LUHAPU ngeenge to shakene nomunhu oshikando shotete, oshike osho ho mu pula tete? —  Oho mu pula edina laye. Ovanhu aveshe ove na omadina. Kalunga okwa li a pa omulumenhu nomukainhu wotete omadina. Omulumenhu okwe mu luka Adam nomukainhu okwe mu luka Eva.

Ndelenee ovanhu havo aveke ve na omadina. Diladila yo kombinga yoinima imwe oyo nayo hai lukwa omadina. Ngeenge wa pewa okapopifa ile okanamwenyo komeumbo, mbela iho i luku omadina? —  Osho ho ningi, molwaashi edina ola fimana neenghono.

Diladila keenyofi dihapuhapu odo hadi kala keulu oufiku, mbela nado odi na omadina? —  Heeno odi na, molwaashi Kalunga eenyofi adishe okwe di luka omadina. Ombibeli otai ti: ‘Oye ha pangelele eenyofi omuvalo apa u fike, note di ifana adishe komadina.’ — Epsalme 147:4, yelekanifa OB-1986.

Mbela olyelye a fimanenena meshito alishe? —  OKalunga. Mbela oto diladila kutya Kalunga oku na edina? —  Jesus okwa popya kutya Kalunga oku na edina. Pomhito imwe eshi Jesus a li ta ilikana kuKalunga, okwa li a tya: ‘Ame onda shiivifila ovashikuli vange edina loye.’ (Johannes 17:26) Mbela ou shi shii kutya edina laKalunga olyelye? —  Kalunga ote tu lombwele kutya oye lyelye. Okwa ti: “Aame Jehova, olo edina lange.” Hano edina laKalunga oJEHOVA. — Jesaja 42:8, yelekanifa NW.

Oho kala u udite ngahelipi ngeenge ovanhu ove shii edina loye? — Mbela oho kala wa hafa? —  Jehova okwa hala yo ovanhu va shiive edina laye. Onghee hano, ngeenge hatu popi kombinga yaye otu na okukala hatu longifa edina laye. Omuhongi Munene okwa li ha longifa edina laKalunga, Jehova, ngeenge a li ta popi novanhu. Pomhito imwe Jesus okwa li a tya: “Hola [Jehova, NW] Kalunga koye nomutima woye aushe.” — Markus 12:30.

 Jesus okwa li e shii kutya edina “Jehova” ola fimanenena. Nomolwaasho okwa li a honga ovashikuli vaye va kale have li longifa. Okwa li nokuli e va honga kutya ove na oku li longifa ngeenge tava ilikana. Jesus okwa li e shii kutya Kalunga okwa hala ovanhu aveshe va shiive kutya edina laye oJehova.

Nalenale, Jehova okwa li a ulikila omulumenhu umwe wedina Moses, oo a li Omuisrael, kutya edina laye ola fimana. Ovaisrael okwa li hava kala medu laEgipti. Ovanhu vomedu laEgipti ova li hava ifanwa Ovaegipti. Ovaegipti ova li va ninga Ovaisrael ovapika vavo, nova li have va ningi onyanya. Eshi Moses a ka kula, okwa li a kendabala okukwafela umwe womoshiwana shavo oo a li ta dengwa kOmuegipti. Osho osha li sha handukifa Farao, ohamba yOvaegipti. Farao okwa li a hala okudipaa Moses, onghee hano, Moses okwa li a ya onhapo okudja muEgipti.

Moses okwa li a ya koshilongo shimwe shi lili, koshilongo shOvamidian. Ofimbo a li oko, okwa li a hombola omukainhu  Omumidian, ndele tava dala naye ounona. Moses okwa li yo omufita weedi. Efiku limwe eshi Moses a li ta lifa eedi daye popepi nomhunda yonhumba, okwa li a mona oshinima shikumwifi. Okwa li a mona oshixwa sheno sha tema omundilo, ndele kasha li tashi lungwina po. Moses okwa li a ehena popepi nasho opo e shi tale nawa.

Mbela ou shi shii kutya oshike sha li sha ningwa po eshi Moses a li a ehena popepi noshixwa sheno osho? —  Moses okwa li a uda ondaka tai di moshixwa sheno osho sha li tashi pi. Ondaka oyo oya li ye mu ifana tai ti: “Moses, Moses!” Mbela olyelye a li ta ifana Moses? —  OKalunga! Kalunga okwa li e nine Moses oilonga ihapu. Kalunga okwa li e mu lombwela a ti: ‘Ame ohandi ku tumu kohamba yaEgipti, Farao, ndele pitifa mo muEgipti oshiwana shange shOvaisrael.’ Kalunga okwa li a udanekela Moses kutya ote ke mu kwafela moshinima osho.

Moses okwa li a lombwela Kalunga a ti: ‘Ame ngeenge handi i kOvaisrael kedu laEgipti ndele handi va lombwele kutya Kalunga okwa tuma nge ndele tava pula nge kutya: Olyelye edina laye? Ohandi ke va nyamukula ngahelipi?’ Kalunga okwa li a lombwela Moses a lombwele Ovaisrael  ta ti: ‘Jehova oye a tuma nge kunye, nokwa ti kutya Jehova olo edina laye fiyo alushe.’ (Exodus 3:1-15, yelekanifa NW.) Osho otashi ulike kutya Kalunga okwa li a hala okukala a shiivika nedina Jehova fiyo alushe, noka li te ke li lundulula.

Eshi Moses a li a shuna kuEgipti, Ovaegipti ova li tava diladila kutya Jehova oshikalunga shOvaisrael shihe na eenghono. Kava li ve shii kutya Jehova oKalunga oo a shita edu alishe. Onghee hano, Jehova okwa li a lombwela ohamba yaEgipti a ti: ‘Ame ohandi ka shiivifa edina lange kombada yedu alishe.’ (Exodus 9:16) Jehova osho a ka shiivifa edina laye ngaashi a li a popya. Mbela ou shi shii kutya okwa li e shi ninga ngahelipi?

Okwa li a longifa Moses a pitife mo Ovaisrael muEgipti. Eshi Ovaisrael va ka fika pEfuta Litilyana, Jehova okwa li a tukaula omeva efuta pokati, ndele tava taulula efuta olo poukukutu. Ndele eshi Farao netangakwaita laye alishe ve ke va shikulila mo, omeva oo a li a tukulwa pokati okwa li a alukila kumwe ndele Ovaegipti tava file mo mefuta.

Ovanhu mounyuni aushe ova li va uda osho Jehova a li a ninga pEfuta Litilyana. Otu shi shii ngahelipi kutya ova li ve shi uda? —  Omido 40 lwaapo konima yaasho, Ovaisrael ova li va ya kedu laKanaan, edu olo Jehova a li e va udanekela. Eshi ovalumenhu vavali Ovaisrael vali va ya  kuKanaan, omukainhu umwe omunyasha wedina Rahab okwa li e va lombwela a ti: “Fye twa uda nhumbi Omwene okwe mu pwininifila omeva omEfuta lomanenge komesho yeni fimbo mwa dja mo muEgipti.” — Josua 2:10.

Ovanhu vahapu kunena ove na oikala ya fa yOvaegipti ovo vonale. Inava itavela kutya Jehova oye Kalunga oo a shita edu alishe. Onghee hano, Jehova okwa hala oshiwana shaye shi lombwele ovanhu vakwao kombinga yaye. Jesus osho a li ha ningi ngaho. Lwopexulilo longhalamwenyo yaye yokombada yedu, Jesus okwa  li a ilikana kuJehova a ti: “Ame nde va shiivifa edina loye.” — Johannes 17:26.

Mbela owa hala okuhopaenena Jesus? Ngeenge osho, kala ho lombwele vamwe kutya edina laKalunga oJehova. Ovanhu vahapu otashi dulika vehe shii kutya edina laKalunga oJehova. Onghee hano, oto dulu oku va ulikila omushangwa oo u li muExodus 15:3 (OB-1954), oo tau ti: “Jehova Ofule; edina laye Jehova.”

Oshike hatu lihongo movelishe oyo? —  Ohatu lihongo mo kutya edina laJehova olo la fimanenena meshito alishe. Olo olo edina laKalunga Omunaenghono adishe, Xe yaJesus nosho yo oo a shita oinima aishe. Dimbuluka yo kutya Jesus okwa ti kutya otu na okukala tu hole Jehova Kalunga nomutima wetu aushe. Mbela ou hole Jehova?

Ongahelipi hatu dulu okuulika kutya otu hole Jehova? —  Onghedi imwe omo hatu dulu oku shi ninga omoku mu shiiva opo a ninge kaume ketu. Onghedi vali imwe omo hatu dulu oku shi ninga omokulombwela vamwe edina laye. Ohatu dulu yo okulombwela vamwe kombinga yoinima ikumwifi oyo Jehova a shita nosho yo kombinga yoinima iwa oyo a ninga. Kungaho, ohatu ka hafifa Jehova neenghono, molwaashi Jehova okwa hala ovanhu ve mu shiive. Mbela ino hala okukala ho lombwele vamwe kombinga yoinima ya tya ngaho?

Havanhu aveshe tava ka kala va hala okupwilikina kufye ngeenge hatu va lombwele kombinga yaJehova. Ovanhu vahapu kava li nokuli hava pwilikine eshi Jesus, Omuhongi Munene, a li ta popi kombinga yaJehova. Ndele nande ongaho, Jesus ka li a efa po okupopya kombinga yaJehova.

Onghee hano, natu hopaenene Jesus. Natu twikile okukala hatu popi kombinga yaJehova. Ngeenge otwa ningi ngaho, Jehova Kalunga ota ka kala e tu hokwa, molwaashi ohatu ulike kutya otu hole edina laye.