MAARAM ako hin usa ka butang nga urusahon. Karuyag mo ba mahibaro hito?— Kitaa an imo kamot. Piloa an imo mga tudlo. Yana purota an usa nga butang. Damu an nahihimo han imo kamot, ngan nahihimo ito hin maopay. Maaram ka ba kon hin-o an naghimo han aton mga kamot?—

Oo, hiya amo an Usa nga naghimo liwat han aton baba, han aton irong, ngan han aton mga mata. Hiya amo an Dios, an Amay han Bantogan nga Magturutdo. Nalilipay ba kita nga an Dios naghatag ha aton hin mga mata?— Pinaagi hito nakikita naton an damu nga mga butang. Nakikita naton an mga bukad. Nakikita naton an berde nga banwa ngan an asul nga langit. Bangin nakikita pa ngani naton an gudtiay nga katamsihan nga nakaon pariho han aada ha retrato. Oo, urusahon gud nga nakikita naton an sugad hini nga mga butang, diri ba?—

Kondi hin-o an naghimo hini nga mga butang? Mga tawo ba an naghimo hito? Diri. An mga tawo makakahimo hin balay. Kondi waray tawo nga makakahimo hin banwa nga natubo. An mga tawo diri makakahimo hin piso nga tamsi, hin usa nga bukad, o bisan ano nga buhi nga butang. Maaram ka ba hito?—

An Dios an usa nga naghimo hini ngatanan. An Dios naghimo han mga langit ngan han tuna. Ginhimo liwat niya an mga tawo. Ginhimo niya an  siyahan nga lalaki ngan an siyahan nga babaye. Igintutdo ini ni Jesus, an Bantogan nga Magturutdo.​—Mateo 19:4-6.

Kay ano nga maaram hi Jesus nga an Dios naghimo han lalaki ngan han babaye? Nakita ba ni Jesus nga ginhimo ito han Dios?— Oo, nakita niya ito. Kaupod han Dios hi Jesus han ginhimo han Dios an lalaki ngan an babaye. Hi Jesus an siyahan nga persona nga ginhimo han Dios. Hito nga panahon hi Jesus usa nga anghel, ngan nag-ukoy hiya ha langit kaupod han iya Amay.

An Biblia nagsusumat ha aton nga an Dios nagsiring: “Himoon naton an tawo.” (Genesis 1:26) Maaram ka ba kon hin-o an kaistorya han Dios?— Kaistorya niya an iya Anak. Kaistorya niya an usa nga ha urhi kinanhi ha tuna ngan nagin hi Jesus.

Diri ba ito makaruruyag? Hunahunaa la! Kon namamati kita kan Jesus, gintututdoan kita han usa nga kaupod han Dios han ginhimo han Dios an tuna ngan an ngatanan nga iba nga mga butang. Damu hinduro an hinbaroan  ni Jesus tikang ha pagbuhat kaupod han iya Amay ha langit. Diri urusahon nga hi Jesus an Bantogan nga Magturutdo!

Naghuhunahuna ka ba nga masurub-on an Dios tungod kay nag-uusahan hiya antes niya himoon an iya Anak?— Diri. Niyan, kon diri hiya masurub-on, kay ano man nga naghimo hiya hin iba nga buhi nga mga butang?— Iya ginbuhat ini tungod kay mahigugmaon hiya nga Dios. Karuyag niya nga an iba mabuhi ngan magpahimulos han kinabuhi. Sadang magpasalamat kita ha Dios nga tinagan kita niya hin kinabuhi.

An ngatanan nga ginhimo han Dios nagpapakita han iya gugma. An Dios naghimo han adlaw. An adlaw naghahatag ha aton hin kalamrag ngan hin kapaso. An ngatanan magigin matugnaw ngan mawawaray kinabuhi ha tuna kon waray kita adlaw. Diri ka ba nalilipay nga ginhimo han Dios an adlaw?—

Ginpapahinabo liwat han Dios nga umuran. Usahay bangin diri mo karuyag an uran tungod kay diri ka nakakagawas ha pag-uyag kon nauran. Kondi an uran nabulig ha mga bukad nga tumubo. Salit kon nakikita naton an mag-opay nga mga bukad, hin-o an sadang naton pasalamatan tungod hito?— An Dios. Ngan hin-o an sadang naton pasalamatan kon nakaon kita hin marasa nga mga prutas ngan mga utanon?— Sadang magpasalamat kita ha Dios tungod kay an iya adlaw ngan uran an nagpapatubo han mga tanom.

Pananglitan may-ada magpakiana ha imo, ‘Ginhimo ba han Dios an tawo ngan an mga hayop liwat?’ Ano an imo isisiring?— Husto an pagsiring: “Oo, ginhimo han Dios an tawo ngan an mga hayop.” Kondi ano man kon may-ada diri natoo nga ginhimo han Dios an mga tawo? Ano man kon nasiring hiya nga an tawo nagtikang ha mga hayop? Diri ito igintututdo han Biblia. Nasiring ito nga an Dios naghimo han ngatanan nga buhi nga mga butang.​—Genesis 1:26-31.

Kondi bangin may-ada sumiring ha imo nga diri hiya natoo ha Dios. Ano an imo isisiring?— Kay ano nga diri itudlok an balay? Pakianhi an tawo: “Hin-o an naghimo hiton nga balay?”  Maaram an ngatanan nga may-ada naghimo hito. Sigurado nga an balay waray maghimo ha kalugaringon!​—Hebreo 3:4.

Katapos, dad-a an tawo ngadto ha hardin ngan ipakita ha iya an usa nga bukad. Pakianhi hiya: “Hin-o an naghimo hini?” Waray tawo nga naghimo han bukad. Ngan sugad la nga an balay waray maghimo ha kalugaringon, sugad man ini nga bukad waray maghimo ha kalugaringon. May-ada usa nga naghimo hito. An Dios.

Hangyoa an tawo nga humunong ngan mamati ha kanta han usa nga tamsi. Katapos, pakianhi hiya: “Hin-o an naghimo han mga tamsi ngan nagtutdo ha ira nga magkanta?” An Dios. An Dios an usa nga naghimo han mga langit ngan han tuna ngan han ngatanan nga buhi nga mga butang! Hiya an Usa nga naghahatag hin kinabuhi.

Kondi, bangin may-ada sumiring nga natoo hiya ha iya la nakikita. Bangin sumiring hiya: ‘Kon diri ko nakikita ito, diri ako natoo hito.’ Salit an iba nga mga tawo nasiring nga diri hira natoo ha Dios tungod kay diri nira nakikita hiya.

Totoo nga diri naton nakikita an Dios. An Biblia nasiring: ‘Waray tawo nga nakakakita ha Dios.’ Waray lalaki, babaye, o bata dinhi ha tuna nga nakakakita ha Dios. Salit waray usa nga sadang magsari ha paghimo hin retrato o imahen han Dios. An Dios nasiring pa ngani ha aton nga diri maghimo hin imahen niya. Salit, diri malilipay an Dios ha aton kon magkaada kita hin sugad hito nga mga butang ha aton balay.​—Eksodo 20:​4, 5; 33:20; Juan 1:18.

Kondi kon diri mo nakikita an Dios, kay ano nga maaram ka nga may-ada gud usa nga Dios? Hunahunaa ini. Nakikita mo ba an hangin?— Diri. Waray nakakakita han hangin. Kondi nakikita mo an mga butang nga nahihimo han hangin. Nakikita mo an mga dahon nga nagkikiwa kon nahuyop an hangin ha mga sanga han kahoy. Salit natoo ka nga may-ada hangin.

Nakikita mo an mga butang nga ginhimo liwat han Dios. Kon nakikita mo an buhi nga bukad o an tamsi, nakikita mo an butang nga ginhimo han Dios. Salit natoo ka nga may-ada gud Dios.

Bangin may-ada magpakiana ha imo, ‘Hin-o an naghimo han adlaw ngan han tuna?’ An Biblia nasiring: “An Dios naghimo han mga langit ngan han  tuna.” (Genesis 1:1) Oo, ginhimo han Dios ini ngatanan nga urusahon nga mga butang! Ano an inaabat mo mahitungod hito?—

Diri ba urusahon an magin buhi? Nababatian naton an mag-opay nga mga kanta han katamsihan. Nakikita naton an mga bukad ngan an iba nga mga butang nga ginhimo han Dios. Ngan nakaon kita han mga pagkaon nga iginhahatag han Dios ha aton.

Tungod hini ngatanan nga mga butang, sadang kita magpasalamat ha Dios. Labaw ha ngatanan, sadang kita magpasalamat ha iya tungod ha paghatag ha aton hin kinabuhi. Kon tinuod nga mapasalamaton kita ha Dios, may-ada kita pagbubuhaton. Ano ito?— Mamamati kita ha Dios, ngan bubuhaton naton an ginsisiring niya ha aton ha Biblia. Hito nga paagi maipapakita naton nga nahigugma kita ha Usa nga naghimo han ngatanan nga mga butang.