A WEA zua a or kwa u hiihii nahan, ka nyi ka ú vande pinen nana?— Ka ú vande pinen iti i nan. Se cii se mba a ati. Ka Aôndo yange ii or u hiihii u lu shin tar la iti ye. Yange yila un iti ér Adam. I gema i ii kwase u Adam iti ér Ifa.

Kpa ka ior tseegh ve lu a ati ga. Hen ase sha akaa agen kpaa a á lu a ati yô. Or ka nana yam aniwa yô nan ii un iti, shin ka nahan ga?— Een, u lun a iti ka kwagh u hange hange.

Tugh mbu a ile yô kende ashe sha, kenger sha kwavaôndo tsô ú nenge er asan a ngee kpishi yô. Ú hen wer nga a ati gaa?— Hanma ishan i sha kwavaôndo yô, Aôndo ii i̱ iti. Bibilo ôr se ér: “A ôr iyenge i asan, A ii a ati cii.”—Pasalmi 147:4.

Aluer i pine ú yô, ú kaa wer ka an nan hembe sha won ciilii?— Ka Aôndo. Ú hen wer ngu a iti kpa?— Yesu yange kaa ér ngu a iti. Shighe ugen la Yesu er msen hen Aôndo kaa ér: ‘M pase mbahenen av iti You.’ (Yohane 17:26) Ú fa iti i Aôndo kpa?— Aôndo iyol na pase se iti na. Á kaa ér: Ka ‘Mo Aôndo Uhembanagee, iti Yam ér TER (ka Yehova je la).’ Nahan iti i Aôndo ér YEHOVA.—Ekesodu 6:3.

Or ka nana umbur iti you nahan, ka i lu ú ken ishima nena?— Ka i saan we iyol, shin ka nahan ga?— Yehova kpa soo ér ior ve̱ fa iti na. Nahan doo u se yilan Yehova sha iti shighe u se lu ôron kwagh u Aôndo yô. Ortesen Uhemban la kpa yange una ôron kwagh a ior yô, a yila Aôndo sha iti ér, Yehova. Shighe ugen la Yesu kaa ér: “Aôndo wou a doo u ishima sha ishima you cii.”—Marku 12:30.

Yesu yange fa er iti i YEHOVA la í lu iti i injaa kpishi yô. Nahan á tese mbahenen nav ér ve̱ yilan Aôndo sha iti na shon. Shi yange  tese ve ér vea eren msen hen Aôndo kpa ve̱ teren iti la. Yesu fa er Aôndo a soo ér ior cii ve̱ fa iti na i Yehova la yô.

Ngise la Aôndo tese Mose er iti na í lu a inja kpishi yô. Mose kpa lu môm ken ônov mba Iserael. Ônov mba Iserael lu ken tar u Igipiti, í yilan ve ér Mbaiserael. I gema i yilan ior mba ken tar la ér Mbaigipiti. Ve gema Mbaiserael hingir ikpan, ve lu eren ve ican tsung. Mose vesen we ikyondo yô, á nôngo ér una wase orgen ken ior nav mbara. Kwagh ne na ishima vihi Farao, tor u Igipiti la tsung. Nahan a soo ér una wua Mose kera! Nahan Mose yevese due ken tar u Igipiti.

Mose yem ken tar ugenegh. Lu ken tar u Midian yem ye. Mose za lu ker, vôso kwase, maa ônov kpaa. Shi lu orkuranilev kpaa. Iyange igen yô, Mose lu kuran ilev ikyua a uwo ugenegh, tsô a nenge kwagh er u kpilighyol. Ageva gba usu lu yeghen, kpa gema  lu hian ga! Mose maa kporom ér una za nenge kwagh la doo doo.

Ú fa kwagh u yange er kpa?— Yange Mose ungwa imo lu yilan un ken ageva u usu la. Imo la yila ér, “Mose, Mose!” Lu an je nan lu yilan un nahana?— Lu Aôndo lu yilan un ye! Aôndo lu a tom u vesen ú una na Mose a̱ er yô. Aôndo kaa a na ér: ‘Va, M̱ tindi ú hen Farao, tor u Igipiti, za due a ior Av Mbaiserael ken tar u Igipiti kera.’ Aôndo tôndo zwa ér una wase Mose a̱ er kwagh ne.

Kpa Mose kaa a Aôndo ér: ‘Aluer me za hen Mbaiserael ken Igipiti me za kaa a ve mer: Aôndo tindim hen a ven, man vea pinem ér: Iti na er ana? Yô, m̱ kaa a ve mer nena? Aôndo kaa a Mose ér a̱ kaa a Mbaiserael nahan ér: Ka Yehova a tindim hen a ven ye. Ka iti yam gbem sha won je la.’ (Ekesodu 3:1-15; 6:3) Kwagh ne tese ér Aôndo una za hemen u yan iti i Yehova la gbem. Una gema í mayange ga. Aôndo soo ér i̱ fa un sha iti i Yehova la gbem sha won.

Mose hidi yemen ken Igipiti yô, Mbaigipiti hen ér Yehova ka di anaôndo u cuku u Mbaiserael ve civir tsô. Ve kera fa er un a lu  ­Aôndo u hemban sha won cii nahan ga. Nahan Yehova kaa a tor u Igipiti ér: ‘Me pase iti yam sha won cii.’ (Ekesodu 9:16) Man Yehova yange pase iti na kpaa. Ú fa gbenda u yange pase iti na kpa?

A tsua Mose ér a̱ hemen Mbaiserael a̱ due a ve ken Igipiti kera. Mba za nyer hen Zegemnger u Nyian yô, Yehova bugh gbenda hen atô u ifi la zan zan za per vegher la, gbenda la uma due shin tareghnyaagh. Mbaiserael hungwa shin tareghnyaagh per yande la. Tsô Farao man akumautya na cii kpa hungwa shin tareghnyaagh u ifi la, kpa mngerem ma má tile ijiir i môm keen man keera mara cii ma hide ma imbishi Mbaigipiti, nahan ve cii ve tim.

Ica i gba ga tsô ior sha won cii hingir u ungwan kwagh u Yehova er shin Zegemnger u Nyian la. Er nan ve se fe ser yange ior ungwa kwagh shono?— Yange anyom nga karen ka kom er 40 nahan yô, Mbaiserael va nyôr ken tar u Kanaan, tar shon u Yehova tôndo zwa ér una na ve la. Gumkwase ugen lu ken tar la, i yilan un ér Rahabi, a kaa a iorov uhar mba ken Mbaiserael ér: “Se ungwa er TER tôndo Zegemnger u Nyian sha ishigh yenegh, zum u ne due ken Igipiti la.”—Yosua 2:10.

Nyian kpa ior kpishi mba di er Mbaigipiti mbara nahan. Ve na jighjigh ér Yehova ka Aôndo u tar sha won cii ga. Nahan Yehova soo ér ior nav ve̱ ôr  mbagenev kwagh na. Ka kwagh u Yesu yange er je ne. Yange uma na u shin tar ne zurum u been yô, a er msen a kaa a Yehova ér: “M pase ve iti You.”—Yohane 17:26.

Ú soo u lun er Yesu nahan kpa? Yô, pase mbagenev wer iti i Aôndo ér Yehova. Alaghga ú kav er ior kpishi ve fe kwagh ne nahan ga yô. Ityôkyaa i í ne ve ior kpishi ve fe iti ne ga yô, ior mba yange ve gema Bibilo la yange ve dugh iti i Aôndo sha, ve gema ve nger TER sha asange abaacaa a vesen. Kpa aluer ú bugh Icighan Bibilo ken mhii u takerada u Genese la, ú ­nenge sha  peeji u a lu ken imese la yô, i pase her ér: “Ajiir a i yila Aôndo sha iti i Yehova la i gema i nger ken zwa Tiv er TER, sha asange a vesen. Ajiir a i nger AÔNDO sha asange a vesen la kpaa, ka Yehova je la.” Nahan kpa, shi ú fatyô u tesen ve ivur ruamabera i Ekesodu 6:3 la ken Bibilo you. Se bugh ase Bibilo se nenge ivur ruamabera la imôngo. I̱ kaa ér: “M ande hen Aberaham man Isaka man Yakob, Mo Aôndo Uhembanagee, kpa iti Yam i TER (ka Yehova je la) ne yô, ve fa ga.”

Ivur i̱ se ôr ne i̱ tese se nyi?— I̱ tese se ér iti i Yehova la í hemba sha won cii. Ka iti i Aôndo Uhembanagee, ka un a lu Ter u Yesu shi a gbe akaa cii ye. Shi umbur wer, Yesu yange kaa ér Yehova Aôndo a̱ doo se ishima a ishima yase cii. Yehova doo ú ishima kpa?

Se tese ser Yehova doo se ishima nena?— Kwagh u se er yô, ka u fan un doo doo, kôron ijende a Na kpaa. Gbenda ugen yô, ka u ôron mbagenev iti na. Se fatyô u tesen ve ken Bibilo jighilii ser iti na ér Yehova. Shi se fatyô u ôron ve akaa a kpilighyol a Yehova a gbe la man akaa a dedoo a á er la kpaa. Kwagh ne ka a na i saan Yehova iyol kpishi, sha ci u á soo ér ior ve̱ fa kwagh na. Se kpaa se fatyô u eren kwagh ne nahan, shin se fatyô ga?

Kpa ka hanma or nana soo u keghen ato shighe u se lu ôron kwagh u Yehova ga. Shighe u Yesu, u a lu Ortesen Uhemban la iyol na lu ôron kwagh Na je kpa, ior kpishi ve venda u keghen ato ungwan. Kpa kwagh la yange Yesu u ôron kwagh u Yehova ga.

Nahan se kpa se lu er Yesu nahan. Se za hemen u ôron kwagh u Yehova. Aluer se er nahan yô, a saan Yehova Aôndo iyol a vese, sha ci u se mba tesen ser iti na doo se ishima.