SAPIT 5
“Sa mon Garson”
LER zanfan i fer en bon keksoz, zot paran i kontan. Kan en pti fiy i fer en keksoz ki byen, son papa i fyer pour dir lezot: “Sa mon fiy.” Oubyen si i en pti garson i fer en bon keksoz, son papa pou kontan e dir: “Sa mon garson.”
Zezi i toultan fer son Papa kontan. Alor son Papa i fyer ler i get li. Ou rapel ki Papa Zezi ti fer en zour ler Zezi ti avek son trwa zanmi?— Bondye ti koze dan lesyel e dir zot: “Sa i mon Garson byenneme dan ki mon met tou mon lazwa.”
Zezi i toultan kontan fer plezir son Papa. Ou konnen akoz? Akoz i vreman kontan son Papa. Si en dimoun i fer keksoz zis akoz i bezwen fer li, i pou difisil pour li fer sa keksoz. Me si i fer sa keksoz avek tou son leker, i pou pli fasil. Ou konnen ki savedir fer en keksoz avek tou ou leker?— Savedir ou fer sa keksoz akoz ou vreman anvi fer li.
Menm avan Zezi ti vin lo later, i ti fer tou sa ki son Papa ti demann li avek tou son leker. Sa akoz i kontan son Papa, Zeova. Zezi ti kontan laba dan lesyel avek son Papa. Me Bondye ti annan en travay spesyal pour donn Zezi. Pour kapab fer sa travay, Zezi ti bezwen kit lesyel. I ti bezwen ne konman en pti baba lo later. Zezi ti anvi fer sa akoz Zeova ki ti’n demann li pour fer sa.
Ki lanz Gabriyel ti dir Mari?
Pour Zezi ne konman en pti baba lo later, i ti bezwen annan en manman. Ou konnen lekel ki ti son manman?— Son manman ti apel Mari. Zeova ti anvoy lanz Gabriyel lo later pour koz avek Mari. Lanz Gabriyel ti dir li i pou ganny en pti baba e i pou en garson. Sa pti baba pou apel Zezi. E Lekel ki ti pou vin papa sa pti baba?— Lanz ti dir Zeova ki pou vin Papa sa pti baba. Sanmenm sa Zezi i apel Garson Bondye.
Ki mannyer ou krwar Mari ti santi?— Eski i ti dir, “Mon pa anvi vin manman Zezi”? Non, Mari ti pare pour fer sa ki Bondye ti oule li fer. Be ki mannyer Garson Bondye dan lesyel ti pou ne konman en pti baba lo later? Akoz nesans Zezi pa ti parey nesans tou lezot pti baba? Ou konnen akoz?—
Bon, ler Bondye ti fer nou premye paran, Adan ek Ev, i ti fer zot kapab zwenn ansanm dan en fason tre spesyal. Apre sa, en pti baba ti pou devlope dan vant sa madanm. Dimoun i dir sa en mirak! Vre i en mirak!
Me pour Zezi, Bondye ti fer en pli zoli mirak ankor. I ti pran lavi son Garson dan lesyel e met li dan vant Mari. Bondye pa ti’n zanmen deza fer sa avan, e i pa’n fer li ankor apre sa. Akoz sa mirak, Zezi ti konmans devlope dan vant Mari zis parey lezot pti baba i devlope dan vant zot manman. Apre sa, Mari ti marye avek Zozef.
Ler ti’n ariv ler pour Zezi ne, Mari ek Zozef ti pe vizit lavil Betleenm. Me dan sa lavil ti annan bokou dimoun. Mari ek Zozef pa ti kapab trouv en landrwa pour reste. Alors zot ti bezwen reste dan en park kot dimoun i met zannimo. Lanmenm ki Zezi ti ne, e zot ti met li dan en manzwar, parey ou vwar la. Manzwar i sa ki bef ek lezot zannimo i manz ladan.
Akoz Zezi ti ganny mete dan en manzwar?
Sa zour swar ki Zezi ti ne, bann keksoz enteresan ti arive. En lanz ti aparet avek bann berze pros avek Betleenm. I ti dir zot ki Zezi i en dimoun enportan. Sa lanz ti dir: ‘Mon annan en bonn nouvel pour zot, ki pou donn tou dimoun lazwa. Ozordi i annan en dimoun ki’n ne e ki pou sov dimoun.’
Ki bon nouvel enn sa bann lanz ti anons bann berze?
Sa lanz ti dir sa bann berze ki Zezi i Betleenm, pe dormi dan en manzwar. Apre, en sel kou, lezot lanz dan lesyel ti zwenn ansanm avek sa lanz e konmans sante pour glorifye oubyen felisit Bondye. Zot ti sante, “Glwar-a-Dye dan lesyel, e lo later lape parmi son bann byenneme.”
Ler bann lanz ti ale, sa bann berze ti al Betleenm e zot ti trouv Zezi. Zot ti dir Zozef ek Mari tou sa bann bon keksoz ki zot ti’n tande. Mari ti bezwen vreman kontan ki i ti’n aksepte pour vin manman Zezi!
Plitar, Zozef ek Mari ti anmenn Zezi dan lavil Nazaret. Zezi ti grandi laba. Ler i ti gran, i ti konmans son gran travay lansennyman. Sa ti form parti sa travay ki Zeova ti anvi son Garson fer lo later. Zezi ti anvi fer sa travay akoz i ti kontan son Papa dan lesyel en kantite.
Avan Zezi ti konmans son travay konman en Gran Ansennyan, Zan Batis ti batiz li dan Larivyer Zourden. Apre en keksoz enkrwayab ti arive! Ler Zezi ti pe sorti dan delo, Zeova ti koze dan lesyel e dir: “Sa mon Garson byenneme, ki donn mwan bokou lazwa.” (Matye 3:17) Pa ou kontan ler ou paran i dir ou ki zot kontan ou?— Be Zezi osi ti kontan.
Zezi ti toultan fer sa ki byen. I pa ti fer konmsi i en lot kalite dimoun. I pa ti dir dimoun li menm li Bondye. Lanz Gabriyel ti dir Mari ki Zezi ti pou ganny apele Garson Bondye. Zezi li menm ti dir i Garson Bondye. I pa ti dir dimoun i konn plis ki son Papa. I ti dir: ‘Mon Papa i pli gran ki mwan.’
Ler Zezi ti ankor dan lesyel, i ti fer tou sa ki son Papa ti demann li pour fer. I pa ti dir i pou fer me apre al fer en lot keksoz. I ti kontan son Papa. Alor i ti ekout sa ki son Papa ti dir li. Apre ler Zezi ti vin lo later, i ti fer sa ki son Papa dan lesyel ti’n anvoy li fer. I pa ti pas son letan fer lezot keksoz. Sanmenm Zeova ti kontan son Garson!
Nou osi nou anvi fer plezir Zeova, pa i vre?— Alors nou bezwen montre ki nou vreman ekout Bondye, zis parey Zezi ti fer. Bondye i koz avek nou atraver Labib. Ou krwar i byen pour fer krwar nou pe ekout Bondye me apre krwar e fer bann keksoz ki Labib i defann?— Apre, pa bliye si nou vreman kontan Bondye, nou pou anvi fer li plezir.
Aprezan lir sa bann verse Labib ki montre ki nou bezwen konnen e krwar lo Zezi: Matye 7:21-23; Zan 4:25, 26; ek 1 Timote 2:5, 6.
Ou pou kapab kontan sa osi
MON LIV ZISTWAR LABIB
En Lanz Ti Vizit Mari
I anmenn en mesaz sorti kot Bondye: Mari pour ganny en pti baba ki pour vin lerwa pour touzour.
