O LE ā e masani lava ona e fesili ai i se tagata, i le taimi e faatoʻā lua feiloaʻi ai?— Ioe, e te fesili i ai po o ai lona igoa. E tofu uma i tatou ma igoa. Na faaigoa e le Atua le tamāloa muamua lava na ola i le lalolagi iā Atamu. O Eva le igoa o le toʻalua o Atamu.

Ae e lē na o tagata e iai o latou igoa, e fai foʻi igoa o isi mea. Pe a avatu e se tasi se tamaʻi maile po o se tamaʻi pusi ma oe, e te tago faaigoa, a ea?— Ioe, e tāua tele le iai o se igoa.

Ia mafaufau foʻi i le tele o fetu i le pō lea e mafai ona e vaai i ai. O le ā sou manatu, e iai ni o latou igoa?— Ioe, ua faaigoa e le Atua fetu taʻitasi i le lagi. Ua taʻu mai e le Tusi Paia iā i tatou: “O loo faitaulia e ia le aofaʻi o fetu; ua faaigoaina e ia o latou igoa uma lava.”​—Salamo 147:4.

O le ā sou iloa, o ai e aupito i maualuga i le lagi ma le lalolagi aoao?— Ioe, o le Atua. Pe e te manatu e iai se suafa o le Atua?— Na fetalai Iesu e iai le suafa o le Atua. Na taʻua e Iesu i lana tatalo i le Atua: ʻUa ou faailoa atu lou suafa i ē ua mulimuli mai iā te aʻu.’ (Ioane 17:26) E te iloa le suafa o le Atua?— Ua faailoa mai e le Atua lona suafa iā i tatou. Ua faapea mai: “O aʻu o Ieova, o loʻu igoa lea.” O le suafa la o le Atua, o IEOVA.​—Isaia 42:8.

O le ā sou faalogona pe a manatua e tagata lou igoa?— E te fiafia, a ea?— E manaʻo foʻi la le Atua e iloa e tagata lona suafa. O lea la, e tatau ona tatou faaaogā le suafa Ieova pe a tatou talanoa e uiga i le Atua. Na faaaogā foʻi e le Faiaʻoga Sili le suafa o le Atua, o Ieova, a o talanoa i tagata. Na faapea mai Iesu: “Ia e alofa foʻi [“iā Ieova,” NW] lou Atua ma lou loto atoa.”​—Mareko 12:30.

 Na silafia e Iesu le tāua o le suafa lenei o “Ieova.” O lea na aʻoaʻo ai e Iesu ona soo ina ia faaaogā le suafa o le Atua. Na ia aʻoaʻoina foʻi ona soo e faaaogā le suafa o le Atua, i a latou tatalo. Na silafia e Iesu, e manaʻo le Atua ina ia iloa e tagata uma Lona suafa, o Ieova.

I aso a la ua leva, na faaalia ai e le Atua le tāua o lona suafa iā Mose, o se tagata mai le fanauga a Isaraelu. Sa nonofo le fanauga a Isaraelu i le nuu na taʻua o Aikupito. Sa fai tagata Isaraelu ma pologa, ma sa faasauā i ai tagata sa nonofo i Aikupito. Ina ua matua Mose, sa iai se aso na taumafai ai e fesoasoani i se tasi o ona tagata Isaraelu. Na ita tele le tupu o Aikupito, o Farao, i le mea na faia e Mose. Na manaʻo le tupu e fasioti iā Mose! O lea, na sola ese ai Mose mai Aikupito.

Na sola Mose i se isi nuu. O Mitiana le igoa o le nuu lenā. O inā na faaipoipo ai Mose ma tausi aʻe ai sona aiga. Na galue  foʻi Mose o se leoleo mamoe. I se tasi aso a o leoleo e Mose ana mamoe e latalata ane i se mauga, na ia vaaia ai se mea uiga ese. O se afi na mumū i totonu o se laau talatala, ae e leʻi faaumatia ai le laau! Sa faalatalata atu Mose ina ia iloa lelei ai le mea o loo tupu.

E te iloa le mea na tupu?— Na faalogo atu Mose i se leo o sau mai i le laau o loo mumū. Na valaau mai le leo, “Mose, Mose e!” O ai na valaau mai iā Mose?— O le Atua! E tele galuega sa manaʻo le Atua e faia e Mose. Na fetalai mai le Atua: ʻInā sau ia, ou te auina atu oe iā Farao, le tupu o Aikupito, ina ia e au mai loʻu nuu o le fanauga a Isaraelu mai Aikupito.’ Na folafola atu le Atua iā Mose, o le a ia fesoasoani iā te ia.

Ae na fai atu Mose i le Atua: ʻPe a ou alu i le fanauga a Isaraelu i Aikupito, ma ou fai atu iā i latou ua auina mai aʻu e le Atua. Ae faapefea pe a latou fai mai iā te aʻu, “O ai ea lona suafa?” Se ā ea saʻu tali?’ Na fetalai atu le Atua iā Mose, e taʻu atu i le fanauga a Isaraelu: ʻUa auina mai aʻu e Ieova iā te outou. O Ieova o loʻu igoa lea e faavavau.’ (Esoto 3:1-15) Ua faaalia e lenei mea, o le a faaauau pea ona  faaaogā e le Atua lona suafa o Ieova. E lē suia e Ieova lona suafa. E manaʻo le Atua ia iloa o ia i lona suafa o Ieova, e oo i le faavavau.

Ina ua toe foʻi Mose i Aikupito, sa manatu tagata Aikupito o Ieova ua na o se atua faatauvaa i Isaraelu. Latou te leʻi manatu faapea o Ieova o le Atua o le lalolagi aoao. Ona faapea atu loa lea o Ieova i le tupu o Aikupito: ʻO le a ou faaalia loʻu igoa i le lalolagi uma lava.’ (Esoto 9:16) Sa faaalia moni lava e Ieova lona suafa. Pe e te iloa le auala na faaalia ai e Ieova lona suafa?—

Na faaaogā e Ieova Mose e taʻitaʻiina ona tagata mai Aikupito. I le taimi na taunuu ai i le Sami Ulaula, na faaavanoa ai e Ieova se auala matūtū e ui atu ai i le sami. Na taunuu ma le saogalemu tagata Isaraelu i le isi itu. Ona ui atu ai foʻi lea o Farao ma lana ʻautau uma i le auala matūtū i le sami. Ae peitaʻi, o le sami lea na vaelua i autafa, ua toe solo ifo nei i luga o ʻautau a Aikupito ma feoti uma ai.

E leʻi umi lava, ae faalogo tagata uma o le lalolagi i mea na faia e Ieova i le Sami Ulaula. E faapefea ona tatou iloa, na faalogo tagata i lea tala?— Ina ua mavae ni tausaga e 40, na taunuu ai tagata Isaraelu i le nuu o Kanana lea na folafola e Ieova o le a foaʻi atu mo  i latou. O le tala lenei na fai atu e se fafine e igoa iā Raava, i ni tamāloloa Isaraelu e toʻalua: “Ua matou faalogo na faamateina e Ieova le suāsami o le sami Ulaula ona o outou, ina ua outou ō mai mai Aikupito.”​—Iosua 2:10.

I aso nei, ua toʻatele i latou e pei o tagata Aikupito. Latou te lē talitonu, o Ieova o le Atua o le lalolagi aoao. O lea la, e manaʻo Ieova e taʻu atu e ona tagata i isi, tala e uiga iā te Ia. O le mea lenā sa fai e Iesu. A o toeitiiti uma lona soifua ai i le lalolagi, na faapea  atu Iesu iā Ieova i lana tatalo: “Ua ou faailoa atu foʻi lou suafa iā te i latou.”​—Ioane 17:26.

E te fia faataʻitaʻi iā Iesu? Ia taʻu atu la i isi o Ieova o le suafa lea o le Atua. E te ono iloa ai, o le toʻatele o tagata latou te lē iloa le suafa o le Atua. Atonu e lelei pe a e faasino i ai le mau o le Tusi Paia i le Salamo 83:18. Seʻi aumai loa le Tusi Paia ma suʻe faatasi le mau. Ua fai mai le mau: “Ina ia iloa e i latou, o oe, e ou le suafa o Ieova, na o oe lava o le Silisili ese i le lalolagi uma.”

O le ā tatou te iloa mai le faitauina o lenei mau?— Ioe, tatou te iloa ai, o Ieova o le suafa lea e pito i sili ona tāua. O le suafa lenā o le Atua e Ona le Malosi Uma Lava, o le Tamā o Iesu, ma o Lē na faia mea uma lava. Ia manatua foʻi, na faapea mai Iesu e tatau ona tatou alolofa iā Ieova le Atua ma o tatou loto atoa. Pe e te alofa iā Ieova?—

O le ā le auala e faaalia ai, tatou te alolofa iā Ieova?— Ia taumafai e iloa lelei Ieova e pei o sa tatou Uō. O le isi auala, ia taʻu atu lona suafa i tagata. E mafai ona tatou suʻe i le Tusi Paia ma faasino iā i latou, o Lona suafa o Ieova. E lē gata i lenā, e mafai ona tatou taʻu atu mea matagofie na faia e Ieova ma mea lelei ua ia faatinoina. E fiafia tele Ieova i le mea lenā, auā e manaʻo ia iloa o Ia e tagata. E mafai la ona tatou fesoasoani i tagata ina ia iloa Ieova, a ea?—

E lē fiafia tagata uma e faalogo mai a o tatou talanoa atu e uiga iā Ieova. E toʻatele tagata e leʻi faalogo iā Iesu, le Faiaʻoga Sili, a o talanoa atu e uiga iā Ieova. Ae, e leʻi taofia ai le talanoa atu o Iesu e uiga iā Ieova.

O lea la, ia tatou faataʻitaʻi iā Iesu. Seʻi faaauau pea ona tatou talanoa e uiga iā Ieova. A tatou faia faapea, o le a fiafia mai o Ia iā i tatou auā ua faamaonia ai lo tatou alofa atu i lona suafa.