NA CAVA o dau taroga vua e dua drau se qai sota vakadua?​— Io, o dau taroga na yacana. E tiko kece na yacada. Na Kalou e vakayacana na imatai ni tagane e vuravura. E vakayacani koya o Atama. Na yaca i wati Atama o Ivi.

Ia, era sega ni vakayacani ga na tamata. Vakasamataka mada na veika tale e so era vakayacani. Ni soli vei iko e dua na matakau lailai se dua na manumanu, o sega beka ni dau vakayacana?​— Io, e bibi dina na yaca.

Raici ira mada na iwiliwili kalokalo vakaitamera ena bogi. Era vakayacani beka?​— Io, e vakayacani ira yadudua na kalokalo e macawa na Kalou. E tukuna vei keda na iVolatabu: “Sa wilika ko koya na kedrai wiliwili na kalokalo; sa vakayacani ira kecega.”​—Same 147:4.

O cei e cecere se uasivi duadua ena lomalagi kei vuravura?— Io, na Kalou. E tiko beka na yacana?— E kaya o Jisu ni tiko na yacana. Ni masu vua na Kalou ena dua na gauna, e kaya o Jisu: ‘Au sa vakatakila vei ira na noqu imuri na yacamuni.’ (Joni 17:26) O kila na yaca ni Kalou?— E vakaraitaka sara ga vei keda na yacana na Kalou. E kaya: “Koi au ko Jiova; sai koya oqo na yacaqu.” E yaca ni Kalou o JIOVA.​—Aisea 42:8.

O na marau ke so era nanuma na yacamu?​— Io, se vakacava?​— E vinakata tale ga o Jiova mera kila na tamata na yacana. E dodonu gona meda vakayagataka na yaca na “Jiova” nida vakamacalataka na Kalou. E vakayagataka na yaca ni Kalou na Qasenivuli Levu ni vosa vei ira na tamata. E kaya o Jisu ena dua na gauna: “Mo lomani Jiova  na nomu Kalou e na lomamu taucoko.”​—Marika 12:30.

E kila o Jisu na bibi ni yaca na “Jiova.” Oya na vuna e vakavulici ira kina na nona imuri mera vakayagataka na yaca ni Kalou. E vakavulici ira tale ga mera cavuta na yaca ni Kalou nira masu. E kila o Jisu ni vinakata na Kalou mera kila kece na tamata ni yacana o Jiova.

Ena dua na gauna makawa a vakaraitaka kina na Kalou na bibi ni yacana vei Mosese, e dua na kawa i Isireli. Era tiko ena vanua o Ijipita na kawa i Isireli. Era kai Ijipita na lewe ni vanua oqori. Era vakabobulataki ira na Isireli ra qai sega tale ga ni lomani ira. Ni sa cauravou o Mosese, e qai saga me vukea e dua na kainona. Oqo e vakavuna me cudru o Fero, na tui Ijipita. E vinakata sara ga me vakamatei Mosese! E qai dro mai Ijipita o Mosese.

E dro ina vanua o Mitiani o Mosese.  E lai vakawati qai vakaluveni o Mosese ena vanua oya. E dau vakatawani ira tale ga na sipi o koya. Ena dua na siga e raica o Mosese e dua na ka veivakurabuitaki ni vakatawani ira tiko nona sipi. E kama tiko e dua na kau, ia e sega ga ni kama yavu! E toro voleka o Mosese me lai raica vinaka.

O kila na ka e qai yaco?​— E rogoca o Mosese e dua na domo e kaci tiko mai ena loma ni kau oya. E kacivaka mai na domo oya, “I Mosese! I Mosese!” O cei e vosa mai oya?​— Na Kalou! E levu sara na cakacaka a vinakata na Kalou me cakava o Mosese. E kaya na Kalou: ‘Au na talai iko vei Fero, na tui Ijipita, mo lai kauti ira tani mai na noqu tamata, na kawa i Isireli, mai Ijipita.’ E yalataka na Kalou ni na vukei Mosese.

Ia e kaya o Mosese vua na Kalou: ‘Niu sa lako vei ira na kawa i Isireli e Ijipita meu vakaraitaka ni talai au mai na Kalou, vakacava ke ra tarogi au, “O cei na yacana?” Na cava meu kaya?’ E tukuna na Kalou vei Mosese me tukuna vei ira na kawa i Isireli: ‘E talai au mai o Jiova. Oqo na yacaqu me tawamudu.’ (Lako Yani 3:​1-15) E vakaraitaka  oya ni na taura dei na Kalou na yaca na “Jiova.” Ena sega ni veisautaka tale. A vinakata na Kalou me kacivi ena yaca na “Jiova” me tawamudu.

Ni lesu o Mosese i Ijipita, era nanuma na kai Ijipita ni o Jiova e dua ga na nodra kalou lailai na Isireli. Era sega ni vakabauta ni o koya e Kalou ni vuravura taucoko. Mani tukuna o Jiova vua na tui Ijipita: ‘Au na vakatakila na yacaqu e vuravura taucoko.’ (Lako Yani 9:16) E qai vakatakila dina na yacana o Jiova. O kila se a vakatakila vakacava?​—

E lesi Mosese me kauti ira tani na nona tamata mai Ijipita. Nira yaco ina Wasa Damudamu, e dolava o Jiova e dua na vanua mamaca me takosovi. Nira sa takoso oti na Isireli, era sa tekivu curuma tale ga mai o Fero kei na nona mataivalu na vanua mamaca oya. E qai luvuci ira na kai Ijipita na wai a tarovi tu oya ra mani mate kece sara.

Sega ni bera nodra sa kila na tamata e veiyasa i vuravura na ka e cakava o Jiova ena Wasa Damudamu. Eda kila vakacava nira rogoca?​— Ni oti e 40 na yabaki, era sa yaco i Kenani na Isireli, oqo na vanua e yalataka o Jiova me solia vei ira. E tukuna vei rau e rua na Isireli o Reapi e dua na marama ni vanua oya:  “Keimami sa rogoca sa vakadiva na Wasa Damudamu ko Jiova e na vukumuni, ni kemuni a lako mai Ijipita.”​—Josua 2:10.

E levu na tamata ena gauna oqo era vakataki ira na kai Ijipita. Era sega ni vakabauta ni Kalou ni vuravura taucoko o Jiova. E vinakata gona o Jiova mera tukuni koya na nona tamata. Oya na ka e cakava o Jisu. Ni voleka ni oti nona bula e vuravura, e tukuna vei Jiova ena nona masu: “Ka’u sa vakatakila vei ira na yacamuni.”​—Joni 17:26.

 O vinakata mo vakataki Jisu? Tukuna tale ga vei ira tale e so ni yaca ni Kalou o Jiova. O na rairai vakila ni levu na tamata era sega ni kila na yacana. Ena rawa mo vakaraitaka vei ira na tikinivolatabu na Same 83:18. Daru cega vata mada na tikinivolatabu oya. E kaya: “Me ra kila ko ira na tamata ni sai kemuni na yacamuni ga ko JIOVA, sa Cecere sara duaduaga e vuravura taucoko.”

Na cava eda vulica mai na ka eda wilika oya?​— Io, eda vulica kina ni yaca na “Jiova” e yaca bibi duadua. E yacana na Kalou Kaukaua Duadua, o koya e bulia na veika kece qai Tama i Jisu tale ga. Nanuma ni a tukuna o Jisu ni dodonu meda lomana na Kalou o Jiova ena lomada kece. O lomani Jiova?​—

Eda vakaraitaka vakacava nida lomani Jiova?​— Meda kilai koya me vaka e noda itokani. Meda dau vakatakila tale ga na yacana. Meda vakaraitaka sara ga mai na iVolatabu ni yacana o Jiova. Meda vakaraitaka tale ga na veika totoka e bulia kei na veika vinaka e sa cakava. Oqo ena vakamarautaki Jiova baleta ni vinakata mera kilai koya na tamata. E rawa nida vakaitavi ena cakacaka oya, se vakacava?​—

Era na sega ni vakarorogo kece na tamata nida tukuni Jiova. E levu era sega mada ga ni vakarorogo vua na Qasenivuli Levu o Jisu, ni tukuni Jiova. Ia e sega ni tarova oya na nona tukuni Jiova tiko o Jisu.

Meda vakataki Jisu mada ga. Meda tukuni Jiova tiko ga. Nida vakayacora oqori, ena marautaki keda na Kalou baleta eda vakaraitaka nida taleitaka na yacana.