Ibuot 4

Abasi Enyene Enyịn̄

NSO isidi akpa n̄kpọ oro afo esibụpde owo ke ini afo osobode enye ke akpa ini?— Kamse, afo esibụp enyịn̄ esie. Kpukpru nnyịn imenyene enyịn̄. Abasi ama osio akpa erenowo ke isọn̄ enyịn̄. Abasi okosio enye Adam. Ẹkekot n̄wan Adam, Eve.

Nte ededi, idịghe mme owo ikpọn̄ ẹsinyene enyịn̄. Kere ban̄a mme n̄kpọ en̄wen oro ẹnyenede enyịn̄ n̄ko. Mme ebua n̄ko ẹsinyene enyịn̄. Ntre, edi ata akpan n̄kpọ owo m̀mê n̄kpọ ndinyene enyịn̄.

Menede enyịn se ata ediwak ntantaọfiọn̄ ke okoneyo. Nte afo emekere ke mmọ ẹnyene enyịn̄?— Ih, Abasi ama osio ntantaọfiọn̄ kiet kiet oro odude ke ikpaenyọn̄ enyịn̄. Bible asian nnyịn ete: “Edi enye abat ibat ntantaọfiọn̄; onyụn̄ osio mmọ kpukpru enyịn̄.”—Psalm 147:4.

Anie ke afo ọkpọdọhọ ke edi ata akpan owo akan ke ofụri ekondo?— Abasi. Nte afo emekere ke enye enyene enyịn̄?— Jesus ọkọdọhọ ke Enye enyene. Ini kiet Jesus ama ọbọn̄ akam ọnọ Abasi ete: ‘Mmayarade enyịn̄ Fo nnọ mme anditiene mi.’ (John 17:26) Nte afo ọmọfiọk enyịn̄ Abasi?— Abasi ke idemesie asiak enyịn̄ oro ọnọ nnyịn. Enye ọdọhọ ete: “Ami ndi Jehovah; enyịn̄ mi edi oro.” Ntre enyịn̄ Abasi edi JEHOVAH.—Isaiah 42:8.

Didie ke esitie fi ke idem ke ini mbon en̄wen ẹtide enyịn̄ fo?— Afo emesikop inemesịt, nte usukopke?— Jehovah oyom mme owo ẹfiọk enyịn̄ imọ n̄ko. Ntre nnyịn ikpenyene ndikot enyịn̄ oro Jehovah ke ini nnyịn itịn̄ke ikọ iban̄a Abasi. Akwa Andikpep ama okot enyịn̄ Abasi, Jehovah, ke ini enye eketịn̄de ikọ ọnọ mme owo. Jesus  ọkọdọhọ ini kiet ete: “Afo nyụn̄ ma Jehovah Abasi fo ke ofụri esịt fo.”—Mark 12:30.

Jesus ama ọfiọk ete ke “Jehovah” edi ata akpan enyịn̄. Ntre enye ama ekpep mme anditiene enye ndikot enyịn̄ Abasi. Enye ama akam ekpep mmọ nditịn̄ mban̄a enyịn̄ Abasi ke akam mmọ. Jesus ama ọfiọk ete ke Abasi oyom kpukpru owo ẹfiọk enyịn̄ Imọ, Jehovah.

Anyan ini ko ke edem Abasi ama owụt owo oro Moses, emi ekedide kiet ke otu nditọ Israel, nte enyịn̄ imọ edide akpan n̄kpọ. Nditọ Israel ẹkedụn̄ ke idụt oro ẹkotde Egypt. Ẹkediọn̄ọ mbon idụt oro nte nditọ Egypt. Mmọ ẹma ẹnam nditọ Israel ẹdi ifịn ẹnyụn̄ ẹnen̄ede ẹsọn̄ ido ye mmọ. Ke ini Moses ọkọkọride okpon, enye ama odomo ndin̄wam kiet ke otu ikọt esie. Emi ama anam Pharaoh, edidem Egypt, ayat esịt. Enye ama oyom ndiwot Moses! Ntre Moses ama efehe ọkpọn̄ Egypt.

 Moses ama aka idụt efen. Idụt oro ekekere Midian. Do Moses ama ọdọ ndọ onyụn̄ ọtọn̄ọ ndisiak ubon. Enye n̄ko akanam utom nte ekpemerọn̄. Usen kiet nte Moses akadade ekpere obot kiet ekpeme mme erọn̄ esie, enye ama okụt n̄kpọ n̄kpaidem. Ikan̄ ama asak ke eto, edi ikataha eto oro! Moses ama asan̄a ekpere man etịm ese.

Nte afo ọmọfiọk se iketịbede?— Moses ama okop uyo otode ufọt eto oro akasakde ikan̄ do. Uyo oro ama okot ete, “Moses, Moses!” Uyo anie ekedi oro?— Ekedi uyo Abasi! Abasi ama enyene ediwak utom ndidọn̄ Moses. Abasi ọkọdọhọ ete: “Di, ndien, nyọdọn̄ fi utom ke ọtọ Pharaoh, man afo osio ikọt mi, kpa nditọ Israel, ke isọn̄ Egypt efep.” Abasi ama ọn̄wọn̄ọ ndin̄wam Moses anam emi.

Edi Moses ama ọdọhọ Abasi ete: ‘Edieke n̄kade n̄kesịm nditọ Israel ke Egypt nnyụn̄ ndọhọ mmọ nte ke Abasi ọkọdọn̄ mi. Nso edieke mmọ ẹbụpde mi ẹte, “Enye ekere didie?” Ndidọhọ didie?’ Abasi ama ọdọhọ Moses ọbọrọ nditọ Israel ete: ‘Jehovah ọdọn̄ mi utom ke ọtọ mbufo. Jehovah edi enyịn̄ mi ke nsinsi.’ (Exodus 3:1-15) Emi owụt nte ke Abasi eyekpeme enyịn̄ oro Jehovah. Enye idikpụhọke  enyịn̄ oro tutu amama. Abasi okoyom ẹda enyịn̄ imọ, Jehovah, ẹfiọk imọ ke nsinsi.

Ke ini Moses akafiakde aka Egypt, nditọ Egypt ekekere ke Jehovah ekedi sụk usụhọde abasi nditọ Israel. Mmọ ikekereke ite ke enye ekedi Abasi emi akarade ofụri isọn̄. Ntre Jehovah ama asian edidem Egypt ete: ‘Ami mmọn̄ nnam ẹfiọk enyịn̄ mi ke ofụri ererimbot.’ (Exodus 9:16) Jehovah ama anam ẹfiọk enyịn̄ esie. Nte afo ọmọfiọk nte enye akanamde oro?—

Ọfọn, enye ama anam Moses ada nditọ Israel ọwọrọ ke Egypt. Ke ini mmọ ẹkesịmde Ididuot Inyan̄, Jehovah ama anam edisat isọn̄ odu ebe ke ndibahade inyan̄ oro iba. Nditọ Israel ẹma ẹsan̄a ifụre ifụre ẹbe ke edisat isọn̄. Edi ke Pharaoh ye ofụri udịmekọn̄ esie ẹma ẹkesan̄a ẹdụk edisat isọn̄ oro, mmọn̄ oro okodude ke edem mbiba ama ọtọ ofụk nditọ Egypt, ndien kpukpru mmọ ẹma ẹkpan̄a.

Ibịghike mme owo ke ofụri isọn̄ ẹma ẹtọn̄ọ ndikop se Jehovah akanamde ke Ididuot Inyan̄. Nnyịn isan̄a didie ifiọk ke mmọ ẹma ẹkop ẹban̄a emi?— Ọfọn, ke n̄kpọ nte isua 40 ke ukperedem, nditọ Israel ẹma ẹkesịm Canaan, emi edide isọn̄ oro Jehovah ọkọn̄wọn̄ọde ndinọ mmọ. Do n̄kaiferi oro Rahab ama asian iren  Israel iba ete: “Nnyịn imokop nte Jehovah akanamde mmọn̄ Ididuot Inyan̄ asat ke iso mbufo, ke ini mbufo ẹketode ke Egypt ẹwọn̄ọ.”—Joshua 2:10.

Mfịn ediwak owo ẹtie ukem ukem nte nditọ Egypt oro. Mmọ inịmke ite ke Jehovah edi Abasi emi akarade ofụri isọn̄. Ntre Jehovah oyom ikọt esie ẹsian mbon en̄wen ẹban̄a imọ. Emi edi se Jesus akanamde. Ke ekperede utịt uwem esie ke isọn̄, enye ama etịn̄ ọnọ Jehovah ke akam ete: “Mmayarade enyịn̄ Fo nnọ mmọ.”—John 17:26.

 Nte afo omoyom nditie nte Jesus? Do sian mbon efen nte ke enyịn̄ Abasi edi Jehovah. Afo emekeme ndikụt nte ke ediwak owo ifiọkke oro. Ntre afo emekeme ndiwụt mmọ itien̄wed oro ke Bible ke Psalm 83:18. Yak ida Bible idahaemi inyụn̄ iyom itien̄wed oro ọtọkiet. Enye ọdọhọ ete: “Ndien owo ẹyefiọk ẹte ke afo emi enyịn̄ fo ikpọn̄ ekerede Jehovah, edi Ata Edikon̄ ke ofụri ererimbot.”

Nso ke nnyịn ikpep ke ndikot itie emi?— Ke akpanikọ, nnyịn ikpep nte ke Jehovah edi ata akpan enyịn̄ emi odude. Enye edi enyịn̄ Ata Ọkpọsọn̄ Abasi, kpa Ete Jesus ye Enye emi okobotde kpukpru n̄kpọ. Ndien ti, Jesus ọkọdọhọ ete ke nnyịn ikpenyene ndima Jehovah Abasi ke ofụri esịt nnyịn. Nte afo amama Jehovah?—

Didie ke nnyịn ikeme ndiwụt ke imama Jehovah?— Usụn̄ kiet edi ndidi ndifiọk enye nte Ufan. Usụn̄ efen edi ndisiak enyịn̄ esie nnọ mbon en̄wen. Nnyịn imekeme ndiwụt mmọ nnennen ke Bible nte ke enyịn̄ esie edi Jehovah. Nnyịn imekeme n̄ko nditịn̄ mban̄a mme utịbe utịbe n̄kpọ oro Jehovah obotde ye nti n̄kpọ oro enye anamde. Emi anam Jehovah enen̄ede enem esịt koro enye oyom mme owo ẹfiọk ẹban̄a imọ. Nnyịn imekeme ndibuana ke ndinam oro, nte nnyịn ikemeke?—

Idịghe kpukpru owo edima ndikpan̄ utọn̄ ke ini nnyịn itịn̄de iban̄a Jehovah. Ediwak owo ikakpan̄ke utọn̄ idem ke ini Jesus, kpa Akwa Andikpep, eketịn̄de aban̄a Enye. Edi oro ikakpanke Jesus nditịn̄ mban̄a Jehovah.

Ntre yak nnyịn itie nte Jesus. Yak nnyịn ika iso itịn̄ iban̄a Jehovah. Edieke nnyịn inamde oro, Jehovah Abasi eyenem esịt ye nnyịn koro nnyịn imama enyịn̄ esie.

Idahaemi yak ikot ọtọkiet ito mme itien̄wed ifan̄ ke Bible oro ẹwụtde nte enyịn̄ Abasi edide akpan n̄kpọ: Isaiah 12:4, 5; Matthew 6:9; John 17:6; ye Rome 10:13.

[Ndise ke page 27]

Nte afo ama ọfiọk ete ke kpukpru ntantaọfiọn̄ ẹnyene enyịn̄?

[Ndise ke page 28]

Nso akpan n̄kpọ ke Moses ekekpep oto eto oro akasakde ikan̄?

[Ndise ke page 29]

Didie ke Jehovah akanam ẹfiọk enyịn̄ esie ke Ididuot Inyan̄?

[Mme ndise ke page 30]

Jesus ama anam ẹdiọn̄ọ enyịn̄ Abasi. Nte afo emekeme ndiwụt enyịn̄ Abasi ke Bible?