MAKIYKEQA tʼukunapaj jina ruwasqa kashan. ¿Yachankichu imastachus makiykiwan ruwayta atisqaykita?... Makiykita qhawarikuy, dedosniykita pujllarichiy, kunantaj imallatapis oqhariy. Makiykeqa ashkha imasta ruwayta atin, sumajtataj. ¿Pitaj makisniyojta ruwawarqanchej?...

Arí, Dios ruwawarqanchej. Diosqa Jesuspa Tatan. Payllataj siminchejta, senqanchejta, ñawisninchejtapis ruwarqa. Diosninchej ñawisniyojta ruwawasqanchejmanta, ¿kusikunkichu?... Ñawisninchejwanqa tʼikasta, qʼomer pampasta, cielotapis qhawayta atinchej. Chantapis kay dibujitopi jina, pʼesqetus mikhusqankuta qhawayta atinchej. Tukuy imata qhawayta atisqanchej, ¿tʼukuchisunkichu?...

Chantá, ¿pitaj chay imasta ruwarqa? ¿Runachu ruwarqa? Mana. Runasqa wasista ruwayta atinku, manataj ruwayta atinkuchu pastota, pʼesqetusta, tʼikitasta, nillataj ima kausajtapis. ¿Chayta yacharqankichu?...

Diosqa tukuy imata ruwarqa: Jallpʼata, cielota, runastapis. Sumajta Yachachej Jesusqa, Diosninchej ñaupaj qharita, ñaupaj warmitapis ruwasqanta nerqa (Mateo 19:4-6).

 ¿Imaynatá Jesús chayta yacharqa? Runasta Dios ruwashajtin, ¿Jesús rikorqachu?... Arí. Jesusqa Dioswan kasharqa. Imajtinchus Diosqa Jesustaraj tukuy imamanta ñaupajta ruwarqa. Jesusqa Tatanwan cielopi tiyakushaspa uj ángel karqa.

Biblia nisqanman jina, Dios nerqa: “Runata ruwanachej”, nispa (Génesis 1:26). ¿Piwantaj Dios parlasharqa?... Wawanwan parlasharqa. Wawanqa aswan qhepaman Jallpʼaman jamorqa, Jesús sutiwantaj rejsisqa karqa.

Kaypi tʼukuriy. Diosninchej Jallpʼata, tukuy imatawan ruwashajtin, ¡Jesusqa paywan kasharqa! Chayrayku Jesusta uyareyqa, ¡may sumaj! Payqa Tatanwan cielopi trabajaspa, mayta yachakorqa. ¡Chantachá Jesusqa Sumaj Yachachej!

 Dios niraj Jesusta ruwashaspa sapan kasqanmanta, ¿llakikojchu?... Mana. Chantá, ¿imaraykutaj angelesta, runasta, animalestapis ruwarqarí?... Munakuyniyoj kasqanrayku. Payqa wajkuna kausanankuta, kusisqataj kanankuta munarqa. Chayrayku Diosman “gracias” ninanchej tiyan, kausayta qowasqanchejmanta.

Diospa tukuy ruwasqasnenqa, munakuyninta rikuchin. Intipi tʼukurina. Inti kʼanchamusqanrayku mana chirimanta wañunchejchu. Manachus inti kanman chayqa, manchay chiri kanman, nitaj imapis Jallpʼapi kausanmanchu. Intita Dios ruwasqanmanta, ¿kusikunkichu?...

Diosllataj paratapis parachimun. Wakin kutistaj ichapis mana paramunanta munankichu, paramojtin jawapi mana pujllayta atisqaykirayku. Chaywanpis mana parajtenqa, mana tʼikas kanmanchu. Kʼacha tʼikasta rikuspa, ¿pimantaj “gracias” ninanchej tiyan?... Diosman. ¿Frutasta, verdurasta mikhusparí?... Diosllamantaj agradecekuna tiyan. Paymín plantas wiñananpaj intita kʼanchachimun, parachimuntaj.

“¿Diosllatajchu runasta, animalestapis ruwarqa?”, nispa tapusojtinku, ¿imatá kutichiwaj?... “Arí, Diosllataj ruwarqa”, nispa kuticheyqa may allin. Chaywanpis, ¿imatá niwaj mana creesojtin, chayri animalesmanta jamusqanchejta nisojtin? Bibliaqa mana chaytachu yachachin. Astawanpis Diospuni tukuy kausajkunata ruwasqanta nin (Génesis 1:26-31).

Pillapis “Diospi mana creenichu” nisojtin, ¿imatá niwaj?... Uj wasita rikuchispa tapuriwaj: “¿Pitaj kay wasita ruwarqa?”, nispa. Tukuy yachanchej wasita runapuni ruwasqanta, nitaj jinallamantachu rikhurisqanta (Hebreos 3:4).

 Chantá uj jardinman pusawaj. Uj tʼikitata rikuchispataj tapuriwaj: “¿Pitaj kay tʼikata ruwarqa?”, nispa. Tʼikastaqa mana runachu ruwan. Imaynatachus uj wasi mana sapallanmantachu rikhurin, jinallataj tʼikaspis mana jinallamantachu rikhurinku, manaqa Dios ruwan.

Chantá chay runata niwaj pʼesqetuspa takisqankuta uyarinanta. Tapuriwajtaj: “¿Pitaj pʼesqetusta ruwarqa? ¿Pitaj takiyta yachacherqa?”, nispa. Chaytaqa ruwarqa cielota, Jallpʼata, tukuy kausajkunatawan ruwaj Dios. Pay tukuyman kausayta qon.

Ichá pillapis nisunkiman: “Noqaqa rikusqallaypi creeni”, nispa. Wakenqa Diospi mana creenkuchu, payta mana rikusqankurayku.

Diostaqa manapuni rikuyta atinchejchu. Biblia nin: ‘Mana pipis Diosta rikuyta atinchu’, nispa. Jinapunitaj, Diostaqa ni mayqen runapis, ni warmipis, ni wawapis rikuyta atinchu. Chayrayku ni pipis, uj cuadrota chayri uj santota Diosman rijchʼachiyta munaspa ruwananchu tiyan. Diosqa mana chaykunata ruwanata munanchu. Chaykunata wasinchejpi japʼikuspaqa, Diosta phiñachisunman (Éxodo 20:4, 5; 33:20; Juan 1:18).

Diosta mana rikuyta atispapis, ¿imaynapi yachanchej Pay kasqantapuni? Kaypi tʼukuriy: ¿Wayrata rikuyta atinkichu?... Mana, ni pipis wayrata rikuyta atinchu. Wayra kasqantapuni yachanchej, sachʼaj ramasninta kuyuchisqanrayku.

Uj tʼikata, uj pʼesqetuta qhawaspaqa, Diospa ruwasqasninta qhawashanchej. Ajinamanta, Dios kasqantapuni yachanchej.

Ichá pillapis tapusunkiman: “¿Pitaj intita, Jallpʼata ruwarqa?”, nispa. Biblia kutichin: “Dios cielotawan, kay pachatawan ruwarqa”, nispa (Génesis 1:1). Arí, chay sumaj imastaqa Diospuni ruwarqa. Chaykunamanta, ¿imatá ninki?...

 Kausayniyoj kayqa, ¡may sumaj! Imajtinchus pʼesqetuspa takisqankuta uyarinchej. Tʼikasta, Diospa waj ruwasqasnintawan qhawariyta atinchej. Chantapis Dios noqanchejpaj poqochisqan imasta mikhuyta atinchej.

Chay tukuy imasmanta Diosman “gracias” ninanchej tiyan, astawanraj kausayta qowasqanchejmantaqa. Diosman agradecesqa kasqanchejta rikuchinapaj, ¿imatá ruwasunman?... Diosta uyarina, Bibliapi kamachiwasqanchejtataj kasukuna. Ajinamanta, tukuy imata Ruwaj Diosta munakusqanchejta rikuchisun.