ANO an agsob nga siyahan nga iginpapakiana mo kon siyahan nga iginpapakilala ka ha usa ka tawo?— Oo, nagpapakiana ka kon ano an iya ngaran. Kita ngatanan may-ada mga ngaran. An Dios naghatag ha siyahan nga lalaki dinhi ha tuna hin usa nga ngaran. Iya ginngaranan hiya hin Adan. An asawa ni Adan ginngaranan hin Eva.

Kondi, diri la mga tawo an may-ada mga ngaran. Paghunahuna hin iba nga mga butang nga may-ada liwat mga ngaran. Kon may-ada naghatag ha imo hin usa nga monyika o usa nga hayop, tinatagan mo ito hin ngaran, diri ba?— Oo, importante gud an pagkaada hin ngaran.

Kitaa an damu hinduro nga mga bitoon ha langit. May-ada ba hira mga ngaran?— Oo, an Dios naghatag hin ngaran ha kada usa nga bitoon ha langit. An Biblia nagsusumat ha aton: “Gin-iihap niya an kadamuan han mga bitoon; tinatawag niya [hira ngatanan] ha ira mga ngaran.”​—Salmo 147:4.

Hin-o an masisiring mo nga pinakaimportante nga persona ha bug-os nga uniberso?— Oo, an Dios. Naghuhunahuna ka ba nga may-ada hiya ngaran?— Hi Jesus nagsiring nga an Dios may-ada ngaran. Hi Jesus makausa nga nagsiring ha pag-ampo ngadto ha Dios: ‘Akon iginpakilala an imo ngaran ha akon mga sumurunod.’ (Juan 17:26) Maaram ka ba han ngaran han Dios?— An Dios mismo nagsusumat ha aton kon ano ito. Hiya nasiring: “Ako hi Jehova, amo ito an akon ngaran.” Salit JEHOVA an ngaran han Dios.​—Isaias 42:8.

Ano an inaabat mo kon an iba nahinunumdom han imo ngaran?— Malipayon ka, diri ba?— Karuyag ni Jehova nga makilala liwat han mga tawo an iya ngaran. Salit sadang gamiton naton an ngaran nga Jehova kon nag-iistorya kita mahitungod han Dios. Ginamit han Bantogan nga Magturutdo an ngaran han Dios, nga Jehova, han nakiistorya hiya ha mga tawo.  Ha usa nga okasyon hi Jesus nagsiring: ‘Higugmaon mo hi Jehova nga imo Dios ha bug-os mo nga kasingkasing.’​—Markos 12:30.

Maaram hi Jesus nga importante hinduro an ngaran nga “Jehova.” Salit iya gintutdoan an iya mga sumurunod nga gamiton an ngaran han Dios. Iya gintutdoan pa ngani hira ha pagyakan mahitungod han ngaran han Dios ha ira mga pag-ampo. Maaram hi Jesus nga karuyag han Dios nga an ngatanan nga mga tawo mahibaro han Iya ngaran, nga Jehova.

Maiha na nga naglabay ipinakita han Dios an pagkaimportante han iya ngaran ha tawo nga hi Moises, nga usa han mga anak ni Israel. An mga anak ni Israel, nga gintawag nga mga Israelita, nag-ukoy ha tuna nga tinawag nga Ehipto. An katawohan hiton nga tuna kilala sugad nga mga Ehiptohanon. Ira gin-uripon an mga Israelita ngan mabangis hira hinduro ha ira. Han nagdaku hi Moises, nangalimbasog hiya nga buligan an usa han iya katawohan. Nasina hini hi Paraon, an  hadi han Ehipto. Karuyag niya patayon hi Moises! Salit pinalagiw hi Moises tikang ha Ehipto.

Hi Moises nagpakadto ha iba nga tuna. Ha tuna han Midian. Didto nag-asawa hi Moises ngan nagpamilya. Nagtrabaho liwat hiya sugad nga magbarantay han mga karnero. Usa ka adlaw, okupado hi Moises ha pag-ataman han iya mga karnero hirani ha bukid han hinkit-an niya an urusahon nga butang. Usa nga kahoy-kahoy an naglalaga, kondi diri ito nasusunog! Dinuok hi Moises basi makita ito hin mas klaro.

Maaram ka ba kon ano an nahitabo?— Nakabati hi Moises hin tingog nga nagtatawag tikang ha butnga hito nga naglalaga nga kahoy-kahoy. An tingog nagtawag, “Moises, Moises!” Hin-o an nagyayakan?— An Dios an nagyayakan! Damu an iginpapabuhat han Dios kan Moises. An Dios nagsiring: ‘Kadi ngan akon ka susugoon ngadto kan Paraon, an hadi han Ehipto, ngan imo pagdad-on an akon katawohan, nga mga anak ni Israel, tikang ha Ehipto.’ An Dios nagsaad nga bubuligan hi Moises ha pagbuhat hini.

Kondi hi Moises nagsiring ha Dios: ‘Pananglitan kumadto ako ha mga anak ni Israel ha Ehipto ngan sumiring nga an Dios nagsugo ha akon. Ano  man kon hira magpakiana ha akon, “Ano an iya ngaran?” Ano an akon isisiring?’ An Dios nagsiring kan Moises nga sumatan an mga anak ni Israel: ‘Hi Jehova an nagpakanhi ha akon. Jehova an akon ngaran ha kadayonan.’ (Eksodo 3:1-15) Ipinapakita hini nga titipigan han Dios an ngaran nga Jehova. Diri gud niya sasaliwnan ito. Karuyag han Dios nga makilala hiya pinaagi han iya ngaran nga Jehova, ha kadayonan.

Han binalik hi Moises ngadto ha Ehipto, naghunahuna an mga Ehiptohanon nga hi Jehova usa la ka maluya nga dios han mga Israelita. Waray hira maghunahuna nga hiya an Dios han bug-os nga tuna. Salit hi Jehova nagsiring ha hadi han Ehipto: ‘Akon ipapakilala an akon ngaran ha bug-os nga tuna.’ (Eksodo 9:16) Oo, ipinakilala ni Jehova an iya ngaran. Maaram ka ba kon paonan-o niya ginbuhat ito?—

Iya ginsugo hi Moises nga manguna ha mga Israelita ha paggawas ha Ehipto. Han inabot hira ha Dagat nga Pula, hi Jehova naghimo hin mamara nga dalan ha butnga hito. An mga Israelita talwas nga naglakat ha mamara nga tuna. Kondi pag-abot ni Paraon ngan han ngatanan nga iya kasundalohan ngada ha mamara nga tuna han dagat, an katubigan nga ginpugngan ha paluyoluyo binalik ngan nagtabon ha mga Ehiptohanon, ngan nagkamatay hira ngatanan.

Waray pag-iha an katawohan ha bug-os nga tuna nagtikang makabati han ginbuhat ni Jehova ha Dagat nga  Pula. Kay ano nga maaram kita nga hinbatian nira an mahitungod hito?— Aw, paglabay hin mga 40 ka tuig, an mga Israelita inabot ha Kanaan, an tuna nga iginsaad ni Jehova nga ihahatag ha ira. Didto duha nga Israelita nga lalaki an ginsumatan han batan-on nga babaye nga hi Rahab: “Nakabati kami kon gin-onan-o ni Jehova an pagpamara ha iyo atubangan han Dagat nga Pula han iyo paggowa tikang ha Ehipto.”​—Josue 2:10.

Yana nga panahon damu nga mga tawo an pariho gud hiton nga mga Ehiptohanon. Diri hira natoo nga hi Jehova an Dios ha bug-os nga tuna. Salit karuyag ni Jehova nga isumat han  iya katawohan ha iba an mahitungod ha iya. Ini an ginbuhat ni Jesus. Ha ikatarapos han iya kinabuhi ha tuna, iya ginsumatan hi Jehova ha pag-ampo: “Akon iginpakilala ha ira an imo ngaran.”​—Juan 17:26.

Karuyag mo ba magin pariho kan Jesus? Niyan, isumat ha iba nga Jehova an ngaran han Dios. Makikita mo nga damu nga mga tawo an diri maaram hito. Salit maipapakita mo ha ira an teksto ha Biblia ha Salmo 83:18. Kuhaon naton an Biblia yana mismo ngan kitaon naton iton nga teksto. Ito nasiring: “Basi nga hira kumilala nga hi ikaw la, nga an ngaran hi Jehova, amo an Gihitaasi ha bawbaw han tuna.”

Ano an nahibaroan naton tikang ha pagbasa hini?— Oo, nahibaroan naton nga Jehova an pinakaimportante nga ngaran. Ito an ngaran han Makagarahum-ha-ngatanan nga Dios, an Amay ni Jesus ngan an Usa nga naghimo han ngatanan nga mga butang. Ngan hinumdumi, hi Jesus nagsiring nga sadang higugmaon naton hi Jehova nga Dios ha bug-os naton nga kasingkasing. Nahigugma ka ba kan Jehova?—

Paonan-o naton maipapakita nga nahigugma kita kan Jehova?— An usa nga paagi amo an pagkilala ha iya sugad nga Sangkay. An usa pa nga paagi amo an pagsumat ha iba kon ano an iya ngaran. Maipapakita naton ha ira tikang ha Biblia mismo nga Jehova an iya ngaran. Maisusumat liwat naton an mahitungod han urusahon nga mga butang nga ginhimo ni Jehova ngan an mag-opay nga mga butang nga iya ginbubuhat. Nakakapalipay gud ini kan Jehova tungod kay karuyag niya nga an mga tawo mahibaro mahitungod ha iya. Mahimo kita makigbahin ha pagbuhat hito.—

Diri ngatanan maruruyag ha pamati kon nag-iistorya kita mahitungod kan Jehova. Damu nga mga tawo an waray mamati bisan han hi Jesus, an Bantogan nga Magturutdo, nag-istorya mahitungod ha Iya. Kondi waray ito makapaundang kan Jesus ha pag-istorya mahitungod kan Jehova.

Salit magin pariho kita kan Jesus. Magpadayon kita ha pag-istorya mahitungod kan Jehova. Kon buhaton naton ito, malilipay ha aton hi Jehova nga Dios tungod kay ipinapakita naton an gugma ha iya ngaran.