Cibalo 3

Ooyo Iwakalenga Zintu Zyoonse

KULI cintu cimwi ncendizyi icibotu kapati. Sena ulayanda kucizyiba?— Langa mujanza lyako. Vwunga tunwe twako. Lino bweza cintu cimwi. Ijanza lyako lilakonzya kucita zintu zinji kapati, alimwi lilazicita kabotu. Sena ulimuzyi wakalenga maanza eesu?—

Inzya, Ngonguwe iwakalenga mulomo, impemo alimwi ameso eesu. Ngu Leza, Bausyi ba Mwiiyi Mupati. Sena tatukkomene kuti Leza wakatupa meso?— Tulakonzya kubona zintu zinji angawo. Tulakonzya kulanga maluba-luba. Tulakonzya kulanga mweemvwe alimwi ajulu. Alimwi mane tulakonzya kubona tuyuni katulya mbuli tootu tuli mucifwanikiso. Masimpe, cilakondelezya kuti tulakonzya kubona zintu zili boobu, tee kayi?—

Pele ino nguni wakazyilenga zintu eezyi? Sena kuli muntunsi umwi wakazilenga? Peepe. Bantu balakonzya kuyaka ŋanda. Pele kunyina muntu uukonzya kupanga mweemvwe. Bantu tabakonzyi kupanga mwanaa kayuni, maluba-luba naa cintu cimbi cili coonse icipona. Sena ulaazyi makani aaya?—

Leza nguwakalenga zintu eezyi zyoonse. Leza wakalenga ijulu alimwi anyika. Alimwi wakalenga abantu. Wakalenga mwaalumi amwanakazi bakusaanguna. Jesu, Mwiiyi Mupati wakaayiisya makani aaya aakulenga.—Matayo 19:4-6.

 Ino Jesu wakazyiba buti kuti Leza nguwakalenga mwaalumi amwanakazi? Sena Jesu wakalibonena Leza kalenga?— Inzya wakacita oobo. Jesu wakali antoomwe a Leza eelyo Leza naakali kulenga mwaalumi amwanakazi. Jesu ncecilenge citaanzi ncaakalenga Leza. Jesu wakali mungelo, alimwi wakali kukkala kujulu antoomwe a Basyi kuciindi eeco cakulenga.

Ibbaibbele litwaambila kuti Leza wakaamba kuti: “Atupange muntu.” (Matalikilo 1:26) Sena ulimuzyi ooyo Leza ngwaakali kwaambila?— Wakali kwaambila Mwanaakwe. Wakali kwaambila ooyo iwakazyikuboola anyika akuzyikuba Jesu.

Eeci cilakondelezya, tee kayi? Koyeeya buyo! Eelyo notumumvwida Jesu, tulayiisyigwa ayooyo wakali aa Leza eelyo Leza naakalenga nyika azintu zili mumo zyoonse. Nzinji kapati Jesu nzyaakaiya eelyo naakali kubelekaa Bausyi kujulu. Anu Jesu ncali Mwiiyi Mupati uucibwene kuyiisya!

 Sena uyeeya kuti Leza wakalityompedwe akaambo kakuti wakali buyo alikke eelyo naatakaninga kulenga Mwanaakwe?— Peepe, tanaakatyompedwe pe. Ikuti naa wakalikkomene, ino nkaambo nzi ncaakalengela zintu zimbi zipona?— Wakazilenga nkaambo ngu Leza siluyando. Wakali kuyanda kuti abambi bapone alimwi akukkomana abuumi. Tweelede kumulumba Leza akaambo kakuti wakatupa buumi.

Izintu zyoonse Leza nzyaakalenga zitondezya luyando lwakwe. Leza wakalenga zuba. Izuba litupa mumuni alimwi akukasaalilwa. Izintu zyoonse nozyali kutontola alimwi nokwatali cintu cipona anyika ikuti zuba nolyataliko. Sena tokkomene kuti Leza wakalenga zuba?—

Alimwi Leza upa kuti kakuwa mvwula. Zimwi ziindi inga toko kwiiyanda mvwula akaambo kakuti noiwa ilakusinkila kuya anze kuyoosobana. Pele imvwula njiipa kuti kaakomena maluba-luba. Aboobo eelyo notubona maluba-luba mabotu, ino nguni ngotweelede kulumba?— Tweelede kulumba Leza. Alimwi ino nguni ngotweelede kulumba notulya micelo azisyumani zinona?— Tweelede kumulumba Leza nkaambo nguupa izuba alimwi amvwula izipa kuti zintu eezyi zikomene.

Ikuti muntu umwi wakubuzya mubuzyo wakuti, ‘Sena Leza nguwakalenga abantu alimwi abanyama?’ Ino inga wamwiingula buti?— Cililuzi kwiingula kuti: “Inzya, Leza nguwakalenga bantu alimwi abanyama.” Pele ino mbuti kuti muntu umwi kataasyomi makani aakuti Leza ncobeni nguwakalenga bantu? Ino kuti muntu ooyo waamba kuti bantu bakasanduka buya kuzwa kubanyama? Kunyina Bbaibbele noliyiisya makani aali boobo pe. Lyalo lyaamba kuti Leza nguwakalenga zintu zyoonse zipona.—Matalikilo 1:26-31.

Pele umwi ulakonzya kukwaambila kuti tasyomi kuti Leza nkwali. Ino uyoomwaambila nzi muntu uuli boobo?— Ulakonzya kutondeka ŋanda imwi akumubuzya kuti: “Ino nguni wakayaka ŋanda iilya?” Muntu woonse ulizyi kuti kuli muntu umwi iwakaiyaka. Masimpe iŋanda kunyina noyakaliyaka yini pe!—Ba-Hebrayo 3:4.

 Mpoonya muntu ooyo mutondezye maluba-luba. Mubuzye kuti: “Ino nguni wakapanga maluba-luba aaya?” Kunyina muntu wakapanga maluba-luba. Alimwi mbubwenya buyo ŋanda mboyatakaliyaka yini, aalo maluba-luba aaya tanaakalipanga meni pe. Kuli umwi wakaapanga. Leza nguwakaapanga.

Ambila muntu ooyo aswiilizye kayuni nikalila. Mpoonya mubuzye kuti: “Ino nguni wakapanga bayuni akubayiisya kulila boobo?” Ngu Leza. Leza nguwakalenga ijulu, inyika alimwi azintu zyoonse zipona! Nguupa buumi.

Pele muntu uumbi ulakonzya kukwaambila kuti usyoma buyo zintu nzyakonzya kubona. Ulakonzya kwaamba kuti: ‘Ikuti kanditaciboni, tandicisyomi pe.’ Aboobo bamwi baamba kuti tabamusyomi pe Leza akaambo kakuti tabakonzyi kumubona.

Ncamasimpe kuti tatukonzyi kumubona Leza. Ibbaibbele lyaamba kuti: ‘Taakwe muntu uukonzya kubona Leza.’ Kunyina mwaalumi, mwanakazi naa mwana anyika uukonzya kumubona Leza. Aboobo kunyina weelede kupanga cifwanikiso naa cikozyanyo ca Leza. Alimwi mane Leza ulatukasya kupanga cikozyanyo cakwe. Aboobo inga tiicamukkomanisya pe Leza ikuti katujisi zintu zili boobo muŋanda yesu.—Kulonga 20:4, 5; 33:20; Johane 1:18.

Pele ikuti katutakonzyi kumubona Leza, ino mbuti mbotuzyi kuti nkwali ncobeni? Koyeeya makani aaya. Sena ulakonzya kuubona muwo?— Peepe. Kunyina muntu uukonzya kuubona muwo. Pele ulakonzya kuzibona nzyoucita muwo. Ulakonzya kubona matuvwu aamusamu kaayuuntana mumitabi. Aboobo ulasyoma kuti kuli muwo.

Azyalo zintu nzyaakalenga Leza ulakonzya kuzibona. Eelyo nobona maluba-luba naa kayuni, ubona cintu ncaakalenga Leza. Eelyo ulasyoma kuti nkwali ncobeni Leza.

Imuntu uumbi ulakonzya kukubuzya kuti, ‘Ino nguni wakapanga zuba alimwi anyika?’ Ibbaibbele lyaamba kuti: “Leza wakalenga ijulu  anyika.” (Matalikilo 1:1) Inzya, Leza nguwakalenga zintu zyoonse eezyi zibotu! Ino ulimvwa buti kujatikizya makani aaya?—

Sena tacikkomanisyi kuba muumi? Tulakonzya kumvwa inyimbo zyabayuni zikondelezya. Tulakonzya kubona maluba-luba alimwi azintu zimbi nzyaakalenga Leza. Alimwi tulakonzya kulya zilyo nzyaakatupa Leza.

Tweelede kumulumba Leza akaambo kazintu eezyi zyoonse. Ikwiinda zyoonse, tweelede kumulumba akaambo kabuumi mbwaakatupa. Ikuti katumulumba ncobeni Leza akaambo kazintu nzyaakatupa, ciyootupa kubweza ntaamu imwi. Ino nintaamu nzi?— Tunoomuswiilila Leza alimwi tunoocita zyoonse nzyatwaambila kucita mu Bbaibbele. Munzila eeyo, tulakonzya kutondezya kuti tulamuyanda Ooyo wakalenga zintu zyoonse.

Tweelede kumulumba Leza kuzintu zyoonse nzyaakacita. Ino inga twacita buti oobo? Kobala cilembedwe ku Intembauzyo 139:14; Johane 4:23, 24; 1 Johane 5:21; alimwi a Ciyubunuzyo 4:11.

[Cifwanikiso icili apeeji 21]

Ino nguni wakalenga zintu zyoonse zyuumi?

[Zifwanikiso izili apeeji 22, 23]

Mbwaanga kuli muntu wakayaka ŋanda, ino nguni wakapanga maluba-luba, masamu alimwi abanyama?

[Cifwanikiso icili apeeji 25]

Ino uzyiba buti kuti kuli muwo?