SE A te mea muamua e masani o fesili atu koe ki se tino māfai fatoā fetaui koulua?— Ao, e fesili atu koe me ko oi tena igoa. E isi katoa ne ‵tou igoa. Ne fakaigoa ne te Atua a te tagata muamua i te lalolagi. Tena igoa ko Atamu. Ne fakaigoa te avaga a Atamu ki a Eva.

Kae e se ko tino fua e isi ne olotou igoa. Mafaufau aka ki nisi mea kolā e isi ne olotou igoa. Kafai e tuku atu ne se tino ki a koe se pepe faite io me se manu, e fakaigoa foki ne koe, ne?— Ao, e tāua ‵ki eiloa a te igoa.

Ke onoono atu ki fetu e uke ‵ki eiloa i se po. Se a tau faka‵tau e isi ne olotou igoa?— Ao, ne fakaigoa ne te Atua a fetu takitasi i te lagi. E fai mai te Tusi Tapu: “Ko oti ne fuafua ne ia te aofaki o fetu o te lagi, kae fakaigoa ne ia a fetu takitasi.”—Salamo 147:4.

Ko oi e mafaufau koe me ko te ‵toe tino tāua eiloa i te iunivesi kātoa?— Ao, ko te Atua. Se a tau faka‵tau, e isi sena igoa?— Ne fai mai a Iesu me e isi Sena igoa. I se taimi e tasi i tena ‵talo ki te Atua, ne fai atu a Iesu: ‘Ko oti ne fakailoa ne au tou igoa ki oku soko.’ (Ioane 17:26) E iloa ne koe a te igoa o te Atua?— Ne fai mai eiloa ne te Atua tena igoa. E fai mai a ia: “Au ko Ieova. Tenā toku igoa.” Tela la, a te igoa o te Atua ko IEOVA.—Isaia 42:8, O le Tusi Paia.

E pefea ou lagonaga māfai e masaua ne nisi tino tou igoa?— E fiafia eiloa koe, ne?— E manako foki a Ieova ke iloa ne tino tena igoa. Tela la, e ‵tau o fakaaoga ne tatou te igoa o Ieova i te taimi e fai‵pati atu ei tatou e uiga ki te Atua. Ne fakaaoga ne te Faiakoga Sili a te igoa o te Atua, ko Ieova, i te taimi ne faipati ei a ia ki tino. I te taimi e tasi ne fai atu a Iesu: “E ‵tau mo koe o alofa ki a Ieova tou Atua mo tou loto kātoa.”—Maleko 12:30.

 Ne iloa ne Iesu me i a “Ieova” se igoa tāua ‵ki eiloa. Tela la, ne akoako ne ia ana soko ke fakaaoga ne latou te igoa o te Atua. Ne akoako atu foki a ia ki a latou ke fai‵pati e uiga ki te igoa o te Atua i olotou ‵talo. Ne iloa ne Iesu me e manako te Atua ke iloa ne tino katoa Tena igoa, ko Ieova.

I aso mua loa, ne fakaasi atu ne te Atua te tāua o tena igoa ki te tagata ko Mose, telā se tokotasi o tino Isalaelu. A tino kolā ne taku ki te kau Isalaelu, ne ‵nofo atu i te fenua o Aikupito. Ne taku a tino i te fenua tenā ki tino Aikupito. Ne fakapologa ne latou a te kau Isalaelu kae ne ma‵sei ‵ki olotou faifaiga ki a latou. I te taimi ne gasolo aka ei o matua a Mose, ne taumafai a ia ke fesoasoani ki se tino e tokotasi i ana tino. Ne fai ne te mea tenei ke kaitaua a te Falao, te tupu o Aikupito. Ne fia tamate a ia ki a Mose! Tela la, ne tele keatea a Mose mai i Aikupito.

Ne fanatu a Mose ki te suā fenua. Ko te fenua o Mitiana. I konā ne avaga ei a  Mose kae ne kamata o fai tena kāiga. Ne galue foki a ia e pelā me se tausi mamoe, kae ne tausi ne ia a mamoe. I te aso e tasi ne tausi atu ei a Mose ki ana mamoe i tafa o se mauga kae ne lavea ne ia se mea fakaofoofogia. Ne ‵ka se lakau, kae e se ‵paku! Ne fakapilipili atu a Mose o onoono ki ei.

E iloa ne koe me se a te mea ne tupu?— Ne lagona ne Mose se leo e kalaga mai i loto i te lakau ‵ka tenā. Ne kalaga mai te leo, “Mose! Mose!” Ko oi ne kalaga atu penā?— Ko te Atua telā e faipati atu! Ne manako te Atua ke fai ne Mose a galuega e uke. Ne fai atu a ia: ‘Ka uga atu koe ne au ki te tupu o tino Aikupito ke tuku atu oku tino ke ‵taki ne koe keatea mai tona fenua.’ Ne tauto atu te Atua me ka fesoasoani atu a ia ki a Mose i te faiga o te mea tenei.

Kae ne fai atu a Mose ki te Atua: ‘Kafai e fano au ki tino Isalaelu kae fai atu me ne uga mai au ne te Atua. Kae kafai e fesili mai, “Ko oi tena igoa?” Se a taku tali ka fai ki a latou?’ Ne fai atu te Atua ki a Mose ke fai ki tino Isalaelu: ‘Ne uga mai au ne Ieova ki a koutou. A Ieova ko toku igoa ki te se-gata-mai.’ (Esoto 3:1-15) E fakaasi mai ne te mea tenei  me ka taofi ‵mau eiloa te Atua ki te igoa ko Ieova. Ka se ‵fuli eiloa ne Ia. Ne manako te Atua ke iloa ne tatou tena igoa, ko Ieova, ki te se-gata-mai.

I te taimi ne toe foki atu ei a Mose ki Aikupito, ne mafau‵fau a te kau Aikupito me i a Ieova se tamā atua fua o te kau Isalaelu. Ne seki mafau‵fau latou me i a ia ko te Atua o te lalolagi kātoa. Tela la, ne fai atu a Ieova ki te tupu o Aikupito: ‘Ka fai ne au ke takutakua toku igoa i te lalolagi kātoa.’ (Esoto 9:16) Ne fai eiloa ne Ieova ke takutakua tena igoa. E iloa ne koe me ne fai pefea ne ia?—

Ia, ne fakaaoga ne Ia a Mose ke takitaki atu ne ia a tino Isalaelu keatea mai Aikupito. I te taimi ne oko atu ei latou ki te Tai ‵Kula, ne fai ne Ieova ke olo atu latou i te laukele malō i loto i ei. Ne māti atu a te kau Isalaelu mo te tokagamalie i te laukele malō. Kae mai tua o te uluatuga o te Falao mo tena kautau i te laukele malō, ne toe ‵foki ifo a vai kolā ne taofi aka i feitu, ki luga i te kau Aikupito, kae ne ‵mate atu latou katoa.

E seki leva kae ne kamata o lagona ne tino katoa i te lalolagi a te mea ne fai ne Ieova i te Tai ‵Kula. E iloa pefea ne tatou me ne lagona ne latou?— Ia, kāti i se 40 tausaga mai tua ifo i ei, ne oko atu te kau Isalaelu ki Kanana, telā ko te fenua ne tauto a Ieova ke tuku atu ki a latou. Ne fai atu se fafine ko Lahapa ki tāgata Isalaelu e  tokolua: “A matou ko oti ne ‵logo i te faiga ne te Aliki a te Tai ‵Kula ke ‵masa pakupaku i otou mua, i te taimi ne tiakina ei ne koutou a te fenua o Aikupito.”—Iosua 2:10.

I aso nei, e tokouke a tino e fai eiloa pelā mo te kau Aikupito. E se tali‵tonu latou me i a Ieova ko te Atua o te lalolagi kātoa. Tela la, e manako a Ieova ke fakailoa atu ne ana tino a mea e uiga ki a ia. Tenei eiloa te mea ne fai ne Iesu. I te fakaotiotiga o tena olaga i te lalolagi, ne fai atu a ia ki a Ieova i te ‵talo: “Ko oti ne fakailoa atu ne au tou igoa ki a latou.”—Ioane 17:26.

 E mata, e manako koe o fai pelā mo Iesu? E ‵tau la mo koe o fai atu ki nisi tino me i te igoa o te Atua ko Ieova. E mafai o lavea atu ne koe i ei me e se iloa ne tino e tokouke a te mea tenā. Tela la, kāti e mafai o fakaasi atu ne koe ki a latou a te tusi faitau i te Tusi Tapu ko te Esoto 3:14, fakamatalaga mai lalo, Tusi Tapu Tauloto. Ke puke mai nei ne tāua te Tusi Tapu tenā kae fai‵tau fakatasi ki te tusi siki tenā. E fai mai i ei: “‘Ko au’ e fakaleo pelā mo te igoa Epelu Iāuē, ne ‵fuligina sāle taumua ko Ieova.”

Se a te mea e tauloto ne tatou mai i te faitauga ki te mea tenei?— Ao, e tauloto ne tatou me i a Ieova ko te ‵toe igoa tāua eiloa. Ko te igoa o te Atua Malosi Katoatoa, te Tamana o Iesu mo te Tino telā ne faite ne ia a mea katoa. Kae masaua, ne fai mai a Iesu me e ‵tau mo tatou o a‵lofa ki a Ieova te Atua mo ‵tou loto kātoa. E mata, e alofa koe ki a Ieova?—

E mafai pefea o fakaasi atu me e a‵lofa tatou ki a Ieova?— A te auala e tasi ko te taumafai ke iloa ‵lei ne koe a ia e pelā me se Taugasoa. A te suā auala ko te fakaasi atu ki nisi tino tena igoa. E mafai o fakaasi atu ne tatou ki a latou mai i te Tusi Tapu me i tena igoa ko Ieova. E mafai foki o fai atu ne tatou a mea ‵gali ko oti ne faite ne Ieova mo mea ‵lei ne fai ne ia. E fai ne te mea tenei ke fiafia malosi a Ieova me e manako a ia ke iloa ne tino a ia. E mafai o fai ‵tou tusaga i ei, ne?—

E se ko tino katoa ka fia faka‵logo mai māfai e fai‵pati atu tatou e uiga ki a Ieova. Ne seki faka‵logo a tino e tokouke i te taimi ne faipati atu ei a Iesu, te Faiakoga Sili, e uiga ki a Ia. Kae ne seki taofi aka ne te mea tenā a Iesu mai i te faipati atu e uiga ki a Ieova.

Tela la, ke fai tatou pelā mo Iesu. Ke na tumau eiloa i te fai‵pati atu o tatou e uiga ki a Ieova. Kafai e fai tatou penā, ka fiafia eiloa a Ieova te Atua ki a tatou me e a‵lofa eiloa tatou ki tena igoa.