E IAI se mea manaia ua ou iloa. E ā, e te fia faalogo i ai?— Seʻi tilotilo foʻi i lou lima. Ia taumafai e faapiʻo ou tamatamaʻi lima. Seʻi tago la e uu se mea. E mafai e lou lima ona faia le tele o mea, ma e faia i se auala lelei. E te iloa o ai na faia o tatou lima?—

Ioe, o Ia foʻi lenā na faia o tatou gutu, isu, ma mata. O ia o le Atua, o le Tamā o le Faiaʻoga Sili. Pe tatou te lē fiafia ea ua faia e le Atua o tatou mata?— E tele mea e mafai ona tatou vaai i ai i o tatou mata. E mafai ona vaai i fugālaau. E mafai ona vaai atu i le mutia lanu meamata ma le lagi lanumoana. Atonu e mafai foʻi ona tatou vaai atu i manufelelei laiti o aai, e pei o manufelelei i le ata. Ioe, e manaia tele le vaai atu i mea faapena, a ea?—

O ai na faia nei mea uma? Faamata na faia e se tagata? E leai. E mafai e le tagata ona fai le fale. Ae e lē mafai e se tagata ona faia se mutia e ola. E lē mafai foʻi e tagata ona fai se manulele laʻitiiti, se fugālaau, po o se isi meaola. Pe na e iloa lenā mea?—

O le Atua na faia mea uma nei. Na faia e le Atua le lagi ma le lalolagi. Na faia foʻi e le Atua tagata. Na ia faia le uluaʻi tamāloa ma le fafine. Na aʻoaʻo mai e Iesu le Faiaʻoga Sili, lenā mea.​—Mataio 19:4-6.

Na faapefea ona silafia e Iesu, na faia e le Atua le tamāloa ma le fafine? Pe na vaai i ai Iesu o faia i laʻua e le Atua?— Ioe, na vaai i ai  Iesu. Na faatasi Iesu ma le Atua, i le taimi na fai ai e le Atua le tamāloa ma le fafine. O Iesu na muamua lava faia e le Atua. Na avea muamua Iesu ma agelu, ma na la iai faatasi ma lona Tamā i le lagi.

Ua taʻu mai e le Tusi Paia le faapea atu o le Atua: ʻIa ta faia le tagata.’ (Kenese 1:26) E te iloa o ai na talanoa atu i ai le Atua?— O lona Alo. Na fetalai atu i lona Alo, lea na mulimuli ane sau i le lalolagi, ma faaigoa iā Iesu.

Oka se manaia o lenā mea, a ea? Seʻi mafaufau i ai! Pe a tatou faalogo iā Iesu, o lona uiga ua aʻoaʻoina i tatou e lē na faatasi ma le Atua, i le taimi na faia ai e le Atua le lalolagi ma isi mea uma lava. O le tele ia o mea na silafia e Iesu, i le taimi na la galulue faatasi ai ma lona Tamā i le lagi. O le māfuaaga lenā ua avea ai Iesu ma Faiaʻoga Sili!

O le ā sou manatu, pe na faanoanoa le Atua i le taimi na nofo ai na o ia, a o leʻi faia lona Alo?— E leai. Ae aiseā la na faia ai e le Atua  isi agelu ma tagata, pe afai sa fiafia lava le Atua ia na o ia?— Na faia e le Atua i latou, ona o ia o le Atua alofa. Na finagalo le Atua e maua foʻi e isi le ola ma le fiafia. E tatau la ona tatou faafetai i le Atua mo le ola ua ia foaʻi mai iā i tatou.

O mea uma lava ua faia e le Atua, ua faaalia ai lona alofa. Na faia e le Atua le lā. Ua aumaia e le lā le malamalama, ma faamāfanafana ai i tatou. Ana faapea e leai se lā, semanū o le a mālūlū tele ma lē mafai ai ona ola se mea i le lalolagi. E te fiafia la na faia e le Atua le lā?—

Na faia foʻi e le Atua le timu. Atonu e te lē fiafia i le timu i nisi o taimi, auā e lē mafai ai ona e taalo i fafo. Ae e fesoasoani le timu e ola ai fugālaau. O lea la, a tatou vaai i ni fugālaau mananaia, o ai e tatau ona faafetai i ai?— O le Atua. O ai foʻi tatou te faafetai i ai pe a ʻai ni fualaau ʻaina ma fualaau faisua, e manaia o latou tofo?— E tatau ona tatou faafetai i le Atua, auā o le lā ma le timu lea na ia faia, ua māfua ai ona ola na fualaau.

Seʻi faapea ua fesili atu se tagata iā te oe, ʻPe sa faia foʻi e le Atua tagata ma manu?’ O le ā sau tali?— E saʻo pe a e tali atu: “Ioe, na faia e le Atua tagata ma manu.” Ae ā pe a talitonu se tasi e leʻi faia e le Atua le tagata? Faapefea pe a fai mai se tasi o tagata na tupuga mai manu? E lē o aʻoaʻoina e le Tusi Paia lenā manatu. Ua taʻu mai e le Tusi Paia, o le Atua na faia tagata ma meaola.​—Kenese 1:26-31.

Ae atonu o le a fai atu se tagata iā te oe, o ia e lē talitonu i le Atua. O le ā la sau tali?— E lelei ona e faasino i se fale. Ia fesili i le tagata: “O ai na faia le fale?” E iloa uma lava e tagata, e iai lē na faia le fale. E leʻi teʻiteʻi iai le fale!​—Eperu 3:4.

E lelei pe a lua ō ma lenā tagata i se togālaau, ma faasino i ai se fugālaau. Fesili  i ai: “O ai na faia lenei fugālaau?” E leʻi faia e se tagata. E leʻi teʻiteʻi tū se fale, e faapena foʻi lenei fugālaau, e leʻi teʻiteʻi fua mai. Na iai sē na faia. Na faia e le Atua.

Ia fai i le tagata e lelei pe a faalogo i se pese a se manulele. Ona fesili atu lea i ai: “O ai na faia manufelelei, ma o ai na aʻoina a latou pese?” O le Atua. O le Atua na faia le lagi ma le lalolagi ma mea uma ua iai le ola! O le Atua, o Lē na foaʻi maia le ola.

Ae atonu o le a fai mai se tasi, e talitonu o ia na o mea e mafai ona vaai i ai. Atonu e faapea mai: ʻPe afai e lē mafai ona ou vaai i ai, e lē mafai foʻi ona ou talitonu i ai.’ Ua fai mai isi tagata latou te lē talitonu i le Atua auā e lē mafai ona latou vaai i ai.

E moni, e lē mafai ona tatou vaai i le Atua. Ua fai mai le Tusi Paia: ʻE leʻi vaai lava se tagata i le Atua.’ E lē mafai e se tamāloa, se fafine po o se tamaitiiti i le lalolagi, ona vaai i le Atua. E lē tatau la i se tagata ona faia se ata po o se faatusa o le Atua. Ua faapea mai foʻi le Atua e lē tatau ona tatou faia sona faatusa. O lea, e lē fiafia le Atua pe a iai ni faatusa po o ni ata faapena, i totonu o o tatou fale.​—Esoto 20:4, 5; 33:20; Ioane 1:18.

E faapefea ona tatou iloa e iai moni le Atua, auā o lea e lē mafai ona vaai i ai? Seʻi mafaufau i lenei manatu. Pe e mafai ona e vaai i le matagi?— E leai. E leai ma se tagata e mafai ona vaai i le matagi. Ae e mafai ona e vaai atu i mea e fai e le matagi. E mafai ona e vaai atu i lau o laau ua minoi solo, pe a agi le matagi. O lea ua e talitonu ai, e iai moni le matagi.

E mafai foʻi ona e vaai i mea na faia e le Atua. A e vaai atu i se fugālaau po o se manulele, o lenā ua e vaai i mea na faia e le Atua. O lea ua e talitonu ai, e iai moni le Atua.

Ae ā pe a fesili atu se tasi iā te oe, ʻO ai na faia le lā ma le lalolagi?’ Ua fai mai le Tusi Paia: “Na faia e le Atua le lagi ma le lalolagi.”  (Kenese 1:1) Ioe, na faia e le Atua mea matagofie uma nei! O le ā sou manatu i ai?—

Pe tatou te lē fiafia ea ua tatou maua le ola? E mafai ona tatou faalogo atu i pese mālie a manufelelei. Ua mafai foʻi ona vaai i fugālaau ma isi mea ua faia e le Atua. Ua mafai foʻi ona tatou aai i meaʻai ua foaʻi mai e le Atua.

E tatau ona tatou faafetai atu i le Atua mo mea uma nei. Ae e sili atu ona tāua le faafetai i le Atua, mo le foaʻiina mai o le ola. Afai tatou te talisapaia moni mea uma na faia e le Atua, e iai mea o le a tatou faia. O ā na mea?— Ia tatou faalogo atu i le Atua, ma faia mea ua ia taʻu mai o loo i le Tusi Paia. Afai tatou te usiusitai i mea na, o le a faaalia ai lo tatou alofa mo Lē na faia mea uma lava.