MI SABI wan heri moi sani. Yu wani yere san na dati?— Luku yu anu. Kron yu finga. Piki wan sani now nanga yu anu. Yu anu kan du furu sani, èn a kan du den sani disi bun. Yu sabi suma meki den anu fu wi?—

Iya, a srefi Sma di meki wi mofo, wi noso, nanga wi ai. A Sma dati na Gado, a Tata fu a Bigi Leriman. Wi no breiti taki Gado gi wi ai?— Wi kan si so furu sani nanga den. Wi kan luku den bromki. Wi kan luku a grun grasi nanga a blaw hemel. Kande wi sa si pikin fowru srefi di de nanga angri, soleki den wan na tapu a prenki. Iya, a de wan moi sani trutru taki wi kan si den sortu sani disi, a no so?—

Ma suma meki den sani disi? Na wan libisma meki den? Nôno. Libisma kan meki wan oso. Ma nowan libisma kan meki grasi di e gro. Libisma no kan meki wan yongu fowru, wan bromki, noso iniwan tra sani di abi libi. Yu ben sabi dati?—

Gado na a sma di meki ala den sani disi. Gado meki hemel nanga grontapu. A meki libisma tu. A ben meki a fosi man nanga a fosi uma. Yesus, a Bigi Leriman, leri wi a sani disi.​—Mateyus 19:4-6.

Fa Yesus ben sabi taki Gado ben meki a fosi man nanga a fosi uma? Yesus ben si di Gado du dati?— Iya, a ben si dati. Yesus ben  de makandra nanga Gado di Gado ben meki a fosi man nanga a fosi uma. Di Gado ben meki den, dan Yesus ben de kaba. A ben de wan engel, èn a ben libi na ini hemel makandra nanga en Tata.

Bijbel e fruteri wi taki Gado ben taki: „Meki wi meki libisma” (Genesis 1:26). Yu sabi nanga suma Gado ben e taki?— A ben e taki nanga en Manpikin. Gado ben e taki nanga a sma di ben kon na grontapu bakaten èn di tron Yesus.

A sani dati a no wan tumusi moi sani? Denki a sani dati! Te wi e arki Yesus, dan wi e kisi leri fu a sma di ben de makandra nanga Gado na a ten di Gado meki grontapu nanga ala tra sani. Yesus ben leri furu sani di a ben e wroko makandra nanga en Tata na ini hemel. Fu dati ede a no e fruwondru wi taki Yesus na a Bigi Leriman!

Bifo Gado ben meki en Manpikin, a ben de en wawan. Yu denki taki a sani dati ben meki a firi sari?— Nôno, a no ben firi sari. We,  efu a no ben firi sari taki a ben de en wawan, dan fu san ede a meki tra libisani?— A ben du disi fu di a de wan Gado fu lobi. A ben wani gi tra sma libi, èn a ben wani den fu prisiri fu a libi. Wi musu taki Gado tangi taki a gi wi libi.

Ala sani di Gado du e sori taki a lobi libisma. Gado meki a son. A son e gi wi leti nanga waran. Efu a son no ben de, dan ala sani ben o kowru èn libi no ben o de na grontapu. Yu no breiti taki Gado meki a son?—

Gado e meki sosrefi taki alen e fadon. Kande yu no lobi en son leisi taki alen e fadon, fu di yu no kan go na dorosei fu prei. Ma alen e yepi den bromki fu gro. Sobun, te yu e si moi bromki, dan suma wi o taki tangi?— Gado. Èn suma wi musu taki tangi te wi e nyan switi froktu nanga gruntu?— Wi musu taki Gado tangi fu di na en e gi wi a son nanga na alen di e meki taki sani e gro.

Kon meki wi taki dati wan sma e aksi yu: ’Gado meki libisma nanga den meti tu?’ San yu ben o taki?— A bun fu taki: „Iya, na Gado meki libisma nanga den meti.” Ma san yu o piki te wan sma no e bribi taki na Gado meki libisma trutru? San yu o piki te a sma dati e taki dati libisma e komoto fu meti? We, Bijbel no e leri wi dati. Bijbel e taki dati Gado meki ala libisani.​—Genesis 1:26-31.

Ma wan sma ben kan taigi yu taki a no e bribi na ini Gado. San yu o piki en dan?— Fu san ede yu no e sori a sma wan oso? Aksi a sma: „Suma meki na oso dati?” Ala sma sabi taki a musu de wan sma di meki en. Na oso no meki ensrefi kwetikweti!​—Hebrewsma 3:4.

Baka dati, tyari a sma go na ini wan dyari èn sori en wan bromki. Aksi a sma: „Suma meki a bromki disi?” A no wan libisma du dati. Èn neleki fa na oso no meki ensrefi, na  so a bromki disi no meki ensrefi tu. Wan sma meki a bromki disi. A sma dati na Gado.

Aksi a sma fu tanapu arki fa wan pikin fowru e singi. Baka dati, aksi en: „Suma meki den pikin fowru èn suma leri den fu singi?” Na Gado du dati. Gado na a sma di meki hemel nanga grontapu èn sosrefi ala libisani! En na a Sma di e gi libi.

Ma toku wan sma ben kan taki dati a e bribi soso na ini sani di a kan si. A sma dati ben kan taki: ’Mi no e bribi noti san mi no man si nanga mi eigi ai.’ Fu dati ede son sma e taki dati den no e bribi na ini Gado, fu di den no man si en.

A tru taki wi no man si Gado. Bijbel e taki: ’Nowan sma no man si Gado.’ Nowan mansma, umasma, èn nowan pikin na grontapu kan si Gado. Fu dati ede nowan sma musu pruberi fu meki wan prenki noso wan popki fu Gado. Gado srefi e taigi wi fu no meki wan popki fu en. Fu dati ede, Gado no ben o feni en bun te wi ben o abi den sortu sani dati na ini wi oso.​—Exodus 20:4, 5; 33:20; Yohanes 1:18.

Ma efu wi no man si Gado, dan fa wi kan sabi taki wan Gado de trutru? Prakseri a sani di e kon now. Yu kan si a winti di e wai?— Nôno. Nowan sma no man si a winti di e wai. Ma yu kan si san a winti e du. Yu kan si fa den wiwiri fu wan bon e seki te a winti e wai na mindri den taki fu wan bon. Na fu dati ede meki yu e bribi taki winti de trutru.

Yu kan si sosrefi den sani di Gado du. Te yu e si wan libilibi bromki noso wan pikin fowru, dan yu e si wan sani di Gado meki. Na fu dati ede meki yu e bribi taki wan Gado de trutru.

Wan sma ben kan aksi yu: ’Suma meki a son nanga grontapu?’ Bijbel e taki: „Gado ben meki hemel nanga grontapu” (Genesis 1:1).  Iya, Gado meki ala den tumusi moi sani disi! Fa yu feni a sani dati?—

A no wan moi sani fu de na libi? Wi kan yere fa den pikin fowru e singi so moi. Wi kan si den bromki nanga den tra sani di Gado meki. Èn wi kan nyan den difrenti sortu nyanyan di Gado gi wi.

Wi musu taki Gado tangi gi ala den sani disi. Ma san de moro prenspari, na taki wi musu taki en tangi fu di a gi wi libi. Efu wi de nanga tangi na ati trutru gi den sani di Gado du gi wi, dan wi sa du wan sani. San na dati?— Wi sa arki Gado, èn wi sa du san a e taigi wi na ini Bijbel. Na so wi kan sori taki wi lobi a Sma di meki ala sani.