NDI mumanye bualu bukuabu bua dikema. Udi musue pebe kubumanya anyi?​— Tangila tshianza tshiebe. Bunya minu. Mpindieu ambula tshintu. Tshianza tshiebe etshi tshidi mua kuenza bintu bia bungi kabidi kubienza bimpe. Udiku mumanye muntu udi muenze bianza bietu anyi?​—

Eyowa, udi anu Eu umue umue udi muenze mukana muetu, kuenza diûlu ne mêsu. Muntu au n’Nzambi, Tatuende wa Mulongeshi Munene. Kabienaku bikuenza disanka bua mudi Nzambi mutupeshe mêsu anyi?​— Tudi mua kumona bintu bia bungi ne mêsu etu. Tudi mua kutangila bilongo. Tudi mua kutangila mashinda adi ne mubidi wa mâyi a matamba ne diulu didi ne mubidi wa bulé. Tudi nansha mua kumona tunyunyu tudia biakudia anu bu etu tutudi tumona mu tshimfuanyi etshi. Bushuwa, ebu si mbualu bua dikema bua mutudi mua kumona bintu bu ebi, ki mmuomu anyi?​—

Kadi nnganyi udi muenze bintu ebi? Kudiku muntu kampanda bu tuetu uvua muenze bintu ebi anyi? Tòo. Bantu bu tuetu buobu badi mua kuibaka nzubu. Kadi kakuena muntu bu tuetu udi mua kufuka mashinda atu atoloka aa to. Bantu kabena mua kuenza kana ka nyunyu, kabena mua kuenza tshilongo anyi tshintu tshikuabu tshidi ne muoyo nansha. Udiku mumanye bualu abu anyi?​—

Nzambi ke udi muenze bintu ebi bionso. Nzambi uvua mufuke diulu ne buloba. Wakafuka kabidi ne bantu. Wakafuka mulume wa kumpala ne  mukaji wa kumpala. Yezu Mulongeshi Munene wakalongesha bualu ebu.​—Matayo 19:4-6.

Yezu uvua mumanye munyi ne: Nzambi wakafuka muntu mulume ne muntu mukaji? Yezu wakamona pavua Nzambi ubafuka anyi?​— Eyowa, wakamona. Yezu uvua ne Nzambi pakafuka Nzambi muntu mulume ne muntu mukaji. Yezu ke uvua Nzambi mufuke kumpala kua kufukaye muntu mulume wa kumpala ne muntu mukaji wa kumpala. Yezu uvua muanjelu, uvua musombele mu diulu ne Tatuende dîba divua Nzambi ufuka muntu mulume wa kumpala ne muntu mukaji wa kumpala.

Bible udi wamba ne: Nzambi wakamba ne: “Tuenze muntu.” (Genese 1:26) Udi mumanye uvua Nzambi wambila bualu ebu bua ne: tuenze muntu anyi?​— Uvua wambila Muanende. Uvua wambila eu wakalua kulua pa buloba e kuluaye Yezu.

Kabienaku bisankisha anyi? Anji elabi meji katupa! Patudi tuteleja Yezu, mmuomumue ne: badi batulongesha kudi eu uvua ne Nzambi pavua Nzambi ufuka buloba ne bintu bikuabu bionso. Yezu wakamanya malu a bungi  pavuaye wenza mudimu pamue ne Tatuende mu diulu. Kakuyi mpata, Yezu m’Mulongeshi Munene!

Udi wela meji ne: Nzambi kavua ne disanka bu muvuaye nkayende kumpala kua kufukaye Muanende eu anyi?​— Tòo, kabivua nanku to. Bikalabi ne: kabivua bimutonda bua muvuaye nkayende amu, kadi bua tshinyi wakafuka bintu bikuabu bia muoyo?​— Wakabifuka bualu udi Nzambi wa dinanga. Uvua musue bua bakuabu bikale pabu ne muoyo ne disanka. Tudi ne bua kuela Nzambi tuasakidila bua mudiye mutupe muoyo.

Tshintu tshionso tshidi Nzambi muenze tshidi tshileja dinanga didiye nadi. Nzambi mmufuke dîba. Dîba didi ditukenkesha ne ditupesha luya. Bintu bionso bivua mua kuikala ne mashika ne kakuvua mua kuikala tshintu tshia muoyo pa buloba bu tuetu katuyi ne dîba to. Kabienaku bikusankisha bua mudi Nzambi mufuke dîba anyi?​—

Nzambi mmuenze kabidi bua mvula ikala uloka. Imue misangu kutu musue mvula to bualu kuena mua kupeta mushindu wa kupatuka pambelu bua kunaya padi mvula uloka. Kadi si mvula udi wambuluisha bilongo bua kukolabi. Nunku patudi tumona bilongo bilenga, nnganyi utuela tuasakidila?​— Nzambi. Nnganyi utudi ne bua kuela tuasakidila patudi tudia bimuma ne bisekiseki bia muenya?​— Tudi ne bua kuela Nzambi tuasakidila bualu dîba diende ne mvula wende ke bidi bikoleshe bintu ebi.

Tshinka ne: muntu udi ukukonka nunku: ‘Nzambi ke uvua mufuke bantu ne nyama payi anyi?’ Neumuandamune munyi?​— Mbilelela bua kuandamuna ne: “Eyowa, Nzambi ke uvua mufuke bantu ne nyama.” Kadi netuambe tshinyi bikala muntu kayi witaba ne: bushuwa Nzambi ke udi mufuke bantu? Kadi bikalaye wamba ne: muntu mmufume ku nyama? Bushuwa, Bible kena ulongesha nanku to. Bible udi wamba ne: Nzambi mmufuke bintu bionso.​—Genese 1:26-31.

Kadi muntu udi mua kukuambila ne: kena witabuja Nzambi to. Neumuambile tshinyi dîba adi?​— Udi nansha mua kufunkuna nzubu kampanda. Pashishe ukonke muntu au ne: “Nnganyi udi muibake nzubu wawa?” Bantu bonso mbamanye ne: kudi ne bua kuikala muntu udi muibake nzubu au. Bua kuamba bulelela, nzubu eu ki mmudibake nkayende to!​—Ebelu 3:4.

 Pashishe uye ne muntu webe au mu budimi umuleje tshilongo kampanda. Mukonke ne: “Nnganyi udi muenze tshilongo etshi?” Kakuena muntu bu tuetu aba udi muenze tshilongo etshi to. Anu bu mudi nzubu kayi mua kudibaka nkayende to, tshilongo etshi ki ntshidienze patshi nkayatshi to. Kudi muntu udi mutshienze. Nzambi ke udi mutshienze.

Ambila muntu imane katantshi ateleje muadi wa kanyunyu. Pashishe umukonke ne: “Nnganyi udi mufuke tunyunyu ne mutulongeshe mua kuimba?” Nzambi ke udi mutufuke. Nzambi ke udi mufuke diulu ne buloba ne bintu bionso! Yeye ke Udi ufila muoyo.

Kadi, muntu mukuabu udi mua kuamba ne: yeye utu witaba anu tshintu tshidiye mua kumona ne mêsu. Udi kabidi mua kuamba ne: ‘Pandi ntshiyi mua kumona tshintu atshi, tshiena mua kutshitaba to.’ Nunku bamue bantu batu bamba ne: kabena bitabuja Nzambi to bualu kabena mua kumumona ne mêsu.

Bushuwa, katuena mua kumona Nzambi to. Bible udi wamba ne: ‘Kakuena muntu udi mua kumona Nzambi.’ Kakuena muntu mulume, nansha muntu mukaji, nansha muana panu pa buloba apa udi mua kumona Nzambi to. Nunku muntu nansha umue kêna ne bua kuteta bua kuzola tshimfuanyi tshia Nzambi to. Nzambi muine udi utuambila bua katudidingi bua kuenza tshimfuanyi tshiende to. Nunku kabiena mua kusankisha Nzambi tuetu bikale ne bintu bia nanku mu nzubu muetu to.​—Ekesode 20:4, 5; 33:20; Yone 1:18.

Kadi bu mutudi katuyi mua kumona Nzambi, ntshinyi tshidi mua kutujadikila ne: bushuwa Nzambi udiku? Anji elabi meji pa bualu budi bulonda ebu. Udi mua kumona lupepele anyi?​— Tòo. Kakuena muntu udi mua kumona lupepele to. Kadi nansha nanku tudi mua kumona bintu bidi lupepele luenza. Udi mua kumona mabeji a mitshi anyungakana padi lupepele ludituta mu matamba a mitshi ayi. Nanku si udi witaba ne: lupepele lutuku.

Tudi kabidi mua kumona bintu bidi Nzambi muenze. Paudi umona tshilongo ta kanyunyu, udi umona tshintu tshidi Nzambi muenze. Nanku udi witaba ne: Nzambi udiku bushuwa.

Muntu mukuabu udi mua kukukonka ne: ‘Nnganyi udi muenze dîba ne buloba?’ Bible udi wamba ne: “Nzambi wakafuka diulu ne buloba.” (Genese 1:1)  Eyowa, Nzambi ke wakenza bintu bionso bidi bikemesha ebi! Udi umona munyi bua bualu ebu?​—

Ki mbualu bua disanka bua kuikalaku ne muoyo anyi? Tudi mua kumvua tusambu tulenga tua tunyunyu. Tudi mua kumona bilongo ne bintu bikuabu bidi Nzambi muenze. Kabidi tudi mua kudia biakudia bidi Nzambi mutupeshe.

Tuelayi Nzambi tuasakidila bua bintu bionso ebi. Tudi kabidi nangananga ne bua kumuela tuasakidila bua mudiye mutupe muoyo. Tuetu bikale menemene ne dianyisha kudi Nzambi, nebitusake bua kuenza bualu kampanda. Mbualu kayi abu?​— Netuteleje Nzambi, netuenze malu adiye utuambila bua kuenza adi mu Bible. Tuetu benze nanku netuleje ne: tshia bushuwa tudi banange Eu udi muenze bintu bionso.