AMI sa un kos ku lo bo gusta hopi. Bo ke tende ta kiko e ta?— Wak bo man. Dobla bo dedenan. Awor, kohe un kos. Bo man por hasi hopi kos, anto bon tambe. Bo sa ta ken a traha nos mannan?—

Sí, ta e mesun ku a traha nos boka, nos nanishi i nos wowo: Dios, Tata di e Gran Maestro. Bo no ta kontentu ku Dios a duna nos wowo?— Nos por mira hopi kos ku nan. Nos por mira flor. Nos por mira yerba bèrdè i shelu blou. Asta nos por mira para chikitu ta kome, manera esnan riba e plachi aki. Sí, ta dushi ku nos por mira kos asina, no?—

Ma ta ken a traha e kosnan aki? Ta un hende a traha nan? Nò. Hende por traha kas. Pero niun hende no por traha yerba ku ta krese. Hende no por traha yu di para, ni flor, ni niun otro kos ku tin bida. Bo tabata sa e kos ei?—

Ta Dios a traha tur e kosnan aki. Ta Dios a traha shelu i tera. Ta Dios a traha hende tambe. El a krea e promé hende hòmber i e promé hende muhé. Esei ta loke Hesus, e Gran Maestro, a siña nos.—Mateo 19:4-6.

 Kon Hesus por tabata sa ku ta Dios a traha hende hòmber ku hende muhé? Hesus a mira Dios traha nan?— Sí, el a mir’é. Hesus tabata serka Dios ora Dios a traha hende hòmber ku hende muhé. Hesus tabata e promé persona ku Dios a traha. Hesus tabata un angel, i e tabata biba den shelu serka su Tata.

Beibel ta konta nos ku Dios a bisa: “Laga nos traha hende.” (Génesis 1:26) Bo sa ta ken Dios a bisa e kos ei?— El a bisa su Yu. Dios tabata papiando ku esun ku despues a bini na mundu i a bira Hesus.

Kon bo ta haña e kos ei? Bon, no? Imaginá bo! Ora nos ta skucha Hesus, nos ta siñando for di esun ku tabata serka Dios ora Dios a traha mundu i tur otro kos. Hesus a siña hopi kos trahando ku su Tata den shelu. P’esei, no ta nada straño ku Hesus ta e Gran Maestro!

 Bo ta kere ku Dios tabata tristu promé ku el a traha su Yu dor ku e tabata su so?— Nò, e no tabata tristu. Pakiko antó el a traha otro kos bibu?— El a hasié pasobra e ta un Dios di amor. E tabata ke pa otronan tambe biba i gosa di bida. Nos mester gradisí Dios ku el a duna nos bida.

Tur kos ku Dios a hasi ta mustra ku e tin amor. Dios a traha solo. Solo ta duna nos lus i ta tene nos kurpa kayente. Si nos no tabatin solo, tur kos lo tabata friu i lo no tabatin bida riba tera. Bo no ta kontentu ku Dios a traha solo?—

Ta Dios ta pone awaseru kai tambe. Kisas tin bes bo no gusta ora awa ta kai, pasobra e ora ei bo no por bai hunga pafó. Pero áwaseru ta yuda flor krese. P’esei, ora nos mira flor bunita, ken nos mester gradisí pa nan?— Dios. Anto ken nos mester gradisí ora nos kome un fruta dushi òf un bèrdura ku ta smak bon?— Nos mester gradisí Dios, pasobra ta su solo i su áwaseru ta hasi kos krese.

Awor, laga nos bisa ku un hende ta puntra bo: “Ta Dios a traha hende ku bestia tambe?” Kiko bo ta kontest’é?— Si bo bisa: “Sí, ta Dios a traha hende ku bestia,” bo a kontest’é bon. Pero kiko ta pasa si un hende no ta kere ku ta bèrdat ku Dios a traha hende? I kiko awor si e bisa ku hende a bini di bestia? Wèl, no ta esei Beibel ta siña nos. Beibel ta bisa ku ta Dios a traha tur kos ku tin bida.—Génesis 1:26-31.

Pero kisas tin hende lo bisa bo ku nan no ta kere den Dios. E ora ei, kiko lo bo bisa un hende asina?— Si bo ke bo por mustr’é un kas. Puntr’é: “Ta ken a traha e kas ei?” Tur hende sa ku un hende mester a trah’é. Ta klaru ku e kas no a traha su mes!—Hebreonan 3:4.

 E ora ei, bai ku e hende pafó i mustr’é un flor. Puntr’é: “Ken a traha e kos aki?” No ta un hende. I meskos ku e kas no a traha su mes, e flor tampoko no a traha su mes. Ta un persona a trah’é. Sí, Dios.

Pidi e hende para un ratu i skucha un para kanta. E ora ei, puntr’é: “Ken a traha e para i siñ’é kanta?” Sí, Dios. Ta Dios a traha shelu, tera, i tur kos ku tin bida! E ta Esun ku ta duna bida.

Tòg un hende lo por bisa bo ku e ta kere den kos ku e por mira so. Lo e por bisa bo: ‘Si mi no por mira un kos, mi no ta kere aden.’ P’esei tin hende ta bisa ku nan no ta kere den Dios, pasobra nan no por mir’é.

Ta bèrdat ku nos no por mira Dios. Beibel ta bisa ku ‘niun hende no por mira Dios.’ Niun hende riba tera no por mira Dios; ni hòmber, ni muhé ni mucha. P’esei niun hende no mester purba traha un prenchi ni un imágen di Dios. Dios a asta bisa nos ku nos no tin mag di traha imágen di dje. Esei kier men ku Dios no ta keda kontentu si nos tin kos asina den nos kas.—Eksodo 20:4, 5; 33:20; Juan 1:18.

Pero si bo no por mira Dios, kon bo por sa ku Dios ta eksistí di bèrdat? Pensa un ratu. Bo por mira bientu?— Nò. Niun hende no por mira bientu. Pero bo por mira kiko bientu ta hasi sí. Bo por mira blachi move bai bin ora bientu pasa den rama di palu, i esei ta yuda bo mira ku bientu ta eksistí.

Bo por mira kos ku Dios a traha tambe. Ora bo mira un flor bibu òf un para, bo ta mirando un kos ku Dios a traha. E kosnan ei ta mustra bo ku Dios ta eksistí di bèrdat.

 Kisas un hende por puntra bo: ‘Ken a traha solo i tera?’ Beibel ta bisa: ‘Dios a krea shelu i tera.’ (Génesis 1:1) Sí, Dios a traha tur e kosnan bunita aki! Kon bo ta haña e kos ei?—

Bo no ta kontentu ku nos ta na bida? Nos por tende para kanta bunita. Nos por mira flor i otro kos ku Dios a traha. Anto nos por kome e kuminda ku Dios a duna nos.

Nos mester gradisí Dios pa tur e kosnan aki. Pero e kos ku mas nos mester gradisié p’e ta ku el a duna nos bida. Si di bèrdat nos ta gradisidu na Dios, anto tin un kos ku nos lo hasi. Kiko e ta?— Nos lo tende di Dios, i nos lo hasi loke e ta bisa nos den Beibel. Asina nos por mustra ku nos ta stima Esun ku a traha tur kos.