NAA nannaʼ xiixa guizáʼ galán. Racaláʼdxiluʼ gunadiágaluʼ ni la?... Biiyadxí naluʼ. Bizeechuʼ ca bicuini ca ne gunaaze xiixa. Naluʼ zanda guni stale cosa ne gúnini jneza. Nannuʼ tu biʼniʼ náʼ binni la?...

Ya, laaca binni ni biʼniʼ ruaanu, xiinu ne lunu. Laabe nga Dios, bixhoze Maestru Ni Jma Nanna Gusiidiʼ que. Cadi galán nga bidii Dios laanu bezalunu ca la?... Pur laacani zanda gúʼyanu stale cosa: ca guieʼ ca, ca yaga verde ca ne guibáʼ color azul ca. Laaca riquiiñenu cani para gúʼyanu ca manihuiiniʼ ripapa ca ora maʼ cayocaʼ, casi ridúʼyanu lu dibuju riʼ. Ñee cadi sicarupeʼ nga ganda gúʼyanu stale cosa la?...

Peru tu biʼniʼ cani yaʼ. Tuuxa hombre la? Coʼ. Ca hombre ca zanda gucuícabe ti yoo, peru qué zanda diʼ gúnicabe ti yagahuiiniʼ, nin gúnicabe ti manihuiiniʼ ripapa nin ti guieʼ o xiixa ni nabani. Ñee nannuʼ nga la?...

Dios nga bizáʼ guiráʼ xixé ni nuu: laabe bíʼnibe guibáʼ ne Guidxilayú, ne laaca bizaʼbe binni. Jesús, Maestru Ni Jma Nanna Gusiidiʼ que, bisiidibe Dios nga bizáʼ primé hombre ne primé gunaa (Mateo 19:4-6).

 Ximodo gunna Jesús ndiʼ yaʼ. Biiyabe dxi bizáʼ Dios cani la?... Biiyabe pue. Laabe nga ni bizáʼ Dios primé, ne nuube raqué ora bizáʼ Dios primé hombre ne primé gunaa que. Jesús nga ti ángel ni gulezané Bixhoze guibáʼ.

Lu Biblia cá caadxi diidxaʼ ni guníʼ Dios: «Gúninu binni» (Génesis 1:26). Nannuʼ tuu ngue guniʼné Dios la?... Guníʼnebe Xiiñibe, ni beeda lu Guidxilayú riʼ despué, ne laabe nga Jesús.

Ñee cadi guizáʼ galán nga la? Guníʼ ique ni. Ora rucaadiáganu Jesús, cazíʼdinu de ti binni ni bibaniné Dios dxi bizaʼbe Guidxilayú ne guiráʼ ni nuu luni. Jesús biziidiʼ stale ra bíʼninebe Bixhózebe dxiiñaʼ guibáʼ. ¡Dxandipeʼ laabe nga ti Maestru Ni Jma Nanna Gusiidiʼ!

 Ñee raʼbuʼ guyuu Dios triste dxi nuube stúbibe ante guzaʼbe Xiiñibe la?... Coʼ. Xiñee ca bizaʼbe stuudxi binni yaʼ.... Purtiʼ laabe nga ti Dios ni rannaxhii. Laabe guyuuláʼdxibe guibani xcaadxi binni ne chuʼcaʼ nayecheʼ lu Guidxilayú riʼ. Naquiiñeʼ gudiʼnu xquíxepeʼ Dios pur cudii laanu guendanabani.

Lu guiráʼ ni bizáʼ Dios rihuinni guendarannaxhii stibe, casi Gubidxa ca rudiini laanu biaaniʼ ne ruchaani laanu. Pa qué ñuu ni la? guiráʼ cani nuu ca ñaca cani nananda ne qué ñanda nibani guirutiʼ lu Guidxilayú riʼ. Ñee qué riécheluʼ pur bizáʼ Dios Gubidxa ca la?...

Dios laaca rusaba nisaguié. Nuu tiru qué riuláʼdxiluʼ guiaba nisaguié purtiʼ qué zanda diʼ chichíteluʼ. Peru nisaguié ca nga racané igaa ca yaga guieʼ ca. Nga runi ora gúʼyanu ca guieʼ sicarú ca, tu gudiʼnu xquíxepeʼ yaʼ.... Dios njaʼ. Yanna, ora guidoʼno xiixa cuananaxhi nanixe ne verdura yaʼ.... Laaca naquiiñeʼ gudiʼnu xquíxepeʼ Dios purtiʼ Gubidxa ca ne nisaguié ca nga rusiroobaʼ ca yagahuiiniʼ ca.

Guníʼ ique, pa guinabadiidxaʼ tuuxa lii: «Ñee laaca bizáʼ Dios binni ne ca maniʼ ca la?». Xi niniʼluʼ yaʼ.... Galán nga guicábiluʼ: «Laaca pue, laabe bizaʼbe binni ne ca maniʼ ca». Yanna, xi gaca pa qué guni crebe cani, ne guiniʼbe de maniʼ nga zeeda binni yaʼ. Biaa, cadi nga diʼ nga ni rusiidiʼ Biblia. Laani caniʼni Dios nga bizáʼ guiráʼ xixé ni nabani ni nuu lu Guidxilayú ne guibáʼ (Génesis 1:26-31).

Xi ñábiluʼ tuuxa ni qué runi cré Dios yaʼ.... Ñanda nuluíʼnaluʼ laabe ti yoo ne ninabadiidxuʼ laabe: «Tu bicuí yoo ca». Guiráʼ binni nanna guyuu tu bicuí ni. Qué zanda diʼ cuí ni stubi ni (Hebreos 3:4).

 Óraque zanda chineluʼ laabe ndaaniʼ ti jardín, guluiʼluʼ laabe ti guieʼ ne guinabadiidxuʼ laabe: «Tu bizáʼ guieʼ riʼ». Qué ñuni diʼ nin ti hombre ni. Cásica yoo que, qué nibí diʼ ni stubi ni, guieʼ riʼ laaca qué ñáʼ diʼ ni stubi ni. Dios nga biʼniʼ ni.

Zanda gábiluʼ laabe guzuhuaadxibe ne gucaadiágabe ni cayuundaʼ ti manihuiiniʼ ripapa, ne guinabadiidxaluʼ laabe: «Tu biʼniʼ ca maniʼ ripapa ca ne tu bisiidiʼ laacame gúʼndacame yaʼ». Dios ni biʼniʼ guibáʼ ne Guidxilayú ne guiráʼ xixé ni nabani luni. Laabe nga rudiibe guendanabani.

Zándaca chuʼ tu gabi lii runi cré ni ruuyaʼ si, ne pa qué gúʼyabe gastiʼ qué zuni crebe. Zacá ni, nuu binni qué runi cré Dios purtiʼ qué randa ruuyacabe laabe.

Dxandíʼ nga qué zanda gúʼyanu Dios. Biblia na: Guirutiʼ zanda guʼyaʼ Dios. Nin hombre nin gunaa o baʼduhuiiniʼ qué zanda gúʼyacaʼ laabe. Nga runi, guirutiʼ naquiiñeʼ guni ti dibuju o ti bidóʼ Stibe. Laapebe nabe cadi gaca diʼ ni, ne qué riuláʼdxibe gápanu ti dibuju Stibe ralídxinu (Éxodo 20:4, 5;33:20; Juan 1:18).

Pa qué zanda gúʼyanu Dios, ximodo nánnanu dxandíʼ nuube yaʼ. Guníʼ ique ndiʼ: ñee zanda guʼyuʼ bi ca la?... Coʼ, njaʼ, guirutiʼ zanda guʼyaʼ ni. Peru zanda guʼyuʼ xi guiráʼ runi ni, casi ora runiibini ca bandaga stiʼ ca yaga ca. Pur nga nannuʼ nuu bi.

Laaca zanda guʼyuʼ guiráʼ ni maʼ biʼniʼ Dios. Ora guʼyuʼ ti guieʼ o ti manihuiiniʼ ripapa, cayuuyuʼ cani bizáʼ Dios. Ne laacani zucaa cani lii guni creluʼ nuu ti Dios.

Zándaca chuʼ tu guinabadiidxaʼ lii: «Tu bizáʼ Gubidxa ne Guidxilayú riʼ yaʼ». Biblia na: «Dios bizáʼ guibáʼ ne guidxilayú» (Génesis 1:1). Dxandíʼ, Dios nga bizáʼ guiráʼ xixé ni galán ni nuu. Lii xi raʼbuʼ yaʼ....

 Ñee cadi galán nga nabáninu la? Zanda gunadiáganu pabiáʼ sicarú ruundaʼ ca manihuiiniʼ ripapa ca, gúʼyanu ca guieʼ ca ne guiráʼ xixé ni maʼ bizáʼ Dios, ne guidoʼno guiráʼ ni cudii Dios laanu.

Naquiiñeʼ gudiʼnu xquíxepeʼ Dios pur guiráʼ ni cudiibe laanu riʼ, ne jma pur cudiibe laanu guendanabani. Zusihuínninu ni pa gúninu xiixa. Nannuʼ xi laani la?... Gucaadiáganu Dios ne gúninu ni cayábibe laanu lu Biblia. Zacá zanda gusihuínninu pabiáʼ nadxiinu ni bizáʼ guiráʼ xixé ni nuu.