PITAPAS chayllaraq reqsispa, ¿imatan ñaupaqta tapunki?... Arí, sutintan. Llapa runapas sutiyoqmi kanchis. Ñaupaqpi Diospa kamasqan runakunapas sutiyoqmi karanku. Qhariq sutinmi karan Adán, esposanpa sutintaq Eva.

Ichaqa manan runakunallachu sutiyoq kanchis. A ver, kaypi piensay: Pipas juj alqochata otaq michichata regalasuqtiyki, ¿imatan kaq rato ruwanki?... Sutintan churanki ¿riki? Sutiyoq kayqa allinpunin.

Yachasqayki jina cielopiqa ancha askha ch’askakunan kan. Chay ch’askakuna, ¿sutiyoqchu kankuman?... Arí, sutiyoqmi kanku. Diosmi sapankaman sutita churaran. Biblian nin: ‘Paymi jayk’achus ch’askakuna kasqanta yupan, sapankatan sutinmantakama wajan’, nispa (Salmo 147:4).

¿Pin aswan importante janaq pachapipas kay pachapipas?... Diosmi. ¿Kanchu sutin?... Arí, kanmi. Jesusmi Diosmanta mañakuspa niran: ‘Paykunamanmi sutiykita reqsichini’, nispa (Juan 17:26). ¿Yachankichu Diospa sutinta?... Arí, sutinqa JEHOVÁ. Pay kikinmi niran: “Noqan Jehová kani. Chaymi sutiy”, nispa (Isaías 42:8, NM).

¿Imaynan sientekunki jujkuna sutiykita yuyaqtin?... Kusikunkin ¿riki?... Diospas munanmi sutinta llapa runakuna yachananta, chaymi Diosmanta rimaspaqa sutinmanta rimananchis. Jesuspas Diosmanta yachachispaqa sutinmantan rimaran. Juj kutinmi niran: “Jehová Diosniykitan munakunki tukuy sonqoykiwan”, nispa (Marcos 12:30).

 Diospa sutinta yachayqa ancha importanten, Diospunin munan sutinta llapa runakuna yachanankuta. Chaytan Jesús yacharan, chaymi qatikuqninkunaman Diospa sutinta yachachiran nirantaqmi sutinmanta mañakunankupaq.

Diosmi unay watakuna ñaupaqtaraq Moisesman sutinta willaran. Chay tiempopin israelitakuna Egipto llaqtapi esclavo kasharanku, sinchitataqmi ñak’arisharanku. Juj kutinmi Moisés juj israelitata yanapayta munaran. Chayta yacharuspan Egiptopi rey phiñakuran jinaspa Moisesta wañuchiyta munaran. Jinan Moisesqa Egipto llaqtamanta ayqekuran.

Moisesqa Madián nisqa llaqtamanmi ripuran. Qhepamanmi chay llaqtayoq warmiwan casarakuspa wawakunayoq kapuran. Payqa oveja michiqmi  karan. Juj kutinmi orqoq ladonpi ovejata michishaqtin admiranata rikuran. Juj juch’uy sach’an raurasharan ichaqa manan rupharanchu. Chaymi payqa chay sach’aman achhuykuran.

¿Iman chaypi pasaran? ¿Yachankichu?... Chay sach’a ukhumantan Moisesta wajamuran: “¡Moisés! ¡Moisés!”, nispa. ¿Pin wajamusharan?... ¡Diosmi wajamusharan! Chaypin niran: ‘Faraonman riy, paymanmi kachasqayki Egipto suyumanta Israel llaqtayta orqomunaykipaq’, nispa. Nirantaqmi: ‘Noqan yanapasayki’, nispa.

Moisesmi Diosta niran: ‘Israel runakunaq kasqanman rispa: Diosmi qankunaman kachamuwan, niqtiyqa: “¿Imataq sutinri?” niwanqakun. Jinari, ¿ima nisaqmi paykunata?’, nispa. Chaymi Diosqa niran: ‘Jehová Diosmi kachamuwan, chaymi wiñay-wiñaypaq sutinqa, nispa ninki’, nispa (Éxodo 3:1-15). Arí, Jehová Diosqa manan jayk’aqpas sutintaqa cambianqachu. Chaymi payqa munaran chay sutiwan wiñaypaq reqsinankuta.

 Egiptopi runakunaqa manan yacharankuchu Jehová Dioslla cheqaq Dios kasqanta. Yaqapaschá niranku: “Payqa juj dioskuna jinallan”, nispa. Chaymi Diosqa faraonta niran: ‘Kay pachantinpin reqsichikusaq’, nispa (Éxodo 9:16). Chaytan Dios ruwaran. Ichaqa, ¿imaynatan reqsichikuran?...

Moisesmanmi atiyta qoran Israel llaqtata Egiptomanta orqonanpaq. Puka lamar-qochaman chayaqtinkun Jehová Dios qochata iskayman t’aqaruran. Chaynintan Israel runakuna pasaranku. Faraonwan soldadonkunawan iman qhepankuta qatiranku. Ichaqa lamar-qochan paykuna pataman kutiykuran. Chaypin reypas soldadonkunapas wañupuranku.

Chaytan llapa llaqtakunapi yacharuranku. ¿Imaynapi chayta yachanchis?... Bueno, 40 wata pasasqan qhepamanmi Israel runakuna Diospa prometesqan Canaán allpaman chayaranku. Chaypin juj sipas Rahab sutiyoq iskay israelitakunata niran: ‘Uyariraykun qankuna Egiptomanta lloqsimushaqtiykichis Puka lamar-qochata chimpanaykichispaq Jehová Diospa ch’akichisqanta’, nispa (Josué 2:10).

 Egipto llaqtamanta runakuna jinan kunanpas askha runakuna mana Jehová Diospi creenkuchu. Chaymi Dios munan paymanta runakunaman yachachinanchista. Chaytan Jesuspas ruwaran. Wañuchinankupaq pisillaña tiempo kashaqtinmi papanta niran: “Paykunamanmi noqaqa sutiykita reqsichini”, nispa (Juan 17:26).

¿Munawaqchu Jesús jina kayta? Chhaynaqa Diospa sutinta jujkunaman yachachiy. Ichaqa  kayta willasayki: Askha runakunan mana yachankuchu Diospa sutinta, ¿imarayku? Bibliata wakin t’ijraq runakuna sutinpa rantinpi “Señor Dios” nispalla churasqankurayku. Wakin Bibliakunan ichaqa willashan Diospa sutinta. Español simi Bibliakunapin Salmo 83:18 textopi Diospa sutin kashan. Chaymi quechua simipi nin: “Runakuna yachachunku sutiykiqa Jehová kasqanta. Qanllan allpantinpi ancha jatun Dios kanki”, nispa. *

¿Imatan chaypi yachanchis?... Jehová sutiqa ancha importanten, tukuy atiyniyoq Diospa sutinmi. Paymi Jesuspa papan, tukuyta kamaq Dios. Chaymi Jesús niran tukuy sonqowan munakunapaq. Qanri, ¿munakunkichu Diosta?...

¿Imaynatan rikuchisunman pay munakusqanchista?... Chaymantapas astawanmi Diosta reqsinanchis, amigonmi kananchis. Jinaspapas sutintan jujkunaman yachachinanchis, Bibliapipunin rikuchisunman. Chaymantapas willasunmanmi tukuy imaymana kamasqanmanta. Chayta ruwasun chayqa, Diosmi anchata kusikunqa. ¿Ruwawaqchu chaykunata?...

Ichaqa manan llapa runakunachu uyarisunki. Jesustapas manan llapa runakunachu uyariranku. Chaywanpas willashallaranmi Jehová Diosmanta.

Noqanchispas Jesús jinan llapa runakunaman Diosmanta yachachinanchis. Chayta ruwasun chayqa, Dios munakusqanchistan rikuchisun, jinan payqa anchata kusikunqa.