WALAY amtak a makapakelkelaw. Labay mon naamtaan itan?— Nengneng moy limam. Ikupit mo pa iray gamet mo. Natan et mandokdok ka pay sakey a bengatla. Dakel so nayarin gawaen na limam, tan marakep so panggawa to ed saratan. Kabat mo no siopa so nanggawa ed saray lima tayo?—

On, saman lanlamang so Sakey a nanggawa ed sangi, eleng, tan kamataan tayo. Say Dios, say Ama na Sankamaongan a Managbangat. Agta malikeliket itayo ta inikdan itayo na Dios na kamataan?— Makanengneng itayo na dakel a bengatla. Makanengneng itayo na saray rosas. Makanengneng itayo na saray birdin dika tan asul a tawen. Makanengneng itayo ni ingen na mamangan iran billit a singa saray nanengneng diad retrato. Talagan makapakelkelaw a nayarian tayon nanengneng iray bengatla a singa saya, agta ontan?—

Balet siopa so nanggawa ed sarayan bengatla? Wala ta’y too a nanggawa ed saratan? Anggapo. Saray totoo so makapanggawa na abung. Balet anggapoy too a makapanggawa na dika ya ombaleg. Agmakapanggawa iray totoo na sibong na billit, rosas, odino dinanman a mabilay a bengatla. Kasin antam itan?—

 Say Dios so nanggawa ed sarayan amin a bengatla. Ginawa na Dios so katawenan tan say dalin. Ginawa to met so totoo. Pinalsa to so inmunan laki tan inmunan bii. Si Jesus, say Sankamaongan a Managbangat, so angibangat ed saya.—Mateo 19:4-6.

Panon ya amta nen Jesus a ginawa na Dios so laki tan bii? Kasin anengneng nen Jesus so Dios a nanggawa ed satan?— On, anengneng to. Si Jesus so kaiba na Dios sanen pinalsa na Dios so laki tan bii. Si Jesus so inmunan ginawa na Dios. Si Jesus so sakey ya anghel, tan sikatoy nambilay ed tawen a kaibay Ama to.

Ibabaga ed sikatayo na Biblia ya inkuan na Dios: ‘Manggawa ta na too.’ (Genesis 1:26) Antam no siopa so pitotongtongan na Dios?— Sikatoy mitotongtong ed Anak to. Sikatoy mitotongtong ed samay linma dia ed dalin tan nagmaliw a Jesus.

Makapalikliket itan, anto? Nonot mo pa! Sano ondengel itayo ed si Jesus, sikatayoy babangatan na samay akaiba na Dios sanen ginawa na  Dios so dalin tan amin niran bengatla. Dakel so naaralan nen Jesus diad impikimey to ed Ama to diad tawen. Agpankelawan a si Jesus so Sankamaongan a Managbangat!

Isipen mo kasi ya aliwan maliket so Dios lapud bukbukor to antis ton pinalsa so Anak to?— Andi, sikatoy maliket. No sikatoy maliket sirin, akin a ginawa to so arum niran mabilay a bengatla?— Ginawa to iya lapud sikatoy Dios a maaro. Labay ton saray arum et manbilay tan panliketan da so bilay. Nepeg itayon misalamat ed Dios lapud inikdan to itayo na bilay.

Amin a bengatlan ginawa na Dios so pakapatnagan na aro to. Ginawa na Dios so agew. Say agew so mangiiter ed sikatayo na liwawa tan petang. Amin a bengatla so magmaliw ya ambetel tan anggapoy bilay diad dalin no anggapo so agew. Agka ta misalsalamat ed Dios lapud ginawa to so agew?—

Say Dios met so mamapauran. No maminsan et agmo labay so uran lapud agka makapaway pian manggalaw no onuuran. Balet say uran so mamapabaleg ed saray rosas. Kanian no nanengneng tayo iray mararakep a rosas, siopa so pisalamatan tayo ed saratan?— Say Dios. Tan siopa so nepeg tayon pisalamatan sano mangan itayo na saray prutas tan pising a mananam?— Nepeg tayon pisalamatan so Dios lapud say agew tan uran to so mamapabaleg ed saraya.

Bilbilang ta walay sakey ya angitepet ed sika na onia, ‘Kasin ginawa na Dios so too tan ayayep?’ Antoy ibagam?— Susto so pangibagan: “On, ginawa na Dios so too tan ayayep.” Balet panon to no walay agmanisia a say Dios so talagan nanggawa ed totoo? Panon to no ibaga to a say too so linmesa manlapud ayayep? Ag-itan ibabangat na Biblia. Ibabaga na Biblia a pinalsa na Dios so amin a mabilay a bengatla.—Genesis 1:26-31.

Balet nayarin ibaga ed sika na sakey a sikatoy agmanisia ed Dios. Antoy ibagam ed sikato ey?— Akin ya agmo ituro so sakey ya abung? Insan tepetan mo: “Siopa so nanggawa ed  satan ya abung?” Panisiaan na amin a walay nanggawa ed satan. Talagan say abung so aglinmesa a bukor!—Hebreos 3:4.

Insan mo itagar ed sakey a hardin tan ipanengneng ed sikato so sakey a rosas. Sikatoy tepetan mo: “Siopa so nanggawa ed saya?” Anggapoy too a makagawa na rosas. Tan singa say abung et aglinmesa a bukor, ontan met ed sayan rosas. Walay nanggawa ed satan. Say Dios.

Ikerew ed sikato ya ontundan magano tan ondengel ed kansion na billit. Insan itepet ed sikato: “Siopa so nanggawa ed saray billit tan siopa so angibangat ed saratan a mangansion?” Say Dios. Say Dios so nanggawa ed katawenan tan say dalin tan amin a mabilay iran bengatla! Sikato so mangiiter na bilay.

Balet, nayarin ibaga na sakey a panisiaan to labat so nanengneng to. Nayarin ibaga to: ‘No agko nanengneng, agko panisiaan.’ Kanian ibabaga na arum a totoo ya ag-ira manisia ed Dios lapud sikatoy agda nanengneng.

Tua ya agtayo nanengneng so Dios. Ibabaga na Biblia: ‘Anggapoy too a makanengneng ed Dios.’ Anggapoy laki, bii, odino ugaw diad dalin a makanengneng ed Dios. Kanian agnepeg ya igawaan na retrato odino imahen so Dios. Ibabaga ni ingen na Dios a sikatoy agtayo igagawaan na imahen. Kanian, agnapaliket so Dios ed sikatayo no walaray ontan ed abung tayo.—Exodo 20:4, 5; 33:20; Juan 1:18.

Balet no agtayo nanengneng so Dios, panoy pakaamta tayo a talagan wala so Dios? Isipen pa iya. Kasin nanengneng mo so dagem?— Andi. Anggapoy anggan sakey a makanengneng ed dagem. Balet nanengneng mo iray bengatla ya isisiplog na dagem. Nanengneng mo iray bulong ya onggagalaw sano onsiplog so dagem ed saray sanga na kiew. Kanian panisiaan mo a wala so dagem.

Nanengneng mo iray bengatla a ginawa met na Dios. Sano nanengneng mo so mabilay a rosas odino billit, nanengneng mo so bengatlan ginawa na Dios. Kanian panisiaan mo a talagan wala so Dios.

Nayarin itepet ed sika na sakey, ‘Siopa so nanggawa na agew tan say dalin?’ Ibabaga na Biblia: “Say Dios pinalsa to so saray tawen tan say dalin.”  (Genesis 1:1) On, ginawa na Dios irayan amin a makapakelkelaw a bengatla! Anto so liknaan mo nipaakar ed satan?—

Agta balibali so manbilay? Narengel tayo iray mararakep a kansion na saray billit. Nanengneng tayo iray rosas tan arum a bengatlan ginawa na Dios. Tan makapangan itayo na saray nakan ya iiter na Dios ed sikatayo.

Lapud sarayan amin a bengatla, nepeg tayon pisalamatan so Dios. Nagkalalo ed amin, nepeg itayon misalamat ed sikato lapud pangiiter to ed sikatayo na bilay. No talagan misalsalamat itayo ed Dios, walay kaukolan tayon gawaen. Anto itan?— Ondengel itayo ed Dios, tan gawaen tayo so ibabaga to ed sikatayo a walad Biblia. Diad ontan a paraan et nipanengneng tayo ya aaroen tayo imay Sakey a nanggawa na amin a bengatla.