A NO sɔntin we rili wɔndaful. Yu go lɛk fɔ yɛri am?— Luk yu an. Bɛn yu finga dɛn. Naw tray fɔ pik sɔntin. Yu an kin du bɔku tin, ɛn i kin du dɛn fayn. Yu no udat mek yu an dɛn?—

Yɛs, na di sem pɔsin we mek yu mɔt, yu nos, ɛn yu yay dɛn. Na Gɔd, we na Jizɔs Krays in Papa. Yu nɔ gladi we Gɔd gi wi yay?— Wi kin si bɔku tin dɛn wit wi yay. Wi kin luk flawa dɛn. Wi kin luk di grin gras ɛn di skay. Wi kin si we smɔl bɔd dɛn de it, lɛk di wan dɛn we de na dis pikchɔ. I rili wɔndaful fɔ si ɔl dɛn tin ya, nɔto so?—

Bɔt udat mek dɛn tin ya? Fɔ se na mɔtalman mek dɛn? Nɔ. Mɔtalman go mek os. Bɔt no mɔtalman nɔ ebul mek gras we de gro. Mɔtalman nɔ ebul mek pikin bɔd, flawa, ɔ ɛnitin we gɛt layf. Yu no dat?—

Na Gɔd mek ɔl dɛn tin ya. Na Gɔd mek di ɛvin ɛn dis wɔl. Na in mek mɔtalman bak. I mek di fɔs man ɛn di fɔs uman. Jizɔs, we na di Gret Ticha, bin tich pipul dɛn bɔt dis.—Matyu 19:4-6.

 Aw Jizɔs bin no se na Gɔd mek man ɛn uman? Fɔ se Jizɔs bin si we Gɔd de du dat?— Yɛs, i bin si we Gɔd de mek man ɛn uman. Jizɔs bin de wit Gɔd di tɛm we Gɔd bin de mek man ɛn uman. Jizɔs na di fɔs pɔsin we Gɔd mek. Jizɔs na bin enjɛl, ɛn i bin de na ɛvin wit in Papa.

Di Baybul tɛl wi se Gɔd bin se: “Lɛ wi mek mɔtalman.” (Jɛnɛsis 1:26) Yu no udat Gɔd bin de tɔk to?— I bin de tɔk to in Pikin we na Jizɔs ɛn we bin kam na dis wɔl leta.

Yu nɔ tink se dat fɔ mek yu gladi? Jɔs imajin! We wi de lisin to Jizɔs, wi de lan frɔm di wan we bin de wit Gɔd di tɛm we Gɔd bin de mek di wɔl ɛn ɔl ɔda tin dɛn. Jizɔs bin lan bɔku tin dɛn we i bin de wok wit in Papa na ɛvin. Na dat mek Jizɔs bin bi di Gret Ticha!

 Yu tink se Gɔd nɔ bin gladi we in wangren bin de bifo i mek in Pikin?— Nɔ, i bin gladi. Bɔt if i bin gladi, wetin mek i mek ɔda tin dɛn we gɛt layf?— I bin du am bikɔs in na Gɔd we gɛt lɔv. I want mɔtalman ɛn animal fɔ liv ɛn ɛnjɔy layf. Wi fɔ tɛl Gɔd tɛnki we i gi wi layf.

Ɔl wetin Gɔd dɔn du sho se i lɛk wi. Gɔd mek di san. Di san de gi wi layt ɛn i de wam wi bɔdi. If di san nɔ bin de, ɔltin bin fɔ kol ɛn layf nɔ bin fɔ de na dis wɔl. Yu nɔ gladi we Gɔd mek di san?—

Na Gɔd mek di ren bak. Sɔntɛm yu nɔ lɛk di ren bikɔs we ren de kam yu nɔ kin ebul fɔ ple na do. Bɔt di ren de ɛp di flawa dɛn fɔ gro. So we wi si fayn flawa dɛn, udat wi go tɛl tɛnki?— Na Gɔd. Udat wi fɔ tɛl tɛnki we wi de it frut ɛn ɔda plant dɛn we gɛt fayn test?— Wi fɔ tɛl Gɔd tɛnki bikɔs na di san ɛn di ren de mek dɛn gro.

Naw if pɔsin aks yu, ‘Na Gɔd mek mɔtalman ɛn di animal dɛn?’ Wetin yu go se?— I go kɔrɛkt if yu se: “Yɛs, na Gɔd mek mɔtalman ɛn di animal dɛn.” Bɔt wetin yu go se if pɔsin nɔ biliv se na Gɔd mek mɔtalman ɛn if di pɔsin se mɔtalman kɔmɔt frɔm animal? Wɛl, di Baybul nɔ tich dat. Di Baybul se na Gɔd mek ɔltin we gɛt layf.—Jɛnɛsis 1:26-31.

Bɔt if sɔmbɔdi tɛl yu se i nɔ biliv se Gɔd de. Wetin yu go se?— Pɔynt wan os. Aks di pɔsin se: “Udat mek dis os?” Ɔlman no se na pɔsin de mek os. Di os nɔ tinap de bay insɛf!—Di Ibru Pipul Dɛn 3:4.

 Dɔn kɛr di pɔsin go na wan gadin ɛn sho am wan flawa. Aks am: “Udat mek dis flawa?” Nɔto mɔtalman mek am. Jɔs lɛk we di os nɔ mek insɛf na so di flawa sɛf nɔ de na di gadin bay insɛf. Na pɔsin mek am. Ɛn di pɔsin na Gɔd.

Tɛl di pɔsin mek i lisin to di siŋ we di bɔd dɛn kin siŋ. Dɔn aks am se: “Udat mek di bɔd dɛn ɛn tich dɛn aw fɔ siŋ?” Na Gɔd. Na Gɔd mek di ɛvin ɛn dis wɔl ɛn ɔl wetin gɛt layf! Na in de gi layf.

Sɔmbɔdi go se na wetin i de si na in i go biliv. I go se: ‘If a nɔ si am, a nɔ go biliv am.’ Sɔm pipul dɛn go se dɛn nɔ biliv Gɔd bikɔs dɛn nɔ de si am.

Na tru se wi nɔ de si Gɔd. Di Baybul se: ‘No mɔtalman nɔ go ebul si Gɔd.’ No man, ɔ uman, ɔ pikin we de na dis wɔl nɔ ebul si Gɔd. So nɔbɔdi nɔ fɔ tray fɔ drɔ pikchɔ ɔ mek ɛnitin ɛn se na Gɔd. Gɔd tɛl wi se wi nɔ fɔ mek ɛnitin ɛn se na in. So Gɔd nɔ go gladi fɔ wi if wi gɛt sɔntin na wi os we wi de kɔl Gɔd.—Ɛksodɔs 20:4, 5; 33:20; Jɔn 1:18.

Bɔt if yu nɔ de si Gɔd, aw yu go rili no se Gɔd de? Tink bɔt dis. Yu de si briz?— Nɔ. Mɔtalman nɔ de si briz. Bɔt wi de si di tin dɛn we briz kin du. We briz de blo, yu de si we lif dɛn de shek. So dis de mek yu biliv se briz de.

Yu de si di tin dɛn we Gɔd dɔn mek. We yu si flawa ɔ bɔd, yu dɔn si sɔntin we Gɔd mek. So dis de mek yu rili biliv se Gɔd de.

Sɔmbɔdi go aks yu se, ‘Udat mek di san ɛn di wɔl?’ Di Baybul se na “Gɔd mek di ɛvin ɛn di wɔl.” (Jɛnɛsis 1:1, NW) Yɛs, na Gɔd mek ɔl dɛn wɔndaful tin ya! Yu gladi fɔ di fayn fayn tin dɛn we Gɔd mek?—

 Yu nɔ tink se i wɔndaful we yu gɛt layf? Wi kin yɛri di fayn siŋ we bɔd dɛn kin siŋ. Wi kin si di flawa dɛn ɛn ɔda tin dɛn we Gɔd mek. Ɛn wi kin it tin dɛn we Gɔd dɔn gi wi fɔ it.

Wi fɔ tɛl Gɔd tɛnki fɔ ɔl dɛn tin ya. Wetin impɔtant pas ɔl na dat wi fɔ tɛl Gɔd tɛnki fɔ we i gi wi layf. If wi gladi fɔ wetin Gɔd dɔn du fɔ wi, wisɛf go du sɔntin. Wetin wi go du?— Wi go lisin to Gɔd ɛn du wetin i de tɛl wi na di Baybul. Na so wi go sho se wi lɛk di Wan we gi wi ɔltin.