ជំពូកទី៣
អ្នកដែលបានបង្កើតអ្វីៗទាំងអស់
តើអ្នកណាបានបង្កើតជីវិតទាំងឡាយ?
ខ្ញុំដឹងអ្វីមួយដ៏អស្ចារ្យ។ កូនចង់ស្តាប់ទេ?— សូមមើលដៃរបស់កូន។ សូមក្ដាប់ហើយលាដៃវិញ។ ឥឡូវសូមរើសរបស់មួយ។ ដៃរបស់កូនអាចធ្វើអ្វីៗបានច្រើនយ៉ាង ហើយអាចធ្វើបានយ៉ាងល្អផង។ តើកូនដឹងថាអ្នកណាបានបង្កើតដៃរបស់យើងទេ?—
ពិតមែន គឺបុគ្គលដែលបានបង្កើតមាត់ ច្រមុះ និងភ្នែករបស់យើង។ បុគ្គលនោះគឺជាព្រះដែលជាបិតារបស់គ្រូដ៏ល្អប្រសើរ។ យើងសប្បាយចិត្តដែលព្រះបានឲ្យយើងមានភ្នែក មែនទេ?— យើងអាចមើលឃើញអ្វីៗជាច្រើន។ យើងអាចមើលផ្កានានា។ យើងអាចមើលស្មៅព័ណ៌បៃតង និងមេឃព័ណ៌ខៀវ។ យើងអាចមើលកូនចាបដែលកំពុងស៊ីចំណីដូចយើងឃើញក្នុងរូបភាពនេះ។ ពិតជាអស្ចារ្យណាស់ដែលយើងអាចឃើញរបស់ទាំងនេះ មែនទេ?—
ក៏ប៉ុន្តែ តើអ្នកណាដែលបានបង្កើតរបស់ទាំងនេះ? តើមនុស្សបានបង្កើតរបស់ទាំងនេះឬ? មិនមែនទេ។ មនុស្សអាចសង់ផ្ទះបាន។ ក៏ប៉ុន្តែ គ្មានមនុស្សណាម្នាក់អាចបង្កើតស្មៅដែលដុះឡើងបានទេ។ មនុស្សមិនអាចបង្កើតកូនសត្វ ផ្កា ឬជីវិតផ្សេងៗណាមួយឡើយ។ តើកូនដឹងអំពីរឿងនោះទេ?—
ព្រះជាអ្នកដែលបានបង្កើតរបស់ទាំងអស់នេះ។ ព្រះបានបង្កើតផ្ទៃមេឃនិងផែនដី។ លោកក៏បានបង្កើតមនុស្សដែរ។ លោកបានបង្កើតបុរសទី១និងស្ដ្រីទី១។ លោកយេស៊ូដែលជាគ្រូដ៏ល្អប្រសើរក៏បានបង្រៀនអំពីរឿងនោះដែរ។—ម៉ាថាយ ១៩:៤-៦
តើលោកយេស៊ូដឹងថាព្រះបានបង្កើតបុរសនិងស្ដ្រីយ៉ាងដូចម្ដេច? តើលោកយេស៊ូបានឃើញព្រះធ្វើដូច្នោះទេ?— លោកបានឃើញមែន។ លោកយេស៊ូនៅជាមួយព្រះ ពេលព្រះបង្កើតបុរសនិងស្ដ្រី។ ព្រះបានបង្កើតលោកយេស៊ូមុនគេបង្អស់។ លោកយេស៊ូជាទេវតាមួយរូប ហើយលោកបានរស់នៅស្ថានសួគ៌ជាមួយបិតារបស់លោក។
ក្នុងគម្ពីរព្រះមានប្រសាសន៍ថា៖ ‹ចូរយើងបង្កើតមនុស្ស›។ (លោកុប្បត្តិ ១:២៦) តើកូនដឹងថាព្រះកំពុងនិយាយជាមួយអ្នកណាទេ?— ព្រះនិយាយជាមួយកូនរបស់លោក។ ក្រោយមកកូនរបស់លោកមកផែនដី ហើយមានឈ្មោះថាយេស៊ូ។
គួរឲ្យអស្ចារ្យណាស់ មែនទេ? គិតមើល! ពេលយើងស្តាប់លោកយេស៊ូ យើងកំពុងទទួលការបង្រៀនពីអ្នកដែលធ្លាប់រស់នៅជាមួយព្រះ ពេលព្រះបានបង្កើតផែនដីនិងអ្វីៗឯទៀតទាំងអស់។ លោកយេស៊ូបានរៀនច្រើនណាស់ពេលលោកធ្វើការជាមួយបិតាលោកនៅស្ថានសួគ៌។ នេះច្បាស់ជាមូលហេតុដែលលោកយេស៊ូជាគ្រូដ៏ល្អប្រសើរ!
តើកូនគិតថាព្រះមិនសប្បាយដោយនៅម្នាក់ឯងមុនពេលព្រះបានបង្កើតបុត្ររបស់លោកឬទេ?— មិនមែនទេ លោកសប្បាយចិត្ត។ បើព្រះសប្បាយចិត្ត ហេតុអ្វីព្រះបានបង្កើតទេវតា មនុស្ស និងសត្វ?— ព្រះបានធ្វើដូច្នេះ ពីព្រោះលោកមានសេចក្ដីស្រឡាញ់។ ព្រះចង់ឲ្យពួកគេរស់នៅហើយមានអំណរនឹងជីវិត។ យើងគួរអរគុណព្រះដែលឲ្យជីវិតដល់យើង។
អ្វីៗទាំងអស់ដែលលោកបានបង្កើតបង្ហាញថាលោកស្រឡាញ់យើង។ ព្រះបានបង្កើតថ្ងៃដើម្បីឲ្យយើងទទួលពន្លឺនិងទទួលកម្ដៅ។ បើគ្មានថ្ងៃទេ នោះអ្វីៗទាំងអស់នឹងត្រជាក់ ហើយគ្មានជីវិតនៅផែនដីឡើយ។ តើកូនសប្បាយចិត្តទេដែលព្រះបានបង្កើតថ្ងៃ?—
ព្រះក៏ធ្វើឲ្យមានភ្លៀងដែរ។ ជួនកាលកូនមិនចូលចិត្តពេលមានភ្លៀងទេ ព្រោះកូនមិនអាចចេញទៅលេងខាងក្រៅបាន។ ក៏ប៉ុន្តែ ភ្លៀងជួយឲ្យផ្កាដុះ។ ដូច្នេះ ពេលយើងឃើញផ្កាស្អាតៗ តើយើងនឹងអរគុណអ្នកណា?— អរគុណព្រះ។ តើយើងគួរអរគុណអ្នកណាពេលយើងញ៉ាំផ្លែឈើ និងបន្លែដែលមានរសជាតិឆ្ងាញ់?— យើងគួរអរគុណព្រះ ពីព្រោះព្រះជាអ្នកបង្កើតថ្ងៃនិងភ្លៀងដែលធ្វើឲ្យអ្វីៗលូតលាស់។
ឧបមាថា មានមនុស្សម្នាក់សួរកូនថា‹តើព្រះបានបង្កើតមនុស្សនិងសត្វទេ?›។ តើកូននឹងឆ្លើយយ៉ាងណា?— គឺត្រឹមត្រូវបើឆ្លើយថា«មែន! ព្រះបានបង្កើតមនុស្សនិងសត្វ»។ ចុះយ៉ាងណាវិញ បើគេមិនជឿថាព្រះពិតជាបានបង្កើតមនុស្ស? ចុះបើពួកគេថាមនុស្សកើតមកពីសត្វ? គម្ពីរមិនបានបង្រៀនដូច្នេះទេ។ គម្ពីរប្រាប់ថាព្រះបានបង្កើតជីវិតទាំងឡាយ។—លោកុប្បត្តិ ១:២៦-៣១
ដោយសារផ្ទះមានអ្នកសង់ តើអ្នកណាដែលបានបង្កើតផ្កា ដើមឈើ និងសត្វ?
ក៏ប៉ុន្តែ ប្រហែលជាមានអ្នកណាម្នាក់និយាយថា គាត់មិនជឿព្រះទេ។ តើកូននឹងឆ្លើយយ៉ាងណា?— សូមកូនចង្អុលទៅផ្ទះមួយ។ រួចសួរគាត់ថា៖ «តើអ្នកណាសង់ផ្ទះនោះ?»។ អ្នកណាក៏ដឹងដែរថាផ្ទះមានអ្នកសង់។ ផ្ទះប្រាកដជាមិនបានកើតឡើងដោយឯកឯងទេ!—ហេប្រឺ ៣:៤
បន្ទាប់មក កូននាំគាត់ទៅសួនច្បារមួយ រួចបង្ហាញផ្កា ហើយសួរគាត់ថា៖ «តើអ្នកណាបង្កើតផ្កានេះ?»។ គ្មានមនុស្សណាម្នាក់បង្កើតផ្កាទេ។ ដូចជាផ្ទះមិនកើតឡើងដោយឯកឯង ដូច្នេះ ផ្កានេះក៏មិនបានកើតឡើងដោយឯកឯងដែរ។ ត្រូវមានអ្នកបង្កើត។ អ្នកបង្កើតគឺជាព្រះ។
សូមឲ្យគាត់ស្តាប់សំឡេងចាបយំ។ បន្ទាប់មកសួរគាត់ថា៖ «តើអ្នកណាបានបង្កើតចាបហើយបង្រៀនវាឲ្យចេះយំ?»។ គឺជាព្រះ។ ព្រះគឺជាអ្នកដែលបានបង្កើតស្ថានសួគ៌និងផែនដី ព្រមទាំងជីវិតទាំងឡាយ! លោកគឺជាអ្នកដែលផ្ដល់ជីវិត។
ក៏ប៉ុន្តែ អ្នកណាម្នាក់ប្រហែលជានិយាយថា គាត់ជឿទៅលើអ្វីដែលគាត់អាចឃើញតែប៉ុណ្ណោះ។ ប្រហែលជាគាត់ចង់ថា ‹អ្វីដែលខ្ញុំមិនឃើញ ខ្ញុំមិនជឿទេ›។ ដូច្នេះ មនុស្សខ្លះប្រាប់ថា ពួកគេមិនជឿទៅលើព្រះ ដោយសារពួកគេមិនអាចឃើញលោក។
នេះជាការពិតដែលយើងមិនអាចឃើញព្រះ។ គម្ពីរប្រាប់ថា៖ ‹គ្មានមនុស្សណាអាចឃើញព្រះឡើយ›។ គ្មានបុរស ស្ដ្រី ឬកូនក្មេងណាម្នាក់នៅផែនដីដែលអាចឃើញព្រះទេ។ ដូច្នេះ មនុស្សមិនគួរខំគូររូបឬធ្វើរូបតំណាងព្រះឡើយ។ ព្រះប្រាប់យើងថា យើងមិនត្រូវធ្វើដូច្នោះទេ។ ដូច្នេះហើយ ព្រះមិនពេញចិត្តឲ្យយើងមានរបស់ដូចនោះក្នុងផ្ទះឡើយ។—និក្ខមនំ ២០:៤, ៥; ៣៣:២០; យ៉ូហាន ១:១៨
បើយើងមិនអាចឃើញព្រះ ចុះតើកូនដឹងយ៉ាងដូចម្ដេចថា ពិតជាមានព្រះមែន? សូមគិតអំពីរឿងនេះ។ តើកូនឃើញខ្យល់ទេ?— អត់ទេ។ គ្មានអ្នកណាម្នាក់អាចឃើញខ្យល់ទេ។ ប៉ុន្តែ កូនអាចឃើញអ្វីដែលខ្យល់បក់ផាត់។ កូនអាចឃើញស្លឹកឈើបក់រវិចៗ ពេលខ្យល់បក់ផាត់ទៅលើមែកឈើ។ ពេលនោះកូនជឿថាមានខ្យល់ហើយ មែនទេ?
តើតាមរបៀបណាដែលកូនដឹងថាមានខ្យល់?
កូនក៏អាចឃើញអ្វីដែលព្រះបានធ្វើដែរ។ ពេលកូនឃើញផ្កា ឬសត្វចាប កូនដឹងថា ព្រះបានបង្កើតរបស់ទាំងនោះ។ ដូច្នេះ កូនជឿថា ពិតជាមានព្រះមែន។
ប្រហែលមានគេសួរកូនថា ‹តើអ្នកណាបានបង្កើតថ្ងៃនិងផែនដី?›។ គម្ពីរប្រាប់ថា៖ «ព្រះបានបង្កើតផ្ទៃមេឃនឹងផែនដី»។ (លោកុប្បត្តិ ១:១) ត្រូវហើយ ព្រះបានបង្កើតអ្វីៗដ៏អស្ចារ្យទាំងនេះមែន! តើកូនមានអារម្មណ៍យ៉ាងណាអំពីរឿងនោះ?—
យើងសប្បាយចិត្តណាស់ដែលយើងមានជីវិត មែនទេ? យើងអាចឮសត្វចាបយំយ៉ាងពីរោះ។ យើងអាចឃើញផ្កានិងអ្វីឯទៀតដែលព្រះបានបង្កើត។ យើងក៏អាចញ៉ាំចំណីអាហារដែលព្រះបានឲ្យយើងដែរ។
យើងគួរអរគុណព្រះសម្រាប់អ្វីៗទាំងអស់នេះ។ សំខាន់បំផុត យើងគួរអរគុណលោកដែលឲ្យជីវិតយើង។ បើយើងពិតជាមានចិត្តដឹងគុណមែន នោះជំរុញយើងឲ្យធ្វើអ្វីមួយ។ តើនោះជាអ្វី?— យើងនឹងស្តាប់ព្រះ ហើយធ្វើតាមពាក្យរបស់លោកដែលមានក្នុងគម្ពីរ។ ធ្វើដូច្នោះ យើងអាចបង្ហាញថា យើងស្រឡាញ់អ្នកដែលបានបង្កើតអ្វីៗទាំងអស់។
យើងគួរដឹងគុណព្រះសម្រាប់អ្វីៗទាំងអស់ដែលលោកបានធ្វើ។ តើតាមរបៀបណា? សូមអានអ្វីដែលបានសរសេរទុកនៅ ទំនុកតម្កើង ១៣៩:១៤ យ៉ូហាន ៤:២៣, ២៤ យ៉ូហានទី១ ៥:២១ និងការបើកបង្ហាញ ៤:១១។
លោកអ្នកក៏ប្រហែលជាចូលចិត្តដែរ
ចូរធ្វើជាមិត្តសម្លាញ់ព្រះយេហូវ៉ា
«ព្រះយេហូវ៉ា . . . បានបង្កើតអ្វីៗទាំងអស់»
តើប្អូនដឹងទេ ព្រះបានបង្កើតអ្វីមុនគេបង្អស់? សូមរៀនជាមួយនឹងសុខលាភអំពីអ្វីៗបន្តបន្ទាប់ដែលព្រះបានបង្កើត។
ចូរធ្វើជាមិត្តសម្លាញ់ព្រះយេហូវ៉ា
ព្រះយេហូវ៉ាបានគ្រោងបង្កើតអ្វីៗទាំងអស់
ព្រះបានបង្កើតអ្វីដ៏អស្ចារ្យជាច្រើន! តើកូនចូលចិត្តអ្វីខ្លះ?
