NKUMANYA cintu cinyake cakuzizwiska comene. Kasi ungatemwa kuti ucimanye?— Laŵiska cikufi cako. Vumbatira minwe yako. Tora cintu cilicose ico ungatemwa. Cikufi cako cingacita vintu vinandi comene, ndipo cingacita vintu ivi makoraghene. Kasi ukumumanya uyo wakapanga vikufi vithu?—

Nimweneyuyu Uyo wakapangaso mlomo withu, mphuno yithu na maso ghithu. Uyo wakapanga vyose ivi ni Ciuta, Awiske ŵa Msambizgi Waluso. Kasi ndise ŵakukondwa yayi kuti Ciuta walikutipa maso?— Tingawona vintu vinandi comene cifukwa ca maso. Tingawona maluŵa. Tingawona uteka wakubiliŵira na mtambo wabulumu. Tingawonaso tuyuni uto twayasamura cifukwa ca njala, twa nga ni uto tuli pa cithuzithuzi apa. Mwanadi, ncintu cakukondweska comene kuwona vintu vyose ivi. Kasi naweso ndimo ukughanaghanira?—

Kasi ni njani uyo wakalenga vintu ivi? Kasi ni muntu uyo wakavipanga? Yayi. Ŵantu ŵangazenga nyumba. Muntu wangapanga yayi uteka uwo ukumera. Muntu wangapanga yayi kamwana ka kayuni, luŵa panji cintu camoyo cilicose. Kasi ukumanya?—

Ciuta ndiye wakalenga vintu vyose ivi. Ciuta wakalenga kucanya na caru capasi. Iye wakalengaso ŵantu. Iye wakalenga mwanarumi wakudanga na mwanakazi wakudanga. Yesu, Msambizgi Waluso, wakasambizga kuti ŵantu ŵaŵiri aŵa ŵakalengeka nadi na Ciuta.—Mateyu 19:4-6.

 Kasi Yesu wakamanya wuli kuti Ciuta wakalenga mwanarumi na mwanakazi? Kasi Yesu wakawona Ciuta kuti wakuŵalenga ŵantu ŵara?— Enya. Yesu wakaŵa na Ciuta apo Ciuta wakalenganga mwanarumi na mwanakazi. Yesu ndiye wakaŵa wakwamba kulengeka na Ciuta pambere ŵantu ŵaŵiri ŵara ŵakaŵa ŵandalengeke. Yesu wakaŵa mungelo, ndipo wakakhalanga kucanya na Ŵawiske.

Baibolo likutiphalira kuti Ciuta wakati: “Tilenge muntu mu cikozgo cithu.” (Genesis 1:26) Kasi ukumanya uyo Ciuta wakayowoyanga naye?— Iye wakayowoyanga na Mwana wake. Iye wakayowoyanga na Yesu uyo pamanyuma pake wakiza pano pa caru capasi.

Kasi ici ncakukondweska yayi? Aghanaghanira waka! Para tikutegherezga kwa Yesu, tikusambizgika na uyo wakaŵa na Ciuta pa nyengo iyo Ciuta wakalengeranga caru capasi na vintu vinyake ivyo vilimo. Yesu wakasambira vintu vinandi pa nyengo iyo wakagwiliranga ncito lumoza na Awiske kucanya. Nadi, ndico cifukwa cake Yesu ni Msambizgi Waluso!

 Kasi ukughanaghana kuti Ciuta wakaŵa wakukondwa yayi apo wakaŵa wandalenge Mwana wake?— Wakaŵa wakukondwa. Usange wakaŵa wakukondwa, ncifukwa wuli wakalenga vintu vyamoyo?— Iye wakalenga vintu vyamoyo cifukwa ni Ciuta wakutemwa. Wakakhumbanga kuti ŵantu ŵaŵe ŵamoyo na kusangwa na umoyo. Tikwenera kumuwonga Ciuta cifukwa walikutipa umoyo.

Cilicose ico Ciuta wacita cikurongora citemwa cake. Ciuta wakalenga dazi. Dazi likutipa ungweru ndiposo likutipa cithukivu kuti tifundenge. Kuŵevyenge dazi, ntena vintu vyose ni vyakuzizima ndipo ntena palije camoyo pano pa caru capasi. Kasi ndiwe wakukondwa yayi kuti Ciuta walikupanga dazi?—

Ciuta ndiye wakupangiska vula kuti yiwenge. Nyengo zinyake ungayitemwa vula yayi cifukwa cakuti ungaruta kuwaro kukaseŵera yayi para yikuwa. Kweni umanye kuti vula ndiyo yikupangiska maluŵa kukura. Anteura, para tikuwona maluŵa ghakutowa, kasi tikwenera kuwonga njani cifukwa ca kutipa vintu ivi?— Tiwonge Ciuta. Kasi tikwenera kuwonga njani para tikurya vipasi na mphangwe yakunowa?— Tikwenera kuwonga Ciuta cifukwa ca dazi lake na vula yake ivyo vikupangiska vintu kumera.

Tiyerezgere kuti muntu munyake wakukufumba kuti, ‘Kasi Ciuta ndiye wakalenga ŵantu na vinyama?’ Kasi ungazgora wuli?— Zgoro launenesko ndakuti: “Enya, Ciuta ndiye wakalenga ŵantu na vinyama.” Kasi ungacita wuli usange uyo wakukufumba wakugomezga yayi kuti Ciuta ndiye wakalenga nadi ŵantu? Wuli usange iye wakuyowoya kuti muntu wakacita kuzgoka kufuma ku vinyama? Baibolo likusambizga kuti muntu wakacita kuzgoka kufuma ku vinyama yayi. Kweni likuyowoya kuti Ciuta wakalenga vintu vyamoyo vyose.—Genesis 1:26-31.

Nyengo zinyake muntu wangakuphalira kuti wakugomezga yayi kuti Ciuta waliko. Kasi ungamuphaliraci muntu wanteura uyu?— Uli umurongore nyumba? Umufumbe kuti: “Ni njani uyo wakazenga nyumba iyo?” Waliyose wakumanya kuti muntu munyake ndiyo wakazenga nyumba iyo. Mwaunenesko wose, nyumba yikajizenga yekha yayi!—Ŵahebere 3:4.

 Pamanyuma pake muceme muntu uyo wakufumba na kuruta naye apo pali luŵa. Umufumbe kuti: “Kasi ni njani uyo wakapanga luŵa ili?” Nga ni umo nyumba yindajipangire yekha, anteura pera, luŵa ili nalo lindajipange lekha. Walipo uyo wakalipanga. Uyo wakapanga luŵa ili ni Ciuta.

Muphalire muntu uyo wakufumba kuti wategherezge ku sumu iyo kayuni kakwimba. Pamanyuma pake umufumbe kuti: “Ni njani uyo wakalenga tuyuni na kutusambizga kwimba?” Ni Ciuta. Ciuta ndiye wakalenga kucanya na caru capasi na vintu vyose vyamoyo ivyo vilimo! Iye ndiye wakupereka umoyo.

Ndipouli, pangasangika muntu munyake uyo wangayowoya kuti wakugomezga vyekha ivyo wakuwona. Wangayowoya kuti: ‘Usange nkutondeka kuciwona, ningagomezga yayi kuti cintu ico ciliko.’ Ndico cifukwa cake ŵantu ŵanyake ŵakugomezga yayi kuti Ciuta waliko cifukwa cakuti ŵakuleka kumuwona.

Mbunenesko nadi kuti tikumuwona yayi Ciuta. Baibolo likuyowoya kuti: ‘Palije muntu uyo wangawona Ciuta.’ Palije mwanarumi, mwanakazi panji mwana pano pa caru capasi uyo wangawona Ciuta. Anteura, paŵavye muntu wayezge kupanga cithuzithuzi panji cikozgo ca Ciuta. Ciuta wakutiphalira kuti tireke kupanga cikozgo cake. Anteura, cingamukondweska yayi Ciuta kuti tiŵe na vikozgo mu nyumba yithu.—Exodus 20:4, 5; 33:20; Yohane 1:18.

Usange tikumuwona yayi Ciuta, kasi tingamanya wuli kuti Ciuta waliko nadi? Ughanaghanire ciyerezgero cakurondezgapo. Kasi mphepo ukuyiwona?— Yayi. Palije muntu uyo wangawona mphepo. Kweni ungawona ivyo mphepo yikucita. Ungawona mahamba ghakusukunika para mphepo yikuputa apo yikujumpa mu mintavi ya khuni. Nga ni umo wawonera, ukugomezga kuti mphepo yiriko nadi.

Ungalaŵiskaso vintu ivyo Ciuta walikulenga. Para ukuwona luŵa panji kayuni kamoyo, ukuwona vintu ivyo Ciuta walikulenga. Nadi pano, ukugomezga kuti Ciuta waliko nadi.

Muntu munyake wangakafumba kuti, ‘Kasi ni njani uyo wakalenga dazi na caru capasi?’ Baibolo likuyowoya kuti: ‘Ciuta wakalenga mtambo na  caru.’ (Genesis 1:1) Ciuta ndiye wakalenga vintu vyakukondweska vyose ivi! Kasi maghanoghano ghako ngakuti wuli pa nkani iyi?—

Kasi ncakukondweska yayi kuŵa wamoyo? Tikupulika sumu zakunozga za tuyuni. Tikuwona maluŵa na vintu vinyake ivyo Ciuta walikulenga. Ndiposo tingarya vyakurya ivyo Ciuta watipa.

Tikwenera kuwonga Ciuta cifukwa ca kutipa vintu vyose ivi. Cakuruska vyose, tikwenera kumuwonga iye cifukwa walikutipa umoyo. Para tikuwongera nadi ivyo Ciuta wakuticitira, mbwenu ticitenge kantu kanyake. Ticitenge vici?— Titegherezgenge ivyo Ciuta wakuyowoya na kucita ivyo wakutiphalira kwizira mu Baibolo. Para tingacita nteura, tingarongora kuti tikumutemwa Uyo wakalenga vintu vyose.