NGUYIPHI intfo yekucala lovame kuyibuta umuntfu nawucala kumbona?— Umbuta ligama lakhe. Sonkhe sinawo emagama. Nkulunkulu waniketa umuntfu wekucala emhlabeni ligama. Wametsa ligama watsi ngu-Adamu. Umfati wa-Adamu yena watsi ngu-Eva.

Nobe kunjalo, akusibo bantfu kuphela labanemagama. Cabanga ngaletinye tintfo nato letinawo. Nangabe lotsite akupha umdoli nome silwane sasekhaya, angitsi usinika ligama?— Kuba neligama kuyintfo lebaluleke kakhulu.

Buka tinkhanyeti letinyenti ebusuku. Ucabanga kutsi tinawo yini emagama?— Nkulunkulu waniketa inkhanyeti ngayinye lesesibhakabhakeni ligama layo. LiBhayibheli litsi: “Ubala inombolo yetinkhanyeti, atibite tonkhe ngemabito ato.”​—Tihlabelelo 147:4.

Bowungatsi ngubani umuntfu lobaluleke kubendlula bonkhe emhlabeni nasezulwini?— NguNkulunkulu. Ucabanga kutsi unalo yini ligama?— Jesu watsi unalo. Ngalesinye sikhatsi Jesu washo naku nakathantaza kuNkulunkulu: ‘Ngibente balati libito lakho.’ (Johane 17:26) Ngubani ligama laNkulunkulu?— Nkulunkulu uyasitjela kutsi ungubani. Utsi: “NginguJehova. Ngulelo libito lami.” Ngako ligama laNkulunkulu nguJEHOVA.​—Isaya 42:8, NW.

Utiva kanjani nangabe umuntfu alikhumbula ligama lakho?— Uyajabula, angitsi?— Jehova ufisa kutsi bantfu balati libito lakhe. Ngako kufanele silisebentise libito lelitsi Jehova nasikhuluma ngaNkulunkulu. UMfundzisi Lomuhle Kakhulu walisebentisa ligama laNkulunkulu lelitsi Jehova nakakhuluma nebantfu. Ngalesinye sikhatsi Jesu watsi: “Kufanele utsandze Jehova Nkulunkulu wakho ngayo  yonkhe inhlitiyo yakho.”​—Makho 12:30.

Jesu bekati kutsi libito lelitsi “Jehova” libaluleke kakhulu. Ngaleso sizatfu wafundzisa balandzeli bakhe kutsi balisebentise. Jesu waze wabafundzisa nekutsi bakhulume ngeligama laNkulunkulu emithantazweni yabo. Jesu bekati kutsi Nkulunkulu ufuna bonkhe bantfu balati libito laKhe lelitsi Jehova.

Kadzeni, Nkulunkulu wakhombisa kubaluleka kweligama lakhe kuMosi, lobekangulomunye webantfwana baka-Israyeli. Bantfwana baka-Israyeli lebebabitwa ngekutsi sive sema-Israyeli, bebaphila eGibhithe. Bantfu balelo live bekutsiwa ngemaGibhithe. Bebagcilata bantfwana baka-Israyeli futsi babaphatsa kabi. Ngesikhatsi Mosi asakhulile, wetama kusita bantfu bakubo. Loko kwenta inkhosi yaseGibhithe Faro yatfukutsela. Lenkhosi beseyifuna kumbulala Mosi. Ngaleso sizatfu, Mosi wabaleka eGibhithe.

 Mosi waya kulelinye live. Lelo live bekutsiwa kukaMidiyani. Lapho, Mosi washada futsi waba nebantfwana. Bekangumelusi, anakekela timvu. Ngalelinye lilanga anakekela timvu takhe eceleni kwentsaba, wabona intfo lemangalisako. Sihlahla besivutsa kodvwa singashi. Mosi wasondzela kuze atosibukisisa.

Uyati yini kutsi kwentekani?— Mosi weva livi limbita emkhatsini walesihlahla lebesivutsa. Lelivi latsi: “Mosi! Ye Mosi!” Ngubani lona lowasho lamagama?— BekunguNkulunkulu. Bekabekele Mosi umsebenti lomnyenti. Nkulunkulu watsi: ‘Kota ngitekutfumela kuFaro, inkhosi yaseGibhithe, kutsi uyewukhulula bantfu bami, emadvodzana aka-Israyeli, uwakhiphe eveni laseGibhithe.’ Nkulunkulu watsembisa kumsita Mosi kute ente loyo msebenti.

Kodvwa Mosi watsi kuNkulunkulu: ‘Nangifika kuma-Israyeli ngitsi kubo Nkulunkulu ungitfume kini, bese bangibuta batsi: “Ngubani libito lakhe?” Ngiyawubaphendvula ngitsini?’ Nkulunkulu watjela Mosi kutsi abobaphendvula atsi: ‘Jehova ungitfume kini. Jehova libito lami phakadze naphakadze.’ (Eksodusi 3:1-15) Loku kuveta kutsi  Nkulunkulu bekatawuchubeka alondvolota ligama lelitsi Jehova. Bekangeke alishintje. Nkulunkulu bekafuna kwatiwa ngaleligama lakhe lelitsi Jehova kuze kube phakadze.

Ngesikhatsi Mosi abuyela eGibhithe, bantfu baseGibhithe bebacabanga kutsi Jehova bekangunkulunkulu wema-Israyeli lote emandla. Bebangati kutsi unguNkulunkulu wemhlaba wonkhe. Ngaleso sizatfu, Jehova watsi enkhosini yaseGibhithe: ‘Ngitakwenta libito lami latiwe emhlabeni wonkhe.’ (Eksodusi 9:16) Jehova walenta libito lakhe latiwa. Ucabanga kutsi wakwenta njani loko?—

Nkulunkulu watfuma Mosi kutsi ahole bantfu bakhe baka-Israyeli baphume eGibhithe. Nabefika eLwandle Lolubovu, Jehova wabavulela indlela leyomile elwandle. Ema-Israyeli ahamba ngekuphepha emhlabatsini lowomile. Kodvwa ngemuva kwekutsi Faro kanye nelibutfo lakhe sebangene bonkhe elwandle, emanti elwandle lebekeme ngalana nangalana abambonya bantfu baseGibhithe, futsi bafa bonkhe.

Ngekushesha, emhlabeni wonkhe bantfu bacala kuva ngaloko Jehova lebekakwentile eLwandle Lolubovu. Sati njani kutsi bantfu bese bevile?— Ecinisweni, ngemuva kweminyaka lengu-40, ema-Israyeli efika eKhenani lokulive Jehova lebekawatsembise lona. EKhenani,  emadvodza lamabili langema-Israyeli atjelwa nguRahabi kutsi: “Sivile kutsi [Jehova] walomisa kanjani Lwandle Lolubovu embikwenu ngesikhatsi niphuma eGibhithe.”​—Joshuwa 2:10.

Bantfu labanyenti lamuhla bayafanana nebantfu baseGibhithe. Abakholelwa kutsi Jehova nguNkulunkulu wemhlaba wonkhe. Ngako Jehova ufisa kutsi bantfu bakhe batjele labanye ngaye. Loku nguloko Jesu lakwenta. Ngesikhatsi sekatawufa emhlabeni, watjela Jehova ngemthantazo watsi: ‘Ngibente balati libito lakho.’​—Johane 17:26.

 Uyafisa yini kufanana naJesu? Nangabe kunjalo, kumelwe utjele labanye ngeligama laNkulunkulu lelitsi Jehova. Ungase utfole kutsi bantfu labanyenti abalati. Ngaleso sizatfu, ungabakhombisa lombhalo eBhayibhelini kuTihlabelelo 83:18 [Catsanisa ne-NW.] Asitsatse emaBhayibheli sivule lombhalo ndzawonye. Lombhalo utsi: “Kuze bantfu bati kutsi wena, libito lakho lokunguJehova, wena wedvwa unguLosetikwako Konkhe emhlabeni wonkhe.”

Yini lesiyifundzako kulombhalo?— Sifundza kutsi Jehova ligama lelibaluleke kuwendlula onkhe. Liligama laNkulunkulu Somandla, Babe waJesu futsi longuLoyo lowadala tonkhe tintfo. Khumbula nekutsi Jesu watsi kufanele sitsandze Jehova Nkulunkulu ngenhlitiyo yetfu yonkhe. Uyamtsandza yini Jehova?—

Singabonisa njani kutsi siyamtsandza Jehova?— Lenye indlela kutsi simati njengeMngani wetfu. Lokunye lesingakwenta kutjela labanye ngeligama lakhe. Singabakhombisa eBhayibhelini kutsi ligama laNkulunkulu nguJehova. Singaphindze sibatjele ngetintfo letimangalisako Jehova latidalile kanye nangetintfo letinhle latentile. Loko kwenta Jehova ajabule kakhulu ngobe ufisa kutsi bantfu bamati. Natsi singaba nayo yini incenye ekwenteni loko?—

Akusibo bonkhe bantfu labatasilalela nasikhuluma ngaJehova. Bantfu labanyenti abalalelanga ngesikhatsi Jesu, uMfundzisi Lomuhle Kakhulu akhuluma ngaNkulunkulu. Kodvwa loko akumvimbanga Jesu kutsi akhulume ngaJehova.

Ngako asibe njengaJesu. Asichubeke sikhuluma ngaJehova. Nasenta loko, Jehova Nkulunkulu utawujabula ngatsi ngobe sikhombisa kutsi siyalitsandza ligama lakhe.