo. Kaka mutindu nzo kuditungaka ve, kintuntu yai mpi kudisalaka ve. Kele ti Muntu kusalaka yo. Nzambi Muntu kusalaka yo.

Songa muntu yina nde vanda ntete pima sambu nge widikila nkunga ya ndeke keyimba. Na nima, yula yandi nde: “Nani kusalaka bandeke mpi kulongaka bo kuyimba?” Nzambi. Nzambi muntu kusalaka zulu ti ntoto ti bima yonso ya kezingaka! Yandi Muntu kepesaka luzingu.

Kansi, muntu le tuba nde yandi kekwikilaka kaka na bima yina ya yandi kemonaka. Yandi le tuba nde: ‘Kana mu memona ve kima, mu le kwikila ve na yo.’ Yo yina, bantu mingi ketubaka nde bo kekwikilaka ve na Nzambi sambu bo kemonaka yandi ve.

Ya kyeleka, beto le mona ve Nzambi. Biblia ketuba nde: ‘Muntu mosi ve le mona Nzambi.’ Ata muntu mosi ve na zulu ya ntoto le mona Nzambi, bakala, nkento, to mwana. Yo yina, ata muntu mosi ve le sosa kusala kifwanisu to kiteki ya Nzambi. Nkutu Nzambi ketubila beto nde beto sala ve kifwanisu na yandi. Yo yina, Nzambi ta sepela ve nde beto vanda ti bima ya mutindu yina na nzo na beto.—Kubasika 20:4, 5; 33:20; Yoane 1:18.

Beto kemonaka ve Nzambi, kansi nki mutindu nge mezaba nde ya kyeleka Nzambi kele? Yindula ntete. Keti nge le mona mupepe?— Ve. Ata muntu mosi ve le mona mupepe. Kansi nge le mona mambu yina mupepe kesalaka. Nge le mona matiti kenikana ntangu mupepe kenikisaka balutangu ya nti. Kana nge memona mpidina, pana nge kendimaka nde mupepe kele.

Nge le mona mpi bima yina Nzambi mesalaka. Kana nge memona kintuntu to ndeke mosi ya moyo, pana nge kemona kima mosi ya Nzambi mesalaka. Kana nge memona mpidina, nge kekwikilaka nde ya kyeleka Nzambi kele.

 Muntu le yula nge nde, ‘Nani kusalaka ntangu ti ntoto?’ Biblia ketuba nde: “Nzambi salaka zulu ti ntoto.” (Kuyantika 1:1) Ya kyeleka, Nzambi muntu kusalaka bima yai yonso ya kitoko! Inki mutindu nge kemonaka mambu yai?—

Keti nge kemonaka ve nde kuvanda na luzingu ke kitoko mpenza? Beto le wa bankunga ya kitoko ya bandeke. Beto le mona bintuntu ti bima yankaka ya Nzambi mesalaka. Mpi beto le dya madya yina Nzambi mepesaka beto.

Beto fwe pesaka Nzambi mersi sambu na bima yai yonso. Beto fwe pesaka yandi mersi mingimingi sambu na luzingu ya yandi mepesaka beto. Kana ya kyeleka beto kezolaka kupesa Nzambi mersi, beto tasala kima mosi. Inki kima yango?— Beto tawilaka Nzambi, mpi beto tasalaka mambu ya yandi ketubila beto na Biblia. Kana beto kesala mpidina, pana beto tamonisa nde beto kezolaka Muntu yina mesalaka bima yonso.

Beto fwe pesaka Nzambi mersi sambu na bima yonso ya yandi mesalaka. Inki mutindu nge tasala yo? Tanga mambu yina ke na Nkunga 139:14; Yoane 4:23, 24; 1 Yoane 5:21; mpi Kusonga 4:11.

[Kifwanisu ya kele na lutiti 21]

Nani kusalaka bima yonso ya kezingaka?

[Bifwanisu ya kele na lutiti 22, 23]

Sambu ke ti muntu kutungaka nzo yai, nani kusalaka bintuntu, banti, ti bambisi?

[Kifwanisu ya kele na lutiti 25]

Inki mutindu nge kezabaka nde mupepe kele?