EISI se mea gali e iloa ne au. Koe fia logo?— Onoono ki tou lima. ‵Fetu aka ou matikao lima. Ke puke aka ne koe se mea. E mafai o fai ne tou lima a mea e uke, kae e mafai foki o fai faka‵lei ne ia. E iloa ne koe me ko oi ne faite ne ia ou lima?—

Ao, ko te Tino foki eiloa telā ne faite ne ia ‵tou gutu, ‵tou isu, mo ‵tou mata. Ko te Atua, te Tamana o te Faiakoga Sili. E a, e se fia‵fia tatou me ne faite ne te Atua ‵tou mata?— E mafai o lavea i ei ne tatou a mea e uke. E mafai o ‵kilo atu tatou ki pulalakau. E mafai o ‵kilo atu tatou ki mouku lanu launiu mo te lagi lanu moana. E mafai foki o lavea ne tatou a tamā manu fia‵kai e pelā mo manu i te ata tenei. A te ‵tonuga loa, ko se faka‵tau eiloa i te gali me e mafai o lavea ne tatou a mea e pelā mo te mea tenei, ne?—

Kae ko oi ne faite ne ia a mea konei? E mata, ne faite ne se tino i te lalolagi nei? Ikai. E mafai o faite ne tāgata se fale. Kae e seai se tino e mafai o faite ne ia a mouku ke ola aka. E se mafai ne tāgata o fai se punuā manu, se pulalakau, io me se isi mea ola. E iloa ne koe te mea tenā?—

A te Atua ko te tino telā ne faite ne ia a mea katoa konei. Ko te Atua ne faite ne ia te lagi mo te lalolagi. Ne faite foki ne ia a tino. Ne faite ne ia te tagata mo te fafine muamua. A Iesu, te Faiakoga Sili, ne akoako mai ne ia a te mea tenei.—Mataio 19:4-6.

 Ne iloa pefea ne Iesu me ne faite ne te Atua a te tagata mo te fafine? E mata, ne lavea ne Iesu a te faitega ne te Atua a mea konā?— Ao, ne lavea ne ia. Ne ‵nofo fakatasi a Iesu mo te Atua i te taimi ne faite ei ne te Atua a te tagata mo te fafine. A Iesu ko te tino muamua eiloa ne faite ne te Atua. A Iesu se agelu, kae ne ola a ia i te lagi fakatasi mo tena Tamana.

E fai mai te Tusi Tapu me ne fai atu te Atua: “Ke na faite aka nei ne tāua a te tagata.” (Kenese 1:26, O le Tusi Paia) E iloa ne koe me ko oi ne faipati atu ki ei te Atua?— Ne faipati a ia ki tena Tama. Ne faipati atu a ia ki te tino telā ne vau fakamuli ki te lalolagi kae ne fai mo fai a Iesu.

Ko oko eiloa i te gali o te mea tenā, ne? Mafaufau la! Kafai e fakalogo‵logo tatou ki a Iesu, ko akoako eiloa tatou ne te tino telā ne ‵nofo fakatasi mo te Atua i te taimi ne faite ei ne te Atua a te lalolagi mo nisi mea katoa. Ne tauloto ne Iesu a mea e uke mai i te ga‵lue fakatasi mo tena Tamana i te lagi. E se tioa eiloa o fai a Iesu mo fai te Faiakoga Sili!

E mata, e mafaufau koe me ne seki fiafia te Atua ke nofo tokotasi a ia  a koi tuai o faite ne ia tena Tama?— Ikai, e se penā loa. Ia, moi ne fiafia eiloa a ia, kaia la ne faite ei ne ia a nisi mea ola?— Ne fai ne ia te mea tenei me i a ia se Atua alofa. Ne manako a ia ke ōla kae fia‵fia foki a nisi tino. E ‵tau o fakafetai tatou ki te Atua me ne tuku mai ne ia te ola ki a tatou.

E fakaasi mai te alofa o te Atua i mea katoa ne fai ne ia. Ne faite ne ia te la. E tuku mai ne te la a te mainaga kae fai foki ei ke mafanafana tatou. E mafai o ‵moko a mea katoa kae e seai foki se tino e mafai o ola i te lalolagi moi se maua ne tatou a te la. E mata, e se fiafia koe me ne faite ne te Atua a te la?—

Ne fai foki ne te Atua ke ‵to te vaiua. I nisi taimi, kāti e se fiafia koe ki te vaiua me e se mafai o fanatu koe ki tua o tafao māfai ko ‵to te vaiua. Kae e fesoasoani mai te vaiua ki te faiga o pulalakau ke ola ‵lei. Tela la, kafai e lavea ne tatou a pulalakau ‵gali, ko oi e ‵tau o fakafetai atu tatou ki ei?— Ko te Atua. Kae ko oi e ‵tau o fakafetai atu tatou ki ei māfai ko ‵kai tatou ki fuagalakau mo vesiapolo ‵gali?— E ‵tau o fakafetai atu tatou ki te Atua me ne faite ne ia a te la mo te vaiua kolā e fakaola aka ei a lakau.

Mafaufau la me ko fesili atu se tino ki a koe, ‘E mata, ne faite foki ne te Atua a te tagata mo manu?’ Ne a au pati ka fai atu?— Se mea tonu ke fai atu: “Ao, ne faite ne te Atua a te tagata mo manu.” Kae e a māfai e isi se tino e se talitonu me ne faite eiloa ne te Atua a tino? E a māfai e fai atu a ia me ne māfua mai i manu a te tagata? Ia, e se akoako mai ne te Tusi Tapu a te mea tenā. E fai mai i ei me ne faite ne te Atua a mea ola katoa.—Kenese 1:26-31.

Kae e mafai o fai atu se tino me e se talitonu a ia ki te Atua. Ne a au pati ka fai atu?— Kaia e se tusi atu ei koe ki se fale? Fesili atu ki te tino: “Ko oi ne faite ne ia te fale?” E iloa ne tino katoa me ne faite ne se tino. E seki faite ne te fale a ia eiloa.—Epelu 3:4.

Ke avatu ne koe te tino ki se fatoaga kae fakaasi atu se pulalakau. Fesili atu ki a ia: “Ko oi ne faite ne ia te mea tenei?” E seai se  tino i lalo nei ne faite ne ia te pulalakau. Kae e pelā eiloa mo te fale telā ne seki faite ne ia a ia eiloa, e penā foki loa te pulalakau tenei. Ne faite ne se tino. Ne faite eiloa ne te Atua.

Fai atu ki te tino ke se logoa kae fakalogologo ki te pese a se manu. Ko fesili atu ei ki a ia: “Ko oi ne faite ne ia a manu kae fakaakoako ke iloa o usu pese?” Ko te Atua. A te Atua ko te tino telā ne faite ne ia a te lagi mo te lalolagi mo mea ola katoa! A Ia ko te Tino telā e tuku mai ne ia te ola.

Kae e mafai o fai mai se tino me e talitonu fua a ia ki mea e mafai o lavea ne ia. E mafai o fai mai a ia: ‘Kafai e se mafai o lavea ne au, e se talitonu foki au ki ei.’ Tela la, e fai mai a nisi tino me e se tali‵tonu latou ki te Atua me e se mafai o lavea ne latou a ia.

E tonu me e se mafai o lavea ne tatou te Atua. E fai mai te Tusi Tapu: ‘E seai se tino e mafai o lavea ne ia te Atua.’ E seai se tagata, fafine, io me se tamaliki i te lalolagi nei e mafai o lavea ne ia te Atua. Tela la, e seai se tino e ‵tau o taumafai o ‵lomi ne ia se ata io me se fakatusa o te Atua. E fai mai foki eiloa te Atua ke mo a ma fai ne tatou se fakatusa o ia. Tela la, e se fakafiafia atu foki ki te Atua māfai e isi ne mea penā i loto i ‵tou fale.—Esoto 20:4, 5; 33:20; Ioane 1:18.

Kafai e se mafai o lavea ne koe te Atua, e mafai pefea o mautinoa i a koe me e isi eiloa se Atua? Mafaufau ki te mea tenei. E mata, e mafai o lavea ne koe te matagi?— Ikai. E seai se tino e mafai o lavea ne ia a te matagi. Kae e mafai o lavea ne koe a mea e fai ne te matagi. E mafai o lavea ne koe a laulakau e gasue‵sue māfai e agi mai te matagi i va o kaula o se lakau. Tela la, e talitonu koe me e isi se matagi.

E mafai foki o lavea ne koe a mea ne fai ne te Atua. Kafai e lavea ne koe se pulalakau io me se manu ola, ko lavea eiloa ne koe se mea telā ne faite ne te Atua. Tela la, e talitonu koe me e isi eiloa se Atua.

E mafai o fesili atu se tino ki a koe, ‘Ko oi ne faite ne ia te la mo te lalolagi?’ E fai mai te Tusi Tapu: ‘Ne faite ne te Atua te lagi mo te lalolagi.’ (Kenese 1:1) Ao, ne faite ne te Atua a mea ‵gali katoa konei! E talitonu koe ki ei?—

 E a, e sē se mea gali ke ōla tatou? E mafai o lagona ne tatou a pese ‵gali a manu. E mafai o lavea ne tatou a pulalakau mo nisi mea kolā ne faite ne te Atua. Kae e mafai foki o ‵kai tatou ki mea‵kai kolā ne tuku mai ne te Atua ki a tatou.

E ‵tau o fakafetai atu tatou ki te Atua mō mea katoa konei. E sili atu i ei, e ‵tau o fakafetai atu tatou ki te Atua mō te tukumaiga o te ola ki a tatou. Kafai e loto fakafetai tonu tatou ki te Atua, ka fai eiloa ne tatou se mea. Se a te mea tenā?— Ka faka‵logo tatou ki te Atua, kae ka fai ne tatou a mea e fai mai ne ia i te Tusi Tapu ke fai ne tatou. I te auala tenā, e mafai ei ne tatou o fakaasi atu me e a‵lofa tatou ki te Tino telā ne faite ne ia a mea katoa.