ANO sa masami ang una nga ginapamangkot mo kon ipakilala ka sa isa ka tawo?— Huo, ginapamangkot mo kon ano ang iya ngalan. May ngalan kita tanan. Ginhatagan sang Dios sing ngalan ang una nga tawo sa duta. Ginhingalanan niya sia nga Adan. Ang asawa ni Adan ginhingalanan nga Eva.

Apang, indi lamang ang mga tawo ang may ngalan. Pensara ang iban pa nga mga butang nga may ngalan man. Kon hatagan ka sing isa ka monyika ukon isa ka hinuptanan nga sapat, indi bala nga ginahatagan mo ini sing ngalan?— Huo, importante gid ang ngalan.

Tan-awa ang madamo nga bituon sa langit kon gab-i. Sa banta mo ayhan may ngalan sila?— Huo, ginhatagan sang Dios sing ngalan ang tagsa ka bituon sa langit. Ang Biblia nagasugid sa aton: “Ginaisip niya ang kadamuon sang mga bituon; ginatawag niya sila tanan sa ila mga ngalan.”—Salmo 147:4.

Sin-o ang masiling mo nga labing importante nga persona sa bug-os nga uniberso?— Huo, amo ang Dios. Sa banta mo ayhan may ngalan sia?— Nagsiling si Jesus nga may ngalan ang Dios. Sang mangamuyo si Jesus sa Dios isa ka bes, nagsiling sia: ‘Ginpakilala ko ang imo ngalan sa akon mga sumulunod.’ (Juan 17:26) Nahibaluan mo bala ang ngalan sang Dios?— Ang Dios mismo ang nagasugid sa aton kon sin-o sia. Sia nagsiling: “Ako si Jehova. Ina amo ang akon ngalan.” Gani si JEHOVA ang ngalan sang Dios.—Isaias 42:8.

Ano ang mabatyagan mo kon madumduman sang iban ang imo ngalan?— Indi bala nga nalipay ka?— Luyag ni Jehova nga makilala man sang katawhan ang iya ngalan. Gani dapat naton gamiton ang ngalan nga Jehova kon nagahambal kita tuhoy sa Dios. Gingamit sang Daku nga Manunudlo ang ngalan sang Dios, nga Jehova, sang naghambal sia sa mga tawo.  Sang isa ka bes si Jesus nagsiling: “Higugmaa si Jehova nga imo Dios sa bug-os mo nga tagipusuon.”—Marcos 12:30.

Nahibaluan ni Jesus nga ang “Jehova” isa ka importante gid nga ngalan. Gani gintudluan niya ang iya mga sumulunod nga gamiton ang ngalan sang Dios. Gintudluan pa gani niya sila nga sambiton ang ngalan sang Dios sa ila mga pangamuyo. Nahibaluan ni Jesus nga luyag sang Dios nga makilala sang tanan nga tawo ang Iya ngalan, nga Jehova.

Sang madugay na, ginpakita sang Dios ang importansia sang iya ngalan sa tawo nga si Moises, nga isa sang mga anak sang Israel. Ang mga anak sang Israel, nga gintawag mga Israelinhon, nagapuyo sa duta nga gintawag Egipto. Ang mga tawo sa sadto nga pungsod gintawag nga mga Egiptohanon. Gin-ulipon nila kag ginpintasan ang mga Israelinhon. Sang nagdaku si Moises, ginbuligan niya ang isa sang iya mga kasimanwa. Naakig sa sini si Paraon, nga hari sang Egipto. Luyag niya patyon si Moises! Gani nalagyo si Moises gikan sa Egipto.

 Nagkadto si Moises sa iban nga duta. Amo yadto ang duta sang Midian. Nakapangasawa didto si Moises kag nagsugod sa pagpamilya. Nagtrabaho man sia subong manugbantay sing mga karnero. Isa ka adlaw, masako si Moises sa pag-atipan sang iya mga karnero malapit sa isa ka bukid sang nakakita sia sing isa ka makatilingala nga butang. Ang sapinit nagadabdab, apang wala nagakasunog! Nagpalapit pa si Moises agod makita ini sing maayo.

Nahibaluan mo bala kon ano ang natabo?— Nakabati si Moises sing isa ka tingog nga nagapanawag gikan sa tunga sang nagadabdab nga sapinit. Ang tingog nagpanawag, “Moises! Moises!” Sin-o yadtong nagahambal?— Amo ang Dios! Madamo sing ipahimo ang Dios kay Moises. Ang Dios nagsiling: ‘Kari ka kag ipadala ko ikaw kay Paraon, nga hari sang Egipto, kag paguwaon mo sa Egipto ang akon katawhan nga mga anak sang Israel.’ Nanaad ang Dios nga buligan niya si Moises sa paghimo sini.

Apang si Moises nagsiling sa Dios: ‘Pananglit makadto ako sa mga anak sang Israel sa Egipto kag isiling ko sa ila nga ginpadala ako sang Dios. Ano kon pamangkuton nila ako, “Ano ang iya ngalan?” Ano ang isiling ko?’ Ginsingganan sang Dios si Moises nga sugiran ang mga anak sang Israel:  ‘Ginpadala ako ni Jehova sa inyo. Jehova ang akon ngalan tubtob sa walay katubtuban.’ (Exodo 3:1-15) Ginapakita sini nga huptan sang Dios ang ngalan nga Jehova. Indi gid niya pag-islan ini. Luyag sang Dios nga makilala sia sa iya ngalan nga Jehova tubtob sa walay katubtuban.

Sang nagbalik si Moises sa Egipto, naghunahuna ang mga Egiptohanon nga si Jehova isa lamang ka maluya nga dios sang mga Israelinhon. Wala sila maghunahuna nga sia ang Dios sang bug-os nga duta. Gani ginsilingan ni Jehova ang hari sang Egipto: ‘Ipakilala ko ang akon ngalan sa bug-os nga duta.’ (Exodo 9:16) Ginpakilala matuod ni Jehova ang iya ngalan. Nahibaluan mo bala kon paano niya ginhimo ini?—

Ti, gintangdo niya si Moises nga amo ang manguna sa katawhan sang Israel paguwa sa Egipto. Pag-abot nila sa Dagat nga Mapula, naghimo si Jehova sing mamala nga banas sa tunga sini. Sang makatabok na ang mga Israelinhon padulong sa mamala nga duta, nagsulod man si Paraon kag ang iya bug-os nga hangaway sa nagmala nga dagat, ang mga tubig nga nagpunong sa duha ka bahin nag-uli liwat kag napatay ang tanan nga Egiptohanon.

Wala magdugay nabatian sang katawhan sa bug-os nga duta ang ginhimo ni Jehova sa Dagat nga Mapula. Paano naton nahibaluan nga nabatian nila ini?— Ti, pagligad sang mga 40 ka tuig, nag-abot ang mga Israelinhon sa Canaan, nga amo ang duta nga ginsaad sa ila ni Jehova.  Didto, ang duha ka Israelinhon nga lalaki ginsingganan sang babayi nga si Rahab: “Nabatian namon kon paano ginpamala ni Jehova ang tubig sang Dagat nga Mapula sa atubangan ninyo sang pagguwa ninyo sa Egipto.”—Josue 2:10.

Madamo nga tawo karon ang kaangay gid sadtong mga Egiptohanon. Wala sila nagapati nga si Jehova amo ang Dios sang bug-os nga duta. Gani luyag ni Jehova nga sugiran sang iya katawhan ang iban tuhoy sa iya. Ginhimo ini ni Jesus. Sang malapit na sia mapatay sa duta, ginsugiran niya si Jehova sa pangamuyo: “Ginpakilala ko sa ila ang imo ngalan.”—Juan 17:26.

 Luyag mo bala mangin kaangay ni Jesus? Kon amo, sugiri ang iban nga ang ngalan sang Dios amo si Jehova. Mahimo masapwan mo nga madamo ang wala makahibalo sini. Gani mahimo nga mapakita mo sa ila ang teksto sa Biblia sa Salmo 83:18. Kuhaon naton karon ang Biblia kag pangitaon ini nga teksto. Ini nagasiling: “Agod makilala sang katawhan nga ikaw, nga ang ngalan si Jehova, ikaw lamang ang Labing Mataas sa bug-os nga duta.”

Ano ang natun-an naton gikan sa pagbasa sini?— Huo, natun-an naton nga ang Jehova amo ang labing importante nga ngalan. Amo ini ang ngalan sang Labing Gamhanan nga Dios, nga Amay ni Jesus kag ang Isa nga naghimo sang tanan nga butang. Kag dumduma, nagsiling si Jesus nga dapat naton higugmaon si Jehova nga Dios sa aton bug-os nga tagipusuon. Ginahigugma mo bala si Jehova?—

Paano naton mapakita nga ginahigugma naton si Jehova?— Ang isa ka paagi amo ang makilala naton sia subong isa ka Abyan. Ang isa pa ka paagi amo ang pagsugid sa iban kon ano ang iya ngalan. Mapakita naton sa ila sa Biblia mismo nga ang ngalan niya amo si Jehova. Masugid man naton ang makatilingala nga mga butang nga gintuga ni Jehova kag ang maayong mga butang nga iya nahimo. Magapahalipay gid ini kay Jehova bangod luyag niya nga makilala sia sang katawhan. Mahimo kita makapakigbahin sa paghimo sini, indi bala?—

Indi tanan luyag mamati kon maghambal kita tuhoy kay Jehova. Madamo nga tawo ang wala mamati bisan sang si Jesus, nga Daku nga Manunudlo, naghambal tuhoy sa Iya. Apang wala ini magpugong kay Jesus sa paghambal tuhoy kay Jehova.

Gani ilugon naton si Jesus. Magpadayon kita sa paghambal tuhoy kay Jehova. Kon himuon naton ini, malipay si Jehova nga Dios sa aton bangod nagapakita kita sing gugma sa iya ngalan.