MASSAKKUT tupinnarluinnartumik takutissavakkit. Suunersoq paaserusuppiuk? — Assat takoriaruk. Inussatit peqeriakkit. Arlaannillu tiguseriarit. Ilaa, assak taamaaliullaqqik? Illit assat assigiinngitsorpassuarnik iliorsinnaavoq. Nalunngiliuk kia assavut sanaarinerai? —

Taannaavoq isitsinnik, qinngatsinnik, qanitsinnillu pinngortitsisoq. Tassa Guuti. Taanna Ajoqersuisorsuup Ataatagaa. Nuannaarutigaarput Guutip isilersimammatigut, ilaa? — Eqqarsaatigeriakkit isitsinnik takusinnaasarpassuavut. Naasut isiginnaarsinnaavavut. Ivikkat qorsuit qilallu allaaqqissoq takusinnaavavut. Aamma timmiaaqqat piaqqat mikisut perlilersut uani assimiittut takusinnaavavut. Ilaa, nuanneq tamakku takusinnaallugit? —

Kinaana tamakkuninnga takusinnaasatsinnik tamanik pinngortitsisimasoq? Inuit? Naamik. Inuit illuliorsinnaapput, kisianni ivikkat naalersissinnaanngilaat. Timmiaaqqat piaraannik, naasunik imaluunniit uumassusilinnik suugaluarnersunik pinngortitsisinnaanngillat. Tamanna eqqarsaatiginikuuiuk? —

Aap, Guutimuna tamakku tamaasa suliarisimagai. Qilak nunalu pinngortippai. Inuit aamma pinngortippai. Taassuma angut siulleq  arnarlu siulleq pinngortippai. Ajoqersuisorsuullu tamanna pillugu oqaluttuuppaatigut. — Matthæusi 19:4-6.

Qanoruna ililluni Jiisusip Guutip angummik arnamillu pinngortitsisimanera nalunngikkaa? Guuti taamaaliortoq takunikuugamiuk? — Aap, takunikuuaa. Guuti ilagaa taakkuninnga pinngortitsimmat. Jiisusi nammineq Guutip pinngortitaani siullersaavoq. Taamani inngiliugallarami qilammi najugaqarpoq ataatani ilagalugu.

Biibilimi allaqqavoq Guuti oqartoq: “Inunnik pinngortitsisa.” (1 Mosesi 1:26) Guuti kimut oqarsoraajuk? — Ernerminut oqarpoq. Taannaavorlu kingusinnerusukkut nunarsuarmukartoq tassaalersorlu Jiisusi.

Ilaa pissanganaq? Manna eqqarsaatigeriaruk! Jiisusi tusarnaaraangatsigu ajoqersorneqartarpugut taamani Guuti sunik tamanik pinngortitsimmat peqataasumit. Jiisusip ataatani qilammi suleqatigigamiuk  ilinniarfigilluarsimavaa. Taamaammat paasinarpoq ajoqersuisorsuanngormat, ilaa?

Guuti kisimiippoq ernini pinngortinngikkallaramiuk. Isumaqarpit tamanna aliasuutigisimassagaa? — Naamik, aliasuutiginngilaa. Kisiannimi kisimiinnini aliasuutiginngikkuniuk sooq taava uumassusilinnik pinngortitsilersimava? — Guuti taamaaliorpoq asannittuugami. Guutip kissaatigigamiuk aamma allat inuuneq nuannaarutigissagaat. Guutimut qujasariaqarpugut inuunermik tunimmatigut.

Guutip iliuusiinit tamanit takuneqarsinnaavoq asannittuunera. Seqineq uagutsinnut qaamatitsisoq kissartitsisorlu pinngortippaa. Seqineqanngikkaluarutta sumi tamaani taarlunilu qiianassagaluarpoq nunamilu inuusoqarsinnaanavianngikkaluarluni. Guutip seqineq pinngortissimammagu nuannaarutigisinnaavarput, ilaa? —

Guuti aamma siallersitsisarpoq. Ilaannikkut siallernera nuannarivallaarneq ajorunarpat, immaqami sialleraangat silami aneerlutit pinnguarsinnaaneq ajorputit. Kisiannili sialleraangat ivikkat naajartulertarput. Taamaammat naasut kusagigaangatsigit, taava kimut qujasassaagut? — Guutimut. Aamma paarnanik naatitanillu mamartunik nerigaangatta, taava kimut qujasassaagut? — Guutimut, taassumamiuna seqineq sialuillu pii naalersitsisartut.

Oqariarta arlaata aperigaatit: “Guutimuna inuit uumasullu tamaasa pinngortinnikuuai?” Taava qanoq akissavit? — Ima akisinnaavutit: “Aap, Guutip inuit uumasullu pinngortinnikuugai.” Kisiannimi arlaata upperiumanngippagu Guutimit pinngortitaasugut, oqarlunili uumasuninngaanneersuusugut? Tamanna Biibilimi ajoqersuutinut naapertuutinngilaq. Allaqqavormi Guutip uumassusillit suut tamaasa pinngortissimagai. — 1 Mosesi 1:26-31.

Oqarpammi Guuti upperinagu? Taava qanoq oqassavit? — Immaqa illu tikkuarsinnaavat aperalutillu: “Illu una kia sanaaraa?” Kikkut tamarmik nalunngilaat arlaata illu  sanasimassagaa. Imminummi sanasinnaanngilaq, ilaa? — Hebræerit 3:4.

Taava oqaluussat naasumik takutissinnaavat. Ima aperisinnaavutit: “Kia una sanaaraa?” Inuup kialuunniit sanaarinngilaa. Soorlu illu imminut sanasimanngitsoq, aamma naasoq nammineq pinngorsinnaanngilaq. Pinngortinneqarsimassaaq. Tassa Guutimit.

Oqaluussallu nipageqqoriarlugu timmissamut qarlortumut tusarnaaqqujuk. Ima aperisinnaavutit: “Kina timmissanik pinngortitsisuua qarlornissaannillu ilinniartitsilluni?” Akissut imaappoq: Guuti. Guuti qilammik nunamillu, uumassusilinnillu sunik tamanik pinngortitsisuuvoq. Taannaavoq inuunermik tunisisoq.

Inuit ilaat immaqa oqarumassapput takusinnaasatik kisiisa upperalugit. Ima oqartarput: “Takusinnaanngikkukku, taava upperinngilara.” Guutilu takusinnaannginnamikku upperinngilaat.

Soorunami ilumoorpoq Guuti takusinnaanngikkipput. Biibilimimi allaqqavoq: ‘Inuup kialluunniit Guuti takusimanngisaannaraa.’ Aap, inersimasulluunniit meeqqalluunniit nunarsuarmiittut Guuti takusinnaanngilaat. Taamaammat Guutip qanoq isikkoqarneranik assilialiorniartoqassanngilaq. Guutimi nammineq oqarpoq taamaaliussanngitsugut. Taamaattumik angerlarsimaffitsinni taamaattunik assiliaqarpat nuannarinavianngilaa. — 2 Mosesi 20:4, 5; 33:20; Johannesi 1:18.

Guutili takusinnaanngikkaanni taava qanoq ililluni piviusuunera paasineqarsinnaava? Manna eqqarsaatigeriaruk: Anori takusinnaaviuk? — Naamik. Anori takuneqarsinnaanngilaq. Takusinnaaviulli anori susarnersoq? — Ivikkat naasullu aalataartittarpai apummillu teqqalatitsisarluni. Taamaalilluta anorlertoq naluneq ajorparput.

Aamma Guuti taamaappoq. Iliuusii takusinnaavatit. Uumassusillit isiginnaaraangakkit soorlu naasut imaluunniit timmissat, Guutip pinngortitaasa ilaannik takusaqartarputit. Taamaalillutit nalussanngilat Guuteqartoq.

 Immaqa arlaata aperissavaatit kia seqineq nunarsuarlu pinngortissimanerai. Biibilimi allassimavoq: “Guutip qilak nunalu pinngortippai.” (1 Mosesi 1:1) Aap, Guutip kusanartut tamakku tamaasa pinngortippai! Illit tamanna qanoq isumaqarfigaajuk? —

Inuulluni nuanneq, ilaa? Timmissat qarlorpalunneri tusarnersut tusaasinnaavavut. Naasut allarpassuillu Guutip pinngortitai nuannaarutigisinnaavavut. Nerisinnaavavullu nerisassarpassuit uagut pilluta pinngortissimasai.

Eqqaamasariaqarparput qujaffigissagatsigu. Qujassutissarput pingaarnerpaaq tassaavoq inuunermik tunisimammatigut. Guuti qujamasuffigingaarutsigu, aamma allamik iliorumassaagut. Qanoq iliorsinnaavugut? — Guutip oqaasia tusarnaarsinnaavarput, maleruarlugulu. Taamaalilluta takutissavarput sunik tamanik pinngortitsisoq asallugu.