KIKO hopi bes ta e promé kos ku bo ta puntra un hende ora bo sera konosí kuné?— Sí, bo ta puntr’é su nòmber. Tur hende tin nòmber. Dios a duna e promé hòmber riba tera un nòmber. El a yam’é Adam. Adam su kasá tabata yama Eva.

Pero no ta hende so tin nòmber. Pensa kiko ta un par di otro kos ku tambe tin nòmber. Ora un hende duna bo un pòpchi, un kachó òf un pushi, bo ta duna e tambe nòmber. Òf nò?— Sí, ta hopi importante pa bo tin nòmber.

Hisa kara anochi, i wak kuantu strea tin. Bo ta kere ku nan tin nòmber?— Sí, Dios a duna kada strea den shelu un nòmber. Beibel ta bisa nos: ‘E ta konta kuantu strea tin; e ta yama nan tur na nan nòmber.’—Salmo 147:4.

Segun bo, ken ta e persona mas importante di henter universo?— Sí, Dios. Bo ta kere ku e tin un nòmber?— Hesus a bisa ku sí. Un biaha ku Hesus tabata resa na Dios, el a bisa Dios: ‘Mi a hasi bo nòmber konosí na mi siguidónan.’ (Juan 17:26) Abo konosé e nòmber di Dios?— Dios mes ta siña nos kon su nòmber ta. E ta bisa: “Ami ta Yehova. Esei ta mi nòmber.” Kier men, Dios su nòmber ta YEHOVA.—Isaias 42:8, NW.

Kon bo ta sinti ora un hende kòrda bo nòmber?— Bo ta bira kontentu, no?— Yehova tambe ke pa hende sa su nòmber. P’esei, ora nos ta papia tokante Dios nos mester usa su nòmber, Yehova. E Gran Maestro a usa e nòmber di Dios, Yehova, ora e tabata papia ku hende. Un biaha Hesus a bisa: “Bo tin ku stima Yehova bo Dios ku henter bo kurason.”—Marko 12:30, NW.

 Hesus tabata sa ku “Yehova” ta un nòmber hopi importante. P’esei, el a siña su siguidónan pa usa e nòmber di Dios. Asta el a siña nan papia di e nòmber di Dios ora nan ta hasi orashon. Hesus tabata sa ku Dios ke pa tur hende konosé Su nòmber, Yehova.

Hopi tempu pasá Dios a mustra Moisés kon importante Su nòmber ta. Moisés tabata un dje yunan di Israel. E yunan di Israel tabata yama israelita, i nan tabata biba na un tera ku yama Egipto. E hendenan di Egipto tabata yama egipsio. Nan a pone e israelitanan bira katibu, i nan tabata hasi hopi kos di abusu ku nan. Ora Moisés a bira grandi, el a purba yuda un dje hendenan di su pueblo. Esei a pone Fárao, e rei di Egipto, rabia. E kier a mata Moisés! P’esei Moisés a hui bai for di Egipto.

Moisés a bai un otro tera, e tera di Madian. Na Madian, Moisés a kasa i a kuminsá kria un famia. El a traha komo  kuidadó di karné tambe. Un dia ora Moisés tabata kuidando su karnénan banda di un seru, el a mira un kos masha straño. Un mata di sumpiña tabata na kandela, pero e no tabata kima! Moisés a hala serka pa wak e mihó.

Bo sa kiko a pasa e ora ei?— Moisés a tende un stèm ta yam’é for di den e mata di sumpiña ku tabata na kandela. E stèm a bisa, “Moisés! Moisés!” Ta ken tabata yam’é?— Ta Dios tabata papia! Dios tabatin hopi trabou pa Moisés. Dios a bisa: ‘Bin, i lo mi manda bo serka Fárao, rei di Egipto, pa bo saka mi pueblo, e yunan di Israel, for di Egipto.’ Dios a primintí Moisés ku E lo yud’é hasi esei.

Pero Moisés a bisa Dios: ‘Mi ta bai serka e yunan di Israel na Egipto i lo mi bisa nan ku Dios a manda mi. I si nan puntra mi: “Kon ta su nòmber?” kiko lo mi kontestá nan?’ Dios a bisa Moisés p’e bisa e yunan di Israel: ‘Yehova a manda mi serka boso. Yehova ta mi nòmber pa semper.’ (Eksodo 3:1-15) Esei ta mustra ku Dios  ta bai keda yama Yehova. Nunka e no ta bai kambia su nòmber. Dios ke pa nos keda yam’é Yehova pa semper.

Ora Moisés a bai bèk Egipto, e egipsionan a kere ku Yehova tabata djis un dios suak dje israelitanan. Nan no a kere ku e ta Dios di henter mundu. P’esei Yehova a bisa e rei di Egipto: ‘Mi ta bai pone hende den henter mundu konosé mi nòmber.’ (Eksodo 9:16) Anto Yehova a hasi su nòmber konosí di bèrdat. Bo sa kon el a hasié?—

Wèl, el a laga Moisés guia e pueblo di Israel, i saka nan for di Egipto. Ora nan a yega Laman Kòrá, Yehova a traha un kaminda seku stret dor di e laman. E israelitanan a pasa riba tera seku i yega bon na otro banda. Pero ora Fárao ku tur su sòldánan a kuminsá pasa riba e kaminda seku meimei di laman, e awanan ku tabata wantá na tur dos banda dje kaminda a basha riba nan, i nan tur a muri.

Mesora hende di tur parti di mundu a kuminsá tende kiko Yehova a hasi na Laman Kòrá. Kon nos por sa ku nan a tende loke a pasa?— Wèl, un 40 aña despues e israelitanan a yega Kanaan, e tera ku Yehova a primintí di duna nan. Ei un mucha muhé ku  yama Rahab a bisa dos hòmber israelita: “Nos a tende kon [Yehova] a seka e awa di Laman Kòrá boso dilanti, ora boso a sali for di Egipto.”—Josué 2:10.

Awendia tin hopi hende ku ta meskos ku e egipsionan aya. Nan no ta kere ku Yehova ta Dios di henter mundu. P’esei Yehova ke pa su pueblo konta otro hende tokante dje. Hesus mes a hasi esei. Poko promé ku fin di su bida riba tera, el a bisa Yehova den orashon: “Mi a hasi bo nòmber konosí na nan.”—Juan 17:26.

 Abo ke ta manera Hesus? Awèl, konta otro hende ku Dios su nòmber ta Yehova. Kisas lo bo ripará ku hopi hende no sa su nòmber. Un motibu ta ku algun dje hendenan ku ta tradusí Beibel ta pone SEÑOR ku lèter kapital na lugá di e nòmber di Dios. Pero si bo wak Eksodo 3:14 den Beibel na papiamentu koriente (BPK), lo bo mira ku abou na e página e ta bisa: “Den nos tradukshon e nòmber Yahwe (Yehova) ta tradusí ku SEÑOR ku lèternan kapital.”

Kiko tur esaki ta siña nos?— Sí, nos ta siña ku Yehova ta e nòmber mas importante ku tin, pasobra e ta e nòmber di Dios Todopoderoso, e Tata di Hesus, i Esun ku a traha tur kos. Anto kòrda: Hesus a bisa ku nos tin ku stima Yehova Dios ku henter nos kurason. Abo ta stima Yehova?—

Kon nos por mustra ku nos ta stima Yehova?— Un manera ta dor di siña konosé Dios manera un Amigu. Un otro manera ta dor di bisa otro hende su nòmber. Tambe nos por konta nan tokante tur e kosnan maravioso ku Yehova a traha, i tur e bon kosnan ku el a hasi. Yehova ta keda hopi kontentu ora nos hasi asina, pasobra e ke pa hende sa di dje. Nos tambe por yuda hende sa di Yehova, no ta asina?—

No ta tur hende lo ke skucha nos papia tokante Yehova. Hopi hende no a skucha ni ora Hesus e Gran Maestro a papia di Dios. Pero esei no a pone Hesus stòp di papia tokante Yehova.

P’esei, laga nos ta manera Hesus. Laga nos keda papia tokante Yehova. Si nos hasi asina, Yehova Dios lo keda kontentu ku nos, pasobra nos ta mustra ku nos ta stima su nòmber.