KUNENTFO lemangalisako lengiyatiko. Ungatsandza yini kuyati?— Buka sandla sakho, bese ugoba iminwe yakho. Nyalo tsatsa intfo letsite. Sandla sakho sikhona kwenta tintfo letinyenti, futsi sitenta kahle. Ucabanga kutsi ngubani lowadala tandla tetfu?—

Waphindze wadala nemilomo yetfu, timphumulo kanye nemehlo etfu. Loyo nguNkulunkulu, Babe weMfundzisi Lomuhle Kakhulu. Utiva njani ngekutsi Nkulunkulu usidale saba nemehlo?— Ngawo sikhona kubona tintfo letinyenti. Singabuka timbali, tjani lobuluhlata kanye nesibhakabhaka. Singakhona kubona emazini lalambile njengalawa lakulesitfombe. Ecinisweni, akukumangalisi yini kutsi siyakwati kubona tintfo letinjengaleti?—

Kodvwa ngubani lowadala letintfo? Ukhona yini umuntfu lowatidala? Cha. Kuliciniso kutsi bantfu bayakwati kwakha tindlu. Kodvwa kute umuntfu longakhona kwenta tjani kutsi bukhule. Bantfu ngeke bakwati kudala lizini, kwenta imbali nobe badale lenye intfo lephilako. Bewukwati yini loko?—

NguNkulunkulu lodale tonkhe letintfo. Nkulunkulu udale emazulu nemhlaba. Uphindze wadala nebantfu. Wadala indvodza yekucala nemfati wekucala. Jesu, longuMfundzisi Lomuhle Kakhulu, wafundzisa ngaloko.​—Matewu 19:4-6.

 Jesu bekati ngani kutsi nguNkulunkulu lowadala indvodza nemfati? Jesu wambona yini Nkulunkulu ngesikhatsi abadala?— Wambona. Jesu bekanaNkulunkulu ngesikhatsi Nkulunkulu adala indvodza nemfati. Jesu waba ngumuntfu wekucala Nkulunkulu lamdala. Jesu bekayingilosi, futsi bekahlala ezulwini naBabe wakhe ngesikhatsi kudalwa indvodza nemfati wekucala.

LiBhayibheli lisitjela kutsi Nkulunkulu watsi: ‘Asente umuntfu.’ (Genesisi 1:26) Nkulunkulu bekakhuluma nabani lapha?— Bekakhuluma neNdvodzana yakhe. Bekakhuluma nalomuntfu lowagcina ete emhlabeni waba nguJesu.

Akujabulisi yini loko? Ase ucabange nje kancane! Nasilalela Jesu, sisuke sifundziswa ngumuntfu lobekanaNkulunkulu ngesikhatsi Nkulunkulu adala umhlaba nato tonkhe letinye tintfo. Jesu wafundza lokunyenti ngekusebenta naBabe wakhe ezulwini. Kungako Jesu anguMfundzisi Lomuhle Kakhulu.

 Ucabanga kutsi Nkulunkulu bekangajabuli yini ngesikhatsi ayedvwa, asengakayidali iNdvodzana yakhe?— Cha, bekajabula. Kodvwa-ke, nangabe bekajabula, kungani adala letinye tintfo letiphilako?— Loko wakwenta ngenca yekutsi unguNkulunkulu welutsandvo. Bekafuna kutsi nalabanye bantfu baphile futsi bajabulele imphilo. Kufanele simbonge Nkulunkulu ngekutsi usinike kuphila.

Konkhe Nkulunkulu lakwentile kuveta lutsandvo lwakhe. Nkulunkulu wadala lilanga lelisikhanyiselako nalelisifutfumetako. Tonkhe tintfo betitawubandza futsi bekungeke kube khona kuphila emhlabeni kube lilanga belingekho. Utiva njani ngekutsi Nkulunkulu wadala lilanga?—

Nkulunkulu ubangela nekutsi imvula ine. Ngaletinye tikhatsi kungenteka ungajabuli nalina ngobe awukhoni kuyodlala ngephandle. Kodvwa imvula isita timbali kutsi tikhule. Ngako-ke, nasibona timbali letinhle, ngubani lokufanele simbonge ngekusinika tona?— NguNkulunkulu. Ngubani lokufanele simbonge nasidla titselo kanye netibhidvo letimnandzi?— Kufanele sibonge Nkulunkulu, ngobe lilanga lakhe kanye nemvula yakhe ngiko lokwenta tintfo tikhule.

Ase sitsi umuntfu lotsite uyakubuta: ‘Nkulunkulu wadala nebantfu netilwane yini?’ Ungamphendvula njani?— Kungaba kahle kutsi umphendvule utsi: “Yebo, Nkulunkulu wabadala bantfu netilwane.” Kodvwa kutsiwani nangabe umuntfu lotsite angakholelwa kutsi Nkulunkulu wabadala mbamba bantfu? Yini lotayenta nangabe atsi bantfu bavela etilwaneni? LiBhayibheli alikufundzisi loko. Litsi Nkulunkulu wadala tonkhe tintfo letiphilako.​—Genesisi 1:26-31.

Kodvwa umuntfu lotsite angakutjela kutsi yena akakholelwa kuNkulunkulu. Yini-ke lotayisho?— Kungani ungamtjengisi indlu? Mbute: “Ngubani lowakhe lendlu?” Bonkhe bantfu bayati kutsi kunalotsite loyakhile. Ecinisweni, indlu beyingeke itakhe.​—Hebheru 3:4.

 Ngemuva kwaloko, tsatsa lomuntfu umyise engadzeni bese umtjengisa imbali. Mbute: “Ngubani loyidalile?” Akusiye umuntfu. Njengobe nendlu ingazange itakhe, nalembali ayizange itidale. Kunalotsite loyidalile. Loyo nguNkulunkulu.

Cela lomuntfu kutsi eme kancane alalele tinyoni natihlabela. Ngemuva kwaloko mbute: “Ngubani lodale tinyoni futsi watifundzisa kuhlabela?” NguNkulunkulu. Nguye lodale emazulu, umhlaba kanye nato tonkhe tintfo letiphilako. NguYe losinika kuphila.

Nobe kunjalo, lomunye umuntfu angase atsi ukholelwa kuphela entfweni layibonako. Angatsi: ‘Nangabe intfo ngingayiboni, angiyikholelwa.’ Ngako labanye bantfu batsi abakholelwa kuNkulunkulu ngenca yekutsi abamboni.

Kuliciniso kutsi ngeke sikhone kumbona Nkulunkulu. LiBhayibheli litsi: ‘Kute umuntfu longabona Nkulunkulu.’ Kute indvodza, umfati nobe umntfwana emhlabeni longakhona kubona Nkulunkulu. Ngako-ke, akukafaneli kube nemuntfu lotama kwenta sitfombe nobe umfanekiso waKhe. Nkulunkulu uze asitjele kutsi singawenti umfanekiso wakhe. Ngenca yaloko, ngeke kumjabulise Nkulunkulu nangabe emitini yetfu sinetintfo letifana naleti.​—Eksodusi 20:4, 5; 33:20; Johane 1:18.

Kodvwa njengobe ungeke ukhone kubona Nkulunkulu, ungati njani kutsi ukhona mbamba ? Ase ucabange ngaloku: Uyakhona yini kuwubona umoya?— Cha. Kute umuntfu longakhona kubona umoya. Kodvwa uyakhona kubona loko umoya lokwentako. Uyakhona kubona emacembe anyakata ngesikhatsi umoya uhhusha emagaleni esihlahla. Ngesizatfu saloko, uyakholelwa kutsi umoya ukhona.

Uyakwati kuphindze ubone netintfo Nkulunkulu latidalile. Nawubona imbali nobe inyoni, usuke ubona lokutsite lokudalwe nguNkulunkulu. Ngesizatfu saloko, uyakholelwa kutsi ukhona mbamba Nkulunkulu.

Lomunye umuntfu angase akubute: ‘Ngubani lodale lilanga nemhlaba?’ LiBhayibheli litsi: “Nkulunkulu wadala lizulu nemhlaba.” (Genesisi  1:1) Nkulunkulu udale tonkhe letintfo letimangalisako. Utiva kanjani ngaloko?—

Akujabulisi yini kuphila? Sikhona kuva kuhlabela lokumnandzi kwetinyoni. Sikhona kubona timbali kanye naletinye tintfo Nkulunkulu latidalile. Kantsi futsi sikwati nekudla kudla Yena lasinike kona.

Kufanele sibonge Nkulunkulu ngekusinika tonkhe letintfo. Ngetulu kwako konkhe, kufanele simbonge ngekutsi usinike kuphila. Nangabe simbonga mbamba Nkulunkulu, kunalokutsite lesitakwenta. Yini leyo?— Sitawulalela Nkulunkulu, futsi sitakwenta loko lasitjela kutsi sikwente eBhayibhelini. Nasenta njalo, sitawubonisa kutsi siyamtsandza Loyo lowadala tonkhe tintfo.