NĨ HARĨ kaũndũ kega mũno njũĩ. Hihi no wende gũkaigua?— Ta rora guoko gwaku. Kũnja twara. Rĩu geria kuoya kĩndũ. Guoko gwaku no kũhote gwĩka maũndũ maingĩ, na kũmeke wega. Hihi nĩ ũĩ nũũ wombire moko maitũ?—

Ngai, Ithe wa Mũrutani Ũrĩa Mũnene nĩwe wombire moko maitũ na nowe wombire kanua, iniũrũ, na maitho maitũ. Githĩ tũtikenaga tondũ Ngai nĩ aatũheire maitho?— Nĩ tũhotaga kuona indo nyingĩ namo. No twĩrorere mahũa. No twĩrorere igũrũ rĩa mburuu o na nyeki nduru. Ningĩ no tũhote kuona twana twa nyoni tũkĩrĩa, ta tũtũ tũrĩ haha mbica-inĩ. Githĩ tũtikenaga mũno nĩ ũndũ wa kũhota kuona indo ta icio?—

Nũũ wombire indo icio? Hihi nĩ mũndũ waciũmbire? Aca. Andũ no mahote gwaka nyũmba. No gũtirĩ mũndũ ũngĩhota kũũmba nyeki ĩrakũra. Andũ matingĩhota kũũmba kaana ka nyoni, kana ihũa, kana kĩndũ kĩngĩ o gĩothe kĩ muoyo. Hihi nĩ ũroĩ ũguo?—

Nĩ Ngai wombire indo icio ciothe. Ngai nĩwe wombire igũrũ na thĩ. Na nowe wombire andũ. Akĩũmba mũthuri na mũtumia. Jesu, Mũrutani Ũrĩa Mũnene, nĩ aarutanire ũguo.—Mathayo 19:4-6.

 Jesu aamenyire atĩa atĩ nĩ Ngai wombire mũthuri na mũtumia? Hihi Jesu nĩ onire Ngai akĩmomba?— Ĩĩ nĩ onire. Jesu aarĩ hamwe na Ngai rĩrĩa Ngai ombaga mũthuri na mũtumia. Jesu nĩwe warĩ wa mbere kũũmbwo nĩ Ngai. Jesu ombirũo arĩ mũraika, na maikaraga na Ngai kũũrĩa igũrũ.

Bibilia ĩtwĩraga atĩ Ngai oigire ũũ: ‘Nĩ tũũmbe andũ.’ (Kĩambĩrĩria 1:26) Nĩ ũĩ Ngai aaragia na ũ?— Aaragia na Mũrũwe. Ũcio nĩwe wacokire agĩũka gũkũ thĩ agĩtuĩka Jesu.

Githĩ ũndũ ũcio ti wa magegania? Ta wĩcirie ũndũ ũyũ! Rĩrĩa twathikĩrĩria Jesu, tũkoragwo tũkĩrutwo nĩ mũndũ warĩ hamwe na Ngai rĩrĩa ombaga thĩ na indo iria ingĩ ciothe. Jesu nĩ eerutire maũndũ maingĩ mũno hĩndĩ ĩrĩa maarutaga wĩra na Ithe kũũrĩa igũrũ. Nĩkĩo Jesu aatuĩkire Mũrutani Ũrĩa Mũnene!

 Nĩ ũkuona ta Ngai aaiguaga ihooru hĩndĩ ĩrĩa aatũũraga arĩ wiki mbere ya kũũmba Mũrũwe?— Aca. Angĩkorũo ndaaiguaga ihooru-rĩ, ombire ciũmbe irĩ muoyo nĩkĩ? Ngai aaciũmbire tondũ nĩ arĩ wendo. Nĩ eendaga ciũmbe ingĩ ikenere muoyo. Nĩ twagĩrĩirũo gũcokeria Ngai ngatho nĩ ũndũ wa gũtũhe muoyo.

Maũndũ marĩa mothe Ngai ekĩte nĩ monanagia wendo wake. Ngai nĩwe wombire riũa. Narĩo riũa rĩtũmaga tuone ũtheri na tũigue ũrugarĩ. Korũo gũtirĩ riũa, indo ciothe ingĩrĩ hehu mũno na gũtirĩ kĩndũ kĩngĩrĩ muoyo thĩinĩ wa thĩ. Wee nĩ ũkenaga nĩ tondũ wa Ngai kũũmba riũa?—

Ningĩ Ngai nĩwe ũtũmaga mbura yure. Rĩmwe no wage gũkenio nĩ mbura tondũ nĩ ĩgiragia ũthiĩ nja ũgathaake rĩrĩa kũroira. No mbura nĩyo ĩtũmaga mahũa makũre. Kwoguo rĩrĩa tuona mahũa mathaka-rĩ, nũũ twagĩrĩirũo gũcokeria ngatho?— Nĩ Ngai. Nũũ twagĩrĩirũo gũcokeria ngatho rĩrĩa twarĩa matunda na nyeni iracama wega?— Twagĩrĩirũo gũcokeria Ngai ngatho tondũ nĩ riũa rĩake na mbura yake itũmaga indo icio ikũre.

Ĩ mũndũ angĩkũũria atĩrĩ, ‘Hihi nĩ Ngai wombire andũ o na nyamũ?’ Ũngĩmwĩra atĩa?— No ũmwĩre ũũ: “Ĩĩ, nĩ Ngai wombire andũ na nyamũ.” Ĩ mũndũ angĩkorũo ndetĩkĩtie atĩ Ngai nĩwe wombire andũ? Ĩ angiuga atĩ andũ moimire kũrĩ nyamũ? Ũguo tiguo Bibilia ĩrutanaga. Bibilia yugaga atĩ ciũmbe ciothe iria irĩ muoyo ciombirũo nĩ Ngai.—Kĩambĩrĩria 1:26-31.

No mũndũ no akwĩre atĩ ndetĩkĩtie Ngai. Ũngĩmwĩra atĩa?— No ũmuonie nyũmba. Ũmũrie atĩrĩ: “Nũũ wakire nyũmba ĩrĩa?” Gũtirĩ mũndũ ũtoĩ atĩ yakirũo nĩ mũndũ. Nyũmba ĩyo tiyo yeakire!—Ahibirania 3:4.

No ũcoke ũtware mũndũ ũcio mũgũnda-inĩ ũmuonie ihũa. Ũmũrie ũũ:  “Nũũ wombire ihũa rĩrĩ?” Ti mũndũ warĩũmbire. Na o ta ũrĩa nyũmba ĩteyakire noguo ihũa rĩrĩ rĩteyũmbire. Nĩ kũrĩ ũrĩa warĩũmbire. Rĩombirũo nĩ Ngai.

Ningĩ no ũmwĩre athikĩrĩrie kanyoni gakĩina. Ũcoke ũmũrie ũũ: “Nũũ wombire nyoni na agĩciruta kũina?” Nĩ Ngai waciũmbire. Ngai nĩwe wombire igũrũ na thĩ, na ciũmbe ciothe iria irĩ muoyo! Nĩwe ũheanaga muoyo.

O na kũrĩ ũguo, mũndũ no oige atĩ etĩkagia kĩrĩa arona. No oige ũũ: ‘Ndingĩtĩkia kĩndũ itarona.’ Nĩ ũndũ ũcio, andũ angĩ moigaga atĩ matiĩtĩkĩtie Ngai tondũ matimuonaga.

Nĩ ma tũtingĩhota kuona Ngai. Bibilia yugaga ũũ: ‘Gũtirĩ mũndũ ũngĩona Ngai.’ Gũtirĩ mũthuri, mũtumia, kana mwana gũkũ thĩ ũngĩhota kuona Ngai. Nĩ ũndũ ũcio, gũtirĩ mũndũ wagĩrĩirũo gũcora mbica kana gũthondeka kĩndũ kĩhaana ta Ngai. O na Ngai nĩ atwĩraga tũtigathondeke kĩndũ kĩhaanaine nake. Kwoguo tũtingĩkorũo tũgĩkenia Ngai tũngĩkorũo na indo ta icio gwitũ mũciĩ.—Thama 20:4, 5; 33:20; Johana 1:18.

No angĩkorũo tũtingĩhota kuona Ngai-rĩ, tũmenyaga atĩa atĩ nĩ kũrĩ Ngai? Ta wĩcirie ũndũ ũyũ. Hihi no ũhote kuona rũhuho?— Aca. Gũtirĩ mũndũ ũngĩhota kuona rũhuho. O na kũrĩ ũguo, no ũhote kuona maũndũ marĩa rũhuho rwĩkaga. No wone mathangũ makĩinaina rĩrĩa rũhuho rwahuruta mũtĩ. Nĩkĩo wĩtĩkagia atĩ nĩ kũrĩ rũhuho.

Ũguo no taguo tuonaga maũndũ marĩa Ngai ekĩte. Rĩrĩa wona ihũa kana kanyoni, ũkoragwo ũkĩona kĩndũ kĩũmbĩtwo nĩ Ngai. Ũndũ ũcio ũgatũma wĩtĩkie atĩ nĩ ma nĩ kũrĩ Ngai.

Mũndũ no akũũrie atĩrĩ, ‘Nũũ wombire riũa na thĩ?’ Bibilia yugaga ũũ: “Ngai aatũmire kũgĩe matu-inĩ na gũkũ thĩ.” (Kĩambĩrĩria 1:1)  Nĩ ma, Ngai nĩwe wombire indo icio ciothe cia magegania! Ũrona atĩa ũndũ ũcio?—

Githĩ ti ũndũ wa magegania gũkorũo tũrĩ muoyo? Nĩ tũhotaga kũigua tũnyoni tũkĩina tũrwĩmbo twega. Nĩ tuonaga mahũa na indo ingĩ iria ciũmbĩtwo nĩ Ngai. Na tũkarĩa irio iria Ngai atũheete.

Kwoguo nĩ twagĩrĩirũo gũcokagĩria Ngai ngatho nĩ ũndũ wa indo icio ciothe. No makĩria twagĩrĩirũo gũcokagĩria Ngai ngatho nĩ ũndũ wa gũtũhe muoyo. Nĩguo tuonanie ngatho citũ, nĩ harĩ ũndũ twagĩrĩirũo nĩ gwĩkaga. Hihi nĩ ũndũ ũrĩkũ ũcio?— Nĩ tũrĩthikagĩrĩria Ngai, na tũgeka ũrĩa atwĩraga thĩinĩ wa Bibilia. Na njĩra ĩyo, nĩ tũrĩonanagia atĩ nĩ twendete Ngai ũrĩa wombire indo ciothe.