NI CINTU wuli ico kanandi ukufumba muntu para wakumana naye nyengo yakwamba?— Ukufumba zina lake. Tose tiri na mazina. Ciuta wakapereka zina kwa mwanarumi wakwamba uyo wakakhalanga pa caru capasi. Zina lake likaŵa Adamu. Mwanakazi wa Adamu wakaŵa Heva.

Ndipouli, ni ŵantu pera cara awo ŵali na mazina. Aghanaghaniraso za vintu vinyake ivyo vili na mazina. Para muntu munyake wakupa kana ka ntceŵe, ukukapa zina, asi ntena?— Ncakuzirwa comene kuŵa na zina.

Para ukulaŵiska kucanya na usiku, ungawona nyenyezi zinandi. Kasi ukughanaghana kuti zili na mazina?— Enya, Ciuta wakapereka zina ku nyenyezi yiliyose. Baibolo likutiphalira kuti: ‘Ciuta wakupenda nyenyezi, na kuzipa zose mazina.’—Salmo 147:4.

Kasi ukumumanya muntu wakuzirwa comene mu cilengiwa cose?— Ni Ciuta. Kasi ukughanaghana kuti wali na zina?— Yesu wakayowoya kuti Ciuta wali na zina. Apo Yesu wakarombanga kwa Ciuta wakati: ‘Ndalimanyikwiska zina linu ku ŵasambiri ŵane.’ (Yohane 17:26) Kasi ukulimanya zina la Ciuta?— Ciuta iyemwene wakutiphalira zina lake. Wakuti: “Ine ndine Yehova; ili ndilo zina lane.” Ciuta zina lake ni YEHOVA.—Yesaya 42:8.

Kasi ukujipulika wuli para ŵanyako ŵakukumbukira makora zina lako?— Ukukondwa, asi ntena?— Yehova wakukhumbaso kuti ŵantu ŵalimanye zina lake. Mwanteura para tikuyowoya na ŵanji za Ciuta tikwenera kuzunura zina la Ciuta. Msambizgi Waluso wakazunuranga zina la Ciuta, Yehova, penepapo wakayowoyanga na ŵantu. Zuŵa linyake Yesu wakayowoya kuti: ‘Mutemwenge Yehova Ciuta winu na mtima winu wose.’—Marko 12:30.

 Yesu wakamanya kuti “Yehova” ni zina la lakuzirwa comene. Mwanteura wakaŵasambizga ŵasambiri ŵake kugwiriskira ncito zina la Ciuta. Wakaŵasambizgaso kuti ŵalizinurenge zina ili mu malurombo ghawo. Yesu wakamanya kuti Ciuta wakukhumba kuti ŵantu wose ŵalimanye zina Lake, Yehova.

Mu nyengo ya kale, Ciuta wakarongora kuzirwa kwa zina lake kwa mwanarumi munyake zina lake Moses, mweneuyo wakaŵa Muisrayeli. Ŵaisrayeli wakakhalanga mu caru ca Egupto. Ŵantu ŵamu caru ico ŵakamanyikwanga kuti Ŵaegupto. Ŵakaŵazgora Ŵaisrayeli kuŵa ŵazga ndipo ŵakaŵasuzganga comene. Moses wakati wakura, wakayezgayezga kuti wamovwire yumoza wa ŵantu ŵake. Ici cikamukwiyiska comene Faro, themba la Egupto. Ndipo Faro wakakhumbanga kumukoma Moses! Moses wakacimbira mu Egupto.

Moses wakaruta ku caru cinyake. Cikaŵa caru ca Midiyani. Mu caru ico, Moses  wakatora mwanakazi ndipo wakamba kuŵa na ŵana. Wakagwiranga ncito ya kuliska mberere. Zuŵa linyake Moses wakaliskanga mberere kufupi na phiri ndipo wakawona cintu cakuzizwiska. Civwati cikagoleranga moto, kweni cikapyanga yayi! Moses wakasenderera kufupi kuti wawone makora.

Kasi ukumanya ico cikacitika?— Moses wakapulika mazgu kufuma mu civwati ico cikagoleranga. Mazgu ghakapulikwa mwakucemerezga kuti, “Moses! Moses!” Kasi ni njani uyo wakacemenga?— Wakaŵa Ciuta! Ciuta wakaŵa na ncito yinandi yakuti wamutume Moses. Ciuta wakati: ‘Zakuno nikutume kwa Faro, ukafumiske ŵantu ŵane, ŵana Ŵaisrayeli, mu Egupto.’ Ciuta wakamulayizga Moses kuti wamovwirenge kucita ncito iyi.

Kweni Moses wakati kwa Ciuta: ‘Wonani, pakufika ine kwa ŵana Ŵaisrayeli na kuti kwa iŵo, Ciuta wanituma kwa imwe. Wuli usange ŵamunifumba kuti, Kasi zina lake ni njani? Ndamute wuli?’ Ciuta wakamuphalira Moses kuti wakaŵaphalire ŵana Ŵaisrayeli kuti: ‘Yehova  wanituma kwa imwe. Yehova ndilo zina lane kwamuyirayira.’ (Exodus 3:1-15) Ici cikurongora kuti zina la Ciuta lakuti Yehova likhalilirenge kwamuyirayira. Wasintengepo yayi. Ciuta wakakhumba kuti wamanyikwenge kwamuyirayira na zina lake, Yehova.

Apo Moses wakarutaso ku Egupto, Ŵaegupto wakaghanaghananga kuti Yehova wakaŵa ciuta wambura nkongono wa Ŵaisrayeli. Ŵakamanya cara kuti wakaŵa Ciuta wa caru cose. Mwanteura, Yehova wakaphalira themba la ku Egupto kuti: ‘Nimanyikwiskenge zina lane mu caru cose capasi.’ (Exodus 9:16) Yehova wakamanyikwiska nadi zina lake. Kasi ukumanya umo wakacitira?—

Wakatuma Moses kuti wakarongozge ŵana Ŵaisrayeli kufumamo mu Egupto. Ŵakati ŵakafika pa Nyanja Yiswesi, Yehova wakapanga ntowa yakomira makora mu nyanja. Ŵaisrayeli ŵakenda mu ntowa yakomira iyi kwambura suzgo. Pamanyuma pake Faro na ŵasilikari ŵake wose nawo ŵakamba kwenda mu ntowa yeneyiyi. Kweni maji ghakambaso kwenda nga ni nyengo zose, Ŵaegupto ŵakabira ndipo wose ŵakafwa.

Yikati yajumpapo nyengo yicoko waka, ŵantu pa caru cose capasi ŵakapulika ivyo Yehova wakacita pa Nyanja Yiswesi. Kasi tikumanya wuli kuti ŵakapulika?— Vikati vyajumpapo virimika 40, Ŵaisrayeli ŵakaruta  ku Kanani, caru ico Yehova wakaŵalayizga. Ŵanarumi ŵaŵiri Ŵaisrayeli ŵakaphalirika na mwanakazi munyake zina lake Rahabu kuti: ‘Tiri kupulika umo Yehova wakakamuskira maji gha Nyanja Yiswesi kuti imwe mwambukepo pakufuma mu Egupto.’—Joshua 2:10.

Lero ŵantu ŵanandi ŵali nga Ŵaegupto. Ŵakugomezga cara kuti Yehova ni Ciuta wa caru cose. Ndico cifukwa cake Yehova wakukhumba kuti ŵantu ŵake ŵaphalirenge ŵanji za iye. Yesu wakacita ici. Wakati wakhala pacoko kuti wawelere  kucanya, wakamuphalira Yehova mu lurombo kuti: ‘Nalimanyikwiska zina linu kwa iwo.’—Yohane 17:26.

Kasi ukukhumba kuti uŵe nga ni Yesu? Mbwenu uphalirenge ŵanyako kuti Ciuta zina lake ni Yehova. Ungasanga kuti ŵantu ŵanandi ŵakumumanya yayi. Mutepanji ungaŵarongora lemba la Salmo 83:18 mu Baibolo. Tiye tiŵazgire lumoza lemba ili sono ntena mu Baibolo. Ilo likuti: “Ŵamanye nadi kuti Imwe pera, mwaŵeneimwe zina linu ndi Yehova, ndimwe Wapacanyapose mu vyaru vyose.”

Kasi tasambiraci pa lemba ili?— Tasambira kuti Yehova ni zina lapacanya comene. Ni zina la Ciuta Wapacanyapose, Ŵadada ŵa Yesu Awo ŵakalenga vintu vyose. Ndipo kumbukira kuti, Yesu wakayowoya kuti tikwenera kutemwa Yehova Ciuta na mtima withu wose. Kasi ukumutemwa Yehova?—

Tingarongora wuli kuti tikumutemwa Yehova?— Ntowa yimoza ndiyo kukorana naye ubwezi. Ntowa yinyake ni kuphalira ŵanji zina lake. Tingaŵarongora mu Baibolo kuti zina lake ni Yehova. Tingaŵaphaliraso vintu vyakuzizwiska ivyo Yehova walikulenga na vintu viweme ivyo wacita. Ici cikumukondweska comene Yehova cifukwa wakukhumba kuti ŵantu ŵamumanye makora. Tose tingamanyikwiska zina lake, asi ntena?—

Ni ŵantu wose cara awo ŵazamutegherezga para tikuyowoya za Yehova. Ŵantu ŵanandi ŵakategherezga cara nanga ni apo Yesu, Msambizgi Waluso, wakayowoyanga za Yehova. Kweni ici cikamulekeska cara Yesu kuyowoya za Yehova.

Nase tikwenera kuŵa nga ni Yesu. Tiyeni tirutilire kuyowoya za Yehova. Usange ticitenge nteura, Yehova wazamukondwa comene cifukwa tikulitemwa zina lake.