MBI yeke na mbeni pendere tënë ti tene. Mo ye ti mä ni?— Bâ maboko ti mo. Tingbi ali ti maboko ti mo, na tara ti mû mbeni ye na ni. Mo bâ, maboko ti mo alingbi ti sala gbâ ti aye, nga nzoni mingi. Mo hinga zo wa si aleke maboko ti e?—

Ni la. A yeke gi oko Zo so aleke hôn ti e, yanga ti e, nga na lê ti e. A yeke Nzapa, Babâ ti Kota Wafango ye. So Nzapa amû na e lê, a nzere na e pëpe?— Lê asala si e yeke bâ aye mingi. E lingbi ti bâ afleur. E lingbi ti bâ afini pele nga na lê ti nduzu. E lingbi même ti bâ akete ndeke na tengo kobe tongana ti so ayeke na yâ foto ge. Biani, a yeke tâ nzoni mingi so e lingbi ti bâ mara ti aye tongaso, ni la ape?—

Me zo wa aleke aye so kue? Zo ti sese la aleke ni? Oko pëpe. Zo alingbi ti leke da. Me zo alingbi pëpe ti sala si apele akono. Zo alingbi nga pëpe ti leke mbeni kete ndeke, fleur, wala ye kue so ayeke na fini. Mo hinga so?—

Nzapa la aleke aye so kue. Lo leke yayu na sese. Lo leke nga azo. Lo leke kozo koli na kozo wali. Jésus, Kota Wafango ye, afa lani aye so.​—Matthieu 19:4-6.

 Tongana nyen Jésus ahinga so Nzapa si aleke koli na wali? Lo bâ lani Nzapa na lekengo ala?— En, lo bâ Lo. Jésus ayeke kozo zo so Nzapa aleke. Na tongana Nzapa aleke koli na wali, Jésus ayeke lani dä awe. Lo yeke lani mbeni ange, na lo duti na yayu na tele ti Babâ ti lo.

Na yâ Bible, Nzapa atene: “Zia E sala zo.” (Genèse 1:26). Nzapa ayeke sala lani tënë na zo wa la?— Lo yeke sala lani tënë na Molenge ti lo. Lo yeke sala tënë na lo so na pekoni aga na ndo ti sese, wala Jésus.

Ye so apika bê mingi. Bâ kete si! Tongana e mä Jésus, a yeke lo so aduti lani na tele ti Nzapa na ngoi so Nzapa aleke sese na tanga ti aye kue si ayeke fa ye na e. Na salango kua na tele ti Babâ ti lo na yayu kâ, Jésus amanda aye mingi. A yeke ye ti dongo bê pëpe so Jésus ayeke Kota Wafango ye!

 So lani Nzapa ade ti leke Molenge ti lo pëpe, mo pensé so lo yeke na ngia pëpe, ngbanga ti so lo yeke gi lo oko?— Oko pëpe. Me, tongana lo yeke na ngia, ka ngbanga ti nyen lo leke tanga ti aye kue so ayeke na fini?— Lo leke ni ngbanga ti so lo yeke Nzapa ti ndoye. Lo ye si ambeni zo aduti na fini nga na ngia. A lingbi e kiri singila na Nzapa so lo mû na e fini.

Ye kue so Nzapa asala afa ndoye ti lo. Nzapa asala lâ. Lâ amû lumière na e na a sala si tele ti e amû wâ. Tongana fade lâ ayeke pëpe, ka ye kue ayeke dë dengo, na fini ayeke duti na ndo ti sese pëpe. A nzere na mo so Nzapa asala lâ?—

Nzapa asala nga si ngu apika. Peut-être a si na mo awe so mo ye ngu-nzapa pëpe, ngbanga ti so mo lingbi ti sigigi pëpe ti sala ngia. Me ngu-nzapa la asala si afleur akono. Ni la, tongana e bâ apendere fleur, e yeke kiri singila na zo wa?— Na Nzapa. Na tongana e te alê ti keke wala akugbe ti kasa so anzere, zo wa la a lingbi e kiri singila na lo?— A lingbi e kiri singila na Nzapa, ngbanga ti so a yeke lâ nga na ngu-nzapa so lo leke si asala si aye so akono.

Ka tongana mbeni zo ahunda mo, ‘Nzapa la aleke zo nga na anyama?’ Mo yeke tene nyen?— Tongana mo tene: “En, Nzapa la aleke zo na anyama”, so ayeke na lege ni. Ka tongana mbeni zo ake ti yeda so Nzapa si aleke biani azo? Mo yeke tene nyen tongana lo tene so zo aga na lege ti anyama? Bible afa ti lo ye tongaso pëpe. Lo tene so Nzapa asala aye kue so ayeke na fini.​—Genèse 1:26-31.

Me mbeni zo alingbi ti tene na mo so lo mä na bê na Nzapa pëpe. Mo yeke tene ande nyen?— Fa mbeni da na lo, na hunda zo ni: “Zo wa aleke da so?” Zo kue ahinga so mbeni zo si aleke ni. Da ni asala tele ti lo mveni pëpe!​—aHébreu 3:4.

 Na pekoni, mû zo ni mo gue na lo na mbeni ndo so akeke na afleur ayeke dä, na fa na lo mbeni fleur. Hunda lo: “Zo wa la asala ye so?” Zo oko pëpe. Legeoko tongana da so asala tele ti lo mveni pëpe, fleur nga kue asala tele ti lo mveni pëpe. Mbeni zo si asala ni. A yeke Nzapa.

Hunda zo ni ti luti na ti mä toto ti andeke. Na pekoni, hunda lo: “Zo wa la aleke andeke na afa na ala lege ti he bia?” Nzapa la aleke ala. Nzapa ayeke lo so asala yayu na sese nga na aye kue so ayeke na fini! Lo yeke Zo so amû fini.

Ye oko, mbeni zo alingbi ti tene so lo mä na bê gi na ye so lo bâ. Peut-être lo tene: ‘Tongana mbi bâ ni pëpe, mbi yeke mä na bê na ni pëpe.’ Ni la, ambeni zo atene so ala mä na bê na Nzapa pëpe ngbanga ti so ala bâ lo pëpe.

Tâ tënë, e lingbi ti bâ Nzapa pëpe. Bible atene: ‘Zo oko alingbi ti bâ Nzapa pëpe.’ Zo oko pëpe, atâa koli, wali, wala molenge, alingbi ti bâ Nzapa. Tongaso, a lingbi zo oko atara ti sala mbeni dessin wala mbeni image ti Nzapa pëpe. Nzapa atene même na e so a lingbi e sala mbeni ye so akpa lo pëpe. Tongaso, tongana e yeke na mara ti aye so na da ti e, a yeke nzere ande na Nzapa oko pëpe.​—Exode 20:4, 5; 33:20; Jean 1:18.

Me, teti so mo lingbi ti bâ Nzapa pëpe, tongana nyen mo hinga so Nzapa ayeke dä biani? Pensé kete na ye so. Mo lingbi ti bâ pupu?— Oko pëpe. Zo oko alingbi ti bâ pupu pëpe. Me mo lingbi ti bâ aye so pupu ayeke sala. Tongana pupu ayeke sala na yâ ti akeke, mo lingbi ti bâ akugbe ni so ayeke yengere. Tongaso, mo mä na bê so pupu ayeke dä.

Mo lingbi ti bâ nga aye so Nzapa asala. Tongana mo bâ mbeni fleur wala mbeni ndeke, mo bâ mbeni ye so Nzapa asala. Tongaso, mo mä na bê so Nzapa ayeke dä biani.

 Mbeni zo alingbi ti hunda mo, ‘Zo wa la asala lâ na sese?’ Bible atene: “Nzapa acréé ayayu na sese.” (Genèse 1:1). Tâ tënë, Nzapa la asala apendere ye so kue! Mo tene ti mo nyen?—

A yeke tâ nzoni mingi ti duti na fini, ni la ape? E lingbi ti mä apendere bia ti andeke. E lingbi ti bâ afleur nga na ambeni ye nde so Nzapa asala. E lingbi nga ti te akobe so Nzapa amû na e.

A lingbi e kiri singila na Nzapa ndali ti aye so kue. Mingi ahon so, a lingbi e kiri singila na lo ndali ti fini so lo mû na e. Tongana e kiri biani singila na Nzapa, e yeke sala mbeni ye. Nyen?— E yeke mä Nzapa, na e yeke sala ye so lo tene na e ti sala na yâ Bible. Tongaso, e yeke fa so e ye Lo so asala ye kue.