SAN na a fosi sani furu tron di yu e aksi wan sma te yu e miti en fu a fosi leisi?— Iya, yu e aksi a sma fa a nen. Wi alamala abi wan nen. Gado ben gi a fosi man na grontapu wan nen. A ben gi en a nen Adam. Adam en wefi ben kisi a nen Eva.

Ma a no sma wawan abi wan nen. Prakseri tra sani di abi wan nen tu. Te wan sma e gi yu wan popki, noso wan pikin dagu, dan yu e gi en wan nen, a no so?— Iya, a de prenspari trutru fu abi wan nen.

Opo yu ede luku den someni stari te neti. Yu denki taki den abi wan nen?— Iya, Gado gi ibri stari na loktu wan nen. Bijbel e fruteri wi: „A e teri omeni stari de; a e kari den alamala na den nen.”​Psalm 147:4.

Suma yu denki na a moro prenspari sma na hemel nanga grontapu?— Iya, dati na Gado. Yu denki taki a abi wan nen?— Yesus ben taki dati Gado abi wan nen. Wan leisi di Yesus ben e begi Gado, dan a taki: ’Mi meki yu nen bekènti na den bakaman fu mi’ (Yohanes 17:26). Yu sabi fa Gado nen?— Gado srefi e taigi wi fa a nen. A e taki: „Mi na Yehovah. Dati na mi nen.” Sobun, Gado en nen na YEHOVAH.​—Yesaya 42:8.

Fa yu feni en te tra sma e memre yu nen?— Yu breiti, a no so?— Yehovah wani taki sma musu sabi en nen tu. Fu dati ede wi musu gebroiki a nen Yehovah te wi e taki fu Gado. A Bigi Leriman ben gebroiki Gado nen, Yehovah, te a ben e taki nanga sma. Wan leisi Yesus ben taki: „Yu musu lobi Yehovah yu Gado nanga yu heri ati.”​—Markus 12:30.

 Yesus ben sabi taki a nen „Yehovah” na wan tumusi prenspari nen. Fu dati ede a ben leri den bakaman fu en fu gebroiki Gado en nen. A ben leri den sosrefi fu taki fu Gado nen te den ben e begi. Yesus ben sabi taki Gado wani ala sma fu sabi taki En nen na Yehovah.

Wan langa ten pasa, Gado ben sori a man Moses o prenspari en nen de. Moses ben de wan fu den manpikin fu Israel. Den manpikin fu Israel, di sma ben e kari Israelsma, ben e libi na ini a kondre Egepte. Sma ben e kari a pipel fu a kondre dati Egeptesma. Den Egeptesma ben meki den Israelsma tron srafu, èn den ben e handri na wan ogri-ati fasi nanga den. Di Moses gro kon bigi, dan a pruberi fu yepi wan sma fu en eigi pipel. A sani disi ben meki Farao, a kownu fu Egepte, atibron. A ben wani kiri Moses! Fu dati ede Moses lowe gowe fu Egepte.

 Moses go na wan tra kondre. A go na a kondre Midian. Drape Moses trow èn a kisi pikin. A ben e wroko leki wan skapuman sosrefi. Wan dei di Moses ben e sorgu den skapu fu en krosibei fu wan bergi, dan a si wan fruwondru sani. A si wan makabusi e bron, ma a faya no ben e bron a makabusi kiri! Moses go moro krosibei fu man si a sani disi moro bun.

Yu ben sabi san pasa?— Moses ben yere wan sten e kari. A sten disi ben komoto na mindri a makabusi di ben e bron. A sten ben kari: „Moses! Moses!” Suma ben e taki dati?— Na Gado ben e taki! Gado ben wani Moses fu du wan bigi wroko. Gado ben taki: ’Kon meki mi seni yu go na Farao, a kownu fu Egepte, èn yu musu tyari mi pipel, den manpikin fu Israel, komoto na ini Egepte.’ Gado ben pramisi Moses taki a ben o yepi en nanga a wroko disi.

Ma Moses taigi Gado: ’Kon meki wi taki dati mi doro na den manpikin fu Israel na ini Egepte, èn mi e taigi den taki na Gado seni mi. San mi o du te den e aksi mi: „Fa a nen?” San mi sa piki  den?’ Gado taigi Moses fu taigi den manpikin fu Israel: ’Yehovah seni mi kon na unu, èn a taigi mi taki en nen na Yehovah, fu têgo’ (Exodus 3:1-15). A sani disi e sori taki Gado ben o tan abi a nen Yehovah. Noiti a ben o kenki en. Gado ben wani taki sma musu sabi fu têgo taki en nen na Yehovah.

Di Moses go baka na Egepte, dan den Egeptesma ben denki taki Yehovah ben de wan lawlaw gado fu den Israelsma. Den no ben denki taki a ben de a Gado fu heri grontapu. Fu dati ede Yehovah taigi a kownu fu Egepte: ’Mi o meki mi nen bekènti na heri grontapu’ (Exodus 9:16). Iya, Yehovah meki en nen bekènti trutru. Yu sabi fa a du dati?—

We, a meki Moses tyari a pipel fu Israel komoto na ini Egepte. Di den doro a Redi Se, dan Yehovah meki wan drei pasi langalanga na ini a se. Den Israelsma waka pasa na tapu drei gron, sondro taki wan sani pasa nanga den. Ma baka di Farao nanga en heri legre go na tapu a drei gron fu a se, dan a watra di Gado ben hori na ala tu sei fu a drei pasi, fadon na tapu den Egeptesma, èn den alamala dede.

Heri esi sma na heri grontapu bigin yere san Yehovah ben du na a Redi Se. Fa wi sabi taki den  yere a tori disi?— We, sowan 40 yari baka dati, den Israelsma kon na Kanan, a kondre di Yehovah ben pramisi den. Drape tu mansma fu Israel ben kisi fu yere fu a yongu uma Rakab: „Wi yere fa Yehovah drei den watra fu a Redi Se na un fesi, na a ten di unu ben komoto na ini Egepte.”—Yosua 2:10.

Na ini a ten disi furu sma de leki den Egeptesma. Den no e bribi taki Yehovah na a Gado fu heri grontapu. Fu dati ede Yehovah wani en eigi pipel fu fruteri trawan fu en. Yesus ben du disi. Na a  kaba fu en libi na grontapu, a taigi Yehovah na ini begi: „Mi meki yu nen bekènti na den.”​—Yohanes 17:26.

Yu wani fu de leki Yesus? Dan fruteri tra sma taki Gado en nen na Yehovah. Yu sa si taki furu sma no sabi dati. Sobun, kande yu kan sori den san skrifi na ini Bijbel na Psalm 83:18. Meki wi teki a Bijbel nownowde èn meki wi suku a tekst dati nanga makandra. A tekst e taki: „So taki sma kan sabi taki yu, di nen na Yehovah, yu wawan na a Moro Heiwan na heri grontapu.”

San wi e leri te wi e leisi den wortu disi?— Iya, wi e leri taki a nen Yehovah na a moro prenspari nen di de. A de a nen fu na Almakti Gado, a Tata fu Yesus èn a Sma di meki ala sani. Memre tu taki Yesus ben taki dati wi musu lobi Yehovah Gado nanga wi heri ati. Yu lobi Yehovah?—

Fa wi kan sori taki wi lobi Yehovah?— Wan fasi fa wi kan du dati na te wi e kon sabi en leki wan Mati. Wan tra fasi, na te wi e fruteri tra sma san na en nen. Wi kan sori den na ini a Bijbel srefi taki en nen na Yehovah. Wi kan fruteri sma sosrefi fu den tumusi moi sani di Yehovah meki èn fu den bun sani di a du. A sani disi e gi Yehovah prisiri, bika a wani taki sma musu kon sabi en. Wi kan du dati tu, a no so?—

A no ala sma sa wani arki te wi e taki fu Yehovah. Furu sma no ben arki srefi di Yesus, a Bigi Leriman, ben taki fu Yehovah. Ma dati no ben tapu Yesus fu taki fu Yehovah.

Fu dati ede, meki wi de leki Yesus. Meki wi tan go doro fu taki fu Yehovah. Te wi e du dati, dan Yehovah Gado sa prisiri nanga wi fu di wi e sori taki wi lobi a nen fu en.