PIPAS riqsinaykita munaspanqa, ¿imatam puntataqa willasunki? Sutintam ¿aw?... Llapallanchikpam sutinchikqa kan. Diospas punta kaq runatam suticharqa Adanwan, warmintañataqmi Evawan.

Manam runallachu sutiyuqqa kanchik. Allquchanchikpas hinaspa misichanchikpas sutiyuqmi kanku ¿aw?... Arí, mana sutiyuq kaspaqa manam allinchu kachwan.

Hanaq pachapi lucerokunapas, ¿sutiyuqchu kanman?... Arí, sapakamatam Diosqa suticharqa. Chaymi Bibliapipas nin: ‘Diosqa lucerokunatapas yupaspam sapakamata sutichan’, nispa (Salmo 147:4).

Qampaqqa, ¿pitaq pimantapas aswan riqsisqaqa kanman?... Diosmi. ¿Kanchu sutin?... Arí, kanmi. Diospa sutinmanta rimaspanmi Jesus nirqa: “Ñuqaqa sutikitam riqsichirqani”, nispa (Juan 17:26). Hinaptinqa, ¿imataq Diospa sutin?... Kikillanmi nirqa: ‘Ñuqam Jehova Dios kani. Chayna sutiyuq Diosmi kani’, nispa. Chaynaqa JEHOVA niqmi Diospa sutinqa (Isaias 42:8, NM).

¿Kusikunkichu pipas sutikita yuyaptin?... Kusikunkim ¿aw?... Jehova Diospas kusikunmi sutinmanta rimaptinchikqa. Payqa munanmi sutinta runakunaman riqsichinanchikta. Jesuspas taytanpa sutinmantam runakunaman yachachirqa. Chaymi huk kutipipas nirqa: “Jehova Diosnikitam kuyanayki tukuy sunquykiwan”, nispa (Marcos 12:30).

 Chaymi Jesusqa Diospa sutin maypiñapas riqsisqa kananta munarqa. Chayraykum qatiqninkunaman yachachirqa taytanta sutinpi qayakunankupaq.

Huk kutipim Jehova Diosqa Moisesta nirqa Israel runakunaman sutinta riqsichinanpaq. Israel runakunaqa Egipto nacionpim runakunapa ñakarichisqan karqaku. Chaymi Moisesqa llaqtamasinkunata yanapayta munaptin Faraon runa piñakuspan wañurachiyta munarqa. Hinaptinmi Moisesqa Egipto nacionmanta Madian llaqtaman ayqikurqa.

Chay llaqtapim casarakurqa hinaptinmi churinkunapas karqa. Huk punchawmi urqupi ovejata michipakuchkaspan tankar hina kichkapi nina ratachkaqta rikururqa. Hinaptinmi chay kichka mana kañakuptin Moisesqa qawaykuq asuykurqa.

 Hinaptinqa, ¿imam karurqa?... Chay nina rataqmantam Moisesta rimapayamurqa: “¡Moises, Moises!”, nispa. ¿Pitaq rimapayamurqa?... Jehova Diosmi. Paymi Moisesta kamachispan nirqa: ‘Kunanmi Faraonman kachasqayki Israelpa miraynin runakunata Egipto nacionmanta hurqumunaykipaq’, nispa. Hinaspapas nirqataqmi imapipas yanapananmanta.

Moisesñataqmi nirqa: “Israelpa mirayninkunaman rispaymi nimusaq: ‘Abueloykichikkunapa Diosninmi qamkunaman kachamuwan’ nispa. Hinaptin, ¿imataq sutin? nispa tapuwaptinqa ¿ima nisaqtaq paykunataqa?”, nispa. Chaymi Diosñataq sutin Jehova kasqanta willaspan nirqa: “Kaymá wiñaypaq sutiyqa”, nispa (Exodo 3:1-15). Chaywanmi Diosqa qawachirqa haykapipas chayna sutiyuqlla kananmanta. Payqa munanmi wiña-wiñaypaq chay sutiwan riqsisqa kayta.

 Egipto nacionman Moises kutiruptinmi chay runakunaqa yanqa Dioslla kasqanpaq Jehova Diosta hapirqaku. Manamá musyakurqakuchu tukuy ima unanchaq Dios kasqantaqa. Chaymi Jehova Diosqa Faraon runata nirqa: ‘Sutiyqa lliw kay pachapim riqsisqa kanqa’, nispa (Exodo 9:16). Hinaspanmi Jehova Diosqa pipapas mana ruway atinankunata ruwarqa. ¿Imakunata?...

Moisesmi Egipto nacionmanta Israel runakunata Diospa yanapakuyninwan hurqurqa. Chaymi puka lamar quchaman chayaruptinku Jehova Diosqa lamar quchata iskayman rakirurqa. Hinaptinmi Israel runakunaqa chaki allpanta chimparqaku. Egipto runakuna qipankuta qatiykuchkaptinñataqmi Jehova Diosqa kay lawmanta hinaspa wak lawmanta lamar quchawan pamparachirqa.

Manapas unaymantañataqmi Jehova Diospa chayna ruwasqanta lliw runakuna yacharurqaku. ¿Imaynanpitaq chayta ninchik?... Canaan llaqtapipas chaymanta yacharusqankuraykum. Chay Canaan allpaqa Israel runakunaman Diospa qunan allpam karqa. Chaypim Rahab warmipas 40 wata qipata  llaqtata qawaq riq iskay runakunaman willarqa: ‘Uyarirqanikum Egipto nacionmanta lluqsimuptikichik puka lamar quchata tayta Dios qayllaykichikpi kicharusqanta’, nispa (Josuey 2:10).

Kunan tiempopi runakunapas Egipto runakuna hinam wakinqa Diosninchik Jehova kasqantaqa mana yachankuchu. Diosqa munanmi sutinta riqsichinanchikta. Chaytamá Jesuspas ruwarqa. Chaymi manaraq wañukuchkaspan  taytanta mañakuspan nirqa: “Ñuqaqa sutikitam riqsichirqani”, nispa (Juan 17:26).

¿Jesus hina kaytachu munanki? Chaynaqa Diospa sutin Jehova kasqantam pimanpas willanayki. Wakinqa manam yachankuchu, chaymi allin kanman Hechos 2:21 nisqanta qawachiyniki. Kuska qawasun, ninmi: “Pipas Jehova Diosta sutinmanta ruegakuspa mañakuqmi ichaqa salvasqa kanqa”, nispa.

¿Imatam kaymanta yachachwan?... Jehova Dioslla pimantapas aswan riqsisqa kasqantam. Payqariki tukuy atiyniyuq, tukuy ima unanchaq hinaspa Jesuspa taytanmi. Ichaqa manam chayllatachu yachachwan, Jesusmi nirqa Jehova Diosta tukuy sunqunchikwan kuyanapaq. Qamqa, ¿kuyankichu?...

¿Imaynatataq kuyasqanchikta qawachichwan?... Jehova Diosmanta Bibliapi yachaspa, amistadnin kaspa, tukuy ima unanchasqankunamanta runakunaman willaspa hinaspa runakunaman bibliawan sutinta yachachispam. Hinaptinmi Jehova Diosqa runakunaman sutinta yachachiptinchik kusikunqa. Chaynaqa, ¿atichwanchu sutinmanta willakuyta?...

Ichaqa manam llapallan runakunachu uyariwasun. Alli-allin yachachiq Jesus taytanmanta yachachiptinpas manam llapallan runachu uyarirqa. Chaywanpas payqa manam taytanmanta willakuytaqa saqirqachu.

Chaymi Jesus hina kananchik. Amayá haykapipas Jehova Diosmanta willakuytaqa saqisunchu. Sutinmanta willakuptinchikqa Jehova Diosmi kusikunqa, chaynatam kuyasqanchikta qawachisun.