NGO ma pol kare ikwongo penyone ka irwatte ki ngat mo tyen me acel?— Ipenyo nyinge. Wan ducu watye ki nyingwa. Lubanga ocako nying dano mukwongo i lobo. En ocako nyinge ni Adam. Dako pa Adam kicako nyinge ni Kawa.

Ento pe dano keken aye gitye ki nyinggi. Tam kong i kom jami mukene ma bene gitye ki nyinggi. Gwogi ki dyangi pol kare kicako nyinggi, pe kumeno?— Bedo ki nying pire tek.

Nen kong lwagi lakalatwe mapol ata ma ginen i dyewor. Itamo ni nyinggi tye?— Lubanga ocako nying lakalatwe acel acel ma tye i dan polo. Baibul wacciwa ni: “En omoko wel lakalatwe woko ducu, ocako nyinggi woko ducu liweng.”—Jabuli 147:4.

Anga ma iromo wacone ni obedo ngat ma pire tek loyo ducu i polo ki lobo?— Lubanga. Mono itamo ni en nyinge tye?— Yecu owacci Nyinge tye. I nino mo acel, Yecu owaco i legane bot Lubanga ni: ‘Amiyo nyingi ongene bot lulub kora.’ (Jon 17:26) Mono ingeyo nying Lubanga?— Lubanga kikome owaco botwa nyinge. En owaco ni: ‘An nyinga Rwot [Jehovah]. Meno aye nyinga.’ Pi meno, Lubanga nyinge JEHOVAH.—Icaya 42:8.

Iwinyo nining ka wi dano po i kom nyingi?— Cwinyi bedo yom, pe kumeno? Jehovah mito ni dano gunge nyinge bene. Pi meno, omyero wati ki nying Jehovah ka watito lok kom Lubanga bot dano. Lapwony Madit otiyo ki nying Lubanga, Jehovah, ka en loko ki dano. I nino mo acel Yecu owacci: “Mar Rwot  [Jehovah] Lubangani ki cwinyi ducu.”—Marako 12:30.

Yecu onongo ngeyo ni “Jehovah” obedo nying ma pire tek adada. Pi meno, en opwonyo lulub kore me tic ki nying Lubanga. En bene opwonyogi me tic ki nying Lubanga i legagi. Yecu onongo ngeyo ni Lubanga mito ni dano ducu gunge Nyinge Jehovah.

Yam con, Lubanga onyutu ni nyinge pire tek bot Moses, ma obedo Laicrael. Likwayo pa Icrael onongo kilwongogi ni Luicrael, gukwo i lobo ma kilwongo ni Ejipt. Dano me lobo meno onongo kilwongogi ni Luejipt. Guloko Luicrael odoko opii dok onongo giger adada i komgi. I kare ma Moses odoko dit, en otemo konyo ngat acel ki i kin lutuggi. Man owango i Parao kabaka me Ejipt. En onongo mito neko Moses! Ci Moses oringo woko ki i Ejipt.

 Moses oringo i lobo mukene. Meno obedo lobo Midian. Ki kunnu Moses onyomo dako ci odoko won gang. En bene obedo lakwat kun kwayo romi. I nino mo acel, Moses onongo tye ka kwayo romi i nget got ci oneno gin mo me aura. Latin yat mo onongo tye ka lyel mac, ento pe tye ka wang! Moses onyikke cok wek kong enen maber.

Tika ingeyo ngo mutimme?— Moses owinyo dwan mo ma tye ka lwonge ki i latin yat meno. Dwan meno olwonge ni, “Moses! Moses!” Anga ma obedo ka lok-ki?— Lubanga aye obedo ka lok! Lubanga onongo tye ki tic mapol ma Moses myero otim. Lubanga owacci: ‘Bin, wek acwali bot Parao kabaka me Ejipt, wek ikwany jona, likwayo pa Icrael, ki i Ejipt.’ Lubanga ocikke me konyo Moses wek otim tic man.

Ento Moses owaco bot Lubanga ni: ‘Ka acito bot jo Icrael i Ejipt ci awaco botgi ni Lubanga ocwala botwu. Ci ka gupenya ni, “Nyinge anga?” Abiwaco botgi ningo?’ Ci Lubanga owaco  bot Moses ni owac bot Luicrael ni: ‘Jehovah ocwala botwu. Nyinga Jehovah matwal.’ (Nia 3:1-15) Man nyutu ni Lubanga onongo bigwoko nyinge man ni Jehovah-ni. En pe biloko nyinge matwal. Lubanga mito ni kingeye ki nyinge ni Jehovah pi naka.

I kare ma Moses odok cen i Ejipt, Luejipt gutamo ni Jehovah obedo lubanga mo matidi pa Luicrael. Gin pe gutamo ni en obedo Lubanga ma loyo wi lobo ducu. Pi meno, Jehovah owaco bot kabaka me Ejipt ni: ‘Abimiyo nyinga ywek i lobo ducu.’ (Nia 9:16) Jehovah oweko nyinge ongene. Tika ingeyo kit ma en otimo kwede?—

En oweko Moses okwanyo jo Icrael woko ki i Ejipt. I kare ma guo i Nam Makwar, Jehovah oyabo botgi yo mutwo i dye nam. Jo Icrael guwoto labongo ayela mo i ngom mutwo. Ento i kare ma Parao ki monnye gudonyo i dye nam mutwo-ni, pii ma otinge tungi ki tungi oumo Luejipt ci gin ducu guto woko.

I nge kare manok keken, dano i lobo ducu gucako winyo gin ma Jehovah otimo i Nam Makwar. Wangeyo nining ni guwinyo lok man?— I kine ma romo mwaki pyerangwen i nge ngolo Nam  Makwar, Luicrael guo i Kanaan ma en aye lobo ma Jehovah ocikke me miyone botgi. Ki kunnu, dako mo ma nyinge Rakab owaco bot co aryo me Icrael ni: “Wawinyo kit ma [Jehovah] otwoyo ki pii me Nam Makwar woko i nyimwu i kare ma wua woko ki i Ejipt.”—Yocwa 2:10.

Dano mapol i kare-ni gitye calo Luejipt me kare ca. Pe giye ni Jehovah aye Lubanga ma loyo lobo-ni lung. Dong, Jehovah mito ni jone gutit lok kome bot jo mukene. Man aye gin  ma Yecu otimo. I kare ma kwone cok gik i lobo, en owaco bot Jehovah i lega ni: “Amiyo nyingi ongene botgi.”—Jon 17:26.

In mono imito bedo calo Yecu? Ci tit bot jo mukene ni Lubanga nyinge Jehovah. Itwero nongone ni pol pa dano pe gingeyo. Tyen lok acel aye ni jo mogo ma gugonyo Baibul guleyo nying Lubanga ki RWOT. Ento ka iyabo Nia 3:14, 15 i Baibul me leb Acholi, inongo ni kiketo itere piny ngec ma wacci ‘Leb Ibru: YHWH (Yawe).’

Pwony ango ma wanongo ki i kwan man?— Wapwonyo ni Jehovah aye nying ma pire tek loyo. Man nying Lubanga Won Twer Ducu ma ocweyo jami ducu, dok obedo Won Yecu. Wi myero opo ni Yecu owacci omyero wamar Jehovah ki cwinywa ducu. In mono imaro Jehovah?—

Watwero nyutune nining ni wamaro Jehovah?— Yo acel aye me cako ngeyo en macalo Larem. Yo mukene aye me tito nyinge bot jo mukene. Watwero bene tito lok i kom jami me aura ma Jehovah ocweyogi kacel ki jami mabeco ma en otimo. Man yomo cwiny Jehovah pien en mito ni dano gunge lok kome. Wan watwero nywako i tic man, pe kumeno?—

Pe dano ducu mito winyo lokwa ka waloko i kom Jehovah. I kare ma Yecu Lapwony Madit oloko i kom Jehovah, pol pa dano pe guwinyo lokke. Ento meno pe ogengo Yecu tito lok i kom Jehovah.

Pi meno, omyero wabed calo Yecu. Wamedde wunu ki lok i kom Jehovah. Ka watimo kumeno, ci cwiny Lubanga Jehovah bibedo yom i komwa pien ni wanyutu mar pi nyinge.