MŨKĨMENYANA na mũndũ riita rĩa mbere-rĩ, nĩ ũndũ ũrĩkũ wambaga kũmũũria?— Ũmũũragia ũrĩa etagwo. Ithuothe nĩ tũrĩ marĩĩtwa. Mũndũ wa mbere gũkorũo gũkũ thĩ nĩ aaheirũo rĩĩtwa nĩ Ngai. Aamwĩtire Adamu. Nake mũtumia wa Adamu agĩĩtwo Hawa.

O na kũrĩ ũguo, to andũ makoragwo na marĩĩtwa. Ta wĩcirie indo ingĩ iria ikoragwo na marĩĩtwa. Ũngĩgĩa kagui kana kanyau, nĩ ũkaheaga rĩĩtwa, na githĩ tiguo?— Nĩ ma, gũkorũo na rĩĩtwa nĩ ũndũ wa bata mũno.

Rĩrĩa warora igũrũ ũtukũ, nĩ wonaga njata nyingĩ mũno. Hihi nĩ wĩciragia nĩ irĩ marĩĩtwa?— Ngai nĩ aaheire o njata rĩĩtwa. Bibilia ĩtwĩraga ũũ: “Ataraga njata o ũrĩa ciigana; ciothe akaitua marĩĩtwa.”—Thaburi 147:4.

Ũngĩũrio nũũ wa bata mũno igũrũ na thĩ yothe-rĩ, ũngiuga nũũ?— Ĩĩ, nĩ Ngai. Wee-rĩ, nĩ wonaga ta Ngai akoragwo na rĩĩtwa?— Jesu oigire atĩ Ngai nĩ arĩ rĩĩtwa. Hĩndĩ ĩmwe Jesu akĩhoya erire Ngai ũũ: ‘Nĩ menyithĩtie arũmĩrĩri akwa rĩĩtwa rĩaku.’ (Johana 17:26) Wee nĩ ũĩ rĩĩtwa rĩa Ngai?— Ngai we mwene nĩ atwĩraga ũrĩa etagwo. Atwĩraga ũũ: “Niĩ nĩ niĩ Jehova; rĩu nĩrĩo rĩĩtwa rĩakwa.” Kwoguo rĩĩtwa rĩa Ngai nĩ JEHOVA.—Isaia 42:8.

Ũiguaga atĩa rĩrĩa andũ arĩa angĩ maririkana ũrĩa wĩtagwo?— Nĩ ũkenaga mũno, na githĩ tiguo?— Jehova o nake nĩ endaga andũ mamenye rĩĩtwa rĩake. Nĩ ũndũ ũcio, nĩ twagĩrĩirũo kũhũthĩra rĩĩtwa Jehova rĩrĩa tũraaria ũhoro wa Ngai. Mũrutani Ũrĩa Mũnene nĩ aahũthagĩra rĩĩtwa rĩa Ngai, Jehova, rĩrĩa aaragia na andũ. Hĩndĩ  ĩmwe Jesu oigire ũũ: “No mũhaka wende Jehova Ngai waku na ngoro yaku yothe.”—Mariko 12:30.

Jesu nĩ aamenyaga wega atĩ rĩĩtwa “Jehova” nĩ rĩa bata mũno. Nĩ ũndũ ũcio, nĩ eerire arũmĩrĩri ake mahũthagĩre rĩĩtwa rĩa Ngai. O na nĩ aamarutire kũhũthagĩra rĩĩtwa rĩa Ngai rĩrĩa marahoya. Jesu nĩ aamenyaga wega atĩ Ngai nĩ endaga andũ mamenye etagwo Jehova.

Hĩndĩ ĩmwe tene mũno, Ngai nĩ onirie Musa, ũrĩa warĩ Mũisiraeli, bata wa rĩĩtwa rĩake. Ciana cia Isiraeli, no cio cietagwo Aisiraeli, na ciatũũraga bũrũri wetagwo Misiri. Andũ arĩa maatũũraga bũrũri ũcio meetagwo Amisiri. Amisiri nĩ maatuire Aisiraeli ngombo ciao, na nĩ maamarutithagia wĩra mũritũ mũno. Rĩrĩa Musa aatuĩkire mũndũ mũgima, nĩ aageririe gũteithia Mũisiraeli ũmwe. Ũndũ ũcio nĩ watũmire Firauni, mũthamaki wa Misiri, arakare mũno. Eendaga kũũraga Musa! Nĩ ũndũ ũcio Musa akiuma Misiri akĩũra.

 Musa aathiire bũrũri ũngĩ. Bũrũri ũcio wetagwo Midiani. Arĩ kũu, Musa nĩ aahikanirie na akĩgĩa ciana. Ningĩ nĩ aarutaga wĩra wa kũrĩithia mbũri. Mũthenya ũmwe Musa akĩrĩithia mbũri hakuhĩ na kĩrĩma, nĩ onire ũndũ wamũmakirie mũno. Onire kĩhinga gĩgĩakana mwaki no gĩtiahĩaga! Musa agĩkuhĩrĩria nĩguo one wega.

Nĩ ũĩ ũrĩa gwathiire na mbere?— Musa aiguire mũgambo ũgĩĩtana kuuma kĩhinga-inĩ kĩu gĩakanaga mwaki. Mũgambo ũcio wetanaga ũkoiga, “Musa! Musa!” Hihi nũũ wetanaga?— Nĩ Ngai! Ngai aarĩ na wĩra mũingĩ eendaga Musa arute. Eerire Musa ũũ: ‘Ũka rĩu ngũtũme kũrĩ Firauni, mũthamaki wa Misiri, nĩ getha ũtongorie andũ akwa ciana cia Isiraeli, ũmarute bũrũri wa Misiri.’ Ngai eerire Musa atĩ nĩ ekũmũteithia nĩguo ahote gwĩka ũguo.

Nake Musa akĩũria Ngai atĩrĩ: ‘Ĩ ingĩkinya Misiri kũrĩ ciana cia Isiraeli, ndĩciĩre atĩ Ngai nĩwe ũndũmĩte, nacio injũrie atĩrĩ, “Agĩĩtagwo atĩa?” Ngagĩciĩra atĩa hihi?’ Ngai eerire Musa ere ciana cia Isiraeli ũũ: ‘Jehova nĩwe ũndũmĩte kũrĩ inyuĩ. Jehova nĩrĩo rĩĩtwa rĩakwa tene na tene.’ (Thama 3:1-15) Ũndũ ũcio ũronania atĩ Ngai  eendaga rĩĩtwa rĩake rĩtũũre tene na tene. Ndarĩ hĩndĩ akaarĩcenjia. Ngai eendaga atũũre oĩkaine atĩ nĩwe Jehova, tene na tene.

Rĩrĩa Musa aacokire Misiri, Amisiri meeciragia atĩ Jehova nĩ ngai ũtarĩ hinya wa Aisiraeli. Matiamenyaga atĩ aarĩ Ngai ũrĩa wĩ hinya igũrũ rĩa thĩ yothe. Kwoguo Jehova akĩĩra mũthamaki wa Misiri ũũ: ‘Rĩĩtwa rĩakwa nĩ ngũrĩmenyithania thĩ yothe.’ (Thama 9:16) Hatarĩ nganja, Jehova nĩ aatũmire andũ mamenye rĩĩtwa rĩake. Hihi nĩ ũĩ eekire ũguo atĩa?—

Jehova eerire Musa atongorie ciana cia Isiraeli ciume Misiri. Rĩrĩa maakinyire iria-inĩ itune, Jehova akĩgayũkania maĩ, agĩthondeka njĩra. Aisiraeli maaringire mwena ũrĩa ũngĩ magereire thĩ nyũmũ. No thutha wa Firauni na mbũtũ yake gũtonya iria gatagatĩ, maĩ marĩa maagayũkanĩtio magĩkunĩkĩria Amisiri acio, na othe magĩkua.

Kahinda kanini thutha ũcio, andũ thĩinĩ wa thĩ yothe makĩambĩrĩria kũigua ũrĩa Jehova eekire iria-inĩ itune. Tũmenyaga atĩa atĩ andũ nĩ maaiguire ũhoro ũcio?— Thutha wa mĩaka ta 40, Aisiraeli nĩ maathiire Kanaani, bũrũri ũrĩa Jehova aamerĩire. Na marĩ kũu Kanaani, mũtumia wetagwo Rahabu nĩ eerire  arũme erĩ Aisiraeli atĩrĩ, “Nĩtũiguĩte ũrĩa Jehova aahũithirie maĩ ma Iria Itune mbere yanyu, hĩndĩ ĩrĩa mwoimire Misiri.”—Joshua 2:10.

Andũ aingĩ ũmũthĩ mahaana ta Amisiri acio. Matiĩtĩkĩtie atĩ Jehova nĩwe Ngai ũrĩa wĩ hinya igũrũ rĩa thĩ yothe. Nĩ ũndũ ũcio, Jehova endaga andũ ake mere andũ arĩa angĩ ũhoro wake. Ũguo nĩguo Jesu eekaga. Mũthia-inĩ wa ũtũũro wake wa gũkũ thĩ, Jesu akĩhoya eerire Jehova ũũ: “Nĩ ndĩmamenyithĩtie rĩĩtwa rĩaku.”—Johana 17:26.

 We no wende gũtuĩka ta Jesu? Angĩkorũo no wende-rĩ, ĩraga andũ arĩa angĩ atĩ Ngai etagwo Jehova. Andũ aingĩ matikoragwo moĩ atĩ ũguo nĩguo etagwo. Nĩ ũndũ ũcio, no ũmonie rĩandĩko rĩa Thaburi 83:18. Ta reke tũhumbũrie Bibilia tũcarie rĩandĩko rĩu hamwe. Rĩroiga ũũ: “Nĩguo mamenye atĩ wee, o wee wĩtagwo Jehova, nowe wiki Ũrĩa-wĩ-Igũrũ-Mũno o igũrũ rĩa thĩ yothe.”

Rĩandĩko rĩrĩ rĩratũruta atĩa?— Rĩratũruta atĩ Jehova nĩrĩo rĩĩtwa rĩa bata gũkĩra marĩĩtwa marĩa mangĩ mothe. Nĩrĩo rĩĩtwa rĩa Ngai Mwene-Hinya-Wothe, Ithe wa Jesu, na Ũrĩa wombire indo ciothe. Ririkana Jesu oigire atĩ twagĩrĩiruo kwenda Jehova na ngoro itũ yothe. Wee nĩ wendete Jehova?—

Tũngĩonania atĩa nĩ twendete Jehova?— Njĩra ĩmwe nĩ kwĩruta ũhoro wake nĩguo atuĩke Mũrata witũ. Nayo njĩra ĩngĩ nĩ kwĩra andũ ũrĩa etagwo. No tũmonie kuuma Bibilia-inĩ atĩ rĩĩtwa rĩake nĩ Jehova. Ningĩ no tũmeere ũhoro wa indo cia magegania iria Jehova ombire na maũndũ mega marĩa ekĩte. Ũndũ ũcio nĩ ũtũmaga Jehova akene tondũ nĩ endaga andũ mamenye ũhoro wake. Githĩ o na ithuĩ to tũmamenyithie ũhoro ũcio?—

Ti andũ othe marĩendaga gũtũthikĩrĩria rĩrĩa tũraaria ũhoro wa Jehova. Andũ aingĩ matiathikĩrĩirie Jesu, Mũrutani Ũrĩa Mũnene, rĩrĩa aaragia ũhoro wa Jehova. No ũndũ ũcio ndwagiririe Jesu athiĩ na mbere kwaria ũhoro wa Jehova.

Kwoguo twagĩrĩirũo kwĩgerekania na Jesu. Reke tũthiĩ na mbere kwĩraga andũ ũhoro wa Jehova. Tweka ũguo, Jehova Ngai nĩ arĩkenagio nĩ ithuĩ, tondũ nĩ tũrĩonanagia nĩ twendete rĩĩtwa rĩake.