LOKO u sungula ku vona munhu, i yini lexi hakanyingi u n’wi vutisaka xona ku sungula?— Ina, u n’wi vutisa leswaku hi yena mani. Hinkwerhu hi ni mavito. Xikwembu xi thye munhu wo sungula wa laha misaveni vito. Xi n’wi thye vito ra Adamu. Nsati wa Adamu u thyiwe vito ra Evha.

Hambiswiritano, a hi vanhu ntsena va nga ni mavito. Ehleketa hi swilo swin’wana leswi na swona swi nga ni mavito. Loko munhu un’wana a ku nyika xipopana kumbe xifuwo xa le ndlwini, u xi thya vito, a hi swona ke?— Ina, ku va ni vito i swa nkoka.

Nivusiku, tinyike nkarhi wo languta ehenhla, u vona tinyeleti ta magidi-gidi. Xana u anakanya leswaku ti na wona mavito?— Ina, Xikwembu xi thye nyeleti yin’wana ni yin’wana leyi nga exibakabakeni vito. Bibele yi ri: “U hlaya tinyeleti leswaku i tingani; hinkwato ka tona u ti vitana hi mavito ya tona.”—Pisalema 147:4.

I mani loyi u anakanyaka leswaku hi yena a nga munhu wa nkoka swinene eka vuako hinkwabyo?— Ina, i Xikwembu. Xana u anakanya leswaku xi ni vito?— Yesu u vule leswaku xi na rona. Siku rin’wana Yesu u tshame a khongela eka Xikwembu a ku: ‘Vito ra wena ndzi ri tivise vadyondzisiwa va mina.’ (Yohane 17:26) Xana wa ri tiva vito ra Xikwembu?— Xikwembu xa hi byela leswaku hi xona mani. Xi ri: “Hi mina Yehovha. Rero i vito ra mina.” Kutani vito ra Xikwembu i YEHOVHA.—Esaya 42:8.

Xana u titwa njhani loko vanhu van’wana va tsundzuka vito ra wena?— Wa tsaka, a hi swona ke?— Yehovha na yena wa swi lava leswaku vanhu va tiva vito rakwe. Kutani hi fanele hi ri tirhisa vito leri nge Yehovha loko hi vulavula hi Xikwembu. Mudyondzisi Lonkulu a a tirhisa vito ra Xikwembu leri nge Yehovha, loko a vulavula ni vanhu. Siku rin’wana Yesu u te: “U fanele u rhandza Yehovha Xikwembu xa wena  hi mbilu ya wena hinkwayo.”—Marka 12:30.

Yesu a a swi tiva leswaku vito leri nge “Yehovha,” i ra nkoka swinene. Hi yona mhaka leyi a dyondziseke valandzeri vakwe leswaku va tirhisa vito ra Xikwembu. U tlhele a va dyondzisa ku tirhisa vito ra Xikwembu loko va khongela. Yesu a a swi tiva leswaku Xikwembu xi lava vanhu hinkwavo va tiva vito ra xona, ku nga Yehovha.

Khale ka khaleni, Xikwembu xi kombise ndlela leyi vito ra xona ri nga ra nkoka ha yona eka Muxe, loyi a a ri un’wana wa vana va Israyele. Vana va Israyele, lava a va vitaniwa Vaisrayele, a va tshama etikweni leri vitaniwaka Egipta. Vanhu va tiko rero a va vitaniwa Vaegipta. Va endle Vaisrayele va va mahlonga va tlhela va va khoma hi tihanyi. Loko Muxe a ha kula, u ringete ku pfuna un’wana wa vanhu va ka vona. Leswi swi hlundzukise Faro, hosi ya le Egipta. A a lava ku dlaya Muxe! Hiloko Muxe a baleka a suka aEgipta.

Muxe u ye etikweni rin’wana. A ku ri tiko ra Midiyani. Muxe u teke nsati  etikweni rero kutani a va ni vana. Nakambe a a ri murisi wa tinyimpfu. Siku rin’wana loko Muxe a ri eku riseni ka tinyimpfu ta yena ekusuhi ni ntshava, u vone nchumu wo hlamarisa. Xihlahla xa mitwa a xi pfurha ndzilo, kambe a a xi nga tshwi! Muxe u tshinerile leswaku a xi vonela ekusuhi.

Xana wa swi tiva leswi humeleleke?— Muxe u twe rito ri vitana ri huma exikarhi ka xihlahla xa mitwa lexi pfurhaka. Rito rero ri vitanile, ri ku, “Muxe! Muxe!” I mani loyi a a vula marito lawa?— A ku vulavula Xikwembu! Xikwembu a xi ri ni ntirho wo tala lowu a xi lava leswaku Muxe a wu endla. Xikwembu xi te: ‘Tana ndzi ku rhuma eka Faro, hosi ya le Egipta, kutani u humesa vanhu va mina, vana va Israyele aEgipta.’ Xikwembu xi tshembise Muxe leswaku xi ta n’wi pfuna ku endla leswi.

Kambe Muxe u byele Xikwembu, a ku: ‘A hi nge, ndzi fika eka vana va Israyele aEgipta ndzi va byela leswaku Xikwembu xi ndzi rhumile. Loko vo ndzi vutisa va ku, “I mani vito ra xona?” Ndzi ta ku yini?’ Xikwembu xi byele Muxe leswaku a byela vana va Israyele a ku: ‘Yehovha u ndzi rhume eka n’wina. Yehovha i vito ra mina ra hilaha ku nga riki na makumu.’ (Eksoda 3:1-15) Leswi swi kombisa leswaku Xikwembu a  xi ta ri hlayisa vito ra xona leri nge Yehovha. A xi nga ta ri cinca nikatsongo. Xikwembu a a xi lava ku tiviwa hi vito ra xona, ku nga Yehovha, hilaha ku nga heriki.

Loko Muxe a tlhelela aEgipta, Vaegipta a va ehleketa leswaku Yehovha i xikwembu lexi nga nyawuriki, xa Vaisrayele. A va nga swi ehleketi leswaku a a ri Xikwembu xa misava hinkwayo. Hiloko Yehovha a byela hosi ya le Egipta a ku: ‘Ndzi ta endla leswaku vito ra mina ri twarisiwa emisaveni hinkwayo.’ (Eksoda 9:16) Hakunene Yehovha u swi endlile leswaku vito ra yena ri tiveka. Xana wa swi tiva leswaku u swi endlise ku yini sweswo?—

Phela u byele Muxe leswaku a rhangela Vaisrayele va huma aEgipta. Loko va fika eLwandle ro Tshwuka, Yehovha u pfule ndlela leyi omeke eka rona. Vaisrayele va tsemakanye hi ndlela leyi omeke, va hlayisekile. Kambe loko Faro ni vuthu ra yena hinkwaro va nghene elwandle va famba emisaveni leyi omeke, mati lawa a ma ri ematlhelo ma funengete Vaegipta kutani va fa hinkwavo.

Hi ku hatlisa, vanhu emisaveni hinkwayo va sungule ku twa leswi Yehovha a swi endleke eLwandle ro Tshwuka. Hi swi tivisa ku yini leswaku va swi twile?— Phela, endzhaku ka malembe ya 40, Vaisrayele va nghene etikweni ra Kanana, ku nga tiko leri Yehovha a a tshembise ku va nyika rona. Loko va ri etikweni rero, wansati loyi a vuriwaka  Rahava, u byele vavanuna vambirhi va Vaisrayele a ku: “Hi yi twile ndlela leyi Yehovha a omiseke ha yona mati ya Lwandle ro Tshwuka emahlweni ka n’wina loko mi huma aEgipta.”—Yoxuwa 2:10.

Namuntlha vanhu vo tala va fana ni Vaegipta volavo. A va pfumeli leswaku Yehovha i Xikwembu xa misava hinkwayo. Kutani Yehovha u lava leswaku vanhu va yena va byela van’wana malunghana na yena. Leswi hi leswi Yesu a swi endleke. Loko a ri ekusuhi ni ku heta pfhumba rakwe ra laha misaveni, u khongele eka Yehovha a ku: “Ndzi va tivise vito ra wena.”—Yohane 17:26.

 Xana wa swi lava ku fana na Yesu? Kutani byela van’wana leswaku vito ra Xikwembu i Yehovha. U nga ha kuma leswaku vanhu vo tala a va swi tivi sweswo. U nga ha va komba ni tsalwa ra Pisalema 83:18 eBibeleni. A hi pfuleni Bibele ya hina sweswi kutani hi ri hlaya swin’we tsalwa rero. Ri ri: “Leswaku vanhu va ta swi tiva leswaku wena loyi vito ra wena u nga Yehovha, wena u ri wexe u La nge Henhla-henhla emisaveni hinkwayo.”

Xana hi dyondza yini loko hi ri hlaya?— Ina, hi dyondza leswaku vito leri nge Yehovha i ra nkoka swinene ku tlula mavito hinkwawo lama nga kona. I vito ra Xikwembu xa Matimba Hinkwawo, Tata wa Yesu, hi yena Loyi a endleke swilo hinkwaswo. Naswona tsundzuka, Yesu u vule leswaku hi fanele hi rhandza Yehovha Xikwembu hi timbilu ta hina hinkwato. Xana wa n’wi rhandza Yehovha?—

Hi nga swi kombisa njhani leswaku ha n’wi rhandza Yehovha?— Ndlela yin’wana i ku tikarhatela ku n’wi tiva kutani hi n’wi endla Munghana wa hina. Kasi ndlela yin’wana i ku byela van’wana leswaku vito ra yena i mani. Hi nga va komba hi ku kongoma eBibeleni leswaku vito ra yena i Yehovha. Hi nga ha tlhela hi va byela swilo swo hlamarisa leswi Yehovha a swi tumbuluxeke ni swilo leswinene leswi a swi endleke. Leswi swi n’wi tsakisa swinene Yehovha hikuva u lava leswaku vanhu va n’wi tiva. Na hina hi nga pfuneta ku endla sweswo, a hi swona ke?—

A hi vanhu hinkwavo va nga ta hi yingisela loko hi vulavula hi Yehovha. Hambi ku ri Yesu, Mudyondzisi Lonkulu, loko a vulavula hi Yena vanhu vo tala a va nga n’wi yingiseli. Kambe sweswo a swi endlanga leswaku Yesu a tshika ku vulavula hi Yehovha.

Kutani a hi tekeleleni Yesu. A hi hambeteni hi vulavula hi vito ra Yehovha. Loko hi endla tano, Yehovha Xikwembu u ta hi tsakela hikuva hi kombisa leswaku ha ri rhandza vito ra yena.